Јанушев: Партиското СЈО и клиентелистичкиот суд незаконски го замрзнуваат имотот на ВМРО-ДПМНЕ


Скопје, 1 ноември, 2018 - 14:56 (META) 

Заев одлучи да го направи и последниот чекор и да го впрегне неговиот последен адут, партиското специјално јавно обвинителство и клиентелистички расположениот суд и да го замрзне имотот на ВМРО-ДПМНЕ, обвини на прес-конференција генералниот секретар на ВМРО-ДПМНЕ, Игор Јанушев, откако денеска по барање на Специјалното јавно обвинителство (СЈО), Основен суд Скопје 1 донесе решение со кое е изречена привремена мерка за обезбедување на имотот на најголемата опозициска партија.

– За прв пат во историјата на Република Македонија, но и за прв пат на европско тло се бара замрзнување на имот на политичка партија која што е во опозиција. Ова е демократијата и демократските принципи за кои што се залагаат Заев и СДСМ! Принципи со кои што однародената власт се обидува да го умртви секое поинакво размислување и да забрани секакво политичко делување кое се разликува и кое не се согласува со антидржавните политики на Заев и СДСМ. Барањето на СЈО и Одлуката на судиите Димишкова и Реџепагиќ се целосно неосновани и без никаква правна аргументација. Барањето на СЈО и одлуката на судиите се исклучиво, и исклучиво политички мотивирани. Повредени се и протоколите и праксата на Европската конвенција за човекови права и Европскиот суд за заштита на човекови права – рече Јанушев.

Тој нагласи дека замрзнувањето на имотот се направило иако партијата ВМРО-ДПМНЕ како правно лице воопшто не е осомничена во постапката. Тој потсети и дека на вакво барање Апелацискиот суд Скопје веќе еднаш решавал и го отфрлил барањето за замрзнување на партискиот имот.


СЈО: Замрзнат имотот на ВМРО-ДПМНЕ


Скопје, 1 ноември, 2018 - 11:46 (META) 

По барање Специјалното јавно обвинителство, судија на претходна постапка на Основен суд Скопје 1 донесе решение со кое е изречена привремена мерка за обезбедување на имот на политичката партија ВМРО-ДПМНЕ, соопштија денеска од СЈО.

Со мерката, која е изречена во рамки на предметот „Талир“ се замрзнати вкупно 69 недвижнини, меѓу кои и објектот во кој се наоѓа седиштето на партијата.

„Со оваа мерка се забранува отуѓување на конкретниот имот како и давање под закуп на истиот. Дејствијата се превземени во рамки на предметот „Талир“, со оглед на тоа што постои веројатност истиот имот да биде отуѓен до завршување на постапката“, велат од СЈО.

Оваа судска времена мерка доаѓа откако претседателот на ВМРО-ДПМНЕ, Христијан Мицкоски најави дека партијата размислува да го продаде седиштето во центарот на Скопје или да го даде под закуп.

Истрагата за „Талир“ се однесува на незаконското финансирање на ВМРО-ДПМНЕ од 2009 до крајот на 2015 година, а постои сомнеж за злоупотребени 4,9 милиони евра. Во истрагата осомничени се 14 лица, а меѓу нив е и поранешниот лидер на ВМРО-ДПМНЕ, Никола Груевски. Дел од истрагата е и изградба на главното седиште на партијата во Скопје од страна на градежната фирма „Бетон“.


Јанева: Се повлековме од „Талир“ за да не влијаеме на политичката состојба


Скопје, 21 декември, 2017 - 14:38 (META) 

Специјалното јавно обвинителство го повлекло барањето за замрзнување на имотот на ВМРО-ДПМНЕ во случајот „Талир“ бидејќи не сакало да влијае на политичката состојба во државата, изјави денеска специјалната јавна обвинителка Катица Јанева.

– Мислевме дека треба да одлучиме на поинаков начин во тој предмет бидејќи не сакавме да влијаеме на политичката состојба и бидејќи тоа барање во Основниот суд Скопје 1 можеме да го поднесеме во секое време. Тоа беше процесно барање што го поставивме, не беше тоа облигаторно, не мораше Врховниот суд да каже дека мора се замрзне имотот на политичката партија. Во овој момент сметаме дека добро напредуваме во таа истрага и во следните три-четири месеци сигурно ќе има епилог и од неа – рече Јанева, одговарајќи на новинарско прашање по конференцијата на проектот „Набљудување на судски предмети од областа на организираниот криминал и корупција според новиот закон за кривичната постапка“, што се одржува во Скопје.

