МЗШВ: Земјоделците можат да поднесат барања за легализација на фармите до крајот на 2018


Скопје, 23 ноември, 2018 - 13:02 (META) 

Министерство за земјоделство, шумарство и водостопанство (МЗШВ) информираше дека до крајот на годинава, земјоделците можат да достават барања за легализација на изградените објекти, фарми на градежно земјиште.

„Барањата за легализација треба да се поднесат во општините на живеење. Продолжувањето на рокот е со цел да им се излезе во пресрет на големиот број на граѓани, вклучително и на земјоделците, кои досега не ја завршиле постапката за легализација“, се вели во соопштението на МЗШВ.

Од таму информираат дека, до сега бројот на земјоделските стопанства и чии што објекти се легализирани е исклучително мал, и поголем број од истите ја немаат искористено можноста која ја имаше понудено законот.

„Нерегулираниот статус на објектите за земјоделска намена на градежно земјиште негативно влијае на можноста за модернизација и реструктуирање на земјоделските стопанства кои се занимаваат со сточарство и ги оневозможува стопанствата во користење на државната финансиска помош за земјоделството. Можноста за легализација на фармите е од голема важност за земјоделците. Со стекнување имотни листови, самите фарми ќе добијат и финансиска вредност, која што земјоделците ќе можат да ја искористат за подигнување на кредити за реновирање и модернизација на фармите. Воедно, со легализацијата ќе можат да остварат право за аплицирање за мерките од ИПАРД-програмата и од Националните програми, што ќе влијае врз обемот и квалитетот на производството“, се додава во соопштението.


Мицкоски: Владата ги фрли земјоделците на коленици


Скопје, 21 август, 2018 - 16:27 (META) 

Земјоделците се фрлени на коленици и оставени сами на себе и тоа мора да се смени. Се работи за непочит на трудот на илјадници семејства кои се прехрануваат од земјоделието, се работи за незнаење, неспособност и немање на план, порача претседателот на ВМРО-ДПМНЕ, Христијан Мицкоски, обвинувајќи ја Владата дека не придонела ништо за подобрување на состојбата на земјоделците, туку напротив, води погубни политики.

– Земјоделието е во надолна линија. Земјоделците се на работа на егзистенцијата. Според податоците на Државниот завод за статистика во второто тромесечје од 2018 година откупот и продажбата на земјоделските производи се намалени за 4,4% во однос на истиот период од претходната година. Цените на тековно потрошени средства во земјоделството во јули се пораснати за 9,6%, што значи дека заработката е сè помала за земјоделците. Растот на трошоците од 8% се бележи и во месец јуни. Откупот и продажбата опаѓаат, а трошоците растат – порача Мицкоски.

Како доказ за своите тврдења, тој рече дека годинава заклучно со јули се увезени 6.000 тони бостан, а извезени само 2.500 тони, додека во 2016 година извозот изнесувал 11.000 тони. Посочи и на увоз на 6.500 тони домати, односно речиси половина од вкупниот извоз.

Мицкоски во видео-обраќањето обвини дека владата нема слух за производителите на сливи, бидејќи 20.000 тони се неоткупени.

– Паралелно на тоа ја нема ниту зелената нафтата која ја ветуваа, ниту е намалено ДДВ – то за сточна храна, а се забележува и намалување, кратење на субвенциите во неколку земјоделски гранки – порача претседателот на ВМРО-ДПМНЕ.


Откупот и продажбата на земјоделски производи намалени во однос на лани


Скопје, 16 август, 2018 - 10:27 (META) 

Според податоците на Државниот завод за статистика, во второто тримесечје од 2018 година, откупот и продажбата на земјоделски производи се намалени за 4,4% во однос на истиот период од претходната година.

Позитивна промена има кај откупот на земјоделски производи од индивидуалните производители, каде е забележано зголемување за 14%, а кај продажбата на земјоделски производи од сопствено производство е забележано намалување за 16,5% во однос на лани.

Зголемувањето на откупот и продажбата на земјоделски производи има кај индустриските растенија, овошјето, добитокот, живината и јајцата и млекото, а намалување е забележано кај житата, градинарските растенија, фуражните растенија, алкохолните пијалаци, млечните производи и рибата.

