!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

ЗНМ: Менаџментот на МПМ, наместо да ја реши кризата, се пресметува со новинарите


Скопје, 21 април, 2017 - 13:10 (META) 

Здружението на новинарите на Македонија (ЗНМ) денеска изрази загриженост поради опасноста „Медиа принт Македонија“ (МПМ), која поседува четири весници, еден магазин и еден интернет-портал, да оди под стечај.

ОД ЗНМ велат дека намерата на сопствениците и на менаџерите на МПМ не е да ја решат кризата во компанијата, туку полека да ги згаснат весниците преку постојано отпуштање на новинарите, што, како што нагласуваат од Здружението, не претставува само кршење на работничките права на новинарите, туку е и удар врз слободата на медиумите.

„Обидите за преземање на дел од вработените во новата сестринска фирма преку огласи, претставуваат понижување за новинарите и опасност за отпушање на неподобните. Менаџментот нема храброст да признае дека неуспехот на компанијата е негов неуспех. Наместо да ги отстранат причините што ја произведоа кризата, тие брутално се пресметуваат со новинарите“, стои во соопштението на ЗНМ.

Оттаму велат дека драстичното намалување на тиражите на весниците и на приходите од огласи се случило поради „погрешните политики на менаџментот на компанијата, кои преку послушни уредници некритички ги поддржуваа политиките на владејачката партија ВМРО-ДПМНЕ“.

„Тивкото пропаѓање на МПМ е најдобар пример дека партискиот печат во Македонија нема иднина. Само слободното и професионалното новинарство може да создаде самоодржливи медиуми, кои одговорно ќе ја одиграат својата улога во демократијата, да ги информираат граѓаните и да ја контролираат власта“, нагласуваат од ЗНМ.

Здружението се солидаризира со Самостојниот синдикат на новинари и медиумски работници (ССНМ) во неговите барања да се почне дијалог помеѓу синдикатот и менаџментот на МПМ заради наоѓање одржливо решение во интерес на сите.


ЗНМ: Стрмоглав пад на медиумските слободи и влошување на состојбата на новинарите


Скопје, 13 април, 2017 - 14:57 (META) 

„Владата во 2016 година ги користела сите инструменти на власта за да ја ограничи слободата на говорот и да ги контролира медиумите. Послушните медиуми ги наградува со јавни пари, додека новинарите што ја критикуваат, постојано ги напаѓа и ги изложува на разни притисоци“, порача Насер Селмани, претседател на Здружението на новинарите на Македонија (ЗНМ).

Претседателот на ЗНМ презентираше и бројки за трошењето буџетски пари за медиумите.

– Министерствата и општините во Македонија лани имаат потрошено околу еден и пол милиони евра во печатените, интернет-медиумите и во регионалните и локалните медиуми.  Околу 400.000 евра се потрошени во првата половина од минатата година, додека повеќе од еден милион евра биле планирани да се трошат во втората половина.  Исто така, од 80 општини, само 42 дале податоци за планираните средства за трошење во втората половина од 2016 година – рече Селмани.

Рекордер е Министерството за информатичко општество и администрација (МИОА), со околу 700.000 евра.

Другиот дел од средствата на министерствата и на општините се потрошени за огласување и за претплата на весници. Најмногу средства од општините за таа намена имаат одвоено општините Битола и Гостивар, со околу 60.000 евра, односно 50.000 евра годишно.

Од министерствата најмногу средства за преплата на весници има трошено Министерството за внатрешни работи, кое во 2016 година за таа цел исплатило повеќе од 50.000 евра.

Селмани посочи и дека во последните четири години нападнати се повеќе од 40 новинари. Околу половина од нападите се случиле во 2016 година, а најголем дел од инцидентите не се расветлени и ниту еден насилник не е казнет.

– Единствена светла точка во овој извештај е подобрувањето на судската практика за тужбите за клевета и за навреда против новинарите. За разлика од 2012 година, кога имаше повеќе од 320 тужби за клевета против новинари, лани тој број беше под 50 – рече Селмани.


