Мајлинда Брегу e новата генерална секретарка на Регионалниот совет за соработка


Сараево, 4 јануари, 2019 - 10:30 (META) 

Мајлинда Брегу од денеска е на функцијата генерална секретарка на Регионалниот совет за соработка (РСС), на местото на досегашниот секретар Горан Свилановиќ, официјално е соопштено во Сараево.

РСС е извршно тело на Процесот за соработка во Југоисточна Европа, чиј основач и полноправен член е и Република Македонија.

Во својата писмена изјава Брегу ја подвлече мислата на Жан Моне за обединување на европските народи како услов да опстојат и додаде дека тоа исто важи и за народите на Западен Балкан.

– Иднината е во поврзаноста. Во интегрирање на нашите економии во единствен пазар, поврзување на луѓето и на заедничките вредности, во вложување во човечкиот и интелектуалниот капитал, во нашиот заеднички политички, безбедносен и економски интерес – порача Брегу.

Новата генерална секретарка на РСС на оваа функција стапува откако пред неколку месеци ја доби довербата од министрите за надворешни работи на земјите членки на Процесот, на самитот во Брдо крај Крањ, Словенија.

Таа е искусна политичарка од Албанија, која силно ја поддржува Европската Унија и интегративните процеси.

Пред Брегу, на оваа позиција беше Горан Свилановиќ во два последователни мандати – од 2013 до 2018 година.


Договорот од Преспа – настан на годината во Западен Балкан


Белград, 29 декември, 2018 - 19:47 (META) 

Преспанскиот договор помеѓу Македонија Грција е еден од настаните кои ја обележаа 2018 година, се вели во анализата на Европскиот Западен Балкан – веб порталот на тинк-тенкот Центар за современа политика од Белград.

„Договорот потпишан од министрите за надворешна политика на Мкедонија и Грција, Никола Димитров и Никос Коѕиас на 17 јуни се смета дека е најважниот настан на годината. Договорот му стави крај на деценискиот спор околу името обезбедува земјата официјално да се нарекува Република Северна Македонија, а Грција да не става пречки на евро-атлантскиот пат“ се вели во анализата.

Освен Преспанскиот договор, како настани на годината се издвоени и објавувањето на Стратегијата за проширување на ЕУ, извештаите на Европската комисија за секоја од земјите, одложувањето на почетокот на преговорите со Македонија и Албанија за 2019 година, Лондонскиот самит, визната либерализација за Косово, Изборите во БиХ, Резолуцијата на Европскиот парламент за Западен Балкан, отворањето на поглавјата со Србија и Црна Гора и дијалогот помеѓу Приштина и Белград.


Заев за прогласувањето Војска на Косово: Не се потребни нови тензии


Скопје, 14 декември, 2018 - 15:21 (META) 

Македонскиот премиер Зоран Заев денеска, по изгласувањето на трите закони во парламентот на Косово со кој се прави трансформација на Косовските безбедносни сили во Војска на Косово, порача дека во овој момент на регионот не му се потребни нови тензии.

-Јас знам дека и ставот на НАТО е тој: Не е време! Не ни требаат нови тензии. Уште еднаш, да не забораваме дека Балканот нема намера повторно да биде буре барут – рече Заев.

Апелираше до своите колеги – премиери, но и до претседателите на земјите од Западен Балкан, да внимаваат на своите чекори.

– Да ја унапредиме економската соработка, да постигнеме траен мир, раст, развој и членство во ЕУ – порача Заев по националната конференција за децентрализација.

Инаку, владата на Косово им го честиташе на своите граѓани формирањето на војската на Косово, воедно порачувајќи му на НАТО дека од денеска таа организација се стекнала со еден верен и посветен сојузник.

Соопштението од кабинетот на премиерот Рамуш Харадинај уследи по денешното изгласување на законите со кои Косово доби војска, како и по реакцијата на генералниот секретар на НАТО Јенс Столтенберг, кој изрази жалење што косовската војската се формира „и покрај загриженоста“ на Алијансата поради „избрзаната одлука“ на Приштина.

Според Владата на Косово, право на оваа држава е да има војска, „една мултиетничка и професионална сила изградена според стандардите на НАТО“.

„Владата на Косово цени дека правото на Косово за војска, за една мултиетничка и професионална сила изградена според стандардите на НАТО, извира од жртвите и слободата, од правото на државата, од суверенот, граѓанската волја за да се брани и да ги промовира прозападните вредности во Косово и пошироко. Косово е НАТО и НАТО е Косово. Во тоа никој да не се сомнева“, се вели во владиното соопштение.

Владата на Харадинај гарантира дека косовската војска, „заедно со сојузниците од НАТО, ќе биде единствено во служба на демократијата, безбедноста, мирот и развојот на Косово, регионот и каде и да е потребно“.


