!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Автобус излета од коловозот на автопатот Велес – Скопје, повеќе од 20 патници се повредени


Велес, 20 август, 2017 - 20:18 (META) 

Автобус излета од патот после патарината кај Велес, а повеќе од 20 патници се повредени. Патниците со возила на Итната медицинска помош се превезуваат на клиниките во Велес и во Скопје.

Според првичните информации, возачот на автобусот изгубил контрола и излетал во близина на зимскиот пункт Кула кој се наоѓа на автопатот Велес – Скопје.

Сообраќајот во тој дел од автопатот е во застој, а граѓаните јавуваат дека колона автомобили има од Велес до патарината.


ЛП: Парламентарното мнозинство да не чека и да прејде на избор на спикер и на нова влада


Скопје, 21 април, 2017 - 12:13 (META) 

Извршниот комитет на Либералната партија на синоќешната седница, на која била разгледувана актуелната политичка остојба во државата, констатирал дека „настојувања на парламентарното мнозинство што побргу да се конституираат државните органи, односно да се избере претседател на Собранието и влада на Република Македонија, се во опасен застој“.

„Се наоѓаме во ситуација кога секој изгубен ден во стапувањето во функција на институциите ја зголемува опасноста во државата. Затоа апелираме партиите од парламентарното мнозинство добро да ја согледаат ситуацијата и со поддршка од нашите пријатели од меѓународната заедница и од домашната јавност да прејдат на избор на претседател на Собранието и на избор на влада“, стои во соопштението на ЛП.

Оттаму нагласуваат дека одолжувањето на овие потези ги охрабрува сите што се противат на конститурирањето на државната власт во Македонија и затоа не треба да се чека. ЛП, се додава во соопштението, ги поздравува „сè поотворените обиди од страна на меѓународните фактори да помогнат што побргу да се конституира држваната власт“.

„Ја повикуваме домашната јавност да не остане само на загриженост за состојбите, туку активно да го манифестира своето незадоволство од состојбите и јасно да му даде поддршка на формираното парламентарно мнозинство“, нагласуваат од ЛП.


Сообраќајот се одвива по влажни коловози, слаб снег врне на Буково, Плeтвар и на Страцин


Скопје, 30 декември, 2016 - 14:18 (META) 

Сообраќајот на државните патишта се одвива тековно по претежно влажни коловози. Слаб снег врне во Ресен, Крушево, Маврово и на планиските премини Буково, Плетвар и Страцин, кој не се здржува на коловозот, соопшти Автомото-сојузот на Македонија (АМСМ).

Во клисурите и во засеците можна е појава на помали одрони, особено на патните правци Кочани – Македонска Каменица – Делчево, Виница – Берово, Гостивар – Стража, Маврово – Дебар – Струга, Демир Капија – Удово, Катланово – Велес, Крушево – Демир Хисар и Ресен – Буково.

Надлежните апелираат на внимателно возење и на прилагодување на брзината кон условите на патот.


Нема застој на албански камиони на македонско-албанската граница


Скопје, 11 април, 2016 - 14:51 (META) 

Во врска со шпекулациите на одредени медиуми за застој на албански камиони со свежи зеленчук и овошје на македонската граница со Албанија и наводното прекршување на одредбите од Централноевропскиот договор за слободна трговија (ЦЕФТА), Министерството за економија информира дека трговската размена меѓу двете земји се одвива во согласност со договорот, односно, според информациите добиени од Државниот инспекторат за земјоделство, нема застој на албанските камиони, туку само позаострена контрола на преминот.

Поради сомневање за зголемено количество пестициди во земјоделските производи, засилена контрола била извршена на осум камиони, од кои четири се веќе пуштени.

– Имено, во согласност со ЦЕФТА, доколку постои сомнеж дека во увезените производи има пестициди, се дава можност за забрана или ограничување на увозот, односно извозот или транзитот на стоки, до соодветното испитување (член 17). Тоа подразбира обезбедување на потврда од овластени акредитирани лаборатории во Македонија или преку претходно доставен доказ на граничните служби во Македонија, од страна на  овластена и меѓународно признаена акредитирана лабораторија од Албанија. Во согласност со ЦЕФТА, овој тип забрани или ограничувања не претставуваат средство за самоволна дискриминација или прикриено ограничување на трговијата помеѓу страните -информираат од Министерство за економија.


Грчките бизнисмени се жалат за застојот на македонско-грчката граница поради бегалците


Атина, 26 ноември, 2015 - 10:04 (META) 

Грчката Асоцијација за извоз на Северна Грција реагира против застојот на околу стотина камиони на грчко-македонската граница. Од Асоцијацијата реагираат дека само во средата 90 камиони за извоз и 33 камиони за увоз се заглавиле на границата поради прекинот на железничката линија на граничниот премин меѓу Грција и Македонија.

