!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Османи почнува редовни консултации со амбасадорите од Западен Балкан


Скопје, 15 август, 2017 - 13:29 (META) 

Вицепремиерот за европски прашања Бујар Османи денеска ја одржа првата средба со амбасадори на земјите од Западен Бакан, која, како што рече е увод во постојани координативни средби. Во средбата во Секретаријатот за европски прашања (СЕП) учествувале претставници на Албанија, Босна и Херцеговина, Косово, Србија и на Црна Гора.

На средбата се разговарало за регионалната соработка на земјите од Западниот Балкан и се разменила искуства и мислења за начините на кои може да се зголемат капацитетите на земјите за поголема апсорпциона моќ за искористување на ИПА средствата, како и евентуалните последици врз ИПА фондовите со намалувањето на буџетот на Европската Унија по завршувањето на Брегзитот.

По средбата, вицепремиерот Омани нагласи дека Владата на Република Македонија во следниот период ќе се фокусира на прашањето на името со цел забрзување на евроинтеграциите. Тој најави дека во тие рамки тој денеска заминува во посета на Германија, а месецов ќе ја посети и Атина. Во рамките на новата владина офанзива за решвање на проблемот со името е и посетата на шефот на грчката дипломатија Никос Коѕиас на Скопје, нагласи Османи.


Јункер е против брз прием на Западен Балкан во ЕУ


Претседателот на Европска комисија, Жан-Клод Јункер, уште еднаш повтори дека е противник на идејата за брз прием на земјите од Западен Балкан, но предупреди на ризикот од повторни војни на Балканот.

– Не сум приврзаник на брзо присоединување на Западен Балкан кон ЕУ. Но, ако им се одземе европската перспектива, повторно ќе го преживееме тоа што го преживеавме во 90-тите години на минатиот век. Во тој контекст, стабилноста на системот на ЕУ е задолжителен услов за Балканот повторно да не западне во состојба на војна – вели Јункер во интервју за белгискиот весникот „Политико“.

Истовремено, главниот противник на проширувањето на Унијата рече дека е против прекин на преговорите за членство со Турција и притоа изрази надеж дека официјална Анкара ќе соработува во Брисел.

– Не поддржувам прекин на преговорите со Турција, како што бара Европскиот парламент. Турција буквално секоја секунда се оддалечува од исполнувањето на обврските за членство во ЕУ. Не, ЕУ не се присоединува кон Турција, туку Турција кон ЕУ – рече Јункер, коментирајќи ја резолуцијата на Европскиот парламент, со која се бара прекин на преговорите со Анкара поради непочитување на човековите права и кршење на демократските начела.


Заев: Подготвени сме за соработка за земјите од регионот да станат членки на НАТО


Подгорица, 2 август, 2017 - 15:39 (META) 

Со нашето присуство на Самитот на земјите членки на Јадранската повелба, велиме дека сме подготвени да соработуваме во интерес на граѓаните на нашите држави и низ интеграциските процеси да го донесеме регионот до големото семејство на НАТО, изјави премерот Зоран Заев на воведното обраќање на Самитот на земјите членки на Јадранската повелба, на кој Македонија претседава и е кодомаќин со Црна Гора.

Тој рече дека членството на Црна Гора во НАТО е охрабрувачка порака на Алијансата дека вратите се отворени за сите што ќе се издигнат над сопствените предизвици и ќе покажат дека можат да придонесуваат за колективните потреби и за сопствените граѓани.

– Изразувам верба и подготвеност за акција, за Македонија да биде 30. членка на НАТО. Интеграциите во НАТО и во Европската Унија се стратешки цели за нашата држава. Новата влада, ќе се обврзам и на овој форум, е одлучена да биде локомотивата на возот кон овие две организации, за да го осигуриме добриот живот на нашите граѓан и иднината на своите деца. За да ги забрзаме интеграциите во ЕУ и во НАТО, го почнавме планот „3-6-9“ за реформските приоритети, што водат кон професионални и независни институции, демократизација на целото општество, а со тоа и кон квалитетен живот за сите граѓани – изјави Заев.

Тој најави дека Македонија ќе го зголеми буџетот за одбрана и ќе го зголеми учеството во мисиите на НАТО, а ќе се интензивираат односите со земјите членки на Јадранската повелба.

Премиерот додаде дека со присуството на високиот претставник на Соединетите Американски Држави, се покажува дека таа држава е верен, стратешки партнер на Македонија и на регионот.

Потпретседателот на САД, Мајк Пенс, изјави дека идината на Западниот Балкан е на Запад.

