!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Авганистанските сили спасиле 30 луѓе од талибански затвор


Кабул, 19 ноември, 2017 - 12:15 (META) 

Најмалку 30 лица се спасени во рација што ја спровеле авганистанските сили заедно со специјалните странски сили во талибански затвор во провинцијата Хелманд.

Ова го соопштија војската и локалните власти.

Помеѓу спасените се и четири деца кои имаат помалку од 12 години и двајца полицајци.

Талибанците уапсиле повеќе од 20 лица поради давање помош на владата или затоа што се членови на семејствата на авганистански војници или полицајци.

Во меѓувреме, талибанците соопштија дека луѓето кои се спасени се криминалци осудени поради грабежи, киднапирања и други кривични дела.


Горан Грујовски доби година и пол затворска казна во случајот „Тврдина 2“


Скопје, 8 ноември, 2017 - 12:11 (META) 

Поранешниот началник на петтата управа во МВР, Горан Грујовски, кој беше во бегство, доби една и пол година затворска казна за незаконското палење на илјадници списи во случајот „Тврдина 2“ на СЈО. Другите шест обвинети, вработени во УБК, добија условни казни за фалсификување службена исправа, пет од нив се осудени на условна казна од 9 месеци, а една од нив на 2 години.

На Грујевски, кој се наоѓа во екстрадициски притвор во Солун, му се судеше во отсуство.

Обвинителката на Специјалното јавно обвинителство, Ленче Ристоска, пред два дена, на завршните зборови на судењето, побара од судот максимална казна за Грујовски, за случајот „Тврдина 2“, додека за другите шест службенички од УБК, обвинети во случајот, таа му предложи на судот да им одреди алтернативни, односно условни казни.

Ристоска тогаш истакна дека мотивот на Грујовски, како наредбодавец за уништувањето на документацијата од УБК, бил да се сокријат трагите за тоа кој и како прислушувал стотици граѓани во Македонија и да се отежни истрагата за масовното кршење на човековите слободи и права од страна на Управата за безбедност и контраразузнавање. Таа рече дека уништувањето на документите во полициската база Брест во Петровец, се случувало истовремено со уништувањето на системите од незаконското следење на комуникациите во МВР, за што Грујовски, исто така, е обвинет во случајот „Тврдина“.


Ристоска побара од судот максимална казна за Грујовски за „Тврдина 2“


Скопје, 6 ноември, 2017 - 11:55 (META) 

Обвинителката на Специјалното јавно обвинителство, Ленче Ристоска, денеска побара од судот максимална казна за поранешниот началник на петтата управа, Горан Грујовски, за случајот „Тврдина 2“, додека за другите шест службенички од УБК, обвинети во случајот, таа му предложи на судот да им одреди алтернативни, односно условни казни.

Инаку, Грујовски и службеничките во УБК беа обвинети за уништување на документацијата од незаконското прислушување. СЈО ги гонеше за фалсификување службена исправа, според членот 361, став 2, за што е предвидена затворска казна од три месеци до пет години.

По денешните завршни зборови, судот в среда ќе ја изрече пресудата.

Ристоска, во завршните зборови пред Кривичниот суд во Скопје за случајот „Тврдина 2“, истакна дека мотивот на Грујовски, како наредбодавец за уништувањето на докуемнтацијата од УБК, бил да се сокријат трагите за тоа кој и како прислушувал стотици граѓани во Македонија и да се отежни истрагата за масовното кршење на човековоте слободи и права од страна на Управата за безбедност и контраразузнавање. Таа рече дека уништувањето на документите во Петровец, во близина на Скопје, се случувало истовремно со уништувањето на системите од незаконското следење на комуникациите во МВР, за што Грујовски исто така е обвинет во случајот „Тврдина“.

Обвинителката на СЈО, побара од судот при определувањето на казната да не го зема како олеснителна околност тоа што Грујовски е татко на две деца, туку фактот дека е во бегство, со што децата и семејството ги оставил на цедило, без извор на егзистенција.

За шесте службенички од УБК, кои наместо да ја одбијат наредбата на Грујовски, учествувале во постапката за уништување на документите, Ристоска побара условни казни. Како отежнителна околности таа побара од судот да го оцени тоа што ниту една не се покајала за стореното, но нагласи дека секоја од нив, наведувајќи ги по име, имала беспрекорно однесување во УБК и дека немале дамка во работењето и оти дел од нив се самохрани мајки.

