Во собраниска процедура се законските измени за преземање на медицински сестри во ЈЗУ


Скопје, 13 ноември, 2018 - 16:20 (META) 

Министерството за здравство информира дека измените на Законот за здравствена заштита за преземање во јавно здравство, на медицинските сестри кои претходно работеле во приватни здравствени установи, основани под закуп во здравствените домови, заради затворање на приватни здравствени установи ПЗУ и во меѓувреме останале без работа, се во собраниска процедура.

Во измените на Законот e внесена oдредба согласно која медицинските сестри, кои ќе останат без работа може да бидат преземeни во јавни здравствени установи.

„Овие законски измени, кои сега се уште се во собраниска процедура, пред две недели се усвоени од Владата. Таа ги усвои измените на Законот за здравствена заштита, со можност за преземање здравствени работници со високо образование, стоматолози и фармацевти од приватните во јавните здравствени установи без распишување оглас. На овој начин ќе се пополнат празните работни места на здравствените работници, со пократки процедури“ се вели во соопштението на Министерство за здравство.


Итната помош е со бавни амбулантни возила кои често се расипуваат


Скопје, 29 октомври, 2018 - 16:05 (META) 

Поради доцнење и технички дефекти на амбулантните возила, Итната медицинска помош во Македонија е неефикасна, и наместо да нуди брза медицинска интервенција, во некои екстремни случаи и предизвикала губење на животи на граѓани, пишува „Порталб.мк“.

Техничките доцнења се настанати како последица на не амортизираните возила, а пак условите за нивно одржување не се предвидени ниту со Законот за здравствена заштита, ниту пак со Правилникот за работа на Итна медицинска помош.

Министерството за внатрешни работи и Министерството за здравство немаат никакви информации, но само во медиумите фигурираат три случаи кога амбулантните возила претрпеле дефекти, и не успеале да интервенираат на време. Како резултат на тоа, имало и губење на животи.

„Ние таквите случаи не ги евидентираме како црна хроника. Веруваме дека Министерството за здравство треба да ги евидентира таквите информации“, велат од МВР.

Такви информации нема ниту Министерството за здравство. Последниот случај се случи на 24 август 2018 година, каде што во една сообраќајна несреќа, неколку километри пред Тетово, амбулантното возило на Итна медицинска помош пристигнало со технички дефекти, и за да се стави во движење луѓето го туркале возилото.

„Тешка несреќа неколку километри пред Тетово, каде едно возило беше превртено. И возилото на Итна медицинска помош кое што пристигнало не било во ред, и истото потоа било ставено во движење со туркање”, велат од „Цивилмедиа.мк“.

Вториот случај се случил на 12 јули 2017 година, кога една 15-годишна девојка од Гостивар починала, при пренесувањето од Медицинскиот центар во Гостивар во Ургентниот центар- Скопје. Девојката од Гостивар имала болки во стомакот, а од Медицинскиот центар во Гостивар била испратена во 04.30 часот.

Третиот случај евидентиран во медиуми се случил на 13 март 2017 година во Крива Паланка.

„Двајца пациенти од Крива Паланка претходната ноќ со возило на Итна медицинска помош биле испратени кон Ургентниот центар во Скопје. Возилото доживеало дефект, и додека дефектот бил отстранет, двата пациенти починале”, се вели во веста на „СДК.мк“.

Итна медицинска помош е предвидена во Законот за здравствена заштита. Со законот е предвидена само услугата, но не и условите за обезбедување на добра состојба на амбулантни возила. Според она што го вели законот, начинот на работа Итна медицинска помош е предвиден со Правилник за организацијата и начинот на вршење на работата на Итната медицинска помош, што се усвојува од министерот за здравство.

Член 17 од равилникот наведува дека „Службата за брза медицинска помош работите на медицинска помош ги извршува со помош на транспортни средства кои имаат технички карактеристики што се во согласност со стандардите.“

Но под кои услови треба да се менуваат и сервисираат амбулантните возила на Итна медицинска помош не е предвидено ниту со Законот за здравствена заштита, ниту пак со Правилникот за работа на брзата помош, иако и во двете фигурира како медицинска услуга.

Граѓаните бараат Итната медицинска помош да биде поефикасна со соодветни возила, како и тоа
Министерството за здравство да го измени Правилникот за работа за да ги утврди условите кога е потребна промена и сервисирање на едно амбулантно возило.


Ејуп Рустеми е нов директор на Македонски пошти


Скопје, 22 август, 2018 - 16:43 (META) 

Владата на денешната седница одлучи да го именува Ејуп Рустеми за нов директор на Македонски пошти.
Досегашниот директор на Македонски пошти Фадис Реџепи е разрешен од оваа должност заради завршување на неговиот мандат, информира владината прес-служба.

