!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Ципрас: Ако Скопје направи отстапки, 2018 година би можела да биде позитивна


Белград, 9 декември, 2017 - 16:26 (META) 

Македонската влада треба да сопре со иредентизмот и со реторката за единствени потомци на Македонците, за да се направат суштински чекори и да се најде заемно прифатливо решение, порача грчкиот премиер Алексис Ципрас од Белград, велејќи дека ако се направат неопходните чекори, следната година може да донесе позитивен развој на прашањето за името.

Во Белград, по вториот состанок на четворката – Србија, Бугарија, Романија и Грција, на само два дена пред средбата на Нимиц со преговарачите на двете земји во Брисел, Ципрас напомена дека ако се преземат неопходните чекори и се прифати решение за името, тој ќе биде првиот што ќе се залага Грција да ја гарантира перспективата и безбедноста на Македонија, која ја нарече „соседната земја“.

– Можно е 2018 да е година во која би можеле да имаме позитивна разврска за долгогодишниот проблем, доколку новата влада на Скопје реши да направи суштински чекори напред, ако запре со, според моето мислење, непотребната реторика дека се единствените потомци на Македонците и на Александар Велики. Ако запре со иредентистичката реторика и во исто време прифати едно решение за името, заемно прифатено со соседите. Во оваа перспектива, секако, јас, ќе бидам првиот за Грција да ја гарантира развојната перспектива и безбедноста на оваа соседна земја – рече грчкиот премиер.

Теми на белградската средба беа бугарското претседателство со ЕУ како балканско претседателство, како и за оживување на Солунската агенда од 2003 година и за конкретни проекти, како што се енергетското и железничкото поврзување на балканските земји.


Груби – Кукан: Посветени сме на реализација на очекувањата на Брисел, очекуваме поддршка


Брисел, 6 декември, 2017 - 19:32 (META) 

Претседателот на Комисијата за европски прашања и пратеник од ДУИ, Артан Груби, денеска во Брисел се сретнал и со европратеникот Едвард Кукан. Двајцата соговорници зборувале за актуелните случувања во земјата, владината коалиција, реформите и за интеграциските процеси.

„За да се олесни интегративниот процес, ние како парламентарно мнозинство, целосно сме посветени на тоа за да ги реализираме сите очекувања од Брисел и очекуваме иста посветеност од нашите пријатели во Брисел“, изјавил Груби.

Кукан ветил поддршка во напредокот на интегративните процеси во Европската Унија и добивање на датум за почеток на преговорите.

Груби денеска се сретна и со европратеникот Кнут Фленкештајн.


Еди Рама: Не е важно што ќе се случи меѓу нас, туку меѓу Западен Балкан и ЕУ


Брисел, 5 декември, 2017 - 15:28 (META) 

Нашето прашање не е што ќе се случи меѓу нас ( Западен Балкан – н.з.), туку меѓу нас и Европската Унија, изјави денеска во Брисел албанскиот премиер Еди Рама, отворајќи го 18. политички самит за Западен Балкан и ЕУ, организиран од стручната организација „Пријателите на Европа“, заедно со Регионалниот совет за соработка, а со поддршка од Европската комисија, УНДП, Фондацијата „Конрад Аденауер“ и Фондацијата „Браќа Рокфелер“.

– Европската Унија е важна движечка сила за Балканот, бидејќи без неа регионот не би можел да ги спроведува реформите и сè што се случува е затоа што Балкканот сака да биде дел од европското семјество. Ако оваа надеж избледи, работите би можеле да отидат во погрешна насока – објасни Рама на собирот наречен „Западен Балкан на раскрсница: Нови предизвици, промена на динамиката“.

Генералниот секретар на Рeгионалниот совет за соработка (РСС), Горан Свилановиќ, истакна дека Повеќегодишниот акционен план (MAP) за регионален економски простор на Западен Балкан, а кој беше поддржан од лидерите на шесте земји летоска во Трст, е во центарот на разговорите и е наведен како исчекор кон заедничката цел – пристапување во Европската Унија.

