Прекината исплатата за штетите од земјотресите во Охрид


Охрид, 9 јануари, 2019 - 14:13 (META) 

Формирана е посебна комисија која ја чешла документацијата за исплатите од земјотресите во Охрид а покрената е и дисциплинска постапка против службеник во општината. Оваа информација од локаната самоуправа следи откако од ВМРО-ДПМНЕ обвинија за спорни плаќања на суми поголеми од настанатата штета.

Исплатата на штетите од земјотресите што се случија летото во 2017 година во Охрид е запрена откако на 6 декември лани започнал увид во документацијата за евентуални спорни плаќања. Ова објаснување доаѓа од локалната самоуправа по обвинувањата од ВМРО ДПМНЕ дека поседуваат информации, според кои Општина Охрид преку исплаќањето на штети за земјотресите Комисијата од општината доделила поголема сума на пари од штетата што се случила, за еден ист објект, на повеќе лица од едно семејство кои живеат на истата адреса во истиот објект.

Според ВМРО-ДПМНЕ, се работи за близок човек до СДСМ и до актуелното раководство во општината.

„За истиот овој случај, нашите информации велат дека се води и дисциплинска постапка во тајност поради уцени, за Претседателот и членовите на Комисијата за утврдување на штетите. СДСМ веднаш треба да одговорат за колкава сума на пари се работи, на кои луѓе се поделени парите и да приложи слики од штетата на објектот? Дали и за кои членови се води дисциплинска постапка и во какви корелации се со актуелното раководство на СДСМ во Охрид и во општината?“, праша на прес конференција Димче Арсовски, портпарол на ВМРО-ДПМНЕ.

Од ВМРО ДПМНЕ побараа надлежните институции да спроведат соодветна истрага и веднаш да се сноси одговорност. Од локалната обвинувањата ги отфрлија како неаргументирани. Но потврдуваат дека се води дисциплинска постапка.

„На 14.12.2018 година формирана е комисија со решение бр. 09-17994/1 со задача по увидот врз документацијата да направи записник за плаќањата, а на 31.12.2018 година е покрената дисциплинска постапка против државниот службеник кој е претседател на комисијата. Дисциплинската постапка ја води посебна комисија од седум члена која е формирана на 04.01.2019 година.“, велат од општината.

Од таму потсетуваат дека Комисијата за процена и утврдување на висината на штета настаната од природни непогоди, епидемии, епизоотии, епифитотии и други несреќи е формирана на 18 јули 2014 година со одлука на Советот на општина Охрид, односно од претходната локална власт на ВМРО-ДПМНЕ.


Перински: Oд 840 предложени амандмани, беа разгледани само 62 и ниту еден прифатен


Скопје, 31 јули, 2017 - 16:26 (META) 

СДС со ребалансот покажа дека е антиреформска и неодговорна власт, изјави на прес-конференција членот на ИК на ВМРО-ДПМНЕ, Златко Перински.

Тој додаде дека за тоа најдобро говори фактот дека од 840 предложени амандмани во различни пратенички групи, беа разгледани само 62 амандмани и ниту еден не беше прифатен.

– Владата на СДС својата негрижа и неодговорност ја покажаа со отфрлањето на амандманите како финансиски средства од два милиони евра што би можеле да бидат на располагање на граѓаните што претрпеа штети од земјотресите во Ресен, Охрид и во Струга; финансиски средства за штетите кои настанаа во туризмот како последица од земјотресите во Охрид и во регионот; амандмани за финансиски средства за решавање на проблемот со дивата депонијата во општина Струга – изјави Перински.

Тој нагласи дека Владата не ги прифатила и амандманите за финансиски средства за жртвите на транзицијата, за финансиска поддршка на новооснованите компании, како и дополнителни средства за проектот „Купи куќа за млади“.


Милошоски: Има повеќе од 850 пријавени штети во општините погодени од земјотресите


Скопје, 24 јули, 2017 - 14:09 (META) 

Би сакал, во име на пратеничката група на ВМРО-ДПМНЕ и на Коалицијата за подобра Македонија, да искажам едно разочарување, не толку од пратениците од ДУИ или од Алијансата на Албанците, колку од пратениците од Охрид, Томислав Тунтев и Жаклина Лазаревска, што не прифатија еден интервентен амандман од 2 милиони евра, кој би можел да биде на располагање на граѓаните што претрпеа штети во Ресен, Охрид и во Струга од серијата земјотреси кои се случуваа во изминатиот месец, изјави пратеникот на ВМРО-ДПМНЕ, Антонио Милошоски, откако Комисијата за финансирање и за буџет во саботата не ги прифати амандманите со кои се бара обесштетување на грѓаните.

