!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Еколозите бараат Шар Планина да стане национален парк за да се спаси од уништување


Тетово, 11 мај, 2017 - 16:44 (META) 

Шар Планина што поскоро да се прогласи за национален парк, зашто само на тој начин ова подрачје ќе се заштити од уништувањето на биодиверзитетот, истакнаа учесниците на завршната конференција на проектот „Предизвици за заштита на природата на Шара во идното прекугранично заштитено подрачје Шара, Кораб, Шари“.

– Сведоци сме дека има неконтролиран незаконски лов, а најопасно е неконтролираното градење на Шара, дури и во високите предели. Затоа бараме што поскоро да се заштити ова подрачје. На тој начин ќе има поголема контрола на овој масив, кој, за жал, сега се уништува – изјави проф. д-р Љупчо Меловски од Македонското еколошко друштво.

Со заштита на шарпланинскиот масив и локалното население ќе има големи придобивки.

– Има тука разни плодови, боровинки, шарпланински чај. Овие работи се берат неконтролирано, не се чуваат. Во националниот парк ќе биде многу поинаку – вели универзитетскиот професор Гоше Стефков.

На конференцијата присуствуваше министерот за животна средина, Башким Амети, кој рече дека конференција е чекор напред кон процесот за прогласување на Шар Планина за национален парк,

– Прогласувањето на Шар Планина за национален парк е предвидено со урбанистичкиот план на Македонија години наназад, а досега и во други пригоди Министерството давало заложби за ова да се случи. Со проектот финансиран од УНЕП и од ГЕФ, се подготвува студија за валоризација на природните ресурси за Шар Планина, како и други дополнителни документи за заокружување на овој процес, кои во следните две-три години ќе се финализираат – изјави Амети.

На конференција се презентираа резултатите од активностите на тригодишниот проект „Зачувување на биолошката разновидност преку одржливо искористување на ресурсите на Шар Планина“, спроведуван од Македонско еколошко друштво и од платформата „Пријатели на Шара“. Истовремено и се презентираа заедничките активности од повеќе домашни и меѓународни чинители во прекуграничното подрачје на шарпланинскиот масив.

Инаку, иницијативата за прогласување на Шар Планина за национален парк е стара повеќе од една деценија, но оваа иницијатива сè уште не е влезена во законска процедура. На косовската страна, Шар Планина за национален парк е прогласена во 1983 година.


Заштитата на Студенчишко Блато, „Охрид СОС“ ја подигна на европско ниво


Охрид, 11 мај, 2017 - 15:27 (META) 

Од 15 до 19 мај, во Скопје и во Охрид во работна посета ќе биде проф. д-р Јос Ферхуфен, претседател на Европскиот разгранок на Светското друштво на научници за блатни еко-системи. Од Граѓанската иницијатива „Охрид СОС“ велат дека Ферхуфен доаѓа на нивна иницијатива и дека во Скопје ќе одржи серија предавања на Природно-математичкиот факултет.

Исто така, ќе биде специјален гостин на тркалезната маса во организација на Здружението за заштита на животни и на животна средина „Еден“ на тема „Влијанието на планираните инфраструктурни проекти врз биодиверзитетот во Охридско-преспанскиот Регион“.

Во Охрид, професор Ферхуфен ќе го посети Хидробиолошкиот завод и ќе оствари работна средба со членови на Граѓанската иницијатива „Охрид СОС“.

– Причината за неговата посета е опасноста од уништување на Студенчишкото Блато во Охрид – последниот филтер на езерото и дом и прибежиште на многу ретки и ендемски видови. Граѓанската иницијатива „Охрид СОС“ две години непрекинато и посветено се бореше за заштита на Студенчишкото Блато што конечно даде плод и на последната стручна расправа во Општина Охрид беше потврдено дека блатото останува строго заштитена зона – велат од Здружение за заштита на животните и на животната средина „Еден“.

Оттаму нагласуваат дека, сепак, целта не е докрај постигната бидејќи со заклучок на Владата од 2013 година на Општината ѝ е наложено да се заштитат само 4 до 5 хектари земја, што е неприфатливо оти е многу помалку  од 50-70 хектари кои се предвидени со последната интегрирана студија за блатото.

– На блатото не само што му е потребно да се заштитат сите негови делови кои се сè уште функционални, туку е неопходно и да се ревитализира тоа што било низ годините уништено – нагласуваат од здружението „Еден“.


Еко-активистите имаат големо влијание врз институциите за заштита на околината


Тетово, 9 мај, 2017 - 14:41 (META) 

Активностите и дебатите за еколошките теми имаат големо влијание врз надлежните институциите во преземањето соодветни чекори за заштита на животната средина, беше истакнато на денешната панел-дискусија „Жените во заштита на животната средина“, организирана во чест на Денот на Европа.

