Полска ги крши европските стандарди за квалитет на воздухот, пресуди Судот на ЕУ


Луксембург, 22 февруари, 2018 - 14:21 (META) 

Судот на Европската Унија пресуди дека Полска не ги исполнила барањата на европското законодавство за ограничување на загадувањето на воздухот.

Според директивите на ЕУ од 2008 година, земјите-членки на Унијата мора да го намалат загадувањето на воздухот за да го заштитат здравјето на луѓето.

Европската комисија (ЕК) во декември 2015 година ја даде Полска на суд, затоа што меѓу 2007 и 2015 година дневните вредности на загадување во 35 од 46 зони за оценување на квалитетот на воздухот редовно ги надминувале дозволените вредности.

Судот, исто така, наведува дека мерките што Полска ги планирала за да го ограничи аерозагадувањето, ќе го довдат квалитетот на воздухот во рамките на европските стандарди најрано од 2020 до 2024 година.

„Аргументот на Полска дека нејзината финансиско-економска состојба не зодовлува европското право да биде применето порано, сам по себе не може да го оправда толкавото доцнење во исполнувањето на крајните рокови“, наведува судот.

Инаку, Полска е втората држава од ЕУ, за која е утврдено дека ги крши европските стандарди за квалитет на воздухот. Во април 2017 година судот објави одлука против Бугарија за истиот проблем.

Во последните недели европските институции презедоа строги мерки и против девет други членки – Велика Британија, Чешка, Германија, Шпанија, Франција, Италија, Унгарија, Романија и Словачка, на кои им се закани дека ќе ги даде на суд доколку не достават предлози за подобрување на квалитетот на воздухот.

Според проценките, повеќе од 400 илјади Европејци годишно секоја година предвреме умираат поради лош квалитет на воздухот, кој предизвикува болести како астма, срцеви заболувања и рак на белите дробови.

Одлуката на судот против Полска доаѓа во период на заострени односи меѓу ЕУ и Варшава по предупредувањата што Брисел ги упати до земјата-членка за ерозијата на владеењето на правото, што го дозволила полската владејачка нациоаналконзервативна партија на Правото и правдата.


Билт: „Тешкашите“ од ЕУ треба да се вклучат во решавањето на спорот за името


Лондон, 5 февруари, 2018 - 12:12 (META) 

Во решавањето на спорот за името меѓу Македонија и Грција треба да се вклучат силните членки на Европската Унија, за да се избегне колапс на стратегијата на ЕУ за Балканот, смета ко-претседавачот на Европскиот совет за надворешни работи и поранешен шеф на шведската дипломатија, Карл Билт.

„Мислам дека ќе треба силна посветеност на силните земји-членки и на институциите на Европската Унија за да се постигне компромис за името на Македонија. Без тоа, стратегијата на ЕУ за Балканот ризикува да доживее колапс“, напиша Билт на својот твитер-профил, споделувајќи текст на грчкиот весник „Катимерини“ за вчерашните протести во Атина.


ЕУ ќе има повеќе од 27 членки, но не пред 2019 година, порача Јункер


Брисел, 13 септември, 2017 - 13:23 (META) 

До крајот на мандатот на сегашната Европска комисија нема да бидат исполнети условите за влез на некоја од земјите од Западен Балкан во Европската Унија, изјави денеска претседателот на Европската комисија, во годишното излагање за состојбата на Унијата во Европскиот парламент.

– Условите за влез на некоја нова членка во ЕУ од Западен Балкан нема да може да се исполнат до крајот на сегашниот мандат на Европската комисија, 2019 година – рече Јункер, додавајќи дека апсолутен приоритет е секоја нова члена целосно да ја има воспоставено правната држава и да ги почитува темелните вредности на ЕУ.

Тој рече дека во годините што следат Европската Унија ќе има повеќе од 27 членки, но дека тука не спаѓа и Турција која, како што рече, веќе извесно време со џиновски чекори се оддалечува од ЕУ.

– Тамошните новинари мораат да ја имаат слободата на говор во редакциите, новинарите не смеат да бодат затворани – предупреди Јункер.

Тој ги повика турските власти да ги ослободат сите затворени новинари и да престанат да ги навредуваат земјите од ЕУ и нивните лидери, нарекувајќи ги фашисти и нацисти.

– Европа е континент на зрела демократија, но тие што свесно навредуваат уриваат мостови, а во Турција тие што го прават тоа сакаат да ги урнат мостовите и притоа да ја обвинат Европската Унија за неуспехот во преговорите – рече Јункер.


Џафери денеска на средби со амбасадорите на земјите членки на ЕУ и со новинари


Скопје, 12 мај, 2017 - 11:02 (META) 

Претседателот на Собранието, Талат Џафери, денеска ќе се сретне со амбасадорите од земјите членки на Европската Унија во земјава, како и со претставници на медиумите.

