!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Ловец застрелан во главата во Струмичко починал в болница


Струмица, 9 декември, 2017 - 13:34 (META) 

Маж починал од тешките повреди во главата што ги добил при масовен лов во Струмичко, соопшти СВР Струмица.

Инцидентот се случил вчера, околу 14.30 часот, во близина на браната Водоча. При лов на дивеч во кој учествувале поголема група ловци, Ж.И. бил повреден од ловна пушка во пределот на главата. Поради непристапниот терен, во струмичката болница бил донесен со теренско возило по два часа, по што набргу бил прогласен за мртов.

Увид извршиле екипа на СВР Струмица и јавен обвинител, а во моментот се работи на расчистување на околностите.


Мажот застрелан во Аеродром во болница бил донесен мртов


Скопје, 3 ноември, 2017 - 20:13 (META) 

Мажот што денеска околу 17.40 часот бил застрелан со огнено оружје во скопската населба Аеродром, во Клиниката за хируршки болести „Свети Наум Охридски“ бил донесен мртов, информираше Министерството за здравство.

Потоа лекарите се обидувале да го реанимираат цели 40 минути, но тоа било безуспешно, па била констатирана смрт, известија од министерството.

Како што извести МВР, денеска околу 17.40 часот пред угостителскиот објект „Ред кафе“ на улицата Владимир Комаров во скопската населба Аеродром, со огнено оружје бил застрелан М.Ј.

Според некои медиуми, напаѓачот, кој потоа го фрлил и избегал, испукал четири-пет куршуми во жртвата.


Починал носителот на независна листа што беше застрелан во Кичево


Скопје, 5 октомври, 2017 - 11:02 (META) 

Носителот на независна листа на советници во Кичево, 40-годишниот Алит Абази, кој на 27 септември во центарот на Кичево беше застрелан, утрово починал на КАРИЛ во скопскиот Клинички центар.

Абази од ранувањето беше во критична состојба на интензивна нега, поради сериозни повреди на абдоминалните органи и на ’рбетот.

Врз Алит Абази, како и Дестан Абдиу, шеф на неговиот изборен штаб, и Шабан Далипи, случаен минувач, пукаше 58-годишниот Абдула Абдули. Убиецот беше набргу приведен, а судија на претходна постапка му одреди притвор од 30 дена.

Министерот за внатрешни работи, Оливер Спасовски, вчера на прес-конференција го повтори тврдењето на полицијата дека нападот не е поврзан со изборната кампања.

Премиерот Зоран Заев синоќа на митингот во Општина Ѓорче Петров, осуди какво било насилство во изборниот процес и повика на воздржaност од активности кои би оставиле дамка на овие избори.


Седмоодделенец застрелан во училиштето во Палатица од 17-годишник, се бори за живот


Палатица, 5 април, 2017 - 12:38 (META) 

Седмоодделенец од основното училиште „Фан Ноли“ во селото Палатица, општина Желино, вчера попладнето во дворот на училиштето бил застрелан и е во животна опасност, соопшти Јавното обвинителство.

Во него еден куршум истрелал 17-годишник од Скопје, со пријавен престој во селото Палатица. Детето поради сериозноста на повредите е пренесено во Ургентниот центар во Скопје, оперирано е, но се наоѓа во животна опасност.

Од Јавно обвинителство информираат дека, по сослушување на осомничениот малолетник, поднесено е барање за поведување подготвителна постапка против него и согласно Законот за правда на деца, а во врска со член од Законот за кривична постапка, надлежниот обвинител од Основното јавно обвинителство – Тетово до судијата за деца достави предлог за определување на мерка – притвор.  Судијата постапувајќи по предлогот со решение на осомничениот му определи мерка – притвор во траење од 30 дена. ​​


Скопјанец застрелан во расправија во Ченто, се наоѓа во животна опасност


Скопје, 10 март, 2017 - 14:38 (META) 

Откако вчера бил застрелан, 27-годишен скопјанец со тешки повреди е пренесен во Специјалната хируршка болница „Свети Наум Охридски“ во Скопје и се наоѓа во животна опасност, извести МВР.

Инцидентот се случил вчера попладне. Во полиција било пријавено дека на улицата Фуштанска во населбата Ченто, две непознати лица, кои дошле со два автомобили, почнале да се расправаат со Г.Б. (27), по што еден од нив извадил пиштол и стрелал во 27-годишникот, нанесувајќи му прострелна рана во десна надколеница и повеќе повреди на телото. Вооружениот потоа заминал со автомобилот.

Ранетиот е пренесен и задржан на лекување во болницата „Св. Наум Охридски“, каде му се констатирани тешки телесни повреди и се наоѓа во животна опасност.

Полицијата вели дека трага по сторителите.


Двајца полицајци нападнати со мачета во Белгија


Шарлероа, 6 август, 2016 - 17:59 (META) 

Двајца полициски службеници биле повредени откако напаѓач се нафрлил врз нив со мачета во белгискиот град Шарлероа, јавува „Би-би-си“.

Напаѓачот бил застрелан и ранет од полицијата, објави полицијата во Шарлероа на „Твитер“.

