!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Бразилската полиција пронашла пет тони марихуана во камион


Бразилија, 9 јули, 2017 - 11:49 (META) 

Бразилската полиција запленила 5,1 тон марихуана во еден камион во државата Санта Катарина, информираат локалните власти.

Три лица се уапсени за време на операцијата која се случила во четвртокот и која овозможила најголема заплена на дрога во таа држава, информираше локалната полиција.

Приведен е возачот на камионот, како и неговите двајца браќа за кои постојат сомневања дека се сопственици на дрогата.

Според првичните истраги, браќата се поврзани и со други две афери на запленет канабис, од пет тона во мај и 4,7 тони во јуни.


АХВ на Ќафасан запленила 1.300 килограми небезбедно месо од Бразил


Охрид, 19 април, 2017 - 20:47 (META) 

Агенцијата за храна и ветеринарство (АХВ) запленила 1.300 килограми небезбедно пилешко месо со потекло од Бразил на граничниот премин Ќафасан.

Запленетото месо, како што се наведува во соопштението, било уништено на депонијата во Струга.

– Станува збор за легален увоз на замрзнато пилешко месо, за кое, врз основа на извршениот преглед од страна на официјален ветеринар, било констатирано дека потекнува од објект – кланица, кој во моментот на прегледот не се наоѓал на листата објекти што се одобрени за извоз од страна на Европската Унија, односно кој дозволата за извоз ја изгубил на 23 март годинава – се вели во соопштението на Агенцијата за храна и ветеринарство.


Запленети 7 килограми хероин на граничниот премин Богородица


Гевгелија, 18 април, 2017 - 11:44 (META) 

Царинските инспектори од одделението за оперативни работи за време на велигденските празници на граничниот премин Богородица заплениле 7 килограми хероин, соопштија денеска од Царинската управа.

Како што информираат оттаму, дрогата е запленета во саботата, а била сокриена во возило што го управувал државјанин на Србија, кој бил пријавен за влез во земјава.

„При контрола на возилото во два акумулатори, од кои едниот бил сместен под хаубата, а другиот во багажниот простор, царинските службеници пронајдоа вкупно 14 пакувања облепени со леплива лента, наполнети со кафеава прашкаста материја, за која по извршеното тестирање на тестер за дрога е утврдено дека се работи за хероин со вкупна тежина од 6,9 килограми“, стои во соопштението на Царината.

Оттаму информираат дека осомничениот го набавил хероинот во Истанбул и требало да го пренесе до Нови Пазар во Србија.

Против него Царинската управа до надлежното јавно обвинителство во Велес поднело кривична пријава за неовластено производство и пуштање во промет на наркотични дроги и прекурсори.


Запленети 12 тони марихуана во Албанија


Корча, 9 април, 2017 - 11:15 (META) 

Магацин со 12 тони марихуана открила албанската полиција во селото Пагри, кај Пермет, во рамки на голема акција за сузбивање на производството и трговијата со дрога.
Магацинот бил контролиран и пред два месеца, но тогаш бил празен, а овој пат е најдена дрогата, која била делумно подготвена за продажба, а делумно се сушела.

Уапсени се три лица, по сопственикот на магацинот се трага, а сегашните претпоставки се дека дрогата била донесена од Скрапар и Корча.

Албанската полиција само во изминатите осум дена од април на разни локации во земјата запленила околу 20 тони марихуана.


Запленети повеќе од шест тони кокаин во Колумбија


Богота, 3 април, 2017 - 9:59 (META) 

Во Колумбија се запленети повеќе од шест тони кокаин наменет за црниот пазар во Шпанија, што претставува најголема заплена на дрога во земјата, соопшти денеска полицијата.

„Полицијата го зададе засега најголемиот удар на организираниот криминал, запленувајќи 6.134 килограми кокаин во местото Баранкиља. Кокаинот бил наменет за Шпанија“, наведе полицијата.

Министерот за одбрана, Луис Карлос Виљегас, го посети пристаништето Баранкиља, на северот на земјата, од каде кокаинот требало да биде префрлен во Европа.

Дрогата ѝ припаѓала на криминалната група Заливски клан, со која раководи Даиро Антонио Узуга, во моментов најбараниот криминалец во Колумбија, а неговиот клан го сочинуваат припадници на десничарската паравоена единица.
Колумбија е најголем светски произведувач на растението кока, кое се одгледува на површина од 96.000 хектари.


Полицијата пронајде 42 килограми марихуана во Струга


Охрид, 25 февруари, 2017 - 13:14 (META) 

При координирана акција на криминалистичката полиција од Струга и од Охрид, пронајдени се околу 42 килограми зелена тревкаста материја во патнички автомобил.

Од СВР Охрид информираат дека акцијата била реализирана околу 22 часот, во близина на еден хотел на улицата Димче Ковачески во Струга.

– Полициските инспектори заедно со полициски службеници од полициската станица во Струга, извршија запирање на патничко моторно возило „мини купер“ со струшки регистарски ознаки, управувано од Ф.И. (31) од струшкото село Калишта. При извршен преглед во возилото, забележани се пет вреќи со тревкаста материја, завиткана во повеќе јутени и платнени пакувања. Дополнително, во предната лева врата од автомобилот, пронајдена е едно мало најлонско пакување со бела прашкаста материја – информираат од СВР Охрид.

