!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Николовски во Кавадарци вети дополнителни субвенции за лозарите


Кавадарци, 9 септември, 2017 - 19:59 (META) 

Mинистерот за земјоделство, шумарство и водостопанство, Љупчо Николовски, денеска соопшти дека на првата наредна седница Владата ќе донесе одлука за дополнителни директни плаќања за произведено и предадено грозје во домашните винарски визби.

Тој беше во Кавадарци на традиционалната манифестација во чест на грозјето и виното „Тиквешки гроздобер“.

– Висината на субвенцијата ќе биде определена на самата седница на Влада. Со оваа мерка ќе бидат опфатени сите земјоделски стопанства што до 15 септември пријавуваат површини за лозје и кои произведеното и предадено грозје ќе го дадат во домашните винарски визби – рече Николовски.

Како што рече, според податоците од Државниот инспекторат за земјоделство, заклучно со 5 септември откупени се околу 16 милиони килограми грозје, од кои најголемиот дел се од сортите вранец и смедеревка.

– Би сакал да им порачам на лозарите дека грозјето од годинешната реколта ќе биде целосно откупено од винарските визби, а исплатата за откупеното грозје ќе се реализира според законските одредби и прописи. Државниот инспекторат за земјоделство ги зајакнува контролите на откупните пунктови на грозје за да нема манипулации со откупните цени – рече министерот за земјоделство.

Порача дека уште во првите 100 дена на новата влада се зголемени субвенциите за одржување на лозови насади за 10 отсто по хектар, како и дека за одржување на површини со лозови насади по Програмата за 2016 година се исплатени 8,7 милиони евра, а за вкупно 13 винарски визби за откупено грозје се исплатени субвенции од 700.000 евра.


Николовски: Ќе реагираме на поскапувањето на контролите за увоз на храна во Хрватска


Скопје, 3 август, 2017 - 16:45 (META) 

Со новиот правилник за увоз на овошје и на зеленчук што Хрватска го донесе на 15 јули, значително се зголемуваат трошоците при извоз на македонското свежо овошје и зеленчук, што ќе влијае врз зголемување на крајната цена на производите.

Оттука, министерот за земјоделство, шумарство и водостопанство, Љупчо Николовски, информираше дека Министерството за земјоделство, шумарство и водостопанство ќе достави нота до хрватското министерство за земјоделство и до Европската комисија.

– Со овој правилник трошоците за контрола на квалитет на овошјето и на зеленчукот се зголемуваат од досегашните 90 куни (12 евра) по производ, на 2.000 куни (274 евра) по производ. Со такви зголемени цени, македонското овошје и зеленчук ќе бидат неконкурентни на пазарот. Сметаме дека со носењето на овој правилник се воведува нетарифна бариера од страна на Република Хрватска за заштита на хрватскиот пазар од увоз на свежо овошје и зеленчук – рече Николовски.

Тој најави дека в понеделник надлежните министри на Република Македонија, Република Србија и на Босна и Херцеговина ќе се сретнат во Сараево за да изградат заеднички став и за заедничка реакција до хрватската страна.

– Република Хрватска, како земја членка на Европската Унија, треба да ја почитува Спогодбата за стабилизација и асоцијација (ССА) која Република Македонија ја има склучено со Европската Унија. Во согласност со Спогодбата, односно член 27, точка 1, укинати се царинските давачки и другите давачки што имаат ист ефект за увозот на земјоделските производи со потекло од Република Македонија – посочи македонскиот министер за земјоделство, шумарство и водостопанство.

Република Хрватска е значаен трговски партнер на Република Македонија во трговијата со земјоделско-прехранбени производи, односно втора од земјите членки на Европската Унија, бидејќи Македонија таму извезува земјоделско-прехранбени производи од околу 36 милиони евра годишно. Во однос на увозот од Хрватска, тој изнесува 37 милиони евра.

Вредноста на извозот на овошје и на зеленчук од Македонија во Хрватска е околу 5 милиони евра годишно. Најмногу се извезуваат свежи пиперки, зелка, домати, краставици, трпезно грозје и лубеници.

Од Република Хрватска најмногу се увезуваат месо од живина, шеќер, чоколади, цигари, сирење, конзервирана риба и други производи.


Николовски поднесе кривична пријава против службено лице од МЗШВ


Скопје, 2 ноември, 2016 - 11:59 (META) 

Утврдени се неколку прекршувања на законот во работата на Министерството за земјоделство, шумарство и водостопанство, тврди дополнителниот заменик-министер Љупчо Николовски, повикувајќи се на конечниот извештај од 65 страници на овластениот државен ревизор за периодот од 2013 до 2015 година.

„Бидејќи сите факти утврдени во ревизорскиот извештај не допираат до Јавното обвинителство за да постапува по нив, ние поднесовме кривична пријава против службено лице во Министерството за земјоделство, шумарство и водостопанство кое постапувало спротивно на законите во РМ, а со таквото работење нанело штета и на средствата на буџетот на РМ и потешко ги повредило правата на закупците“, соопшти дополнителниот министер Николовски.

Водејќи се според ревизорскиот извештај, Љупчо Николовски констатира дека не бил извршен увид за да се потврди фактичката состојба на површините што се објавуваат во јавните огласи за давање под закуп и кои се утврдуваат врз основа на распложливите катастарски податоци, содржани во имотните листови од Агенцијата за катастар. Дополнителниот министер додава дека не е предложено спроведување на инспекциски надзор, ниту се преземени сите потребни мерки и активности за утврдување на причините кога дел од избраните најповолни понудувачи доставиле изјава заверена на нотар дека се откажуваат од договорот.

„Сите акти што ги изработувала и ги потпишувала Комисијата за спроведување постапка по еден оглас, кои се однесуваат на различни региони, се заведувале под ист деловоден број и датум“, тврди заменик-министерот Николовски.

Според него, биле склучени договори за закуп на површини поголеми од 10 хектари иако избраните најповолни понудувачи не доставиле банкарска гаранција за квалитетно и навремено извршување на договорот. Тој тврди и дека не биле преземени мерки за наплата на закупнината, така што за периодот од 1999 до 2013 година се водат 282 субјекти за износ од 162.134.000 денари.