Стариот охридски чинар ќе се ревитализира и заштити


Охрид, 14 февруари, 2019 - 11:21 (META) 

За чинарот на плоштадот „Чинар“ кој е во лоша состојба, Општина Охрид побара и доби посебна дозвола од страна на Министерството за животна средина и просторно планирање ( МЖСПП) за имплементација на мерките за санација и ревитализација.

За таа цел, во тек е тендерска постапка за избор на стручна фирма која ќе превземе активности за санација, ревитализација и статичко обезбедување на чинарот.

Охридските чинари се прогласени за споменик на природата со Решението на Републичкиот завод за заштита на спомениците на културата.

Дополнително, чинарот кој се наоѓа на плоштадот „Чинар“, е едно од препознатливите обележја на градот Охрид. Ова многувековно дрво опстојало во различни периоди и епохи од историјата на Охрид и Македонија, што само по себе го прави симбол на времето, односно „сведок“ на настаните кои се случувале и одвивале долги години наназад.


Заев се сретна со здруженија за заштита на животната средина, договорена идна соработка


Скопје, 8 февруари, 2019 - 10:09 (META) 

Премиерот Зоран Заев и заменик-министерот за животна средина и просторно планирање Јани Макрадули, се сретнаа со членови на Координативното тело на граѓански здруженија за животна средина кои заедно со Министерството за животна средина и просторно планирање соработуваат за заштита и подобрување на состојбите во овој сектор.

На средбата, како што информираат од Владата, премиерот Заев изразил подготвеност и волја за продолжување на заложбата на Владата за соработката со граѓанскиот сектор во насока на размена на идеи и ставови при операционализација на политиките за различните области од животната средина.

„Претставниците на Координативното тело, на состанокот претставија дел од своите сугестии кои се однесуваат на различни сектори од животната средина, водата, обновливите извори, квалитет на воздухот, отпадот како и ставови за подобрување на законската регулатива, во согласност со ЕУ регулативите. На работниот состанок беше договорено, претставниците на Координативното тело на граѓански здруженија за животна средина до премиерот Заев и заменик-министерот Макрадули да испратат писмо во кое ќе ги сублимираат сите конкретни иницијативи кои се однесуваат на секторот заштита на животната средина“, соопштуваат од Владата.


Правилници со стандарди стари 50 години ги врзуваат рацете во борбата со загадувањето


Скопје, 6 февруари, 2019 - 8:30 (META) 

Дури шест подзаконски акти врз основ на кои се постапува денес во Македонија, а се однесуваат на квалитетот на амбиентниот воздух се напишани во 1976 година и се сосема застарени, нефункционални, ограничувајќи ги на тој начин инспекциските служби во нивното откривање и санкционирање на загадувачи на воздухот.

На сајтот на Министерството за животна средина и просторно планирање, во заглавјето Регулатива/Национално законодавство, во делот за квалитет на амбиентниот воздух, покрај Законот за квалитет на амбиентниот воздух се дадени и подзаконски акти, правилници, уредби и упатства, кои треба да овозможат примена на овој закон во делот на мерење, следење и утврдување на штетни материи, мониторинг на квалитетот на амбиентниот воздух, утврдување на максимално дозволени емисии, класификации на објекти и слично.

Дел од нив, поради својата застареност, поради тоа што се базирани на стандарди за мерење на квалитетот на воздухот и на емисиите на штетни супстанци од седумдесетите години на минатиот век, кои малку или воопшто не кореспондираат со поимите, стандардите, начините на мерења и другите елементи содржани во важечкиот Закон за квалитет на амбиентниот воздух донесен во 2012 година, ја прават примената на овој закон односно постапувањето по него, отежнат, а во некои случаи речиси невозможен. Дел, пак, од овие подзаконски акти, иако донесени во и по 2010 година, се повикуваат на стандарди од 70-тите, што, исто така, ги прави тешко применливи во постапките на инспекторите за животна средина.

Јавноста за прв пат се соочи со овој проблем откако во дел од медиумите беше објавено дека малите загадувачи, оние чии ложишта имат јачина до еден мегават, не можат да бидат санкционирани доколку загадуваат само поради тоа што инспекциските служби треба да постапуваат по важечкиот Правилник за граничните вредности за дозволените нивоа на емисии и видови на загадувачки супстанции во отпадните гасови и пареи кои ги емитираат стационарните извори во воздухот од 2010.

Овој правилник предвидува загадувањето од малите печки да се мери преку бојата на чадот, тнр.чаднокатрански број, кој во членот 4 се дефинира како „степен на црнина на површина на филтер харијата предизвикана од отпадни гасови и се изразува со помош на скала од 10 полиња (од 0 до 9) (Бахархова скала), со различен интензитет на, при што, се одредува степенот на скалата до која црнината е најблиска.

