!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

ВМРО-ДПМНЕ: Николовски нема легитимитет да зборува за фер доделување земјиште


Скопје, 14 септември, 2017 - 19:19 (META) 

Владата на ВМРО-ДПМНЕ во 2014 година поднесе измени на законот за доделување земјоделско земјиште, по пат на електронско јавно надавање, за фер и транспарентно доделување на земјоделското земјиште во државна сопственост за комерцијални намени, се вели во реакцијата на ВМРО-ДПМНЕ на прес-конференцијата на министерот за земјоделство, шумарство и водостопанство, Љупчо Николовски.

Во соопштението се додава дека СДСМ преку иницијативата за ревизија на договорите за доделување државно земјоделско земјиште, се пресметува со земјоделците кои не се под негова контрола.

„Николовски нема никаков легитимитет и кредибилитет да зборува за фер и за правично доделување земјоделско земјиште и за воведување нови постапки, бидејќи пред извесен период се објави оглас за земјоделско земјиште, потпишан од истиот министер, а според критериуми утврдени со закон што го донесе претходната влада. Доколку имало какви било проблеми со процедурите и со постапките, истиот со владата од СДС ќе иницираше промени во законот, за подобрување на постапките и на процедурите“, се додава во соопштението на ВМРО-ДПМНЕ.


МЗШВ изврши авионско снимање на целата територија


Скопје, 22 август, 2017 - 14:01 (META) 

Mинистерството за земјоделство, шумарство и водостопанство од јуни до средината на август изврши авионско снимање на целата територија на Македонија, по втор пат после 2009 година, информираат оттаму.

Согласно европските регулативи и препораки, авионските снимки се основа за функционирање на Системот за идентификација на земјишни парцели (СИЗП).

„Со просторната идентификација на земјишните парцели се определуваат границите и големината на обработливата површина за која земјоделците аплицираат за финансиска поддршка во земјоделството и руралниот развој. На овој начин, ќе се овозможат прецизни контроли од страна на Агенцијата за финансиска поддршка во земјоделството и руралниот развој, во однос на површините кои земјоделците ги пријавуваат за субвенции и фактичката состојба на терен“, информираат од МЗШВ.

Во рамките на процесот ќе бидат направени „ортофото“ карти, дигитален модел на теренот на целата држава и ќе биде направена иницијална дигитализација на земјоделските површини според употребата на земјиштето.

Новите просторни податоци ќе овозможат ажурирање на промените настанати на земјишните парцели во периодот помеѓу двете снимања.

Активностите на изработка на авионските снимки, „ортофото“ картите, дигиталниот модел на теренот, како и дигитализацијата на земјоделското земјиште финансиски е помогнато од страна на Европската Унија преку ИПА-фондовите.


ЕВН Македонија апелира да се внимава при земјоделски работи под далноводите


Скопје, 15 август, 2017 - 14:31 (META) 

ЕВН Македонија ги повикува земјоделците внимателно да ракуваат со земјоделската механизација и опрема во близина на далноводите, а посебно да внимаваат при ракување со опремата за наводнување.

Mеталната опрема како што се цевки за наводнување и разни видови на прскалки, во никој случај не смее да дојде во директен допир или да се приближува до каблите. Не смее да се поставуваaт метални цевки за наводнување паралелно со трасата на надземниот вод и при наводнување задолжително да се избегнува контакт на водениот млаз со каблите. Притоа особено треба да се внимава на силата и правецот на ветрот, посочува ЕВН Македонија.

Во близина на електричните водови, цевките за наводнување во никој случај не смеат да се поставуваат вертикално ниту при нивно празнење ниту при транспортот. Транспортот на останатата опрема за наводнување мора да биде исклучиво во хоризонтална положба.

ЕВН Македонија и нејзините стручни лица се постојано на располагање на земјоделците за прашања во врска со безбедноста, посочуваат од компанијата.