– Влезот на Црна Гора во НАТО е историски успех и ја покажува силата на оваа земја само десет години по обновата на независноста. НАТО се состои од големи и од мали држави, но САД немаат мали сојузници и ние го цениме нашето ново сојузништво во НАТО – изјави Пенс.


Заев: Ги решивме отворените прашања со Вучиќ


Сараево, 24 јули, 2017 - 11:35 (META) 

Македонскиот премиер Зоран Заев во интервју за регионалната телевизија Н1  изјави дека ги решил сите отворени прашања што ги имал со претседателот на Србија, Александар Вучиќ, по неговата изјава за македонското сценарио кое може да се прелее во Србија, но и по информациите кои велат дека поранешен член на БИА беше во Собранието.

Заев вели дека Србија немала влијание или лоши намери.

– Се разбира, имаше коментари во претседателската кампања за македонско сценарио, но јас не навлегувам во тоа. Според сите извештаи, Македонија беше заробена држава, институциите не функционираа. Ние сите имавме работна вечера, лидерите на земјите од Западен Балкан. Исто така, беше претседателот на Србија, Александар Вучиќ, и тука си подадовме рака и продолживме напред. Исто така, беше премиерката Ана Брнабиќ, која отвори убава перспектива, што јас ја потврдив. Презедовме обврска која ја сакаат и нашите граѓани, а тоа е соработка и отворање нови перспективи за граѓаните на Македонија и Србија – вели Заев, одговарајќи на прашањето дали кризата во Македонија била вештачка, за да се прелее во други земји, како што тврдеше Вучиќ.

Тој вели дека политичарите треба да се борат за правата и на другите етнички заедници, а не само на својата. Вели дека за него доказ се лузните на неговото лице.

– Сите извлековме позитивни поуки од политичката криза во Македонија. Малку бевме изненадени и тоа е добро, за да работиме никогаш тоа да не се повтори ниту во Македонија ниту каде било во светот. Успеавме да тргнеме напред во унапредување на животот на сите граѓаните. Овие лузни на моето лице се затоа што сум Македонец кој се борел за подобрување на правата на другите, помалку бројните народи и за мултиетничко општество – вели Заев во интервјуто.


Бибер: Владата во Македонија може да го разбие циклусот на цинизам за проширувањето на ЕУ


Трст, 21 јули, 2017 - 16:51 (META) 

Новата влада во Македонија може да биде импулс за разбивање на циклусот на цинизам што владее во Европската Унија и во земјите од Западен Балкан, во однос на проширувањето на Унијата, вели Флоријан Бибер, професор на Универзитетот во Грац и член на советодавната група за политиките за внесување на Балканот во Европа, во интервју за „Јуропиан Вестерн Балканс“.

Бибер го дефинира ваквиот став одговарајќи на прашањето за тоа која, според него, е најважната причина за забавувањето на процесот на европската интеграција на земјите од Западен Балкан, односно дали е тоа „заморот од проширување“ кај ЕУ или, пак, недостигот од волја за реформи во регионот.

Според него, станува збор за ситуација што наликува на прашањето за јајцето и за кокошката, односно дека двете работи не може да се раздвојат.

– Недостигот од волја за реформи се темели на фактот дека земјите од Западен Балкан не ги гледаат наградите во однос на членството во ЕУ. Дури и заморот е одвраќање, а политичките лидери на ЕУ чувствуваат дека не можат да го промовираат проширувањето бидејќи нивните граѓани не го сакаат тоа, што не е сосема искрено. Да, повеќето граѓани на ЕУ се скептични за проширувањето, но, од друга страна, проширувањето не е прашање со висок приоритет. Проширувањето не им се допаѓа многу, но истовремено не се ниту особено против. Ако владите на ЕУ направеа повеќе во ситуацијата, можеа да го протуркаат проширувањето. Но, владите се дефокусирани од сите други кризи и не сакаат да вложат енергија во тоа. Недостигот од реформи во регионот и недостигот од посветеност во ЕУ се во симбиоза. Мора да се скрши циклусот – вели Бибер.

Во тој контекст, тој нагласува дека одговорот можеби е во нова влада и како пример ја наведува Македонија.