Тој, според информациите, извикувал „Алаху Акбар“ (Господ е голем, на Арапски) за време на нападот кој се случил пред главната полициска станица во градот.

Областа околу местото на нападот веднаш била запечатена од полицијата.


13-годишна Израелка избодена до смрт на спиење


Ерусалим, 30 јуни, 2016 - 19:56 (META) 

Тринаесетгодишна Израелка била избодена со нож до смрт, во напад кој се случил денеска во еврејска населба во окупираниот Западен Брег, јавуваат светските медиуми.

Халел Јафа Ариел била нападната додека спиела во својата соба, во населбата Кирјат Арба. Чуварите на населбата го убиле напаѓачот, а при интервенцијата еден од нив бил потешко повреден со нож во лицето.

Израелското министерство за здравство го идентификувало напаѓачот како 19-годишниот Палестинец Мухамед Трајра, од селото Бани Наим во близина на населбата.

Израелскиот премиер Бенјамин Нетанјаху го осуди нападот, оценувајќи го како „гнасно убиство“, кое „ја илустрира крвожедноста и недостатигот од хуманост на терористите“ со кои тие се соочуваат.

Тој додал дека светот мора „да го осуди убиството, како што претходно ги осуди убиствата во Орландо и во Брисел“

Нетанјаху го повика и палестинското раководство јасно и недвосмислено да го осуди бруталното убиство и да работи на итен прекин на насилствата.

Од октомври минатата година досега 34 Израелци се убиени во бранот напади со ножеви, огнено оружје и со возила. Повеќе од 200 Палестинци, главно напаѓачи, се убиени во истиот период, пренесуваат медиумите.


Тајната служба застрелала вооружен маж пред Белата куќа


Вашингтон, 21 мај, 2016 - 10:57 (META) 

Припадници на тајната служба на САД вчера застрелале вооружен маж пред Белата куќа, поради што пристапот кон објектот бил блокиран извесно време, јавуваат светските медиуми.

Од полицијата за „Еј-би-си њуз“ изјавиле дека лицето извадило оружје кај безбедносниот пункт во близина на зградата, поради што било застрелано во стомакот.

Напаѓачот бил пренесен во болница со тешки повреди, соопштиле официјалните служби.

Претседателот Барак Обама за време на инцидентот не бил во Белата куќа, туку играл голф во предградието на Вашингтон.

Американскиот потпретседател Џо Бајден, кој се наоѓал во зградата за време на пукањето, веднаш бил однесен на безбедно место, јавуваат медиумите.


Убиецот на двајцата новинари во САД се застрелал


Монет, 26 август, 2015 - 19:31 (META) 

Вооружениот маж осомничен за убиството на двајцата новинари во американската сојузна држава Вирџија се застрелал самиот неколку часа по инцидентот, пишува „Хафингтон пост“, повикувајќи се на информации од полицијата.

Тој бил идентификуван како Вестер Ли Фланаган, на возраст од 41 година, кој до пред извесно време работел како репортер во истата телевизија како и жртвите, односно WDBJ-TV, разгранок на „Си-Би-Ес“ каде известувал под името Брајс Вилијамс.

Како што пренесува „Хафингтон“, осомничениот со возилото со кое се обидувал да и побегне на полициската потера излетал од автопат и по кратко време бил најден од полицајците со рана од огнено оружје. Тој веднаш бил префрлен во најблиската болница со тешки повреди и во критична состојба.

Фланаган е осомничен за убиството на 24-годишната Алисон Паркер и 27-годишниот Адам Ворд, новинарка и снимател на телевизија WDBJ-TV, кои денеска беа застрелани додека известуваа во живо од местото Монет, во округот Бедфорд во државата Вирџинија.

Неколку часа по убиството, на твитер-профил под името Брајс Вилијамс, биле објавени две видеа од пукањето, снимени од перспектива на напаѓачот. Едното видео, според „Хафингтон“ прекинува во моментот кога тој нишани со пиштолот кон новинарката, а на другото се гледа како отвара оган кон неа и снимателот.

Полицијата сеуште ги истражува мотивите за убиството.


Застрелан полицаец во Њујорк


Њујорк, 3 мај, 2015 - 10:45 (META) 

Дваесет и петгодишен службеник на њујоршката полиција вчера бил застрелан во глава од вооружено лице во околината на Квинс, јавува „Би-Би-Си“.

Полицаецот Брајан Мур, кој се наоѓа во критична состојба, бил застрелан кога со својот колега, со необележан полициски автомобил, пресретнале лице за кое претходно се посомневале дека е вооружено со пиштол.

Според информациите на полицијата во Њујорк, осомничениот за пукањето врз полицаецот е идентификуван како Демитриус Блеквел, и бил упасен еден час по инцидентот.

Вчерашниот инцидент, како што пренесува „Би-Би-Си“, е петти случај на пукање на полицаец во Њујорк во изминатите пет месеци.

Вооружениот инцидент доаѓа во услови кога во САД се зголемени тензиите околу прекумерната употреба на сила од полицијата.

Во петокот оваа недела, обвинителството во Балтимор објави дека се поднесени обвиненија против шест полициски службеници поради смртта на човек кој бил држен во притвор.