Оттаму велат дека при извршен претрес во домот на Ф.И. во селото Калишта, пронајдени се две црни најлонски кеси со траги од тревкаста материја.

Пронајдените предмети се одземени и предадени на вештачење во Министерството за внатрешни работи во Скопје, по што ќе биде поднесена соодветна кривична пријава.


Спречен шверц на 8 килограми марихуана на граничниот премин Табановце


Куманово, 4 декември, 2016 - 15:35 (META) 

Царинските екипи на граничниот премин Табановце вчера спречиле обид за шверц на осум килограми марихуана, која била сокрина во автомобил што го управувал 56-годишен државјанин на Република Албанија.

„На 3 декември 2016 година, околу 15 часот, на излез од Република Македонија, на граничниот премин Табановце, се пријавило патничко моторно возило марка „смарт“ со албански регистарски ознаки, а управувано од осомничениот Б.О. (56) од Р.Албанија. При прегледот на возилото, во задниот дел од левиот и десниот праг, во фабричка шуплина, царинските службеници пронашле вкупно 27 пакетчиња со различна големина, облепени со кафеава леплива лента, наполнети со наркотична дрога – марихуана со вкупна тежина од околу осум килограми“, стои во соопштението од Царинската управа.

Во разговор со осомничниот било утврдено дека за паричен надомест од 4.000 евра, тој се договорил со лица од Албанија да пренесе поголемо количество дрога од Албанија во Чешка.

Против албанскиот државјанин Царинската управа до надлежното јавно обвинителство поднела кривична пријава за неовластено производство и пуштање во промет на наркотични дроги, психотропни супстанции и прекурсори.


Запленети 30 килограми марихуана на граничниот премин Долно Блаце


Скопје, 3 декември, 2016 - 13:15 (META) 

Екипи на Царинската управа синоќа на граничниот премин Долно Блаце откриле и заплениле 30 килограми марихуана, која била сокриена во возило што го управувал 53-годишен државјанин на Кралството Шведска, информираше МВР.

Дрогата била сокриена во посебно направен бункер во подот на возилото.

„На 2 декември 2016 година, во 21.30 часот, на граничниот премин Долно Блаце, при контрола на Т.Б.Л.А. (53) од Кралството Шведска, кој управувал патничко моторно возило од марката „крајслер“ со шведски регистарски ознаки, од страна на Царинска испостава Блаце и екипа на мобилната царина била извршена детална контрола на возилото, при што во посебно направен бункер во подот на возилото биле пронајдени 61 пакетчиња завиткани со леплива лента и со алуминиумска фолија со тревкаста материја, најверојатно наркотична дрога марихуана, со тежина од околу 30 килограми“, стои во информацијата на МВР за случајот.

Странскиот државјанин од страна на Царинската управа биле задржан за понатамошна постапка.


На Табановце запленети 12,5 килограми марихуана


Скопје, 11 ноември, 2016 - 16:12 (META) 

На граничниот премин Табановце, во автомобил со германски регистарски ознаки, се пронајдени 12,5 килограми марихуана, известуваат царинските службеници. Во откривањето учествувале цариниците од одделението за оперативни работи во соработка со полициски службеници на граничниот премин Табановце.

Како што информираат од царината, во четвртокот, околу 22 часот, на излез од Република Македонија е запрен автомобил со германски регистарски ознаки, кој бил управуван од лицето Е.Д.Р., косовски државјанин, а со него патувало и друго лице кое било германски државјанин. При контрола на возилото со царинско куче, на повеќе места во фабричките шуплини цариниците пронашле 40 пакувања обвиткани со најлонска фолија, наполнети со марихуана со вкупна маса од 12,5 килограми.

Според информациите и прибраните докази од предистражната постапка од инспекторите од одделението за истраги при Царинската управа, веројатно е дека осомниченото лице требало да ја пренесе марихуаната од Косово до Германија. По комплетирањето на сите докази, против сторителот ќе биде поднесена кривична пријава за неовластено производство и пуштање во промет на наркотични средства, психотропни супстанции и прекурсори.


Чавков се пофали дека БЈБ запленило 108,5 килограми марихуана и уапсило 4 наркодилери


Скопје, 10 ноември, 2016 - 14:13 (META) 

Директорот на Бирото за јавна безбедност (БЈБ), Митко Чавков, денеска соопшти дека во вторникот во организарана акција пресекле меѓународен канал за трогвија со дрога и заплениле 108,5 килограми марихуана. Дрогата, чија вредност на наркопазарот се проценува на околу 1 милион евра, како што информираше Чавков, била со потеколо од Албанија, а требало да заврши во Турција.

Во акцијата биле уапсени четири лица, од кои двајца македонски, еден косовски и еден албански државјанин.

Чавков нагласи дека првоосомничениот бил инволвиран и во случајот со Закир Бекири, познат под прекарот Чауш, кој беше обвинет за фалсификување лични карти и пасоши, односно во случајот во јавноста познат како „Фабрика за афери“.

– Заради ваше информирање, истиот беше на извесен начин и во конекција и во случајот што беше поврзан со Чауш, односно со лицето што беше инволвирано со разни криминални активности повзани со фалсификување најразлична документација. Во таа документација најдовме податоци за фалсификување медицинска документација и за првоосомничениот во овој случај – рече Чавков на денешната прес-конференција.