Три години затвор за Павлевски, година и два месеци за Георгиевски за нападот врз Села


Скопје, 13 јуни, 2018 - 11:21 (META) 

Кривичниот суд во Скопје им определи затворски казни на двајца обвинети за насилство во Собранието на 27 април. Обвинетиот Цејо Георгиевски е осуден на една година и два месеци, додека три години затворска казна доби Стојан Павлевски. Во казната ќе им се пресмета и времето поминато во притвор.

На двајцата им се судеше за насилство во одвоената постапка за нападот врз пратеникот Зијадин Села во Собранието од 27 април минатата година. На претходното рочиште, Георгиевски и Павлевски ја признаа вината за делот откако обвинителот го преиначи обвинението од обид за убиство на Зијадин Села во насилство. Двајцата во завршни зборови, кажаа дека се покајуваат за стореното дело и дека немале намера никого да повредат.

Стојан Павлевски прв влегол и се упатил кон пратениците и почнал да ги напаѓа, образложи судијката, според која тоа е причината за повисоката затворска казна која што му е изречена.

Обвинителот Дарко Јакимовски, во завршни зборови, кажа дека со оглед на признанието на вина Судот обвинетите да ги прогласи за виновни и казни за стореното дело.

„Казната за ова дело е од шест месеци до пет години, што отвора можност за алтернативна санкција. Сметам дека било какво алтернативно казнување ќе значи банализација на делото. Ако вака лесно се влегува во Собранието и се напаѓа, што станува со останатите заштитени објекти. Обвинетите биле свесни, без разлика на поводот, дека ја надминале дозволената граница“, рече Јакимовски. Тој додаде дека обвинетите не одговараат само за напад врз Села, туку за целокупните дејствија во Собранието и прес центарот.


Алeксандар Василевски-Нинџа и се предал на полицијата, одреден му е притвор


Скопје, 11 јуни, 2018 - 13:55 (META) 

Александар Василевски-Нинџа кој е обвинет за настаните на крвавиот четврток во Собранието на 27 април минатата година, и се предал сам на полицијата и денеска дал исказ во Kривичeн суд, од каде потоа бил пренесен во затворот во Шутка.

Нинџа подолго време не беше достапен за органите на прогонот.

Според веб-страницата на МВР за потраги, сè уште недостапни за полицијата се Дејан Давидовски и Митре Питроповски.

Тој е познат по тоа што досега е осудуван за низа тешки кривични дела, а еден период му беше обезбедување на поранешниот директор на УБК, Сашо Мијалков.


„Твитер“ за затворската казна на Груевски: Она на М! Марица?


Скопје, 23 мај, 2018 - 15:12 (META) 

Откако во Кривичниот суд беше прочитана пресудата за поранешниот премиер Никола Груевски во случајот „Тенк“ на СЈО и тој беше осуден на две години казна затвор, на социјалните мрежи се масовно коментира настанот.


Бобан Илиќ осуден на шест години затвор за случајот „Алмир“


Куманово, 5 април, 2018 - 14:57 (META) 

Бобан Илиќ е осуден на шест години казна затвор за случајот со малиот Алмир, одлучи кумановскиот суд од каде велат дека казната е соодветна со оглед на настанатите последици.

-Судот ги имаше предвид сите докази и закон рамки за или соодветна казна согласно дејствијата кои ги презеле и настанатата ситуација. За останатите тројца, судот ја имаше предвид последицата, затоа е одредена минималната казна – рече судијката Денковска.

Таткото на Алмир, Седат Алиу, беше осуден на шест месеци затвор, Абдула Алиу, 9 месеци затвор, и Сами Демири 9 месеци затвор за делото „насилство“.

-Срамно е што за таков сериозен прекршок ќе му се изрече пресуда од 6 години. Судот не ги зема предвид многуте факти, вклучувајќи го и животот на младиот Алмир Алиу, а пак за да биде пресудата е уште поскандалозна, судот му изрече казна на таткото и на семејството на Алмир. Јас како правник ќе се борам да докажам дека е ова монтиран случај. Самото обвинителство го водеше процесот за ваков резултат да се добие. Ние верувавме дека судот ќе изрече многу повисока казна предвидена согласно Кривичниот законик рече адвокатот Асмир Алиспахиќ.

Обвинетиот Бобан Илиќ се товари за „тешко дело против безбедноста на луѓето и имотот во сообраќајот“, во врска со смртта на Алмир.


Одбраната на Младиќ бара поништување на доживотната казна затвор


Хаг, 5 февруари, 2018 - 18:54 (META) 

Поради влошената здравствена состојба, одбраната на поранешниот воен командант на босанските Срби, Ратко Младиќ бара укинување на пресудата за доживотен затвор.

Младиќ покрај досегашните здравствени проблеми има и когнитивни нарушувања и благ степен на деменција. Одбраната тврди дека овие болести не му биле дијагностицирани во затворот во Хаг и не биле третирани како што треба.

Неговите адвокати бараат од Меѓународниот механизам, што ги презеде делата на Хашкиот трибунал, да ги испита активностите на официјалните лица и медицинскиот персонал во затворот. Адвокатите тврдат дека овие лица им забраниле пристап на одбраната до медицински документи, кои биле доказ во тешката состојба на Младиќ, не ја објасниле неопходната медицинска нега и не дозволиле затвореникот да го прегледаат независни лекари.