ЗНМ: Извештајот на „Фридом хаус“ е објективен, медиумите се силно притиснати


Скопје, 5 април, 2017 - 16:04 (META) 

Здружението на новинарите на Македонија (ЗНМ) денеска порача дека е објективен извештајот за напредокот на демократијата во светот на „Фридом хаус“, во кој  Македонија се третира како земја во развој со хибриден режим. ЗНМ посочува и дека „Фридом хаус“ тврди дека паралелното новинарско здружение отворено ги промовира ставовите на ВМРО-ДПМНЕ во врска со состојбата на медиумите.

– „Фридом хаус“ ги препознава ставовите на ЗНМ дека главен извор на кризата во медиумите е неказнивоста на насилство кон новинарите и владината корупција на медиумите. Ваквата оценка се поткрепува со податоци на ЗНМ дека во првата половина од 2016 година насилството ескалирало со физички напади, уништување на имот и опрема на новинари и спречување да известуваат за судски постапки – се вели во соопштението.

ЗНМ вели дека извештајот го потврдил ставот на Здружението дека договорот на партиите за формирање на ад хок телото за следење на медиумите нема значително да го подобри нивното известување.

„Иако АВМУ по препорака на телото поднело 68 прекршочни пријави, судот нема изречено ниту една казна, а провладините медиуми продолжиле да известуваат позитивно за ВМРО-ДПМНЕ и претежно негативно или неутрално за СДСМ“, стои во соопштението.


ЗНМ малку збунети и малку неспремни побараа ослободување на новинарот Божиновски


Скопје, 19 август, 2016 - 15:02 (META) 

Здружението на новинарите на Македонија (ЗНМ) смета дека Зоран Божиновски, неосновано се држи во притвор веќе 4 месеци, со цел да го спречат да не објавува нови скандали поврзани со власта, дека станува збор за политички монтиран случај, со кој се крши Европската конвенција за човекови права и бараат повлекување на обвинението против новинарот и сопственик на порталот „Буревесник“.

ЗНМ денеска ги стави во недоумица новинарите околу точната локација каде треба да се одржи прес-конференцијата,  а претставниците на највисокото раководство на Здружението се чини дојдоа неподготвени, без да бидат запознаени со неколку клучни детали околу случајот со новинарот Зоран Божиновски.

Имено, утрово ЗНМ до медиумите испрати имејл насловен „Известување за изјава пред Апелациониот суд во Скопје“, а во поканата стоеше дека „изјавата ќе биде дадена пред новата зграда на Јавното обвинителство„ а ЗНМ ќе дава изјава „во врска со судскиот процес против новинарот Зоран Божиновски“.

Прес-конференцијата сепак се одржа пред новата зграда на Јавното обвинителство, но со задоцнување од петнаесетина минути, бидејќи дел од претставниците на ЗНМ „тркнаа“ до Апелациониот суд за да проверат дали евентуално и таму чекаат новинарски екипи.

Ито така, во соопштението се поткраднати уште неколку грешки, непрецизности и несмасности. Така, иако тие најавија „изјава во врска со судскиот процес против Зоран Божиновски“, тој сè уште не е започнат, туку предметот е во фаза на обвинение, беше поднесено неодамна од Основното јавно обвинителство за гонење на организиран криминал и корупција.

Судскиот процес треба да започне на 1 септември, детал кој не им беше познат на претставниците на Здружението, како што не им беше познато ниту дека предметот против Божиновски, е предаден во Советот на јавни обвинители, наместо на Специјалното јавно обвинителство, кое минатата недела го побара од Обвинителството за организиран криминал.

Божиновски во 2013 година беше еден од осомничените во случајот „Шпион“, но бидејќи им беше недостапен на органите на прогонот, истрагата против него беше прекината. На 21 април годинава, Божиновски беше екстрадиран од Србија во земјава, откако беше уапсен од српските власти во Нови Сад врз основа на меѓународната потерница, што властите во Скопје ја имаа распишано против него во 2013 година.