Со помош на чадниот број се оценува црнината на отпадните гасови од ложиштата при согорување на течните и гасовитите горивата“. Но, во истиот правилник, во членот 12 стои дека „ за ложишта со јачина до еден мегават се применуваат ограничувања за емисиите согласно стандардот МКС M.E6.110 – 1987 година, при што чаднокатранскиот број може да изнесува најмногу до број 30“. Збунувачки, во еден ист правилник, без никакво објаснување, има два различни начина за мерење на емисиите на чад од малите печки, од кои едниот е стар 32 години!

„Дајте ни алатки за да постапуваме против загадувачите!“, категоричен е Мирослав Богдановски, првиот човек на Градскиот инспекторат.

Тој додава дека за инспекторите за животна средина постапувањето по овој правилник е речиси невозможно бидејќи кога ќе се соочат со загадувач, каде евидентно има надминување на вредностите, врзани им се рацете да докажат дека има загадување и нивните решенија не поминуваат во управна постапка.

„Поднесовме иницијатива за измена на Правилникот и го притискаме Министерството за животна средина во најкус можен рок да ги направи промените“, вели Богдановски и најави формирање на заедничка работна група со Министерството за решавање на овој проблем.

„Мачно е кога ни се префрла дека не правиме доволно за борбата против загадувањето, а притоа ни се врзани раце со застарени или контрадикторни и нефункционални акти“, објаснува Богдановски.

Законот за квалитет на амбиентниот воздух, меѓу другото, за правни лица предвидува глоба од 8.000 до 20.000 евра доколку испуштат во амбиентниот воздух загадувачки супстанции над пропишаните гранични вредности за емисија.

Соочено со проблемот, Министерството за животна средина минатата недела издаде соопштение кое не ги објаснува туку уште повеќе ги заплеткува работите. Во него се вели дека во споменатиот правилник има гранични вредности и дека тие зависат од горивото кое се користи, а инспекторите ги упатува да постапуваат врз основ на Законот за управување со отпад.

„Мета“ во повеќе наврати се обиде да добие одговор од МЖСПП во врска со подзаконските акти кои ја уредуваат материјата на квалитетот на воздухот, но досега од министерот Садула Дураки, ниту од заменик-министерот Јани Макрадули, ниту пак од портпаролката на министерството, Беса Татеши ни беше упатувани одговори дека се презафатени.


МТСП: Поголеми плати за кадарот во градинките со Законот за детска заштита


Скопје, 25 јануари, 2019 - 13:36 (META) 

Покачувањето на платите на вработените во градинките продолжува и во 2019 година, информираат од Министерство за труд и социјална политика (МТСП).

Од таму додаваат дека со измените на Законот за детска заштита кои што се во собраниска процедура и треба да се најдат на гласање пред пратениците е предвидено покачување на платите на кадарот во градинките.

„Со истите измени за прв пат се предвидува и кариерен развој во секторот детска заштита, со што се враќа достоинството на вработените во градинките. Зголемувањето на платите, но и започнатите реформи беше тема на денешниот состанок на министерката за труд и социјална политика Мила Царовска со директорите на градинките од цела Македонија. Процесот на јакнење на детската заштита продолжува и годинава со зголемување за 300 отсто на буџетот за капитални инвестиции во градинки. Со дополнителни 15 милиони евра од Светска банка се обезбедува простор за околу 7.000 нови деца во градинките, но истовремено работиме и на јакнење на кадрите“, се вели во соопштението.


Од утре нема да важат мерките за заштита од загадувањето што ги воведе Владата


Скопје, 22 јануари, 2019 - 12:17 (META) 

Мерките и препораките за заштита од загадувањето што ги воведе завчера Владата, од утре престануваат да важат бидејќи концентрациите на ПМ10 честичките се под дефинираниот праг на алармирање од 200 микрограми на еден кубен метар, соопштија денеска од Владата.

Во соопштението се наведува дека прагот за алармирање на суспендирани честички со големина до 10 микрометри (надминување на вредноста од 188 микрограми на еден кубен метар во текот на два последователни денови) и добиената временска прогноза од Управата за хидрометеоролошки работи, е надминат на мерното место Струмица, за каде остануваат во сила мерките и препораките.

Се укинуваат мерките за ослободување од работни обврски на бремените жени, лицата постари од 60 години, како и лицата со хронична астма и други хронични респираторни болести, прележан миокарден инфаркт, мозочен удар и други кардиоваскуларни или онколошки болести без разлика на возраста, со препорака на матичен лекар, намалената употреба на службени возила, ограничувањето на градежните работи, реорганизирање на работното време на отворено, да не се организираат спортски и други културни манифестации на отворено.