Универзитетската професорка Беса Арифи смета дека досегашните акции на невладините организации дале плод и дел од институциите презеле превентивни мерки во областа на екологијата.

– Па, знаете дека Тетово беше еден од најзагадените градови во Македонија. Имаше повеќе герила-акции и протести од невладината органзиација „Еко-герила“, исто така и од невладината „Мајка и дете“. Од нивна страна имаше голем притисок врз властите, најголемиот загадувач „Југохром“ да не работи без филтри. „Југохром“, знаете, сега не работи и наложено му е додека не ги постави филтрите, да не ги вклучува печките. Затое ние треба да бидеме поактивни, и како жени да ги притискаме институциите да преземаат чекори во областа на заштита на животната средина, затоа што се работи за нашето здравје“, изјави Арифи.

На панел-дискусијата присуствуваа и активистки кои им порачаа на студентите и на средношколците да бидат еколошки посвесни и со разни активности да придонесуваат повеќе за заштита на животната средина.


Еколозите и властите со различни толкувања на ставовите на мисијата на УНЕСКО во Охрид


Охрид, 19 април, 2017 - 10:49 (META) 

Градоначалникот на Охрид, Никола Бакрачески, ги обвинува еколошките асоцијации дека намерно шират паника и невистини околу можното симнување на Охрид од листата на светските вредности и реткости на УНЕСКО.

– Се чини дека некои структури се задолжени и од петни жили се борат Охрид да го изгуби статусот на заштитен град на УНЕСКО, многу повеќе отколку што привидно се загрижени за зачувување на природата и на културното наследство – реагираше Бакрачески.

Екологистите, пак, остануваат на своите ставови и ги поткрепуваат со сознанијата од разговорите со експертската група на УНЕСКО.

– Реактивната мисија на УНЕСКО е најригорозниот инструмент што постои во рамки на институцијата. Наспроти наративот што го презентираат македонските институции, мисијата не е овде за да дава забелешки, туку за да собира информации. Извештајот во кој тие ќе ги вклучат своите забелешки, ќе биде готов за осум недели. Врз основа на тој извештај ќе се реши дали регионот ќе биде преместен на листата на загрозено наследство или не, на 41. седница на УНЕСКО што ќе се одржи во јули годинава, во Краков, Полска – изјави Драгана Велковска од Здружението за заштита на животни и животна средина, по состанокот со експертите на УНЕСКО.

Еколошките асоцијации ја образложиле актуелната ситуација и го претставиле истражувањето на Здружението според кое речиси сите опфатени институции, граѓани и граѓански организации се против уништување на природните вредности на регионот во име на краткотрајна или еднократна финансиска добивка.

– Урбанизацијата на Студенчишко Блато ќе предизвика уништување на последниот блатен еко-систем на Охридското Езеро карактеристичен со својата флора и фауна, додека, пак, изградбата на пристаниште и на пешачки патеки во езерото од каналот Студенчишта до реката Грашница трајно ќе одземе и ќе уништи неколку хектари од литоралниот регион во овој дел од езерото со што ќе се уништат ендемски видови – предупредува д-р Трајче Талевски од „Охрид СОС“.

Експертите на УНЕСКО изнеле иницијатива за прогласување на регионот за зелена дестинација, што еколошките асоцијации ја поддржувале.

Надзорната мисијата на експертски тим на УНЕСКО, која треба да подготви извештај за заштитеното природно и културно наследство во Охридскиот Регион, покрај со невладините организации, оствари средби со претставници на Националниот парк Галичица, Завод и музеј Охрид и на локалната самоуправа.


Мехмедовиќ: Новата влада ќе обезбеди здравство посветено на граѓаните


Скопје, 1 април, 2017 - 14:41 (META) 

„Со блокадата на Собранието, пратениците на ВМРО-ДПМНЕ го загрозуваат здравјето на пациентите. Новата влада ќе обезбеди здравство посветено на луѓето. Нема да се затвораат одделенија и пациенти да чекаат за операција со месеци, затоа што недостига медицински персонал“, изјави членот на комисијата за здравство на СДСМ, Злате Мехмедовиќ, на прес-конференција.

Тој посочи дека таков е случајот во болницата „8 Септември“.

„Основните плати на здравствените работници ќе бидат двојно зголемени, а платите на специјалистите во следните три години ќе се зголемат на 100.000 денари. Така ќе ги задржиме лекарите и персоналот во јавното здравство, за да обезбедиме соодветна грижа за граѓаните. Деновиве лично од директорот на болницата „8 Септември“ граѓаните слушнаа дека дел од медицинскиот персонал заминал во странство, а дел по приватните клиники“, изјави Мехмедовиќ.