Од Асоцијацијата, по писмен пат реагираа до министерот за транспорт и врски, Христос Спириѕис, и до заменик-министерот за цивилна заштита, Николаос Тоска, со барање веднаш да се најде решение и да се нормализира и да се врати во работа железничкиот сообраќај за да се дозволи непречен транспорт, извоз и увоз на потребната стока од и кон странство.

Во писмото се истакнува дека грчките извозници последниве пет дена се соочуваат со сериозни проблеми во работата, со извозот и со увозот поради затворањето на границата. Посочуваат дека по сите бројни блокади и протести на грчките патишта, сега е затворен главниот железнички пат кој ја поврзува Грција со Европа.

Асоцијацијата реагира дека компаниите чии камиони се заглавени на Идомени се принудени или да ги вратат камионите во Солун или, пак, да ја изменат рутата и да ги пренсочат кон Бугарија, рута која се смета дека е за 20 отсто поскапа од превозот преку Македонија и предизвикува дополнителни задоцнувања во испорака до клиентите.

– Неразбирлво е како во држава која се труди да излезе од криза и малкуте грчки производители и извозници се подложени на дополнителни трошоци за превоз на стоката – се вели во писмото.

Целата ситуација се оценува дека ѝ задава голем удар на грчката економија и ги влошува односите со соработниците во странство.


Застана работата во рудникот Тораница


Штип, 12 август, 2015 - 10:29 (META) 

Во рудникот на еден од најбогатите Британци, Гокул Бинани, се чека уплата на приднесите од платата за јуни, поради што рударите не можат да користат здравствена заштита. Веќе шести ден рударите од Тораница целосно или делумно ја прекинуваат работата, како предупредување до раководството. Во петокот тие воопшто не влегле во јамите, а така било и во текот на викендот, потврди синдикатот, додека во изминатите три дена работела само првата смена.

Вчера и во текот на ноќта, само дел од рударите влегле во јамите. Претседателот на синдикатот, Бранко Димитровски, вели дека рударите не добиле целосна исплата на јунската плата со придонесите.

– Особено проблематично е здравственото осигурување, кое го немаме, бидејќи не се платени придонесите – вели Димитровски.

Од раководството на рудникот ветиле дека денеска ќе ги уплатат придонесите. Меѓутоа, за рударите кои работат за околу 250 евра месечно, иако ова е еден од најакутните проблеми, набројуваат уште неколку за решавање. Проблем, според синдикатот, се условите за работа. Бараат современа механизација и репороматеријали, а проблематично е и обезбедувањето на јамата, односно местото каде работат, поради што во минатото имаше и неколку рударски несреќи. Недостига и соодветна заштитна опрема.

Со сопственикот Гокул Бинани лично синдикатот годинава се сретнал неколкупати. Последен пат се сретнале во јуни, кога Бинани ветил дека во август ќе почнат првите инвестиции. Британскиот бизнисмен од индиско потекло, кој го презеде рудникот во 2006 година, никогаш не влегол во една од јамите да ги види условите за работа. Последната година лично се ангажирал околу рудникот, откако стигнаа неофицијални информации дека македонската влада најавува раскинување на концесионерскиот договор со Бинани. Дека нешто се случува со рудниците дадени на странски концесионери, потврдува и веста дека во успешниот рудник Саса управуван од руската компанија „Солвеј“, влегува американски капитал со преземање на поголем дел од управувачкиот капитал, во што се ангажирала Владата.

За синдикатот во рудникот Тораница, најважно е да се решат нивните основни барања, како што се платите и условите за работа, кои деновиве, вторпат летово, ги принудија на прекин на работата.

В.К.


Штрајк на германските железничари, хаос на патиштата


Бон, 6 ноември, 2014 - 13:11 (META) 

Денеска штрајкуваат германските железничари, што предизвика голем метеж на автопатиштата. Поради тоа, пишуваат германските медиуми, во текот на викендот, во Германија ќе има недостиг на бензин. Поради штрајкот, реагираше и германската кацеларка Ангела Меркел, која побара посредник за решавање на проблемот.

– Може само да апелирам на нивното чувство за одговорност да пронајдат решение што ќе предизвика најмала можна штета за сите нас во државата со задржување на правото на штрајк – изјави Меркел.

Медиумите најавуваат дека надлежен суд денеска ќе одлучува за судбината на тој штрајк и дали по барање на „Дојче бан“ може да се забрани.

Шефот на синдикатот, Клаус Веселски, денеска предупреди дека железницата мора да се откаже од тоа да ги намалува основните права на машиновозачите и побара преговори.