„Го сакам Водно“ на Шилегов му испорача новогодишно пакетче со 13 барања


Скопје, 27 декември, 2018 - 14:05 (META) 

Активистите на граѓанската иницијатива „Го сакам Водно“ денеска на градоначалникот на Град Скопје му предадоа „новогодишно пакетче“ од 13 барања за трајно решавање и заштита на парк-шумата Водно.

Тие бараат итно да се донесе закон за Водно, а во меѓувреме Министерството за животна средина да издаде привремен заштитен статус на Водно, како би се оневозможила понатамошна узурпација на парк-шумата.

Дел од барањата се и преиспитување на постапката за Сончев град и патот до Сончев град и решение за ублажување и санација на штетата предизвикана со тој проект.

Активистите бараат да се лоцираат, мапираат, исчистат и отстранат сите депонии кои се формирани во парк-шумата и да се обезбеди стратегија за спречување на нивно повторно формирање.

„Го сакам Водно“ предлага формирање на Јавно претпријатие „Водно“ кое ќе биде задолжено за редот и чистотата на парк-шумата и формирање на ренџерска служба на Водно, во рамките на новото ЈП, со сопствен возен парк во форма на АТМ и теренски возила, соодветни за заштитено подрачје.

„Во однос на вашето прифаќање гасоводната траса да минува низ Водно, уште еднаш гласно ви кажуваме дека продолжуваме да се бориме со сите расположиви средства да го спречиме тоа зошто ниту еден момент не дадовте издржан одговор зошто го сменивте ставот, а напротив, максимално издржано претходно објаснивте зошто сте против тоа“, велат активистите.


Законот за заштита на Водно ќе се донесе догодина


Скопје, 19 декември, 2018 - 10:16 (META) 

Нереално беше да се очекува постапката околу донесувањето на законот за заштита на парк-шумата Водно да биде комплетирана за кусо време поради тоа што на донесувањето му претходат неколку фази за реализација вели Ана Петровска, државен секретар во Министерството за животна средина и просторно планирање на прашањето на „Мета“ зошто ова Министерство не си ја завршило обврската дадена од Владата уште во август годинава да изготви закон за заштита на Водно.

Тогаш Министерството за животна средина доби рок од 30 дена да го изготви текстот на законот со кој конечно ќе се уреди статусот на Водно и ќе се заштити од понатамошна урбанизација и уништување. Ова задолжение од Владата дојде откако летово граѓанските активисти протестираа против изградбата на гасоводната траса преку парк-шумата Водно и откако стана јасно дека тоа што статусот на оваа планина не е докрај законски решен, овозможило реализација на проекти со кои се уништува голем дел од вегетацијата и природните хабитати на Водно.

Дека постои политичка волја кај парламентарното мнозинство за донесување на овој закон потврди во интервјуто за „Мета“ и скопскиот градоначалник Петре Шилегов. Парк-шумата Водно е во надлежност на градот, а законот треба да ги уреди обврските кои Град Скопје ќе ги има во однос на ова препознатливо градско обележје и рекреативна зона.

На донесувањето на законот за прогласување на Водно за заштитено подрачје ќе му претстои конечното финиширање на студијата за ре-валоризација на Водно и јавна расправа, а во склад со постоечките закони треба да биде донесен и План за управување со парк-шумата Водно. Во подготовка на овој закон партнер на Министерството е и УНДП.


Во собраниска процедура се законските измени за преземање на медицински сестри во ЈЗУ


Скопје, 13 ноември, 2018 - 16:20 (META) 

Министерството за здравство информира дека измените на Законот за здравствена заштита за преземање во јавно здравство, на медицинските сестри кои претходно работеле во приватни здравствени установи, основани под закуп во здравствените домови, заради затворање на приватни здравствени установи ПЗУ и во меѓувреме останале без работа, се во собраниска процедура.

Во измените на Законот e внесена oдредба согласно која медицинските сестри, кои ќе останат без работа може да бидат преземeни во јавни здравствени установи.

„Овие законски измени, кои сега се уште се во собраниска процедура, пред две недели се усвоени од Владата. Таа ги усвои измените на Законот за здравствена заштита, со можност за преземање здравствени работници со високо образование, стоматолози и фармацевти од приватните во јавните здравствени установи без распишување оглас. На овој начин ќе се пополнат празните работни места на здравствените работници, со пократки процедури“ се вели во соопштението на Министерство за здравство.


МЕР: Изградбата на гасоводот е според сите стандарди на квалитет и безбедност


Скопје, 29 октомври, 2018 - 16:20 (META) 

Претпријатието „Македонски енергетски ресурси“ реагира на соопштението на граѓанската иницијатива „Го сакам Водно” и информира дека изградбата на гасоводот е според сите стандарди на квалитет и на безбедност.