Тој додаде дека оваа мала, но важна сума може да им биде од помош на граѓаните.

– Досега имаме информација во трите општини има повеќе од 850 пријавени штети на лични, приватни објекти, а истовремено се смета дека ќе биде потребно да се провери статистиката на одредени јавни објекти, како што се училишта, градинки, цркви, џамии, особено во постариот дел на Охрид, кои би можеле да имаат претрпено некои оштетувања, но не мора веднаш да се видливи – додаде Милошоски.


ЦУК тврди дека нема место за паника за земјотресите во Охридско


Охрид, 5 јули, 2017 - 17:11 (META) 

Директорот на Центарот за управување со кризи, Агрон Буџаку, по состанокот со одговорните лица кои го известувале за состојбата со земјотресите во Охридскиот Регион кои се случуваат во континуитет неколку дена, ги уверува граѓаните дека нема место за паника и апелира да се почитуваат препораките.

– Присутните на состанокот уверуваат дека ние како институции на системот за справување со кризи, сме подготвени за што било што би се случило во иднина – истакна Буџаку.

Виталните објекти во Охрид се во функционална состојба и немаат никакви оштетувања, вели директорот на ИЗИИС, Михаил Гаревски.

– Забранивме моментална употреба на една градинка до Архивот на Охрид, не од аспект на тоа дека конструкцијата не чини, туку бидејќи се два објекта споени со фуга и постои мал ризик да не падне некој дел од малтер и да повреди некое дете. Забранивме употреба на два станбени објекти изградени пред 30-тите години од минатиот век, кои не се сеизмички и постои можност да се прошират пукнатините во објектите – вели Гаревски.

Според него, по земјотресот со магнитуда 5 се очекува афтершоковите да бидат со јачина од 3 или 4 степени според Рихтер кои, како што рече, се нормална појава по таква јачина на земјотрес.


Воениот камп во Охрид ги отвори вратите за вознемирените граѓани, тлото уште се тресе


Охрид, 5 јули, 2017 - 12:50 (META) 

Министерството за одбрана ги понуди капацитетите на воениот камп „Васко Карангелески“ кај Свети Наум, за сместување на граѓаните вознемирени од серијата земјотреси што го зафатија подрачјето на Охридско Езеро во последните две недели. Во повикот се вели дека за граѓаните кои имаат штета од досегашните потреси и чувствуваат потреба да се засолнат во воениот камп, може да се јават на мобилниот телефон 070 403 392 и да го побараат Ристе Спасовски, раководител на секторот за услуги, туризам, одржување и возен парк во Министерството за одбрана.

Во меѓувреме, тлото не престанува да се тресе. Земјотрес со јачина од 3,8 степени според Рихтер е почувствуван утрово во Охрид и во околината. Епицентарот бил помеѓу селата Косел и Јанкоец.

Силен земјотрес го потресе Охрид и пред полноќ, чија магнитуда беше 4,1 степен според Рихтеровата скала. По него следуваа два помали потреси со магнитуда од 2 степени и еден во 3 часот со магнитуда 3 степени.

Вознемиреноста кај граѓаните е голема. Изминатата ноќ многумина решија да ја поминат на отворено, а се бројат и штетите на објектите кои засега се од помал обем и најчесто се работи за паѓање на оџаци, доградби, оштетени балкони и ѕидови.

До Центарот за управување со кризи досега биле пријавени штети на околу 200 објекти.

Од 18 јуни во Охридскиот Регион регистрираани се повеќе од 1.000 земјотреси.


Серија земјотреси синоќа го потресоа Охридско


Охрид, 4 јули, 2017 - 9:52 (META) 

Десетина земјотреси во текот на ноќта и утринава го погодија охридското тло, каде неколку потреси со интензитет од 2,7 до 3,4 степени според Рихтеровата скала се регистрирани по полноќ во регионот.

Последниот земјотрес беше пред еден час, со јачина од 3,7 степени, со епицентар пет километри од Косел и на длабочина од два километри.

Општинските власти, претставници на Институтот за земјотресно инжинерство од Скопје (ИЗИС) и на Сеизмолошката опсерваторија при Природно математичкиот факултет во Скопје синоќа одржаа координативен состанок. Целта на состанокот е договарање мерки за смирување на вознемиреноста на охриѓани.