– Имаме план за напредок на регионот и сега треба да го спроведеме – изјави Свилановиќ, појаснувајќи дека станува збор за јасен план за подобрување на трговијата, вклучувајќи ја и трговијата со услуги, отстранување на нецаринските бариери, пронаоѓање начини за привлекување странски инвеститори, мобилност на експерти, истражувачи, иноватори, студенти и, на крај, од пресудна важност – дигитализација и дигитална интеграција на регионот.

На панел-дискусијата за економската соработка, како што соопшти РСС, беше изнесен податокот од извештајот за спроведување на Стратегијата 2020 на РСС, според кој во минатата година е направен пробив во отворањето нови работни места во шесте земји од Западен Балкан. Само во 2016 година биле отворени 400.000 нови работни места и иако податоците се разликуваат од економија до економија, се очекува овој тренд да продолжи оваа и наредната година.

Генералниот директор во Европската комисија за европска политика добрососедство и проширување, Кристијан Даниелсон, изјави дека меѓу лидерите од Западен Балкан постои голема посветеност да се направи прогрес во реформите за пристапување во Европската Унија.

– Видовме промени на економските модели во регионот кои се охрабрувачки. Потенцијалот на регионот лежи во регионалната соработка. Во соработка со РСС во моментов работиме на регионалниот економски простор, бидејќи го гледаме како силен придвижувач на порастот и на отворањето нови работни места, што ќе донесе полза на луѓето. Не станува збор за алтернатива за пристапувањето кон Европската Унија, туку за загревање за влегување во Унијата – нагласи директорот Даниелсон.

Еден од учесниците на панел-дискусијата „Мисли локално, дејствувај регионално“, беше и градоначалникот на Гостивар, Арбен Таравари.


Критериумите за земјите од Западен Балкан се построги од претходно, призна Даниелсон


Брисел, 5 декември, 2017 - 15:22 (META) 

Кристијан Даниелсон, директор на Комесаријатот за проширување на ЕУ, денеска изјави дека земјите од Западен Балкан минуваат низ многу потешки реформски процеси при пристапувањето во ЕУ во споредба со државите што се приклучиле на Унијата во претходната декада.

– Постои силен политички ангажман. Причината е прилично јасна: реформите на Западен Балкан се бараат затоа што сметаме дека на Западен Балкан има повеќе луѓе кои не сакаат да ги видат реформите и кои би биле задоволни со ситуацијата каква што е денес. Затоа политичките барања се поголеми – изјави Даниелсон.

Во својот говор на конференција „Западен Балкан на раскрсница“, која ја организираше бриселската организација „Пријатели на Европа“, Даниелсон на западнобалканските земји им порача да се фокусираат на регионалната соработка и на заедничкиот пазар затоа што тоа е паралела на заедничката царина, од која сите земји ќе бидат дел кога ќе станат дел од Унијата.

– Генерално, кога станува збор за трговија, мој цврст совет е да се фокусирате на регионалната трговија, а не на трговијата со ЕУ, затоа што таму се вистинските потенцијали за економски пораст – порача Даниелсон.


Свилановиќ: За пет години 1.000 борци од Западен Балкан заминале во Сирија и во Ирак


Крањ, 30 ноември, 2017 - 14:24 (META) 

Околу 1.000 лица од земјите од Западен Балкан заминале да се борат во Сирија и во Ирак од 2012 до 2017 година, од кои 300 се вратени, околу 200 се убиени, а околу 400 сè уште се на боиштата, изјави денеска генералниот секретар на Регионалниот совет за соработка (РСС), Горан Свилановиќ.

Тој, како што соопшти РСС, изјави дека темпото на заминување на граѓаните од регионот се намалило во 2015 година, а речиси во целост е запрено во средината на 2016 година.

Study Infographics

Инфографик за движењето на странските борци од Западен Балкан кои заминале на боиштата во Сирија и во Ирак во периодот од 2012 до 2017 година

– Истовремено, од цела Европска Унија околу 5.000 граѓани заминале да се борат во Сирија и во Ирак – рече Свилановиќ во обраќањето на Втората меѓународна конференција за борба против тероризмот и насилниот екстремизам во Југоисточна Европа, што се одржува денеска во Брдо кај Крањ во Словенија.