Николовски најави 10 милиони евра за зголемени субвенции и за млади земјоделци


Скопје, 4 август, 2017 - 14:59 (META) 

Министерот за земјоделство, шумарство и водостопанство, Љупчо Николовски, попладнево ги образложи новите мерки што Владата ги донела за поддршка на земјоделците. Тие вклучуваат 10 милиони евра што ќе се распределат за зголемување на субвенции и за директна поддршка на млади земјоделци.

Мерките се предвидени со измените на Програмата за директна финансиска поддршка во земјоделство и на Програмата за рурален развој.

Измените на програмата за директни плаќања се по барање на земјоделските здруженија за зголемување на субвенциите за производителите на пченица, кои годинава имаа ниски приноси поради лошите временски услови, образложи Николовски.

– Земјоделците ќе добијат дополнителни 6.000 денари од хектар пченица, што се вкупно 2 милиони евра повеќе од субвенциите што ги добиваат сега. За јачменот е предвиден дополнителен 1 денар за килограм јачмен предаден кај регистрирани откупувачи. Ќе реагираме и кај лозовите и овошните насади каде што, исто така, годинава родот е преполовен. За таа цел 25.000 лозари и 15.000 овоштари ќе имаат зголемена субвенција од 10 отсто по хектар за да се надомести дел од штетата, главно поради измрзнувањето на насадите. За градинарите, исто така, одвоивме дополнителни 10 отсто од висината на сегашните субвенции по хектар, а за сточарите поддршката е преку зголемените субвенции за 10 отсто по хектар фуражни култури. Тоа се уште 2 милиони евра предвидени за реализација на овие мерки – рече министерот за земјоделство.

Тој нагласи дека се распишува и оглас за неповратна помош од 10.000 евра за млад земјоделец. Ќе се воведе и субвенција за подигнување повеќегодишни насади, со која ќе бидат опфатени и  земјоделците што извршиле есенско подигнување во 2016 година и на оние кои извршиле пролетно подигнување во 2017 година.

– Само овие две нови мерки, во согласност со програмата на Владата, ќе овозможат директен трансфер на 6 милиони евра, кои овојпат ќе завршат кај вистинските земјоделци до крајот на годината – рече Николовски.


Владата го усвои предлогот за зголемување на минималната плата на 12.000 денари


Скопје, 4 август, 2017 - 9:59 (META) 

На 19. седница со која претседаваше вицепремиерката и министерка за одбрана, Радмила Шекеринска, Владата го усвои предлог-законот за изменување и за дополнување на Законот за минималната плата и со тоа ја почна законската процедура за зголемување на минималната плата на ниво од 12.000 денари.

„Ќе се овозможи исплаќање на иста висина на минимална плата за сите вработени во Република Македонија кои примаат минимална плата, а ќе се обезбеди и финансиска поддршка за фирмите од буџетот на Република Македонија за да ја исплаќаат договорената повисока минимална плата. Усвоените измени на предлог-законот, Владата во текот на денешниот ден ќе ги достави до Собранието на Република Македонија на разгледување и на усвојување“, информираат од владината прес-служба.

На седницата Владата донела и измени на предлог-програмата за финансиска поддршка во земјоделството, како и на програмата за рурален развој со кои, како што појаснуваат од владината служба за односи со јавноста, биле издвоени нови 10 милиони евра директна поддршка за земјоделците.

Владата именувала и членови на управни и надзорни одбори во установи, агенции и други органи што се во надлежност на владата.

На седницата усвоен бил и предлог-законот за ратификација на Спогодба за соработка помеѓу Владата на Република Македонија и Советот на министрите на Босна и Херцеговина во процесот на пристапување во Европската Унија.


Ќе се тргне тајноста од договорите со странските инвеститори


Скопје, 26 јули, 2017 - 11:23 (META) 

На вчерашната 16. седница, Владата усвоила барање за декласификација, односно симнување на тајноста, на сите договори склучени како државна тајна помеѓу поранешната влада и странските инвеститори во економските зони. Сите податоци по декласификацијата, ќе бидат целосно и транспарентно достапни на јавноста, порача Владата.