Адвокатот на Грујовски, Љупчо Шврговски, пред судот рече дека во случајот нема основи за кривично, туку за евентуално прекршочно дело. Одбраната наведе дека СЈО нема мандат да гони дела сторени во 2015 години и дека ова проширување на надлежноста на СЈО ќе доведе до правна конфузија.

Инаку, на Грујовски му се судеше во отсуство, бидејќи тој заедно со својот колега од УБК, Никола Бошковски, се наоѓаат во екстрадициски притвор во Солун, откако беа уапсени на солунскиот аеродром, во обид со лажни бугарски пасоши да заминат за Будимпешта.


Во Косово запалени македонски знамиња поради затворските казни за „Диво Насеље“


Гњилане, 3 ноември, 2017 - 9:48 (META) 

Во знак на протест поради одлуката на скопскиот Кривичен суд за казните во случајот „Диво Насеље“, синоќа во косовските градови Гњилане и Пеќ јавно биле запалени македонски знамиња, пренесоа српските медиуми.

„Поради револт за неправдата сторена против нашите херои од словенската марионетска држава, го запаливме вечерва нивното знаме, тука пред споменикот на легендарниот Агим Рамадани – Катана во Гњилане. Ги повикуваме сите албански државници да се спротивстават на ова и да го заштитат албанскиот народ во Илирија. Албанија ќе го стори тоа“, порачаа од навивачката група „Соколи“ во Гњилане.

Кривичниот суд во Скопје вчера им изрече седум доживотни казни затвор, 13 казни по 40 години затвор, шест по 20 години, една од 18 години, две од 14, две од 13, две по 12 години затвор и четири ослободителни пресуди на обвинетите за настаните во кумановското Диво Насеље во мај 2015 година, во кои загинаа осуммина припадници на македонските безбедносни сили.

Ова не е првпат македонското државно знаме да биде запалено во Косово.

Македонското знаме беше запалено пред македонската амбасада во Приштина за време на протестите по пресудата за случајот „Монструм“, на почетокот на јули 2014 година. Тогашната претседателка на Косово, Атифете Јахјага, го оцени како „неприфатлив“ ваквиот чин и побара од полицијата и правосудните органи да ги откријат сторителите.

Една година подоцна, државното знаме на Република Макединија беше запалено за време на кошарски натпревар во Пеќ. Инцидентот се случи на 15 мај 2015 година, само неколку дена по настаните во кумановско Диво Насеље.


Седум доживотни и 26 долгогодишни затворски казни добија обвинетите во „Диво Насеље“


Скопје, 2 ноември, 2017 - 14:55 (META) 

Седуммина обвинети за настаните во кумановско Диво Насеље од 9 и 10 мај 2015 година добија доживотни казни затвор, 13 обвинети добија по 40 години затвор, шестмина по 20 години, еден обвинет 18 години, двајца по 14 години, двајца по 13 години затвор и двајца по 12 години затвор.

Ова се пресудите за 33 обвинети во случајот „Диво Насеље“ што денеска ги соопшти судијката Верка Петковска. Четворица од вкупно 37 обвинети добија ослободителни пресуди.

Денешното рочиште помина во тензична атмосфера, со големо полициско обезбедување, внатре и пред комплексот судови во Скопје.

Пред да бидат прочитани пресудите, обвинетите станаа од своите места и почнаа да ја пејат албанската химна, да извикуваат „УЧК“ и да се закануваат дека крвта на убиените нема да остане неодмаздена и дека во Македонија ќе нема мир.

Судијката ги острани од судницата повеќето обвинети кои правеа неред, по што ги прочита пресудите.

Обвинителството за гонење организиран криминал и корупција бараше доживотен затвор за сите 37 обвинети за тероризам и терористичка организација, додека адвокатите на обвинетите, пак, бараа ослободителни пресуди бидејќи, според нив, има недостиг од докази за стореното кривично дело.

Адвокатот Насер Рауфи, бранител на дел од обвинетите, по завршувањето на рочиштето, рече дека тие како одбрана не очекувале коректни казни, но не очекувале ниту вакви драконски казни.