– Новата влада е очигледно многу посветена на реформите и на желбата за враќање на патот кон ЕУ и тоа може да помогне во ставање крај на статус кво шемата. Во моментов, државите од Западен Балкан се цинични околу тоа дека ЕУ навистина не ги сака, а ЕУ е цинична дека регионот не е подготвен да ѝ се приклучи. Граѓаните се цинични во однос на нивните влади и во однос на ЕУ. Тие мора да го разбијат овој циклус на цинизам и да кажат: „Ако имаме заедничка цел и сме посветени на пристапувањето во ЕУ, можеме да направиме нешто“. Можеби новата влада во Македонија ќе биде импулс за промена на овој вид на динамика – заклучува Бибер.

Интервјуто со Бибер е направено за време на Форумот за граѓанско општество што се одржа во Трст на 11 и 12 јуни оваа година.


Претседателите на стопанските комори од регионот се сретнаа со Тајани


Подгорица, 19 јули, 2017 - 20:36 (META) 

Претседателите на стопанските комори на земјите од Западен Балкан, денеска во Подгорица се сретнаа со претседателот на Европскиот парламент, Антонио Тајани.

Состанокот, на кој присуствуваа и претседателот на Стопанската комора на Македонија, Бранко Азески, и претседавачот на собранието на комората, Антони Пешев, се одржал во просториите на Стопанската комора на Црна Гора.

„Констатирано е дека со донесувањето на повеќегодишниот акционен план за Регионалната економска област, Европската Унија ги насочува земјите од Западен Балкан да се фокусираат на меѓусебната соработка, а понатамошниот развој ќе се реализира преку структурите на ЦЕФТА“, информираат од Стопанска комора.

Тајани порачал дека земјите од Западен Балкан треба да ги подобрат економските реформи и владеење на правото.


Анѓушев – Гарет: Македонија може повеќе да извезува во Велика Британија


Скопје, 19 јули, 2017 - 18:11 (META) 

Вицепремиерот за економски прашања, Кочо Анѓушев, денеска се сретна со британскиот амбасадор во земјава, Чарлс Гарет, со кој разговарал за економската соработка помеѓу Македонија и Обединетото Кралство.

Тие заклучиле дека соработката е на солидно ниво, но и дека постои можност економските односи уште повеќе да се развијат, особено во поглед на извозот од Македонија.

„Обединетото Кралство е значаен економски партнер на Македонија, втора земја по обем на трговската размена. Сметам дека досегашната меѓусебна економска соработка е добра основа која може да ја надградиме, особено во намалување на трговскиот дефицит и зголемување на извозот кон Обединетото Кралство. Со економските политики кои Владата ќе ги спроведe во наредниот период, ќе се насочиме кон тоа да ги развиваме македонските компании да произведуваат производи со повисока додадена вредност, да станат поконкурентни на регионалните и на европскиот пазар и да го зголемат извозот, со што ќе придонесеме и за отворање нови работни места и за побрз пораст на економијата“, истакна Анѓушев.

Амбасадорот Гарет се осврнал на активностите од Берлинскиот процес, односно на самитот за Западен Балкан кој се одржа во Трст, но и на активностите кои следуваат наредната година.

„На самитот во Трст, Македонија навистина имаше успешно претставување. Наредниот самит за Западен Балкан ќе се одржи во Обединетото Кралствo и се надевам дека планираните реформски процеси во земјата ќе бидат реализирани, а Република Македонија ќе добие уште поголема поддршка на наредниот самит“, изјавил Гарет.


Анѓушев: Добивме 70 милиони евра грант од ЕУ за пругата кон Бугарија


Скопје, 13 јули, 2017 - 14:15 (META) 

Од вкупно 194 милиони евра грант наменет за развој на инфраструктурата во Западен Балкан, Македонија на самитот во Трст добила 70 милиони евра за доизградба на пругата од Бељаковце до Крива Паланка, информираше денеска вицепремирот задолжен за економски прашања, Кочо Анѓушев, кој додаде дека оваа неповратна помош, доволна за да се покрие 46 отсто од вкупната сума што е потребна за изградба на втората делница од пругата кон Бугарија.

– Препознаен е реформскиот дух на Владата практично да ги имплементира сите процедури и потребни чекори за побрзо и полесно пристапување кон Европската Унија и до нејзините фондови – изјави Анѓушев.

Одговарајќи на новинарско прашање, Анѓушев кажа дека пругата ќе биде градена во континуитет и дека третата делница ќе се гради откако ќе биде завршена втората.

Тој, исто така, нагласи и дека биле направени контакти со Светска банка, која била незадоволна што последните две-три години воопшто не биле склучени нови договори за изградба на инфраструктура во Македонија, а и тие чија реализација почнала не е на потребното ниво.

Средствата што ги нуди Светска банка најчесто се за автопатска мрежа, а било разговарано и за буџетска поддршка која, како што рече Анѓушев, конечно ќе заврши кај македонските компании.