СЈО минатата недела со поднесок до Врховниот суд го повлече барањето за заштита на законитоста со кое бараа да се преиспита основаноста на одлуките на Кривичниот суд со кои беше одбиено нивното барање за замрзнување на имотот на ВМРО-ДПМНЕ, вклучувајќи го и централното седиште на партијата.

По поднесокот на СЈО, Врховниот суд одлучи да го се отфрли првичното барање за замрзнување на имотот на ВМРО-ДПМНЕ.

СЈО во рамки на истрагата за случајот „Талир“, која се однесува на незаконското финансирање на партијата, побара замрзнување на имотот на ВМРО-ДПМНЕ. Иако ова обвинителство не успеа да ја затвори истрагата до истекувањето на крајниот рок за покревање обвинение, од СЈО соопштија дека ќе продолжат да испитуваат како партијата се стекнала со толкав имот. Под истрага беа 11 лица, меѓу кои и поранешниот премиер Никола Груевски.


Папата Франциск замрзна 2 милиони евра со сомнително потекло


Ватикан, 19 февруари, 2017 - 12:55 (META) 

Ватикан замрзна повеќе од два милиони евра со сомнително потекло минатата година, во склоп со борбата која папата Франциск ја врши против перењето пари во Светата столица.

Ова го соопшти ватиканскиот главен обвинител Џан Пјеро Милано.

Милано, чија титула гласи „промотер на правдата“ рече дека замрзнатите пари – околу 2,1 милион евра се дел од вкупната сума од околу 13 милиони евра колку што се замрзнати од 2013 до 2016 година.

Според неговите зборови, истрагата се води во 17 случаи за кои има сомневање дека биле финансиски малверзации.

Минатата година, Агенцијата за финансиско информирање на Ватикан соопшти дека затворила скоро 5.000 сомнителни сметки во склоп на тригодишната истрага за работењето на Ватиканската банка.


Ердоган ѝ се закани на ЕУ дека ќе ги отвори границите за бегалците


Истанбул, 25 ноември, 2016 - 11:53 (META) 

Турскиот претседател Реџеп Таип Ердоган се закани дека ќе ги отвори границите за мигрантите кои сакаат да стигнат во западноевропските земји, јавуваат светските агенции. Ваквата реакција на Ердоган доаѓа еден ден откако Европскиот парламент гласаше за замрзнување на пристапните приговори на Турција со Европската Унија (ЕУ).

„Повикувавте на помош кога 50.000 мигранти навалија на граничниот премин Капикуле (на турско-бугарската граница). Почнавте да се прашувате што ќе правиме ако Турција ги отвори границите“, изјави Ердоган во Истанбул.

Тој рече дека Турција е таа што храни меѓу 3 милиони и 3,5 милиони бегалци, додека Европа ги погазува своите ветувања.

„Слушајте ме добро. Ако одите уште подалеку, границите ќе бидат отворени“, порача турскиот претседател.

Европскиот парламент вчера побара замрзнување на преговорите на Турција за членство во ЕУ поради репресијата на турските власти и апсењата во земјата по неуспешниот обид за воен удар во јули годинава.

Пратениците во Европскиот парламент со големо мнозинство ја усвоија резолуцијата, која, иако не е обврзувачка, може да влијае на зголемување на тензиите меѓу Турција и ЕУ.

Европската Унија и Турција кон крајот на март годинава постигнаа договор за враќање на бегалците во Турција, во согласно со кој на Анкара ѝ беше ветена финансиска помош за бегалците и забрзани преговори за членство во ЕУ.


И српските министри го замрзнаа учеството во владата на Косово поради законот за Трепча


Приштина, 10 октомври, 2016 - 8:48 (META) 

Mинистрите на Српската листа одлучија да го замрзнат учеството во работата во владата на Косово, поради усвојување на законот за рудникот Трепча.

Заменикот на премиерот на Косово, Бранимир Стојановиќ, министерот за администрација и локална самоуправа Љубомир Мариќ и министерот за заедници Далибор Јевтиќ во заедничко соопштение изјавиле дека им е оневозможено правото како членови на Владата да учествуваат во расправата за теми, кои се од клучно знаење за положбата на српскиот народ на Косово.

Тие ги повикаа претставниците на меѓународната заедница да се ангажираат во решавање на ситуацијата.

Косовскиот парламент во саботата донесе закон за рудникот Трепча според кој 80 проценти од сопственоста над тоа претпријатие има владата во Приштина, што официјален Белград остро го критикуваше.

