Глобалното затоплување тема на регионалната конференција на метеоролозите во Охрид


Охрид, 9 октомври, 2018 - 16:14 (META) 

Охрид беше домаќин на средбата на директорите на хидрометеоролошките служби од Југоисточна Европа, кои што на конференција дискутираа за штетите кои ги нанесува глобалното затоплување.

„Во овој момент, службите од регионов се соочуваат како и сите останати од целиот свет, со глобалното затоплување, чија што главна карактеристика се зачестените екстремни вредности и појави, како високи температури, суши, поплави, градоносни облаци, укрупнување на зрната на градот“, објасни директорот на Управата за Хидрометеоролошки работи на Македонија, Ивица Тодоровски.

Долгогодишните анализи на метео-податоците укажуваат дека во последните 25 години регионов се соочува со 15 последователни најтопли години. Според метеоролозите, потребна е помош на побогатите земји за да може земјите од Југоисточна Европа соодветно да одговорат на предизвиците кои ги носат климатските промени.

„Високите температури, посебно на лето, предизвикуваат суши во целиот регион каде што земјоделството е многу важно и се нанесуваат огромни штети. Властите и општеството ќе мора под итно да работат на стратегија на прилагодување на таквите услови и низа активности и мерки на целото наше подрачје“, потенцираште Бранка Иванчан Пицек, директорка на државниот хидрометеоролошки завод на Хрватска.

Директорот на Федералниот хидрометеоролошки завод на Босна и Херцеговина, Алмир Биједиќ вели дека државите во регионот, со средствата со кои што располагаат, многу тешко можат да се подготват за климатските промени.

„Она што во овој момент можеме да го очекуваме е побогатите земји да вложуваат кај нас преку проекти низ едукација, како би можеле во иднина да бидеме поподготвени за климатските промени“, додаде Биједиќ.


Сончево и постудено време, со силен северен ветер


Скопје, 25 септември, 2018 - 9:23 (META) 

Сончево, но постудено време со силен северен ветер ќе преовладува денеска во Македонија. Дневните температури во поголем дел од државата ќе бидат намалени за околу 10, а наместа и за 15 Целзиусови степени.

Утринската температура ќе се движи од три до 12, а дневната од 12 до 22 Целзиусови степени. Во Скопје слично време со температура до 18 Целзиусови степени.

Од среда наутро ќе има значително опаѓање на утринската температура, која наместа ќе се спушти дури и околу нулата. Постепено затоплување се очекува кон крајот на неделата.


Сончево и топло време


Скопје, 23 април, 2018 - 9:12 (META) 

Времето денеска ќе биде претежно сончево и топло, со слаб ветер од северен правец.

Минималните температури се движеа од 3 до 9 Целзиусови степени, додека максималните во текот на денот ќе изнесуваат меѓу 22 и 30 степени. УВ индексот е 7.

Во Скопје исто така сончево и топло време, со слаб северен ветер. Утринската температура се спушти до 7 Целзиусови степени, а дневната ќе достигне до 28 степени.

Во наредните денови продолжува периодот на релативно топло време со пораст на утринските температури. Утре ќе се задржи претежно сончево, а од вторник во попладневните часови ќе има делумно зголемување на облачноста со услови за краткотраен локален дожд.


Денеска облачно со повремен дожд


Скопје, 26 март, 2018 - 9:07 (META) 

Времето денеска ќе биде променливо облачно со локални врнежи од дожд, а на планините од снег.

Ќе дува умерен јужен ветер. Дневните температури ќе се движат од 6 до 12 Целзиусови степени.

Во Скопје променливо облачно, со услови за слаб локален дожд и умерен југоисточен ветер и дневна температура од 8 Целзиусови степени.

Утре ќе се задржи променливо облачно време со локални врнежи од дожд, на планините од снег. Дневните температури ќе бидат во благ пораст. Потоа од среда следува период на стабилно и суво време, а од четврток со значителен пораст на дневната температура.


Николовски: Климатските промени ќе ги намалат приносите во земјоделските култури


Скопје, 18 декември, 2017 - 13:46 (META) 

Зелениот климатски фонд (ЗКФ) ќе биде главна меѓународна финансиска институција за обезбедување на финансиски средства за поддршка на активности, за ублажување и адаптација од климатските промени во земјите во развој, рече вицепремиерот за економски прашања Кочо Анѓушев на работилницата за искористување на средствата од овој фонд, која овие два дена се одржува во хотелот „Александар Палас“.

Тој порача, дека Македонија треба да ги искористи можностите кои се нудат преку ЗКФ.

– Ќе работиме на изградба на нови одржливи енергетски капацитети, соодветна употреба на водата за пиење и унапредување на менаџментот на водните ресурси во државата, заштита на шумските богатства и националните паркови, како и на природните богатства. Во фокусот ќе биде и унапредување на третманот на отпад и отпадни води, како и подобрување на квалитетот на амбиенталниот воздух – рече Анѓушев.

Министерот за земјоделство, водостопанство и шумарство Љупчо Николовски, рече дека се очекува климатските промени да ги намалат приносите на повеќето култури.

– Зелениот климатски фонд со 6,9 милијарди американски долари, кои се достапни за ублажување и адаптација кон климатските промени, нуди огромни можности за справување со овој сериозен предизвик, а една од главните можности е инвестирање во отпорно на климатските промени земјоделство – рече Николовски.

Постојаниот претставник на Обединетите нации и претставник на УНДП за Македонија, Луиза Винтон посочи дека температурите во последните пет години, на глобално ниво, се просечно највисоки во историјата.