Владата ја разгледа и усвои и Информацијата за склучување на Спогодба за утврдување на вредноста на бодот за најниската плата за најнизок степен на сложеност и за начинот на пресметување и исплата на платите во здравствената дејност, и ќе изнесува 13.286 денари.

Од владината служба за информирање соопштија дека со оваа корекција вредноста на бодот во здравството се зголемува за пет отсто, а пресметувањето на најниската плата ќе отпочне да се применува со исплатата за септември, и согласно колективниот договор нема да изнесува помалку од 15.770 денари.


Мицкоски: Нема ниту датум за преговори со ЕУ, ниту безусловна покана за НАТО


Скопје, 12 јули, 2018 - 12:44 (META) 

Нема ниту датум за преговори со ЕУ, ниту безусловна покана за НАТО затоа што имаме неспособна влада, повикувам на протест во Кавадарци, в недела во 13 часот, порача претседателот на ВМРО-ДПМНЕ, Христијан Мицкоски, во видео обраќање.

Тој ја обвини актуелната власт дека посеала опасен отров, молчи за неправдите и не се грижи за граѓаните.

– Дојдоа на власт со ветување за подобар живот и повисоки плати. Кога доаѓаа на власт пак беа најгласни дека додека немало правда немало мир, не се колебаа да ги злоупотребат семејните и другите лични трагедии. И не им беше тешко да уриваат, да уништуваат. Да деградираат цел еден систем. Отровот кој се посеа во општеството предизвика омраза, завист и нетрпеливост. Ветуваа чуда. А сега кога се на власт молчат за неправдите, ладнокрвните убиства ги третираат како статистичка евиденција во црните билтени, за владата тоа се обични насилства а не свирепи убиства – вели Мицкоски.

Претседателот на ВМРО-ДПМНЕ порача дека од животот што го ветувала власта, сега има само умирања во ходниците на болниците, скапотија и постојани престрелки.

-Животот, личните трагедии, зацрнетите семејства не им се така атрактивни  и важни како порано, нема да чуете анализа за тоа дека луѓе умираат во ходниците во болниците, додека пак здравството се уште е недопрено од животот кој толку многу го ветуваа. Нема да чуете ниту за тоа дека  има недостиг на инкубатори за бебиња во Гинеколошко акушерската клиника, за тоа дека плаќаме највисока цена на бензин, дека од сиромаштија умираат луѓе, за тоа дека над 800 криминалци ослободија, дека престрелките и физичките насилства се болното секојдневие кое што го мачат секој родител, секој еден човек – вели Мицкоски.
Тој своите политички противници ги обвинува дека немаат образ, чест и достоинство.

-За власта зборот, не е збор, ниту делата реалност. Нема ниту датум за преговори со ЕУ, ниту безусловна покана за НАТО. А нема затоа што имаме неспособна влада. Мора да престанат поразите, а одговорот за тоа е секој еден од вас – рече тој.

Претседателот на ВМРО-ДПМНЕ ги повика сите граѓани на голем протест против власта, кој со почеток во 13 часот в недела ќе се одржи во Кавадарци. Протестниот марш ќе почне од кружниот тек „Сашко Гешковски“ до спомен плочата и паметникот во Кавадарци посветен на формирањето на првиот комитет на ВМРО.


ВМРО-ДПМНЕ: Хаосот во здравството е резултат на непрофесионално раководење


Скопје, 5 февруари, 2018 - 14:34 (META) 

Владата на Зоран Заев го урниса здравствениот систем. Доказ се секојдневните скандали кои се случуваат и кои, за жал, пациентите и граѓаните ги плаќаат со сопственото здравје и живот, изјави денеска на прес-конференција Драги Јовевски од ВМРО-ДПМНЕ.

– Според информации кои не се потврдени, во последните 10 дена на Гинеколошко-акушерската клиника се случиле неколку смртни случаи на новороденчиња, случаи за кои било строго забрането да се информираат медиумите. Отворено го прашуваме министерот за здравство, Венко Филипче и директорката на ГАК, колку смртни случаи на новороденчиња се случиле, а за кои не била информирана јавноста? Дали е пронајдена опасната бактерија МРСА во креветчињата на новороденчињата и конечно дали некој ќе сноси одговорност – вели Јовевски.

Хаосот за здравството, според Јовевски, е резултат на непрофесионално раководење и додава дека пациентите ризикуваат да бидат приведувани или исфрлани со обезбедување само затоа што се пожалиле на услугата.