Свилановиќ додаде дека овие податоци, кои поттекнуваат од студија што наменски ја порача РСС, „нè доведуваат чекор поблиску да осмислиме што треба да се направи од училиштата до затворите за да се победат насилните идеологии кои доведуваат до ужасите на тероризмот“.

Учесниците на Конференцијата, на која има претставници на влади од Западен Балкан и на повеќе меѓународни и регионални организации и инцијативи што се занимаваат со овој проблем, ќе разговараат за моменталните трендови и предизвици во активностите на европско, регионално и на национално ниво, како и за начините на спроведување на порано договорениот принцип – „цела влада, цело општество“, во сузбивање на насилниот екстремизам.

Конференцијата ја организира Регионалниот совет за соработка заедно со Министерството за внатрешни работи на Словенија, како и со Иницијативата на Западен Балкан за борба против тероризмот и Конвенцијата за полициска соработка во Југоисточна Европа.

Првата конференција за овој проблем е одржана во ноември во Тирана. Република Македонија, како основач и активен член на Процесот за соработка во Југоисточна Европа, активно партиципира на овие собири.


Справувањето со повратниците од странските боишта ќе се дефинира на балканска конференција


Крањ, 30 ноември, 2017 - 13:36 (META) 

Заканата од повратниците од странските боишта во земјите од Западен Балкан ќе биде една од темите на денешната Втора меѓународна конференција за борба против тероризмот и насилниот екстремизам во Југоисточна Европа, што се одржува во Брдо кај Крањ, Словенија.

Претставници на влади, како и на меѓународни и регионални организации што се занимаваат со оваа тема, ќе разговараат за зајакнување на соработката и на координацијата на програмите и на активностите во борбата против тероризмот и насилниот екстремизам во Југоисточна Европа (ЈИЕ). Воедно, ќе се запознаат со студијата „Игра на трпение: проценка и одговор на заканата што ја носат странските борци повратници на Западен Балкан“, нарачана од Регионалниот совет за соработка (РСС).

Конференцијата ја организира РСС заедно со Министерството за внатрешни работи на Словенија, како и со Иницијативата на Западен Балкан за борба против тероризмот и Конвенцијата за полициска соработка во Југоисточна Европа. Учествува и Република Македонија.


Могерини во декември организира вечера за Заев и за премиерите од Западен Балкан


Брисел, 28 ноември, 2017 - 16:34 (META) 

Високата претставничка на Европската Унија, Федерика Могерини, планира пред крајот на годинава да организира состанок со премиерите од Западен Балкан.

Состанокот ќе се одржи во Брисел, во форма на работна вечера, и најверојатно ќе биде на 18 декември.

Сепак, засега не е прецизно утврден датумот, бидејќи се чека потврда од сите премиери.

На неформалната работна вечера, како што потврдија за „Мета“ од македонската Влада, ќе присуствува и премиерот Зоран Заев.

Претходниот состанок на премиерите на шесте земји од Западен Балкан во Брисел беше одржан на 24 мај годинава, исто така на иницијатива на Могерини. Тогаш Заев беше повикан како „определен премиер“ на Македонија.


Чижов: Русија сака и по проширувањето на ЕУ да ги задржи односите со одредени земји


Брисел, 23 ноември, 2017 - 18:03 (META) 

Рускиот амбасадор при ЕУ, Владимир Чижов, изјави дека Русија нема ништо против проширувањето на ЕУ, но оти Москва сака да биде сигурна дека при проширувањето на Унијата нема да се нарушат нејзините традиционални односи со одредени земји.

– Многу од земјите што сакаат да се приклучат кон ЕУ, без разлика дали се од Западен Балкан или Турција, добро се познати и потврдени трговски и економски партнери на Руската Федерација, така што внимателно следиме што се случува – вели Чижов за бриселскиот портал „Еуроактив“.