Истовремено, на седницата е усвоена информација за пороен дожд, електрични празнења, силен ветер и град и причинети штети на земјоделски култури на 20 јули 2017 година во Ресенскиот и во Тетовскиот Регион. Задолжено е Министерството за земјоделство, шумарство и водостопанство да формира комисии што ќе предложат решенија по поднесените барања за утврдување на настаната штета од земјоделците или организациите на производители.

За да овозможи продолжување на работите за изградба на автопатот Демир Капија – Смоквица, Владата усвоила одлука да се помогне на МЕПСО да обезбеди имотен лист за далеководите што се наоѓаат на трасата и коишто има потреба да бидат поместени. Владата истовремено ги задолжила надлежните државни претпријатија, заедно со ЕВН, да предложат системско решение за овој и другите проблеми што ја следат изградбата.


СДСМ: Покрај субвенции, договорен е и поголем откуп на лубеници


Скопје, 19 јули, 2017 - 17:56 (META) 

Владата предводена од СДСМ активно работи на надминување на проблемите, преку мерки што ќе ја стабилизираат цената на лубениците и ќе ги санираат штетите на производителите на бостан, се вели во реакцијата на СДСМ, на прес-конференцијата на Ванчо Костадиновски од ВМРО-ДПМНЕ.

Во соопштението се додава дека ВМРО-ДПМНЕ 11 години манипулирала со земјоделците, а субвенциите и другите мерки за помош ги злоупотребувала за да врши притисок, поткуп и уцени врз вистинските земјоделци.

„Проблемот со откупот на лубеници, како и другите напластени проблеми, се решава интензивно и во содејство со земјоделците и со откупувачите. Покрај дополнителните субвенции од два денари за секој продаден килограм, договорен е и поголем откуп на лубеници, кој веќе се остварува“, велат од СДСМ.


Владата усвои акционен план за енергетска ефикасност што го барала ЕУ


Скопје, 18 јули, 2017 - 20:52 (META) 

Владата на денешната седница го усвои третиот акционен план за енергетска ефикасност, што Република Македонија се обврзала пред ЕУ дека ќе го донесе до 30 јуни 2016 година, но тоа досега не е направено, соопшти владината прес-служба.

Овој акциски план, според проценките и очекувањата, ќе донесе заштеди на целокупната крајна потрошувачка на електрична енергија во Македонија за 2018 година.

Премиерот и министрите го усвоиле и предлогот за поведување постапка за водење преговори за склучување договор за статус меѓу Владата на Република Македонија и Европската Унија, како и нацрт-текстот на договорот, за акции спроведени од страна на Агенцијата за европска гранична и крајбрежна стража во Република Македонија, како основа за водење на преговори. Со овој договор треба да се олесни учеството на пограничната агенција на ЕУ, Фронтекс, во заштитата на јужната граница и се однесува на начинот на кој ќе дејствува стражата на границата.

Владата на Република Македонија го разгледа и ги усвои извештајот за извршени преговори со владата на Република Косово за реципрочно признавање на возачки дозволи, како и информацијата за активности што треба да бидат преземени за отворање на новиот граничен премин со Косово, Белановце – Станчиќ.
На седницата било разговарано и за депонијата во Струга, при што е констатирано дека проблемот се појавува поради несоодветен третман на отпадот. Владата одлучила дека е потребно спроведување соодветно долгорочно решение, но и дека треба да се најде системско решение за сите депонии на територијата на Република Македонија.

Во однос на штетите од невремето што на 15 јули го зафати Струмичко-радовишкиот Регион, Владата донесе одлука да ги обесштети земјоделците, поради што го задолжи Министерството за земјоделство, шумарство и водостопанство да формира комисии што ќе извршат увид за утврдување на настанатите штети.