– Секој ден слушаме за недостатоци на лекови, смртни случаи од невнимание и слични семејни и лични трагедии. Тие ветуваа унапредување, а на дело се гледа урнисување и импровизација на здравствената услуга дури и во највисоките здравствени установи како што се клиниките во клиничкиот центар во Скопје – потенцира Јовевски.


Филипче: Ќе правиме реформи за никогаш повеќе да нема здравствени кризи


Скопје, 28 декември, 2017 - 11:25 (META) 

Ќе направиме се, па и измени на законската регулатива за никогаш повеќе да не се повтори криза како оваа со инсулинот и сите лекови во иднина да се набавуваат дури и предвреме. Ќе направиме и целосна надградба на електронскиот систем во здравството за тој да ги опфати сите институции и да ја олесни работата и да ни овозможи многу поголем увид во состојбите, порача денеска Венко Филипче на своето прво обраќање пред новинарите како министер за здравство.

– Сакаме да се подобри здравствената регулатива и тендерите за набавка на лековите да се распишуваат за подолг период наместо една година, како и да се распишуваат одреден период пред новата набавка, за никогаш повеќе да не се повтори ваква криза. Моментално нема инсулинска криза благодарение на донацијата од една фирма производител и ве уверувам дека ќе направиме се повеќе да не се случи таква криза – рече новиот министер за здравство.

Тој најави и изработка на нова позитивна листа на лекови, на која, како што рече, ќе се најдат и најскапите лекови.

Филипче најави целосна реформа на здравствениот систем за да се избегнат досегашните проблеми во здравството, почнувајќи од надградување и усовршување на електронскиот систем за евиденција.

Во поглед на паралелниот увоз на лекови, Филипче рече дека веќе се разговара со Министерството за информатичко општество и администрација да се измени законот за паралелен увоз и да се воведе сертификат за квалитет, како и систем за следење, за да се знае која доза лек каде завршила.

Филипче рече и дека со реформите ќе се настојува да се намалат непотребните трошења, па се размислува сите триесетина клиники во Скопје да се обединат во еден клинички центар, за да не се делат плати и хонорари на десетици директори и членови на управни одбори, а истата замисла ја има и за други капацитети во друтите градови.

Покрај зголемувањето на платите во здравството од 5 отсто од втората половина на следната година, новиот министер за здравство вети и зголемување на надоместокот за дежурства во работни денови од 900 до 1.340 денари сега на 2.500 до 3.000 денари, а за викенд дежурства наместо досегашните 2.800 денари да се исплаќаат по 4.000 денари.

Филипче рече и дека нема да го поништи конкурсот за избор на советник за здравствен менаџмент и здравствена политика, на кој една од трите барани сфери на образование беа и историските науки. Рече дека ќе се направи нова систематизација, за да не се повторуваат такви ситуации, а според министерот, избраниот кандидат на новиот конкурс не е толку проблематичен, оти сепак е економист.


Обезбедени 40 инкубатори за интензивна нега за 12 здравствени установи


Скопје, 31 октомври, 2017 - 21:02 (META) 

Владата на Република Македонија денеска на својата 34. седница одлучи да додели 40 инкубатори на 12 здравствени институции во земјата, соопшти владината прес-служба.

„Владата ја усвоила одлуката за давање на трајно користење на осум инкубатори за интензивна нега на Јавната здравствена установа Универзитетска клиника за гинекологија и акушерство – Скопје, како и одлуката за давање на трајно користење на уште шест инкубатори на Јавната здравствена установа Универзитетска клиника за детски болести од Скопје“, стои во соопштението.

На предлог на Генералниот секретаријат на Владата на Република Македонија, исто така е одлучено на трајно користење да се доделат уште 16 инкубатори на Јавната здравствена установа Универзитетска клиника за гинекологија и акушерство – Скопје, како и 10 инкубатори на клиничките и општите болници во Штип, Тетово, Струга, Прилеп, Охрид, Куманово, Битола, Гостивар и во Струмица, и на Специјалната болница за гинекологија и акушерство Чаир, во Скопје.


Таравари: Ако гостиварци не ми веруваат, се враќам на лекарската професија


Скопје, 10 септември, 2017 - 10:59 (META) 

Министерот за здравство во заминување, Арбен Таравари, во неделното интервју на „Радио Слободна Европа“ зборува за проблемите во ресорот што ги затекна и со кои се справуваше, како и за својата кандидатура за градоначалник на Гостивар.