Тој повтори дека Русија нема ништо против земјите кои воспоставуваат или промовираат добри односи со Европската Унија.

– Немаме ништо против проширувањето на ЕУ, што е поинакво од проширувањето на НАТО – вели Чижов.
Тој додаде дека во тек е политички дијалог меѓу Москва и Брисел и тоа на експертско ниво за бројни прашања, од борбата против трговијата со наркотици до проширување на ЕУ, каде учествуваат со работна група за Западен Балкан.


Попоски во Брисел побара поголема присутност на претставниците на ЕУ во Македонија


Брисел, 21 ноември, 2017 - 18:22 (META) 

Пратениците Артан Груби, Никола Попоски и Фадил Зендели, вчера и денеска учествуваат на конференција посветена на интеграцијата на земјите од Западен Балкан во Европската Унија, која се одржува во Европскиот парламент во Брисел.

На конференцијата, како што соопштија од собраниската Комисија за европски прашања, особен акцент бил ставен на силната заинтересираност на Европската Унија за стабилизација на европскиот континент, при што било нагласено дека тоа нема да се постигне сè додека земјите од Западен Балкан не станат дел од Унијата.

Европратениците на конференцијата испратиле порака дека проширувањето на Унијата ќе продолжи и дека земјите од Западен Балкан во согласност со степенот на реализација и на исполнување на неопходните критериуми имаат јасна перспектива во наредниот период да се приклучат кон ова семејство.

Пратеникот Груби, како што се наведува во соопштението, ги информирал европратениците за текот на реформскиот процес во Македонија, за посветеноста на новото мнозинство да ги зацврсти поставените задачи од Брисел за до крајот на годината да се добие безусловна препорака за почеток на преговори, па дури и конкретен датум за нив.

Пратеникот Попоски упатил апел до претставниците на Унијата за поголема нивна присутност во Република Македонија, како и за поголема соработка на сите земји од регионот во поглед на европската агенда.

– Успехот во интеграцијата зависи од можноста за поголема контрола на Владата од страна на Собранието – рече Попоски.


Македонија ќе ја предводи регионалната активност за заштита на животната средина


Бон, 17 ноември, 2017 - 16:09 (META) 

Република Македонија од денеска па до крајот на наредната година ќе ја предводи Регионалната група за заштита на животната средина на Западен Балкан, која работи под капата на Регионалниот совет за соработка РСС, а со која досега претседаваше Србија.

Примопредавањето се случи денеска во Бон, каде се одржа панел-дискусија на високо ниво на претставници на земјите од Западен Балкан задолжени за заштита на околината и за климатските промени, организиран од РСС и од ресорното министерство од Србија.

На панел-дискусијата е потврдена Декларација за човековата средина и за климатските акции на Западен Балкан, а учесниците се согласија дека во регионот е сè поголема потребата да се унапреди координацијата на постојните регионални иницијативи и проекти, како и да се зацврсти меѓуресорската соработка на највисоко политичко ниво кога станува збор за енергетиката и за политиката за заштита на животната средина и за климатските промени.

Генералниот секретар на РСС, Горан Свилановиќ, ги потсети учесниците дека 73 отсто од граѓаните на регионот ги гледаат климатските промени како проблем, а 77 отсто од стопанствениците во ЈИЕ веќе презеле мерки за да се намалат штетните последици на околината од страна на нивниот бизнис. Податоците се од годишното истражување „Балкански барометар 2017“.

На состанокот, како што соопшти РСС, се разговарало и за спроведување на Парискиот договор за климатските промени, кој неодамна беше ратификуван од Македонија, за придонесот на земјите од Западен Балкан во агендата за заштита на околината, како и за прелиминарните резултатите од „Студијата за климатските промени во регионот на Западен Балкан и нивното влијание врз различни стопански сектори“.

Овие резултати покажуваат дека регионот на Балканот во бројни сектори е многу поподложен на климатските промени отколку остатокот од Европа.

Македонија на овој состанок ја претставуваше заменик-министерот за заштита на животната средина, Јани Макрадули.