– ЗКФ ќе биде инструмент за потписниците на Парискиот договор, за исполнување на ветувањето, за обезбедување на 100 милијарди долари за финансирање на проекти во врска со климатските промени годишно до 2020 година – потенцираше Винтон.

ЗКФ е формиран во 2010 година, од 194 влади на 16. Конференција на членките на Рамковната конвенција за климатски промени на Обединетите Нации.


Денеска главно сончев ден, од утре температура и до 20 степени


Скопје, 22 ноември, 2017 - 9:22 (META) 

Времето во Македонија денеска ќе биде сончево со мала до умерена облачност. Ќе дува слаб до умерен ветер, претежно од северозападен правец.

Во Скопје максималната дневна температура ќе достигне 10 Целзиусови степени, најстудено ќе биде во Маврово со дневен максимум до 4 степени, а најтопло ќе биде во Дојран каде температурата ќе достигне 14Целзиусови степени.

И во наредните три дена времето ќе биде сончево со мала облачност и со минимална температура од минус 3 до 5 Целзиусови степени. Максималната дневна температура ќе достигне од 13 до 20 Целзиусови степени.


Почна пријавувањето за субвенции од Град Скопје за печки на пелети


Скопје, 15 ноември, 2017 - 11:52 (META) 

Град Скопје објави дека од денеска почнува пријавувањето за субвенции, односно надоместување на дел од трошоците на граѓаните на подрачјето на Град Скопје за купување печки на пелети, за 2017 година. Градската управа ќе покрие најмногу 70 отсто, но не повеќе од 30.000 денари како сума со вклучен персонален данок на доход, за купена печка на пелети од денеска до 22 ноември годинава. Пријавувањето трае, исто така, до 22 ноември, а парите ќе се доделуваат по принципот „прв дојден, прв услужен.

Јавниот повик е објавен на оваа страница на Град Скопје и во некои печатени медиуми.

Право на учество на овој Јавен повик имаат жителите на Град Скопје  (домаќинствата) во општините: Аеродром, Гази Баба, Кисела Вода, Карпош, Чаир, Шуто Оризари, Центар, Ѓорче Петров, Бутел и Сарај. На Јавниот повик немаат право на учество домаќинствата кои имаат приклучок на градското централно греење, без оглед на тоа дали го користат, како и сопствениците на станбени објекти кои се се уште во фаза на изградба и не живеат во објектите.

Купувачот на печка на пелети своето барање за искористување на правото за надоместок на дел од трошоците, заедно со потребната документација, треба да го достави во затворен плик до Град Скопје, булевар Илинден број 82, во архивата на Градот, секој работен ден од 8 до 16 часот.


Времето променливо облачно со сончеви периоди


Скопје, 30 септември, 2017 - 9:57 (META) 

Времето во Македонија денеска ќе биде променливо облачно со сончеви периоди, а утрото свежо. Ќе дува слаб до умерен ветер од североисточен правец.

Утринската температура се движи од 3 до 12 Целзиусови степени, а дневната ќе изнесува од 12 до 22 степени.

Во Скопје слично време, променливо облачно и посвежо со кратки сончеви периоди. Ќе дува умерен ветер од северен правец. Утринската температура се спушти до осум, а дневната ќе се искачи до 19 Целзиусови степени.

Следува период на посончево и малку потопло времен преку денот, но со ниски утрински температури. Преодно наоблачување со услови за повремен дожд се очекува од средината на следната работна седмица.


Променливо облачно време со локален дожд и со грмежи


Скопје, 16 мај, 2017 - 9:21 (META) 

Времето денеска ќе биде променливо облачно, со кратки сончеви периоди, но и со повремени локални врнежи од дожд. На места ќе има и појава на грмежи, особено во југоисточните делови од земјаата, каде на некои места се очекува да наврнат околу 30 литри дожд на еден метар квадратен.

Преку денот ќе дува умерен до засилен ветер, претежно од северен правец. Утринската температура ќе се движи од 7 до 14 Целзиусови степени, а дневната од 21 до 26 степени.

Во Скопје времето ќе биде слично. Од четврток во попладневните часови се очекува повторно стабилизирање и извесно затоплување.


Променливо облачно и потопло време, со дневна температура над нулата


Скопје, 13 јануари, 2017 - 9:33 (META) 

Денеска времето во Македонија ќе биде променливо облачно, со сончеви периоди и со дневна температура над нулата. Ќе дува умерен ветер од јужен правец. Попладне и кон крајот на денот, во западните делови од земјата, на планините ќе има повремени врнежи од снег, а на пониските места од дожд. По одделни котлини ќе има појава на слаба магла.

Утринската температура се движи од минус 17 до минус 4 Целзиусови степени, а дневната ќе достигне од нула до 6 степени.

Во Скопје се очекува слично време, променливо облачно со сончеви периоди. Дневната температура во главниот град ќе достигне до 2 Целзиусови степени.

Според Управата за хидрометеоролошки работи (УХМР), снежната покривка измерена утрово во 7 часот е највисока во Маврово – 52 сантиметри, во Лазарополе – 42, Пожаране – 36, во Тополчани – 33, Берово – 28, Дебар – 25, Ѓуриште – 24, Крушево – 23, Битола – 19, Крива Паланка – 16, Куманово, Струмица и Претор – 15, Виница – 12, Демир Капија, Штип и Охрид – 11, Скопје и Прилеп – 10, Гевгелија – 2 и во Дојран снежната покривка е најниска и изнесува 1 сантиметар.