Тој информираше дека освен болницата „8 Септември“, половично прима пациенти и хируршката болница „Св.Наум Охридски“.

„Нема ни нов клинички центар. Од најавата пред пет години, остварен е само спорен тендер од власта во заминување, со технички овластувања. Поради колапсот на здравствениот систем, Македонија е на претпоследно место по здравствени резултати во Европа, според Европскиот здравствен потрошувачки индекс“, додаде Мехмедовиќ.

Според него, новата влада ќе воведе бесплатно болничко лекување за здравствените осигуреници, а „Мој термин“ ќе се замени со систем што ќе гарантира брза, прецизна и пред сè квалитетна здравствена заштита на секое ниво.

„Ќе ги намалиме административните обврски на лекарите, за да може целосно да се посветат на своите пациенти. Болниците ќе бидат реконструирани, ќе изградиме нови, а ќе има и нов клинички центар во Скопје. За сето ова да се реализира, потребно е претседателот Зоран Заев веднаш да го добие мандатот и да ја формира новата влада, која ќе го осигура здравјето на граѓаните и ќе работи исклучиво во граѓански интерес“, изјави Мехмедовиќ.


Скопје и Тетово ќе добијат зелени билборди за прочистување на воздухот


Скопје/Тетово, 20 март, 2017 - 15:06 (META) 

Утре пред Центарот за култура во Тетово и в среда во близина на хотелот „Мериот“ во Скопје, невладината организација „Екосвест“ и Амбасадата на Германија во Македонија ќе го промовираат проектот за клима и за заштита од климатски промени „Сити три“ (City tree).

На градовите Скопје и Тетово и на нивните граѓани, како што соопштија од Амбасадата на Германија, ќе им бидат предадени зелените билборди за прочистување на воздухот.

– „Сити три“ претставува вертикална структура од специфични видови мов, васкуларни растенија кои „јадат“ ситна прашина, азотни оксиди и озон и имаат способност да неутрализираат 240 тони јаглерод диоксид годишно – стои во соопштението од амбасадата.

На свеченото отворање ќе се обратат Ана Чоловиќ-Лешоска од НВО „Екосвест“, амбасадорката на Германија во Македонија, Кристине Алтхаузер, градоначалничката на Тетово, Теута Арифи, и градоначалникот на Скопје, Коце Трајановски.

Овој проект е овозможен со помош на средства од Фондот за заштита од климатиски промени на министерството за надворешни работни на Германија, а во набаваката на билбордите учествувале компаниите „Пакомак“, „Енерџи диливери солушнс“, „Еколог“, „Везе Шари“, „Прокредит банка“, ДХЛ, „Кнауф“ и „Де мед“.


Германија го зголемува степенот на готовност од сајбер-напади во пресрет на изборите


Берлин, 19 март, 2017 - 13:04 (META) 

Германија го зголемува степенот на готовност од сајбер-напади, бидејќи интернет-страниците на владата секојдневно се мета на вакви напади во пресрет на парламентарните избори закажани наесен.

„Забележуваме напади на владините мрежи на дневно ниво“, изјавил за викенд-изданието на весникот „Велт“, претседателот на германската федерална канцеларија за информатичка безбедност (БСИ), Арне Шенбом, пренесува балканскиот сервис на „Радио Слободна Европа“.

Според него, БСИ е во близок контакт со претставниците на институциите задолжени за изборите, со политичките партии и со сојузните германски држави, со кои се разговара за мерките за заштита од сајбер-напади.

Шенбон, како што пренесуваат светските агенции, нагласува дека канцеларијата е подготвена да реагира на евентуални напади во пресрет на изборите.


МНР на Албанија: Сите да останат смирени и да престане антиалбанската реторика


Тирана, 7 март, 2017 - 16:06 (META) 

„Министерството за надворешни работи на Албанија жали и го осудува нападот на Музејот на албанската азбука во Битола, кој се случува на овој важен ден за албанскиот јазик и за Албанците“, се вели во реакцијата на Министерството за надворешни работи на Албанија, а јавува дописничката на „Мета“ од Тирана.

Оттаму бараат македонските власти да го истражат овој вандалски чин што поскоро и да ги казнат сторителите.

– Нападот врз Музејот е доказ дека е потребна поефикасна заштита од страна на надлежните органи на заедничкото наследство – се вели во реакцијата на МНР на Албанија.

Албанското МНР ги повикува сите страни да останат смирени и да престане антиалбанската реторика.