Лидерите од Западен Балкан во Трст го усвоија Акцискиот план за економска интеграција


Трст, 12 јули, 2017 - 21:16 (META) 

Шесте земји од Западен Балкан, меѓу кои и Македонија, денеска на Самитот во Трст го усвоија повеќегодишниот Акциски план за регионален економски простор на Западен Балкан наречен МАП (Multi-annual Action Plan – Повеќегодишен акциски план), соопшти Регионалниот совет за соработка (РСС), кој е овластен да го следи целиот процес.

МАП има цел да овозможи „непречен протек на стока, услуги, капитал и на квалификувана работна сила“, со што регионот би требало да биде поатрактивен за вложувања и за трговија и да го забрза приближувањето кон ЕУ на земјите потписнички.

Со МАП се предвидени мерки за приватниот сектор да може да се реализира на пазар од приближно 20 милиони луѓе и да се насочи кон модел на регионален пораст со долгорочни стапки. Мерките се фокусираат на промовирање на понатамошна трговска интеграција, воведување динамичен регионален простор за инвестиции, олеснување на регионална мобилност и создавање програма за дигитална интеграција.

Надгледувањето на напредокот и реализацијата на МАП му е доверена на Регионалниот совет за соработка и на Секретаријатот на ЦЕФТА.

Генералниот секретар на РСС, Горан Свилановиќ, изрази задоволство што од шесте лидери и од ЕУ, добиле задача да го надгледуваат процесот.

– Шесте лидери на Западен Балкан изразија целосна определеност за спроведување на МАП. Ова ќе даде силен поттик на процесите на пристапување во ЕУ врз основа на индивидуални заслуги, целосно ќе го забрза исполнувањето на економските критериуми од Копенхаген и ќе ослободи поголеми економски потенцијали – изјави Свилановиќ.

Во соопштението се наведува дека лидерите од Западен Балкан ги повикуваат меѓународните организации и донаторите кои ги поддржуваат реформите во областите што ги предвидува МАП, своите програми за помош да ги сообразат со МАП. За таа цел, до крајот на 2017 година треба да се организира конференција посветена на координација на донаторите.


Заев: Во Македонија владее оптимизам од подадената рака од меѓународната заедница


Трст, 12 јули, 2017 - 20:45 (META) 

Има голема потреба од формирање рамка за унапредување на односите меѓу земјите од Западен Балкан, кон што е силно определена новата влада на Република Македонија, а постои и голема потреба не само од реформи, туку и од фокусиран забрзан реформски напредок, рече премиерот Зоран Заев за време на неговото обраќање на самитот за Западен Балкан во Трст.

– Знам дека граѓаните на Македонија се изморени од долгогодишната стагнација. Но, сакам да го споделам и оптимизмот во нашата држава, што го заменува тој замор. Тој оптимизам е резултат на видиците што ги отворија демократските промени во Македонија, но и подадената рака од Брисел и меѓународната заедница, кои тоа го препознаа и ги отворија вратите за Република Македонија. Тоа се врати на перспективи за граѓаните на Македонија, на верба и на надеж дека ова е моментот што не смее да се испушти. Ова е шансата за напредок. И ние тоа го имаме предвид – изјави Заев.

Пред лидерите на земјите од Западен Балкан, еврокомесарот за проширување, Јоханес Хан, шефицата на европската дипломатија, Федерика Могерини, како и шефови на држави членки на ЕУ, Заев потенцираше дека постои политичка волја кај владата на Република Македонија да ја поддржи и да ја прифати Агендата за поврзаност на регионот.

Тој додаде дека Македонија ќе работи на унапредување на владеењето на правото и доброто управување.

– Длабоката и долгогодишна политичка криза, предизвикана токму од непочитувањето на овие базични обврски, ни покажа дека тоа е и потреба за граѓаните кои имаат уставно право на правда и почитување на нивните слободи и права. Ве уверувам, Македонија може да биде и ќе биде кредибилен партнер на ЕУ во регионот, а тоа ќе испрати и нова мотивирачка порака за целиот Западен Балкан, затоа следете нè и поддржувајте нè. Потребна ни е вашата помош и поддршка – рече Заев.

Македонскиот премиер потенцираше дека Македонија ќе остане цврст партнер во справувањето со предизвиците во борбата против тероризмот, илегалната миграцијата, радикализацијата и мигрантската криза.

По обраќањето, Заев заедно со премиерите од Западен Балкан го потпиша Договорот за транспортна заедница.