Брегу: Проширувањето на ЕУ и поврзувањето на Балканот се зависни процеси


Брисел, 4 декември, 2018 - 16:46 (META) 

Мајлинда Брегу, новата генерална секретарка на Регионалниот совет за соработка (РСС), која стапува на должност од идната година, укажа денеска на неопходноста од синхронизација на проширувањето на ЕУ со поврзувањето на Западен Балкан.

– Трансформацијата на Западен Балкан значи поврзување, односно интеграција на нашите економии во единствен пазар, поврзување на луѓето и заедничките вредности, поврзување на нашите заеднички политички, безбедносни и економски интереси. Мораме да се погрижиме нашите општества да станат поинклузивни. Сите заедно без исклучок треба да имаат полза од растот – додаде Брегу.

Брегу зборуваше на панел во рамките на 19. Самит што го организираат „Пријателите на Европа“, со помош на Европската комисија, на „Конрад Аденауер“, на РСС, на УНДП и на Командата на американските сили во Европа.

Самитот е всушност платформа на која се собираат креаторите на политиките од регионот и претставници на Европската Унија, земјите членки и други влијателни институции, а на кои се разговара за политички и економски прашања што се значајни за Западен Балкан.

Мајлинда Брегу е поранешна шефица на албанската дипломатија, а ќе ја преземе должноста генерален секретар на Регионалниот совет за соработка (РСС) од досегашниот Горан Свилановиќ, на 1 јануари 2019 година.


Можна средба на Могерини со премиерите од Западен Балкан во декември


Белград, 29 ноември, 2018 - 12:57 (META) 

Во Европската Комисија се разгледува можноста високата претставничка за надворешна политика Федерика Могерини во втората половина на декември да се сретне со премиерите од Западен Балкан.

Како што пренесуваат медиумите во Србија повикувајќи се на извори во Брисел, би станувало збор за Западнобалканската шестка – Албанија, БиХ, Црна Гора, Косово, Македонија и Србија – а засега нема најава за нова рунда од дијалогот на Белград и Приштина.

Како можен датум за средбата се посочува 19 декември, а темите би биле регионалната соработка и процесот на евроинтеграции, заедно со преглед на сработеното од реформите во текот на 2018 година, која што беше најавувана како преломна година за процесот на проширување и следните чекори на патот кон ЕУ.


Анѓушев место Заев на работниот појадок кај Курц со премиерите од Западен Балкан


Виена, 19 ноември, 2018 - 13:19 (META) 

Вицепремиерот задолжен за економски прашања, Кочо Анѓушев, денеска присуствуваше на работниот појадок кој го организираше канцеларот на Австрија, Себастијан Курц за премиерите од Западен Балкан.

Анѓушев присуствуваше на појадокот наместо премиерот Зоран Заев откако тој го откажа неговото учество поради внатрешните политички случувања во земјата.

Од Владата информираат дека главна тема била регионалната соработка која има важна улога во процесот на интеграција на земјите од Западен Балкан во Европската Унија, начините за нејзино унапредување преку процеси на дигитализација, поврзување и економската соработка.

По завршувањето на официјалниот дел од работниот појадок се одржа заедничка прес-конференција на којашто се обратија канцеларот на Австрија, Себастијан Курц, еврокомесарот за соседска политика и проширување, Јоханес Хан, еврокомесарката за дигитална економија и општество, Марија Габриел, премиерите од Западен Балкан и вицепремиерот Кочо Анѓушев.

Канцеларот Курц изрази голема поддршка за земјите од Западен Балкан за процесот на ЕУ интеграција посочувајќи ја регионалната соработка како клучен сегмент кој ќе го забрза зачленувањето на земјите од Западен Балкан во ЕУ и еден од приоритетите на австриското претседавање со Европската Унија.

Тој ја посочи важноста од продолжување на иницијативата за формирање на регионална економска област како прв чекор во понатамошното интегрирање во единствениот европски пазар.

Вицепремиерот Анѓушев потенцираше дека подобар животен стандард за граѓаните може да се обезбеди само преку подобрување на економијата, што подразбира обезбедување државна финансиска помош, владеење на правото и законите, како и стабилност во земјата.

-Стабилна држава, особено за мала земја како Македонија, значи интеграција во подобар безбедносен и европски систем. Токму поради оваа причина, нашата земја ќе биде посветена на овој процес, ќе ги вложиме нашите најдобри напори за да ја завршиме нашата домашна задача, но и за да обезбедиме подобар живот за нашите граѓани. Да покажеме повеќе капацитет за регионална соработка, меѓу нашите држави, особено ако сакаме да имаме подобра соработка во Европската Унија во иднина – рече Анѓушев.