– Сега е моментот да видам колку тежам и вредам во мојот град. Ако тие ми веруваат и ми дадат гласови, ќе знам дека вредам во политиката. Ако не ми дадат гласови и мислат дека не треба да продолжам во политиката, јас си имам златен занает – вели министерот за здравство во заминување.

Арбен Таравари, кој важи за истакнат стручњак во својата професија, верува дека во Министерството за здравство ќе има континуитет по него.

– Точно е дека нема да стигнам да ги видам првите резултати од тримесечното работење на директорите, меѓутоа јас мислам дека во Министерството ќе има континуитет и за тоа гарантирам, и во здравствените политики и во идеите што јас ги почнав во првите 100 дена, така што, кој било да е мој наследник, јас се надевам дека тој ќе продолжи по истиот пат, ќе се трасираат и ќе се очекуваат истите резултати што јас ги почнав во првите 100 дена, така што граѓаните нема да почувствуваат дека има некаква промена, само личноста ќе биде друга – вели Таравари.

Запрашан за смртните случаи во текот на неговото министерување, вклучително и за мртвороденчињата, Таравари вели дека комисијата формирана уште пред неговиот мандат, а потоа преоформена во нов состав, треба да даде решенија, односно препораки.

– Пред јас да дојдам за министер, имаше комисија која требаше да ги разгледува овие случаи и да направи одреден акциски план, меѓутоа, за жал, таа комисија не се имаше сретнато речиси две години. Сега направивме нова комисија која ќе се занимава само со смртта на доенчиња. Комисијата ќе даде одреден акциски план, кој Министерството ќе треба да го спроведе, сè со цел до 2021 година да имаме како предизвик да ја намалиме смртта на доенчињата до 20 отсто. Не само Министерството, туку и повеќе невладини организации во Македонија ни стојат на располагање за ова, бидејќи еден од индикаторите кој кажува колку е добра и стабилна здравствената политика во една држава е смртноста на доенчињата. Комисијата веќе е назначена, тие што поскоро треба да дадат одредени чекори и мерки што треба да ги преземеме ние како администрација за да ја достигнеме таа цел, да ја намалиме смртта на доенчињата за 20 отсто за четири години – вели министерот за здравство во неделното интервју за „Радио Слободна Европа“.


СДСМ: Здравството тонеше поради криминалните апетити на Тодоров и на Груевски


Скопје, 9 септември, 2017 - 13:48 (META) 

„Лицемерна и лажна е загриженоста на ВМРО-ДПМНЕ за состојбата во здравството, бидејќи сите ги чувствуваат последиците од катастрофалните штети што ВМРО-ДПМНЕ ги направи во здравствениот систем. Никола Груевски, Никола Тодоров и ВМРО-ДПМНЕ оставија пустош во здравството, руинирани болници, понижени пациенти и лекари, неупотреблива опрема и огромни долгови на здравствените установи“, реагира СДСМ на денешната прес-конференција на ВМРО-ДПМНЕ.

„Поради криминалното и расипничко владеење на Тодоров и на Груевски, сите здравствени установи во Македонија тонеа во милионски долгови. Клиничкиот центар во Скопје должи 3 милиони евра, бидејќи цели 10 години не се плаќале сметки за вода, а Градската општа болница „8 Септември“ има вкупен долг од 5 милиони евра. Владата предводена од СДСМ стави крај на таквото криминално, коруптивно и расипничко работење во здравството“, се вели во реакцијата.


ВМРО-ДПМНЕ: СДСМ направи цунами во здравството


Скопје, 9 септември, 2017 - 10:55 (META) 

„Ова што го прави СДС на сопствениот народ и држава е рамно на цунами. Изминативе 100 дена од доаѓањето на власт неспособната влада на СДС ветуваше разно-разни реформи и подобрување на услугите во здравството, а од сето тоа македонските граѓани не видоа ништо“, обвини денеска Дафина Стојаноска од ВМРО-ДПМНЕ на прес-конференција пред Министерство за здравство.

Таа рече дека владата на СДСМ во првите недели направила реваншистичка смена на дирекорите во јавното здравство, а не набавила ниту еден нов медицински апарат или опрема.

– Ветувањето за зголемување на платата на докторите за 100.000 денари, СДС не го реализира ниту за 1 денар. Укинат е ургентниот интернистички центар при кампусот „Мајка Тереза“. Запрени се дури и проектите за едукацијата што врвните странски стручњаци и лекари ја правеа во Македонија, а тоа беше организирано од страна на владата – рече Стојаноска.

Таа порача и дека „неспособноста на владата на СДСМ“ се гледа и во тоа што „за една недела умреа 10-тина дечиња по разни болници, а за ова одговорност од СДС немаше“.