Вредноста на откупот и продажбата на земјоделски производи покажува намалување во април и мај, во однос на истите два месеци во 2017 година, додека во јуни е забележано зголемување на вредноста на откупот и продажбата на земјоделски производи.


МЗШВ: Жетвата заврши, пченицата се откупува по цена од 9 до 10,5 денари по килограм


Скопје, 6 август, 2018 - 10:01 (META) 

Жетвата на пченицата заврши на сите засеани 78.000 хектари, а просечениот принос е околу 3.500 килограми по хектар, информираат од Министерство за земјоделство, шумарство и водостопанство.

Од таму додаваат дека лебното зрно од овогодинешната реколата се откупува по цена од 9 до 10,5 денари по килограм, во зависност од квалитетот на пченица.

До 15 август е и рокот за доставување на барање за понуди за Јавна набавка на меркантилна пченица за потребите на Агенцијата за стоковни резерви. На јавниот оглас за прв пат се дозволени и помали лотови, со цел и земјоделците да можат директно да продадат пченица за стоковни резерви.

„Има 10 лота од по 100 тони и 3 лота по 4.000 тони пченица. На овој начин ќе се придонесе за зголемување на откупот на домашна пченица, како и за постигнување повисока откупна цена. Очекуваме сите овие мерки да дадат дополнителен стимул во овој сектор, како и да обезбедиме одржливо и конкурентно производство на полјоделските култури, особено на пченицата како најзначајна“, се вели во соопштението на МЗШВ.


Бектеши од Хасани денеска ќе бара целосно укинување на царината од Косово


Приштина, 27 јули, 2018 - 11:43 (META) 

Mинистерот за економија Крешник Бектеши денеска ќе се сретна со косовскиот колега Бајрам Хасани за повлекување на царините за земјоделските производи кои останаа неопфатени со одлуката на косовската Влада.

„Во име на досегашната успешна трговска и, воопшто, економска соработка со Република Косово се надевам дека ќе најдеме заеднички јазик со мојот косовски колега, а дека средбата ќе резултира со решение кое ќе биде од взаемен интерес. Уверен сум дека имаме заедничка цел, а тоа е олеснување на трговијата на Западен Балкан, согласно правилата на договорот ЦЕФТА и принципите на слободна трговија“, вели Бектеши.

Царина од Косово се уште важи за доматите, пиперките, јаболката, крушите, сливите, малините и грозјето.Владата се уште дава можност за преговорите да успеат и не воведува контрамерки за косовските производи.

Министрите од регионот денеска во Белград на заеднички состанок ја повикаа косовската Влада целосно да ги укине зголемените царини за извоз на земјоделски производи во Косово.


МЗШВ очекува целосно повлекување на одлуката на Косово


Скопје, 26 јули, 2018 - 15:09 (META) 

Разговорите кои Владата и надлежните министерства ги водеа со Косово во изминатиот период вродија со плод, Приштина веќе ја повлече зголемената царина за дел од производите, информираат од Министерството за земјоделство, шумарство и водостопанство (МЗШВ).

„Утре, министерот за економија Крешник Бектеши, ќе се сретне со неговите колеги во Косово каде ќе се бара решение и надминување на проблемот. Сите досегашни преговори, ни даваат за право да очекуваме целосно укинување на зголемените царини. Затоа во овој момент, Македонија останува на ставот барем засега да не се воведуваат контрамерки. По утрешниот состанок ќе имаме и многу повеќе детали за наредните чекори. Приоритетна цел на министерството за земјоделство во моментов е утврдување на начин како да ги заштитиме земјоделците“, се вели во соопштението на МЗШВ.


МЗШВ: Откупот на лубеници се одвива непречено, земјоделците се манипулираат


Скопје, 6 јули, 2018 - 14:39 (META) 

Во последните седум дена се откупени 800 тони лубеница, а само за денеска се планира откуп од околу 130 тони лубеница, реагираат од Министерството за земјоделство, шумарство и водостопанство на информациите дека земјоделците протестираат и дека лубениците чекаат да бидат откупени.

„Според Подрачната единица во Струмица, во следните денови се планира откуп уште на 200 тони. Откупната цена е задоволителна и се движи од три до четири денари по килограм. Сите земјоделците кои имаат било каков проблем, слободно можат да ги контактираат подрачните единици на МЗШВ или директно МЗШВ“, се вели во соопштението.