Покрај Чавков и Атанасовски, Владата разреши и други директори


Скопје, 17 јуни, 2017 - 11:46 (META) 

На седницата вчеравечер, покрај донесувањето одлука до Собранието да се достави предлог за разрешување на јавниот обвинител Марко Зврлевски и за избор на новите директори на Бирото за јавна безбедност и на Управата за безбедност и контраразузнавање, Владата направи уште неколку смени на директори и на управни одбори и донесе мерки за одредени ситуации.

Владата на вчерашната седница постави нови директори и на УЈП и на Агенцијата за храна и ветеринарство. За директорка на УЈП е именувана Сања Лукаревска, а за директор на Агенцијата за храна и ветеринарство е именуван Зоран Атанасов.

Владата, исто така, ги разреши членовите на управниот одбор на шумскиот резерват „Јасен“, а за нови членови ги именуваше Марјан Даскаловски, Зоран Наков, Ирена Станкоска, Ристо Спасовски и Илми Селмани.

За в.д. директор на Државниот просветен инспекторат е именуван Томе Спировски. Разрешена е в.д. директорката Надица Николоска, поради тоа што е констатирано дека ѝ е истечен мандатот од 9 мај 2017 година.

Од вршител на должноста директор на Државниот инспекторат за локална самоуправа, на негово барање, е разрешен Ванчо Шехтански.

Покрај тоа, донесена е одлука да се овозможи бесплатна услуга, одмор и рекреација на деца од семејства во социјален ризик и на деца корисници на посебен додаток за ова лето.

Владата ја разгледала и ја усвоила информацијата за штетите врз земјоделски култури од невремето на 14 јуни во Скопскиот, Тетовскиот, Велешко-светиниколскиот, Кумановскиот, Штипскиот и во Гевгелискиот Регион. Задолжено е ресорното Министерство за земјоделство да формира комисии кои по поднесените барања од земјоделците ќе ја утврдат настаната штета. Рокот за поднесување на барањата е од 19 до 30 јули, а треба да се достауваат до подрачните единици на Министерството за земјоделство, шумарство и водостопанство.

Владата, исто така, го усвоила предлогот на Министерството за образование за објавување конкурс за запишување студенти на прв циклус студии на студиските програми на Универзитетот „Свети Кирил и Методиј“ во Скопје, во учебната 2017/2018 година. Донесена е и одлука за дополнителни квоти за запишување студенти, припадници на заедниците кои не се мнозинство во Република Македонија во прва година – прв циклус на студии, на јавните високообразовни установи на универзитетите „Свети Кирил и Методиј“ во Скопје, „Свети Климент Охридски“ во Битола, Државниот универзитет во Тетово, Универзитетот „Гоце Делчев“ во Штип, Универзитетот за информатички науки и технологии „Свети Апостол Павле“ во Охрид и Универзитетот „Мајка Тереза“ во Скопје, во учебната 2017/2018 година.


СДСМ: Тренов да објасни зошто ја попречува исплатата на субвенции


Скопје, 16 јуни, 2017 - 18:20 (META) 

Владата предводена од СДСМ веднаш пристапи кон решавање на проблемите што ВМРО-ДПМНЕ ги остави во земјоделството, порача владејачката партија денеска, реагирајќи на прес-конференцијата на Ромео Тренов од ВМРО-ДПМНЕ. СДСМ побара Тренов да докаже дека навистина мисли добро за земјоделците така што ќе им овозможи, како државен функционер, да си ги земат субвенциите.

„Наместо да држи партиски прес-конференции, директорот на АД „Водостопанство“, Ромео Тренов, треба да објасни зошто во софтверот на платежна агенција сè уште ги нема внесено податоците за земјоделците кои не се должници за надомест за вода, со што директно им го спречува правото да си ги земат субвенциите“, се вели во реакцијата.