– Обвинителството сè уште не е реформирано. Со најавената меѓународна истрага, ќе докажеме дека овие луѓе се донесени овде за туѓи интереси. Сите бранители ќе поднесат жалба на пресудите за обвинетите. Има информации за докази со кои ќе се докаже дека ова е монтирано рочиште. Со меѓународна истрага ќе се реши овој случај. Тајните служби се тие што го измонтираа овој случај – рече Рауифи.

Инаку, министерот за внатрешни работи на 20 септември изјави дека Владата ќе бара дополнителна – меѓународна истрага за настаните во Диво Насеље за да се дознае вистината за овој настан.

– Во однос на кумановските настани, ќе кажам две работи. Прва работа е дека тој случај добива некаква судска разврска, меѓутоа ние, како Влада, презедовме обврска дека ќе направиме дополнителна и тоа меѓународна истрага, за на еден соодветен начин јавноста да ја дознае вистината за овој настан и за тоа што се случувало во кумановските настани и согласно на таа истрага, да имаме една постапка во која ќе веруваат мнозинството граѓани на Република Македонија – изјави тогаш Спасовски.

Во настаните во Куманово од 9 и 10 мај 2015 година, каде вооружена група се судри со македонските безбедносни сили, загинаа осум припадници на безбедносните сили, а околу 40 беа повредени. Целиот случај го следат многу контроверзии кои сè уште не се разјаснети.

Судскиот процес за случајот „Диво Насеље“ почна на 9 февруари минатата година.


Омбудсман: Дел од затворениците не гласаа поради истекот на важноста на личните карти


Скопје, 28 октомври, 2017 - 18:18 (META) 

Од канцеларијата на народниот правобранител реагираат дека, како и за гласањето во првиот круг на локалните избори, така и денеска, дел од затворениците не гласале поради истекот на важноста на нивните лични карти.

Советникот на Народниот правобранител, Зоран Билбиловски, рече дека управата на затворот „Идризово“ не води сметка за тоа кога треба да им ги обнови личните карти.

„Кога ќе дојдат на издржување на затворските казни, осудените лица ѝ ги оставаат личните карти на управата. Управата не ги известува кога изминува рокот на личните документи и не им помага да си ги обноват“, вели Билбиловски.

За вториот круг на локалните избори, кој ќе се одржи утре, денеска, од 7 до 19 часот гласаат избирачите кои се на издржување казна затвор или се во притвор. На гласачките места во 13 казнено-поправни установи, избирачко право имаат 939 гласачи.


Обвинителство бара 10 години затвор за обвинетите за грабежот во НЛБ


Скопје, 27 октомври, 2017 - 12:41 (META) 

Основното јавно обвинителство Скопје, во завршните зборови за милионскиот грабеж во НЛБ, денеска побара од судот на обвинетите да им одреди највисока казна, која според Кривичниот законик изнесува 10 години затвор.

Четворицата обвинети, Бобан Смилевски, неговиот брат Горан Смилевски, Борис Минчевски и Мирослав Каевски, на претходното рочиште ја признаа вината, но не открија каде се парите и што сториле со нив. Денеска и тие треба да дадат завршни зборови.

Обвинителството бара највисока казна за првообвинетиот Бобан Смилевски бидејќи ја искористил довербата во банката и ги убедил другите да ги уништат доказите по кражбата, додека за неговиот брат, Горан Смилевски, се бара идентична казна бидејќи откако ги примил парите, го фрлил телефонот и не открива каде се парите.

Единствена олеснителна околност, која може да влијае на намалување на казната, според Обвинителството, би било тоа што обвинетите претходно немале сторено кривични дела.

Адвокатите на обвинетите, пак, бараат поблаги казни бидејќи нивните клиенти ја признале вината и биле угледни луѓе во општеството, односно Горан Смилевски е претседател на Синдикатот на вработените во Народна банка, поради што, според неговиот адвокат, уживал висок општествен углед и добивал признанија и високи оценки за неговата работа.

Според обвинителниот акт, обвинетите, искористувајќи ја својата работна позиција и познавањето на процесите на работа во банката, првин украле 400.000 швајцарски франци и 375.000 евра, а потоа украле уште 2 милиони швајцарски франци и 270.000 евра.