ВМРО-ДПМНЕ: Заев и Николовски ги клекнаа на коленици производителите на пченица


Скопје, 2 јули, 2018 - 9:46 (META) 

Зоран Заев и Љупчо Николовски го клекнаа земјоделието на колена. Производителите на пченица на своја кожа ја чувствуваат неспособноста на Заев и на криминалниот картел околу него, обвини ВМРО-ДПМНЕ денеска.

„Пазарот е презаситен со српско брашно, а државата нема никаква стратегија како да се справи со овој проблем. На само недела дена пред жетвата на пченицата се уште нема потврда дали домашните мелничари ќе го откупуваат домашното производство или не. Ветувањата што Николовски им ги даде на мелничарите дека проблемите ќе ги реши до 30 јуни и дека ќе ја стабилизира состојбата на жетвата се покажаа како една голема лага“, велат од партијата.


Потпишани првите договори за користење на средства од ИПАРД 2-програмата


Скопје, 21 јуни, 2018 - 12:29 (META) 

Вкупно 692 договори за набавка на трактори преку ИПАРД 2-програмата вредни 5,8 милиони евра, ќе бидат потпишани во наредните денови, а денеска во Министерството за земјоделство беа потпишани првите 13 договори.

Најголем дел од средствата се за набавка на трактори, но земјоделците покажале интерес и за приклучна механизација мотокултиватори, ѓубре-растурачи, прскалки, системи „капка по капка“, линии за транспорт на храна.

– Ова е рекорден број на корисници на средства од постоењето на ИПАРД-програмата воопшто. Со оваа поддршка ќе се унапреди состојбата на фармите и земјоделските стопанства, а тоа ќе значи поголема конкурентност – рече министерот за земјоделство, шумарство и водостопанство, Љупчо Николовски.

Директорот на Платежната агенција, Николче Бабовски рече дека по детектираните слабости на ИПАРД 1, процедурата за конкурирање за ИПАРД 2 е поедноставена.

Од вкупно проектираните 5,8 милиони евра за што ќе се потпишуваат договорите овие денови, 4,3 милиони се европски пари, а 1,4 милиони средства од националното финансирање.


Николовски: Даночните постапки за земјоделците се поедноставуваат


Скопје, 11 јуни, 2018 - 16:45 (META) 

Со последните измените на Законот за персонален данок на доход, значително се поедноставуваат даночните постапки за земјоделците, порачаа на денешната заедничка прес-конференција министерот за земјоделство, шумарство и водостопанство, Љупчо Николовски и директорката на Управата за јавни приходи, Сања Лукаревска.

Со последните законски измени, се намали прагот за регистрација на овие даночни обврзници. Со измените на законот се зголеми прагот за остварени приходи од продажба на земјоделски производи од претходно 300.000 денари на 1.000.000 денари, за што земјоделците кои немаат дополнителни приходи во текот на годината, ќе имаат право на поврат на данокот на доход.

Николовски посочи дека на овој начин остануваат повеќе пари кај земјоделците, а дополнително ќе бидат ослободени од досегашните административни процедури.

„Кон крајот на годината УЈП ќе ги има сите пресметки за тоа колкава група на земјоделци ќе бидат опфатени и колку пари се враќаат кај земјоделците. Повратот ќе оди директно на земјоделците, а овој данок ќе се задржува од страна на откупувачите“, рече Николовски.

Тој додаде дека земјоделците нема да поднесуваат барање за регистрација како даночни обврзници, нешто што досега се вршеше, нема да плаќаат адмнистративни такси и нема да поднесуваат годишна даночна пријава.

Повратот на платениот данок ќе го врши Управата за јавни приходи и ќе се реализира по службена должност, по истекот на годината во која е остварен приходот, односно откако ќе завршат постапките за утврдување на годишните приходи и данокот за таа година.

Така, граѓаните ќе немаат обврска да доаѓаат во Управата и да поднесуваат барање за поврат и нема да плаќаат административни такси за барањето за поврат и за даночниот управен акт со кој се врши повратот, во вкупен износ од 300 денари.