– Ги повикуваме сите страни да останат смирени и да престане реториката против Албанците, која има цел само да го оттргне вниманието од вистинските проблеми на земјата, им штети на меѓуетничките односи во земјата и на нејзиниот евроатлантски пат – се додава во реакцијата на МНР на Албанија.

Отатму велат дека „веруваат дека овие напади се дела на една мала група луѓе, водени од екстремните националистички чувства, страв, недостиг на информации и штетна реторика во последниве неколку години“.

– Би сакале да нагласиме дека историјата, традицијата, јазикот и културата на Албанците се додадена вредност за нашите соседи во Македонија и дека нивната заштита покажува високи демократски и човекови вредности. Албанија и Албанците биле и ќе продолжат да бидат постојани пријатели на Македонија. Ние веруваме во вредностите на соживот, хармонија и на соработка меѓу нашите земји и граѓани – се додава во реакцијата.


Кампања на ХЕРА за заштита од секаква дискриминација


Скопје, 22 февруари, 2017 - 14:17 (META) 

Асоцијацијата за здравствена едукација и истражување (ХЕРА) заедно со Коалицијата „Сексуални и здравствени права на маргинализирани заедници“, а со поддршка на Амбасадата на Кралството Холандија во Македонија, од денеска ја почнува кампањата за заштита од дискриминација врз сите основи, вклучувајќи ја и сексуалната ориентација и родовиот идентитет.

Пораката на кампањата е „Ако е вообичаено, не значи дека е праведно. Три пати мери, еднаш сечи, но никогаш не дискриминирај!“

Главен резултат на проектот е основањето на координативни тела за заштита од дискриминација од страна на советите на општините Штип, Куманово и Струмица. Тие ќе имаат цел заеднички да работат на зголемување на информираноста на граѓаните како да препознаат и каде да пријават дискриминација.

– Што се однесува до заштитата од дискриминација на ЛГБТИ-заедницата, во текот на оваа година, Министерството за труд и социјална политика спроведе консултативен процес за изменување на Законот за спречување и заштита од дискриминација. Се надеваме дека во текот на 2017 година ќе се усвојат измени кои ќе вклучуваат сексуална ориентација и родов идентитет како основи за дискриминација, што воедно ќе ги охрабри ЛГБТИ-луѓето да пријавуваат дискриминација – велат од ХЕРА.

Комисијата за заштита од дискриминација во текот на 2016 година одлучуваше во неколку случаи на дискриминација врз основа на сексуална ориентација и родов идентитет. Во повеќето случаи комисијата повторно не успеа да ја препознае дискриминацијата и соодветно да ги примени одредбите на Законот за спречување и заштита од дискриминација.


Трајковски: Никој не може да гарантира сто отсто заштита на личните податоци


Скопје, 27 јануари, 2017 - 15:11 (META) 

„Вонредниот инспекциски надзор на Машински факултет е во завршна фаза, а сè што е алатка на законот во поглед на санирање на настанатите штети, веќе е преземено по наши насоки од страна на Машинскиот факултет. Останува да ги известиме сите засегнати студенти со нашите наоди за да може да си бараат одредени права во граѓански постапки пред судовите“, рече директорот на Дирекцијата за заштита на лични податоци, Горан Трајковски, во врска со случајот со неодамнешното споделување лични податоци на студенти од Машинскиот и други факултети.

ДЗЛП денеска организираше настан на кој се одбележа 28 јануари – Денот за заштита на личните податоци, на кој присуствуваше и народниот правобранител, Иџет Мемети.

Трајковски рече дека личните податоци се високоризична целна група во светски рамки и дека би било смело да се каже дека личните податоци се безбедни во Република Македонија.

И Трајковски и Мемети истакнаа дека во однос на заштитата на личните податоци, најважна е превенцијата и оти граѓанинот мора да си ги штити личните податоци.

– Од една страна, неспорно е дека станува збор за основно човеково право – правото на приватност, меѓутоа, секое право повлекува и одговорност. Во делот на превенцијата, апелираме на обврската секој граѓанин да ги штити своите лични податоци, да ја штити својата приватност. Во тоа ние можеме само да помагаме, меѓутоа како апсолутни заштитници ниту македонскиот орган за заштита на лични податоци ниту кој било друг светски орган за заштита на лични податоци не може да гарантира сто отсто заштита на личните податоци – вели директорот на ДЗЛП.

Во текот на минатата година, ДЗЛП извршила вкупно 307 инспекциски надзори во повеќе области, од кои 132 редовни, 157 вонредни и 18 контролни надзори, а Трајковски рече дека се подготвува нов закон за заштита на лични податоци.