Младиќ беше осуден на доживотен затвор на 22 ноември минатата година за геноцид, злосторства против човештвото и кршење на обичаите и законите на водење војна.


И Фадил Арслани, осуден во случајот „Чекан“ пуштен од затвор поради лекување


Скопје, 29 декември, 2017 - 10:12 (META) 

Фадил Арслани, осуден на 11 ипол години затвор во случајот „Чекан“ вчера бил пуштен од затвор поради лекување. Од Затворската управа за „Алсат-М“ ја потврдиле информацијата дека за Арслани е прекинато издржувањето на казната поради неговата здравствена состојба.

По добивањето на потребниот третман, што, според информациите на управата, ќе потрање околу 20 дена, Арслани ќе биде повторно вратен во затвор.

Кривичниот суд во Скопје во јули минатата година на седуммина од обвинетите во случајот „Чекан“ им одреди вкупна затворска казна од 53 години и 6 месеци. Првообвинет во случајот беше Фадил Арслани, кој заедно со уште едно лице добија највисоки казни од по 11 ипол години затвор.

Полициската акција „Чекан“ беше спроведена во декември 2015 година, во Гостиварско, а обвинетите се товареа за кривичните дела лихварство и изнуда. Во случајот беа гонети 21 лице, од кои со тројца Обвинителството постигна спогодба за признавање на вина во текот на истрагата, а со едно лице беше постигната спогодба во фаза на оценка на обвинителниот акт.

Инаку, вчера по по десет години зад решетки, од затворот „Идризово“, исто така поради лекување беше пуштена и Станислава Чочороска.

Во 2007 година таа беше осудена на 14 ипол години затвор поради организирање транспорт на 486 килограми кокаин, скриени во канти со поликолор.


Чочороска по десет години зад решетки излезе од затворот „Идризово“


Скопје, 28 декември, 2017 - 15:38 (META) 

Станислава Чочороска, по десет години зад решетки, излезе од затворот „Идризово“, јави „Фокус“. Таа не е ослободена од издржување на казната, туку добила 30-дневно отсуство заради лекување.

Во 2007 година таа беше осудена на 14 ипол години затвор поради организирање транспорт на 486 килограми кокаин, скриени во канти со поликолор.


ВМРО-ДПМНЕ ќе блокира четири раскрсници и ќе протестира пред затворот „Шутка“


Скопје, 18 декември, 2017 - 13:53 (META) 

Опозициската ВМРО-ДПМНЕ за денеска најави блокада на четири раскрсници и протест пред Истражниот затвор во Шуто Оризари.

Блокадата ќе има кај „Мавровка“ од 15 до 17 часот, на раскрсницата пред „Нова Македонија“ кај Делегацијата на ЕУ од 15.30 до 17.30 часот, на раскрсницата пред Црвен Крст од 15.30 до 17.30 часот и на раскрсницата кај Соборна Црква од 15.30 до 17.30 часот.

Денешниот протест против одлуката за притворањето на осомничените за насилствата во Собранието од 27 април, меѓу кои се и шестмина пратеници на опозициската партија ќе биде во 18 часот пред Истражниот затвор Скопје во Шуто Оризари каде партијата најави и обраќања пред присутните.


Соборен црниот рекорд – 262 новинари ширум светот се зад решетки


Њујорк, 14 декември, 2017 - 10:10 (META) 

Комитетот за заштита на новинарите, со седиште во Њујорк соопшти дека 262 лица се наоѓаат во затворите ширум светот поради својата работа.

Комитетот наведува дека е соборен негативниот рекорд, истакнувајќи дека станува збор за најголем број притворени новинари откога Комитетот кон почетокот на 90 години на минатиот век кога почнал да го спроведува годишното истражување за „новинари зад решетки“.

Како што јавуваат странските агенции, годинава е соборен минатогодишниот рекорд кога во затвор биле 259 новинари.

Комитетот нагласува дека трите земји во кои има најмногу затворени новинари се Турција, Кина и Египет.

Во Турција, како што се наведува, 73 новинари се наоѓаат зад решетки, во Кина 41, а 20 во Египет.
Комитетот наведува дека нивната листа претставува преглед на новинари кои се уапсени поради вршење на својата работа и се однесува на периодот до 1 декември. Во листата не се вклучени новинарите кои биле притворени, а потоа во текот на годината се пуштени на слобода.


Обвинетите во „Монструм“ излегуваат од затвор


Скопје, 1 декември, 2017 - 21:03 (META) 

Сами Љута вечерва излезе од затворот во населбата Шуто Оризари, како прв од четворицата осудени во случајот „Монструм“, за кој Врховниот суд денеска ја укина пресудата и го врати предметот повторно во скопскиот Кривичен суд, јави „Порталб“.

При излегувањето бил поздравен со аплаузи од најблиските.

По него од затворот во Шуто Оризари и од „Идризово“ треба да излезат и Агим Исмаиловиќ, Фејзи Азири и Хаки Азири.

Врховниот суд денеска донесе решение со кое обвинетите во случајот „Монструм“, кои беа осудени на доживотни затворски казни, се пуштени на слобода.

На обвинетите Агим Исмаиловиќ, Фејзи Азири, Хаки Азири и Сами Љута им се определени други мерки за претпазливост, односно забрана за напуштање на живеалиште, односно престојувалиште, како и двапати неделно јавување пред Основниот суд Скопје 1.

Врховниот суд ги укина шесте доживотни казни и со пресуда го врати предметот во нов судски процес.