Од 18 јуни до денеска во охридското подрачје се регистрирани повеќе од 1.000 потреси, од кои најсилниот беше вчера, со магнитуда од 5 степени по Рихтеровата скала.

Како причина за земјотресите во Охридскиот Регион се посочени тектонските движења на земјените плочи долги околу 20 километри во раседот помеѓу Охрид и Ресен.

Земјотресите ги вознемирија жителите и туристите и предизикаа оштетувања на постарите објекти.


Серија земјотреси го погодија Охридско


Скопје, 29 јуни, 2017 - 10:15 (META) 

Серија земјотреси синоќа се регистрирани во Охридскиот Регион. Првиот земјотрес, со интензитет од 3 степени според Рихтеровата скала, според информациите од Европскиот медитерански сеизмолошки центар, е регистриран во 2:37 часот. Епицентарот бил на 8 километри источно од Охрид, на длабочина од 5 километри.

Речиси два часа подоцна, односно во 4:28 часот е регистриран втор потрес со магнитуда од 2,1 степен според Рихтер, со епицентар 5 километри источно од Охрид, на длабочина од 2 километри.

Тринаесет минути подоцна, во 4:41 часот е регистриран трет, малку посилен потрес со јачина од 3 степени според Рихтер, со епицентар 8 километри источно од Охрид, на длабочина од три километри.

Последниот во серијата земјотреси се случил во 8:34 часот и бил со магнитуда од 2,7 степени, исто така со епицентар во близина на Охрид.

Не се регистрирани материјални штети од земјотресите, а експертите соопштуваат дека не треба да се очекуваат земјотреси со поголема магнитуда, бидејќи со секој изминат земјотрес се губи потенцијалот за поголем потрес.


Балканот викендов интензивно се тресеше


Скопје, 10 април, 2017 - 10:26 (META) 

Земјотресите од саботата и од неделата што се почувствуваа во Македонија, синоќа и утрово беа дополнети со уште по еден потрес.

Земјотрес со магнитуда од 2,7 степени според Рихтеровата скала е регистриран во Скопје синоќа во 21.10 часот. Сеизмолошката опсерваторија при Природно-математичкиот факултет во Скопје, соопшти дека епицентрите на земјотресите биле во скопското епицентрално подрачје, а се почувствувани во Скопје и во околината со интензитет од 4 степени според Европската макросеизмичка скала.

Сè почна со силниот земјотрес што се почувствува во Западна Македонија во саботата попладне, чиј епицентар бил на околу 50 километри северно од Тирана, а нему му претходеле низа земјотреси во Егејското Море, во Грција и во Турција. Потоа во овие две земји, како и во Албанија, се случиле уште неколку потреси, но со помал интензитет, се дознава од веб-страницата на Европско-медитеранскиот сеизмолошки центар.

Земјотресите вчера се случувале главно во Турција и во Егејското Море, но силно почувствуван во Јужна Македонија во 7.40 часот беше земјотресот на границата со Грција.

Во текот на вчерашниот ден, од попладнето, до денеска претпладне, повторно имаше земјотреси, триесетина на број, во Турција, Грција и во Албанија, но со помал интензитет.


Два земјотреса ја погодија Индонезија


Џакарта, 16 февруари, 2017 - 10:35 (META) 

Девет лица се повредени во двата земјотреса што денеска ја погодија индонезиската провинција Аче.

Како што јавуваат локалните медиуми од земјотресите се оштетени се две куќи во дистриктот Пиди Џаја, во чија близина бил и епицентарот на потресите.

Американскиот геолошки завод соопшти дека земјотресите со јачина од 5,1 и 5,6 сптемени според Рихотеровата скала се случиле околу 3.00 часот наутро по локално време.


Два послаби земјотреси регистрирани попладнево во Скопје


Скопје, 26 јануари, 2017 - 20:15 (META) 

Земјотрес со магнитуда од 2,1 степен според Рихтеровата скала, со епицентар во скопското епицентрално подрачје, е регистриран вечерва во 18.04 часот.

Сеизмолошката опсерваторија при Природно-математичкиот факултет соопшти дека земјотресот е почуствуван во Скопје и во околината со интензитет од 3 степени според Европската макросеизмичка скала.

Земјотрес со локална магнитуда од 1,9 степени според Рихтеровата скала бил регистриран и попладнево во 16.28 часот, исто така во скопското епицентрално подрачје.

Земјотресите се регистрирани од телеметриската сеизмолошка мрежа на Република Македонија со станици во Скопје, Штип, Валандово, Битола, Охрид и во Крушево.