Од таму додаваат дека, изградбата на гасоводот продолжува според основниот проект кој што има правосилно одобрение за градба и сите други потребни дозволи дефинирани со позитивните законски прописи.

„Ако има сомнеж или индикации за каква било повреда на некои законски постапки и прописи, ги повикуваме сите што евентуално поседуваат такви информации да се обратат до надлежните институции во рамки на правниот систем на државата“, се вели во соопштението.

Од МЕР потсетуваат дека Владата, тие како претпријатие и Град Скопје прифатиле најголем дел од барањата и сугестиите на активистите како што се намалување и стеснување на работниот појас, измена на трасата од 20 километри до 24 километри со цел избегнување на сечење на дел од шумата.

„Направен е проект за дополнителни мерки за ерозија, програма за рекултивација на која што веќе работи работната група, носење на закони за Водно, Матка и Гази Баба, за кои веќе се работи во надлежните институции, финансирање на неколку еколошки проекти, за кои има одлука на влада – и ред други технички барања и сугестии. Но, мора да се напомене дека барањето за изнаоѓање алтернативна траса во оваа фаза на реализација на проектот не е возможна, од причини што неколку пати беа образложени“, додаваат од МЕР.


Итната помош е со бавни амбулантни возила кои често се расипуваат


Скопје, 29 октомври, 2018 - 16:05 (META) 

Поради доцнење и технички дефекти на амбулантните возила, Итната медицинска помош во Македонија е неефикасна, и наместо да нуди брза медицинска интервенција, во некои екстремни случаи и предизвикала губење на животи на граѓани, пишува „Порталб.мк“.

Техничките доцнења се настанати како последица на не амортизираните возила, а пак условите за нивно одржување не се предвидени ниту со Законот за здравствена заштита, ниту пак со Правилникот за работа на Итна медицинска помош.

Министерството за внатрешни работи и Министерството за здравство немаат никакви информации, но само во медиумите фигурираат три случаи кога амбулантните возила претрпеле дефекти, и не успеале да интервенираат на време. Како резултат на тоа, имало и губење на животи.

„Ние таквите случаи не ги евидентираме како црна хроника. Веруваме дека Министерството за здравство треба да ги евидентира таквите информации“, велат од МВР.

Такви информации нема ниту Министерството за здравство. Последниот случај се случи на 24 август 2018 година, каде што во една сообраќајна несреќа, неколку километри пред Тетово, амбулантното возило на Итна медицинска помош пристигнало со технички дефекти, и за да се стави во движење луѓето го туркале возилото.

„Тешка несреќа неколку километри пред Тетово, каде едно возило беше превртено. И возилото на Итна медицинска помош кое што пристигнало не било во ред, и истото потоа било ставено во движење со туркање”, велат од „Цивилмедиа.мк“.

Вториот случај се случил на 12 јули 2017 година, кога една 15-годишна девојка од Гостивар починала, при пренесувањето од Медицинскиот центар во Гостивар во Ургентниот центар- Скопје. Девојката од Гостивар имала болки во стомакот, а од Медицинскиот центар во Гостивар била испратена во 04.30 часот.

Третиот случај евидентиран во медиуми се случил на 13 март 2017 година во Крива Паланка.

„Двајца пациенти од Крива Паланка претходната ноќ со возило на Итна медицинска помош биле испратени кон Ургентниот центар во Скопје. Возилото доживеало дефект, и додека дефектот бил отстранет, двата пациенти починале”, се вели во веста на „СДК.мк“.

Итна медицинска помош е предвидена во Законот за здравствена заштита. Со законот е предвидена само услугата, но не и условите за обезбедување на добра состојба на амбулантни возила. Според она што го вели законот, начинот на работа Итна медицинска помош е предвиден со Правилник за организацијата и начинот на вршење на работата на Итната медицинска помош, што се усвојува од министерот за здравство.

Член 17 од равилникот наведува дека „Службата за брза медицинска помош работите на медицинска помош ги извршува со помош на транспортни средства кои имаат технички карактеристики што се во согласност со стандардите.“

Но под кои услови треба да се менуваат и сервисираат амбулантните возила на Итна медицинска помош не е предвидено ниту со Законот за здравствена заштита, ниту пак со Правилникот за работа на брзата помош, иако и во двете фигурира како медицинска услуга.

Граѓаните бараат Итната медицинска помош да биде поефикасна со соодветни возила, како и тоа
Министерството за здравство да го измени Правилникот за работа за да ги утврди условите кога е потребна промена и сервисирање на едно амбулантно возило.