Во сала 5 во Собранието, Џафери во 11 часот ќе се сретне со амбасадорката на Австрија, Ренате Коблер, амбасадорот на Бугарија, Иван Петков, на Хрватска, Данијела Баришиќ, на Чешка, Мирослав Рамеш, претставниците на француската и на германската амбасада, Доминик Готиер и Марко Акватичи, претставникот од грчката амбасада, Ефтимиос Царлафтис, амбасадорот на Италија, Карло Ромео, на Словачка, Мартин Безак, на Холандија, Воаутер Пломп, на Полска, Јацек Мултановски, на Романија, Виорел Станила, на Словенија, Милан Јазбец, на Обединетото Кралство, Чарлс Гарет, претставникот на шпанската амбасада, Фернандо Лопез де Кастро, и со претставникот на шведската амбасада, Антон Иреквист.

Во 13 часот, пак, новоизбраниот претседател на Собранието ќе има средба со претставниците на медиумите во Македонија, со кои, како што најавија од неговиот кабинет, ќе размени мислења за актуелната состојба во државата.


Eвропско СЈО ќе ги гони тие што крадат од ЕУ-фондовите


Брисел, 5 април, 2017 - 13:50 (META) 

Советот на Европската Унија соопшти дека 16 земји членки на ЕУ испратиле известување до европските институции дека ќе поведат постапка, со т.н. „засилена соработка“, за основање на канцеларија на европски јавен обвинител, пренесува хрватскиот весник „Нови лист“.

Според соопштението на Европскиот совет, канцеларијата на европскиот јавен обвинител ќе биде надлежна за водење истраги, кривичен прогон и за поведување судски постапки против „извршители на кривични дела насочени против финансиските интереси на Унијата“.

Поради измами и злоупотреби, од сметките на Европската Унија годишно „исчезнуваат“ во просек околу 500 милиони евра. Ова уште пред четири години било утврдено од Европската комисија, која тогаш предложила основање на канцеларија на европски јавен обвинител, кој ќе се занимава со тие што се обидуваат (или ќе успеат) да „дрпнат“ пари од сметката на ЕУ, како, на пример, средства од ЕУ-фондовите.

Како што пишува „Нови лист“, канцеларијата е пред основање и засега ќе биде поддржана од 16 земји членки преку т.н. институт за „засилена соработка“, која овозможува на државите што сакаат да соработуваат во одредена област, да го направат тоа без да чекаат за тоа да се согласат сите 28 членки на ЕУ.

Зад иницијативата стојат Белгија, Бугарија, Кипар, Чешка, Германија, Шпанија, Грција, Финска, Франција, Литванија, Луксембург, Португалија, Романија, Словенија, Словачка и Хрватска.


Роамингот во ЕУ се укинува, цените на разговорите и на интернетот драстично паѓаат


Брисел, 1 февруари, 2017 - 16:35 (META) 

Владите и институциите на земјите членки на Европската Унија потпишаа договор за техничките услови за намалувањето на давачките за роаминг на телекомуникациските оператори. Станува збор за средства што државите ги плаќаат едни на други за користење на мобилни услуги.

Реформите во цените би значеле граѓаните на Европа да зборуваат без да плаќаат роаминг, а се очекува новите правила да стапат на сила од 15 јуни годинава.

Договорот треба да биде изгласан на седници на Советот на Европа и на Европарламентот.

Според новиот договор, цената на мобилниот интернет, која во моментов е 7,7 евра за еден гигабајт, до 2022 година треба да се намали на 2,5 евра. Цената за една минута разговор од сегашните 5 евроценти ќе стане 3,2 евроценти, а од средината на јуни испраќање СМС-порака ќе чини 1 евроцент, што ќе биде двојно помалку од сегашната цена.

Неколку европратеници и политичари на социјалните мрежи ја најавија новината и напишаа „збогум роаминг“.

Во согласност со Регионален договор за роаминг, за негова хармонизација со политиките на Европската Унија, изминатите две години, роамингот помеѓу Македонија, Србија, Црна Гора и Босна и Херцеговина поевтини за 30 отсто.


Донесувањето закони не е доволно, треба да се спроведат во практика, порача Хан за Албанија


Тирана, 25 јануари, 2017 - 17:28 (META) 

Еврокомесарот Јоханес Хан изјавил дека во Албанија не е доволно само да се донесуваат закони, туку преку конкретни дела да се покаже дека се спроведуваат реформите во правосудството, јавува дописничката на „Мета“ од Албанија.

Хан, исто така, посочил дека политичарите и функционерите треба да бидат казнети ако се вмешани во корупција.

Еврокомесарот истакнал дека потребно е да се провери функционалноста на институциите во Албанија и нивните демократски капацитети, пред да бидат отворени поглавјата 23 и 24 кои се однесуваат на реформи во правосудството, слобода на медиумите и на човековите права.

Овој период за имплементација на судските реформи бил од клучно значење и претставува тест за земјите кандидатки за членство во ЕУ.


Туск: Со национализамот и со популизамот во земјите членки, ЕУ нема да преживее


Варшава, 9 декември, 2016 - 12:39 (META) 

Претседателот на Европскиот совет, Доналд Туск, ги предупреди не само Полска туку и другите земји членки на Европската Унија дека демократијата е кревка работа и да не се играат со огнот на национализмот, авторитарноста и на популизмот, бидејќи со тоа ќе ја скршат ЕУ, јавуваат светските агенции.