Претходно, пратениците на Српската листа го замрзнаа учеството во парламентот.


Кривичниот суд ја замрзна сметката на „Финзи“


Скопје, 7 октомври, 2016 - 13:09 (META) 

Специјалното јавно обвинителство денеска соопшти дека Основниот суд Скопје 1 донел решение да се замрзне сметката на фирмата „Финзи“.

„Во текот на вчерашниот ден, судијата на претходна постапка во Основниот суд Скопје 1 донесе решение со кое наложи да се запре извршувањето на финансиските трансакции на сметките на правното лице ДТУ „Финзи“ ДООЕЛ Скопје. Ова решение беше донесено по повод наше барање за донесување привремена мерка забрана за користење и располагање со трансакциска сметка на правното лице во случајот „Трезор“. Појаснуваме дека нашето барање беше прецизирано во согласност со укажувањата на судијата на претходна постапка во Основниот суд Скопје 1, со што изразивме подготвеност за продлабочување на професионалната соработка со судот“, соопштија од СЈО.

Обвинителството минатата недела го презентираше случајот „Трезор“, во кој осомничени се три раководни лица од Управата за безбедност и контраразузнавање и едно лице од МВР.

Како што рече обвинителката Фатиме Фетаи, во истражната постапка било утврдено дека четвртоосомничениот им помогнал на првите тројца осомничени да ѝ овозможат на компанијата „Финзи“, со која управувал сега починатиот Коста Крпач, да оствари имотна корист во вредност од 862.045 евра.


Притвор за едно лице и замрзнување на сметката на „Финзи“ побара СЈО за „Трезор“


Скопје, 28 септември, 2016 - 13:46 (META) 

Во врска со истрагата во предметот „Трезор“, Специјалното јавно обвинителство до Основниот суд Скопје 1 поднесе предлог за определување мерки за претпазливост за три осомничени лица, со кои е побарано од судот да ги одземе патните исправи на овие лица.

– Воедно, за едно осомничено лице побарано е определување мерка притвор поради опасност од бегство, постоење на основан страв дека лицето ќе ја попречува кривичната постапка и поради постоење на особени околности кои го оправдуваат стравот дека лицето ќе го повтори делото – се вели во известувањето на СЈО.

До Основниот суд Скопје 1 поднесено е и барање за донесување привремена мерка – забрана за користење и за располагање со трансакциската сметка на правнато лице „Финзи“ ДООЕЛ Скопје.


СДСМ го замрзна учеството во Собранието


Скопје, 23 јуни, 2016 - 14:44 (META) 

СДСМ и нивните коалициски партнери ја замрзнуваат работата во Собранието додека Уставниот суд не се произнесе за уставноста на Специјалното јавно обвинителство, рече денеска на прес-конференција лидерот на СДСМ, Зоран Заев.

Тој ги повика и другите пратеници да не учествуваат во работата на Собранието затоа што имаат обврска кон граѓаните и со тоа ќе ја покажат нивната поддршка за СЈО.

– Ова не е целосно напуштање на Собранието, туку само потсетување дека сите пратеници гласаа за СЈО и сите треба да дадат поддршка за неговата работа. Сите рокови се пробиени, а трпението на граѓаните е при крај. Уставен суд треба што поскоро да се изјасни за иницијативата за СЈО. Иницијативи поднесени од ВМРО-ДПМНЕ се решаваат за седум дена, а иницијативата за СЈО чека осум месеци – рече Заев.


Уставниот суд одлучува за законитоста на распуштањето на Собранието


Скопје, 25 мај, 2016 - 9:38 (META) 

Уставниот суд денеска треба да одлучи за уставноста и законитоста на одлуките за распуштање на Собранието, со одложено дејство, од 18 јануари и 23 февруари, оваа година.

На минатата седница, одржана пред точно една недела, уставните судии едногласно прифатија да ја разгледуваат иницијативата поднесена од Демократската унија за интеграција (ДУИ), со која се оспорува распуштањето на Собранието.

Судиите, во меѓувреме, донесоа времена мерка за запирање на сите активности и дејствија поврзани со изборите.

Прифаќањето на иницијативата и носењето на времената мерка отвори можност за повторно свикување на Собранието, што спикерот Трајко Вељаноски го направи истиот ден (во средата, минатата недела), на која пратениците едногласно го избришаа од Изборниот законик 5 јуни, како ден на кој треба да се оддржат предвремените парламентарни избори. Нов датум за одржување на изборите не е предвиден.