Надлежниот обвинител, кој го води предметот, поднесе обвинителен предлог против други четири лица, кои како одговорни лица во банката „несовесно постапиле во вршењето на своите овластувања и должности“ и со тоа ја овозможиле кражбата на големата сума пари. Тие се товарат за несовесно работење во службата. Постапката против овие четири лица продолжува одвоено.


Рускиот опозициски лидер Алексеј Навални пуштен од затвор


Москва, 22 октомври, 2017 - 12:09 (META) 

Рускиот опозициски лидер, Алексеј Навални, е пуштен од затвор по 20-дневната казна, на која беше осуден поради повикување на недозволени протести, јавуваат светските агенции.

Навални беше уапсен на 29 септември, кога планираше да замине на протест во градот Нижни Новгород. Сепак, тој не беше уапсен поради овој протест, кој беше одобрен од руските власти, туку за повикување на друг, недозволен собир, во Санкт Петерсбург, родниот град на рускиот претседател Владимир Путин.

Навални, кој планира да се кандидира за претседател на изборите во март следната година, и претходно беше во затвор поради организирање и повикување на протести.

По излегувањето од затвор, Навални преку социјалните мрежи изразил надеж дека ќе присуствува на вечерашните демонстрации во Астрахан.


Обвинителството во Солун ќе одреди каде ќе бидат притворени Грујовски и Бошковски


Скопје, 19 октомври, 2017 - 17:51 (META) 

Поранешниот началник на петтата управа, Горан Грујoвски, и Никола Бошковски, вработен во УБК, денеска ќе бидат изведени пред Обвинителството во Солун, каде ќе им биде одредено во кој затвор ќе бидат притворени до комплетирањето на предметот за нивна екстрадиција, соопшти Министерството за правда.

Инаку, оваа информација до министерството стигнала од Канцеларијата за конзуларни, економски и трговски работи на Република Македонија во Солун, која денеска официјално информирала дека Грујовски и Бошковски биле уапсени вчера во 15 часот.

„При пасошка контрола биле евидентирани со фалсификувани бугарски пасоши и притоа е утврдено дека за нив е распишана меѓународна потерница од Интерпол по барање на Министерството за внатрешни работи на Република Македонија“, стои во соопштението од Министерството за правда.

Денеска попладне и Министерството за внатрешни работи потврди дека добило известување од Интерпол – Атина за апсењето на Грујовски и Бошковски.

„Известувањето веднаш е испратено до Министерството за правда, за тоа да ги достави сите потребни документи за екстрадиција“, стои во соопштението на МВР.

Грујовски и Бошковски веќе три месеци се во бегство за да ја избегнат мерката притвор што им беше одредена откако СЈО поднесе обвиненија за предметите „Тврдина“ и „Таргет“, заради незаконско прислушување на илјадници граѓани преку злоупотреба на системите за следење во МВР, како и за физичко уништување на дел од таа опрема.


Напаѓачот на Шекеринска осуден на четири години затвор


Скопје, 12 октомври, 2017 - 13:53 (META) 

Панче Ангелов, кој ја нападна Радмила Шекеринска, тогаш пратеничка, а сега актуелна министерка за одбрана, за време на насилствата во Собранието на 27 април годинава, денеска од Кривичниот суд во Скопје е осуден на затворска казна од четири години.

Инаку, за кривично дело насилство предвидена е казна затвор од три до 10 години.

Ангелов на рочиштето, минатата недела, ја призна вината и рече дека ѝ се извинува на целата јавност за грозоморното дело што го направил, а им се извини и на оштетените, односно на Шекеринска.

Неговиот адвокат, Драган Пешевски, кој му беше доделен по службена должност, побара од судот да му одреди пониска казна, а како олеснителни околности ги наведе неговото признание, возраста, каењето и досегашната неосудуваност. Тој додаде дека Ангелов кривичното дело го сторил во момент на афект.

Обвинителката во случајот побара од судот да го казни Ангелов, но притоа да се ценат олеснителните, но и отежнувачките околности.

Ангелов за време на насилствата во Собранието ја повлече Шекеринска за коса, откако претходно беше удрена од статив по главата. Тој, според обвинението, бил во првата група што влегла во Собранието и заедно со најнасилните лица се упатил директно во прес-салата.

Шекеринска на рочиштето минатага недела побара одговорност за Ангелов, но и за организаторите на насилствата во Собранието.