„Без добрата волја и недвосмислената солидарност на Полска, ЕУ не може да издржи. Знам дека тоа звучи драматично, но денес е очигледно повеќе од кога било дека е тешко да се одржи ЕУ. Тоа бара постојана ангажираност“, изјавил Туск во интервјуто кое денеска го објавил полскиот портал „Онет“.

Туск ги критикувал сè поголемиот број функционери кои со очигледно задоволство зборуваат дека на Европската Унија ѝ дошол крајот и предупредил дека сега, по Брексит, ќе се зајакне улогата на Германија и дека одговорноста за ЕУ во голема мера ќе падне на само неколку земји членки.

„Тешко го доживувам тоа што Право и правда (владејачката партија во Полска, н.з.) го прави со институциите кои се основа на либералната демократија, но имам впечаток дека и тоа ќе го преживееме. Тоа релативно лесно ќе се поправи. Најмногу ме загрижува плутањето на Полска кон периферијата на геополитичкиот систем, кон осаменост“, рекол Туск.

Поранешниот полски премиер и актуелен претседател на Европскиот совет вели дека нема илузии дека некоја држава, како осамен херој ќе ја спаси ЕУ од нестабилноста, додавајќи дека е потрошен потенцијалот на Полска да игра значајна улога преку зајакнување на врските со Германија и со Франција.

Претседателот на Европскиот совет истакнал дека Полјаците се еден од најпроевропските народи и дека Полска, геополитички поставена помеѓу Германија и Русија, надвор од ЕУ нема шанси да преживее.


Отворено седиштето на Балканските медицински наменски сили во Скопје


Скопје, 5 октомври, 2016 - 17:56 (META) 

Министрите за одбрана на Македонија, Србија, Албанија, Црна Гора, Босна и Херцеговина и на Словенија денеска се состанаа во Скопје по повод свеченото отворање на седиштето на Балканските медицински наменски сили во касарната „Илинден“. Станува збор за регионална организација, составена од шесте балкански земји, а поддржана од Норвешка и од Соединетите Американски Држави.

Целта на проектот, како што посочи министерот за одбрана, Зоран Јолевски, е да се изградат регионални медицински капацитети што ќе бидат способни да дадат брз одговор во кризни ситуации, како што се природните непогоди.

„Станува збор за проект во духот на концептот „паметна одбрана“ на НАТО, кој ќе создаде мала, мобилна, брза организација која секаде и секогаш ќе биде таму каде што им е потребна на граѓаните“, додаде Јолевски.

Неговите колеги од другите земји-членки на регионалната организација истакнаа дека се работи за исклучително корисен проект бидејќи сите земји од регионот се соочуваат со природни непогоди, особено со поплави од големи размери, како пред неколку години во Србија и во Босна и Херцеговина, а неодамна во Македонија.

Амбасадорот на Норвешка, Арне Санес Бјорнстад, посочи дека формирањето на Балканските медицински наменски сили ќе ги зголеми капацитетите во регионот, но и националните капацитети за заеднички операции во рамки на Европската Унија и на Обединетите нации.

Полковник Кевин Хил, претставник од Пентагон, САД, истакна дека не станува збор за обична воена, туку уникатна мултинационална единица, според НАТО-стандардите и е конкретен пример за регионална соработка.

Србија ќе биде првата држава што ќе командува со 86-те припадници на Балканските медицински наменски сили. Командата е на ротирачка основа, на секои две години.


Чавков во Братислава: Потребна е засилена европска солидарност за бегалската криза


Братислава, 7 јули, 2016 - 18:23 (META) 

Мигрантската и бегалската криза биле во фокусот на неформалниот состанок на министрите за внатрешни работи и за правда на земјите членки на Европската Унија и на земјите кандидати за членство во Унијата, што денеска се одржа во Братислава, Словачка, а на кој учествуваше и министерот за внатрешни работи на Македонија, Митко Чавков.

Чавков, по состанокот, како што соопштуваат од МВР, меѓу другото истакнал дека е неопходна засилена европска солидарност, како во рамките на заедничкиот европски систем за азил, така и во поглед на зајакнување на шенгенските граници.

На состанокот, според Чавков, било договорено во наредниот период да се продолжи со интензивни контакти и средби, кои треба да бидат претходница на двата клучни настани посветени на мигрантската и на бегалската криза, односно самитот на лидери на глобално ниво во Њујорк и средбата на високо ниво во рамки на Обединетите нации (ОН), кои треба да резултираат со конкретни заклучоци и мерки за справување со кризата.

“Беа детектирани одредени слабости во досегашниот настап и следствено на тоа и реформи што треба да се преземат како во рамки на шенгенскиот каталог, така и во рамките на Фронтекс, односно проширување на неговата мисија, потоа зајакнување на регулатива за датотеки Еуродакт и на капацитети на постоечкиот систем на азил“, изјавил Чавков.

Тој, по состанокот, истакнал дека на дебатата од страна на повеќе земји на ЕУ била нотирана и поздравена досегашната активност и учество на Македонија во справувањето со мигрантската криза.