Премиерите на Западен Балкан на појадок кај Курц, Заев го откажа учеството


Виена, 19 ноември, 2018 - 9:45 (META) 

Премиерите на Западен Балкан денеска во Виена ќе имаат работен појадок со австрискиот канцелар Себастијан Курц, на кој ќе присуствуваат и европскиот комесар за проширување и соседска политика, Јоханес Хан и за дигитална економија и дигитално општество, Марија Габриел.

Македонскиот премиер Зоран Заев, го откажа учеството поради внатрешно политички случувања во земјата.

Според информациите од кабинетот на Курц, на појадокот ќе присуствуваат шефицата на српската влада, Ана Брнабиќ, премиерот на Албанија, Еди Рама, на Црна Гора, Душко Марковиќ, претставникот на Советот на министри на Босна и Херцеговина, Денис Ѕвиздиќ и шефот на косовската влада, Рамуш Харадинај.

Најавено е дека ќе се зборува на три теми.

„Најпрво за европската перспектива на Западен Балкан, што е и едно од главните цели на австриското претседавање со ЕУ. Потоа ќе се разговара за регионалната соработка и за билатералните конфликти“, стои во соопштението од кабинетот на Курц.

Австрискиот канцелар кој деновиве престојуваше во Белград и Приштина изјави дека Европската Унија ќе биде комплетна дури откако државите од Западен Балкан ќе станат членки на Унијата.


Хан: Сите членки на ЕУ да го почитуваат владеењето на правото во Македонија


Брисел, 16 ноември, 2018 - 17:14 (META) 

Еврокомесарот за соседска политика и проширување, Јоханес Хан, на својот „Твитер“ профил индиректно го искоментира бегството на осудениот поранешен премиер, Никола Груевски, велејќи дека станува збор „за кредибилитетот на Европа“.

„Силно владеење на правото е еден од фундаменталните критериуми за членство во Европската Унија. После години назадување, Македонија има добар напредок во оваа област, вклучувајќи го и кривичното право. Сите членки на ЕУ плус соседите од Западен Балкан треба да го почитуваат овој процес. Ова е прашање за кредибилитетот на Европа“, напиша Хан.


Дигитализацијата една од темите на „Старт-ап самит 2018“ во Софија


Софија, 15 ноември, 2018 - 16:51 (META) 

Министерот за информатичко општество и администрација, Дамјан Манчевски и директорот на фондот за иновации, Јован Деспотовски, денеска оствариле работна средба со еврокомесарката за дигитална економија и општество Мариа Габриел во рамки на „Старт-ап самит 2018“ (Startup Summit 2018), што денеска се одржува во Софија.

На средбата разговарале за повеќе теми од областа на дигитализацијата на Македонија и за соработката помеѓу државите од Западен Балкан.

„Министерот Манчевски ја претстави идејата и подготвеноста на Македонија да се приклучи кон иницијативата „5Г“ прекуграничен Коридор за автопатишта, што претходно беше потпишан од страна на Србија, Бугарија и Грција. Еврокомесарката Габриел ја поддржа спремноста на Македонија и понуди целосна помош од Европската комисија за реализација на оваа идеја“, информираат од Министерство за информатичко општество и администрација.

Манчевски и Деспотовски го претставиле концептот на Научно-технолошкиот парк што е во финална фаза на подготовка.

Габриел, ја повторила важноста од приклучување на Албанија и Косово, кон договорот потпишан помеѓу Македонија, Србија, Црна Гора и Босна и Херцеговина, за намалување на цените во роаминг, што понатаму би прераснало во целосно укинување на цените во роаминг за земјите од Западен Балкан до 2021 година.


Заев на средба со делегација од Светска банка: Поддршка за стабилната буџетска политика


Скопје, 31 октомври, 2018 - 9:52 (META) 

Премиерот Зоран Заев се сретна со високите претставници од Светска банка, потпретседателот за Европа и Централна Азија, Сирил Мулер, регионалната директорка за Западен Балкан, Линда Ван Гелдер и Марко Мантованели, директор на Светска Банка за Македонија.

На средбата разговарале за долгорочната системска и аналитичка поддршка на Светска банка во досегашната и идната соработката со Македонија.

„Одржливоста на нашите капацитети е нешто на кое мораме сериозно да се посветиме“, изјавил Заев на средбата.

Тој исто така нагласил дека, „дури и малите резултати во економското придвижување во Македонија се голем знак за напредок“, но исто така дека „Владата е свесна за потребата од паралелно динамизирање на реформите кои ќе ги елиминираат пречките за понатамошен забрзан развој на земјата.“

Првиот човек на делегацијата, Сирил Мулер, средбата ја окарактеризирал како израз на поддршка за стабилната буџетска политика на Владата, затоа што, како што изјавил „забележливи се плодовите и значајниот развој на потенцијалите на земјата.“

Сублимирајќи ги резултатите од соработката на Светската банка со Македонија, Мулер оценил дека „заедничкиот труд веќе доаѓа до ниво каде многу проекти стануваат реалност.“