Владата подготвува нов закон за СЈО, за Јавното обвинителство и за кривична постапка


Скопје, 15 ноември, 2018 - 10:00 (META) 

Коинциденција или не, Владата реши да менува три клучни закони од областа на кривичниот прогон токму на 13 ноември, денот кога поранешниот премиер Никола Груевски објави дека пребегнал во Унгарија, каде што бара политички азил.

Министерството за правда токму на овој ден објави дека подготвува предлог закон за Специјалното јавно обвинителство кој треба да биде готов до крајот на месецот.

„Целта на законот е да се изврши уредување на материјата за статусот, надлежностите и други прашања поврзани со Специјалното јавно обвинителство. Во текот на подготовката на законот ќе бидат вклучени судии, јавни обвинители, меѓународни организации и надлежни институции“, соопшти Министерството.

Истовремено, Министерство за правда подготвува предлог закон за јавното обвинителство. Во образложението се вели дека законот за кривичната постапка е донесен во 2010 година, а започна да се применува од 2013 година и дека со него биле воведени значајни новини кои во најголем дел се однесуваат на јавното обвинителство.

„Затоа е потребно Законот за јавното обвинителство да се усогласи со соодветните решенија пропишани во Законот за кривичната постапка. Целта на Законот е да се изврши усогласување со меѓународните стандарди и да се усогласи со соодветните решенија пропишани во Законот за кривичната постапка“, информираат од Министерството.

Освен овие два закони, во тек е подготовка и на предлог закон за кривичната постапка. Во образложението од Министерството за правда се вели дека во периодот на неговата примена биле лоцирани одредени недостатоци кои е потребно да се отстранат.

„Дополнително, потребно е усогласување на законот со најновите меѓународни стандарди во оваа област. Целта на Законот е да се изврши усогласување со меѓународните стандарди и да се надминат лоцираните слабости во неговата примена“, објаснуваат од Министерството.


Владата го усвои предлог-буџетот за 2019 и ќе го достави до Собрание


Скопје, 15 ноември, 2018 - 9:35 (META) 

Владата на својата 103. седница го усвои предлог – буџетот за 2019 година, кој ќе биде доставен на усвојување до Собранието.

Вкупните приходи у расходи во предлог – буџетот се во рамките на предвидените параметри на Министерството за финансии, и резултираат со намалување на буџетскиот дефицит на ниво од 2,5 проценти од БДП.

„Планираниот дефицит е во согласност со Фискалната стратегија на Република Македонија 2019-2021 и ја потврдува планираната фискалната консолидација, проследена со натамошна буџетска дисциплина и обезбеден значителен фискален простор за инфраструктурни проекти и поддршка на домашната економија, за зајакнување на социјалната праведност и сигурност, и за забрзување на евро-атлантските интеграциски процеси“, се вели во соопштението на Влада.

На седницата на Владата е усвоен и предлог – закон за извршување на буџетот за 2019 година.


Во собраниска процедура се законските измени за преземање на медицински сестри во ЈЗУ


Скопје, 13 ноември, 2018 - 16:20 (META) 

Министерството за здравство информира дека измените на Законот за здравствена заштита за преземање во јавно здравство, на медицинските сестри кои претходно работеле во приватни здравствени установи, основани под закуп во здравствените домови, заради затворање на приватни здравствени установи ПЗУ и во меѓувреме останале без работа, се во собраниска процедура.

Во измените на Законот e внесена oдредба согласно која медицинските сестри, кои ќе останат без работа може да бидат преземeни во јавни здравствени установи.

„Овие законски измени, кои сега се уште се во собраниска процедура, пред две недели се усвоени од Владата. Таа ги усвои измените на Законот за здравствена заштита, со можност за преземање здравствени работници со високо образование, стоматолози и фармацевти од приватните во јавните здравствени установи без распишување оглас. На овој начин ќе се пополнат празните работни места на здравствените работници, со пократки процедури“ се вели во соопштението на Министерство за здравство.


Владата иницираше законски измени за решавање на проблемот со бездомните кучиња


Скопје, 7 ноември, 2018 - 11:09 (META) 

Владата на 101. седница иницираше измени на Законот за здравствена заштита и благосостојба на животните.

„Министерството за земјоделство, шумарство и водостопанство е задолжено заедно со Агенцијата за храна и ветеринарство, со ЗЕЛС, како и во соработка со граѓанските организации за правата на животните, во најкус период да подготви законски измени за да се надмине проблемот со бездомните кучиња“, се вели во соопштението на Владата.

Оваа реакција на Владата следуваше по маршот за похуман однос кон бездомните животни, но и трагедијата која се случи во Гостивар, кога 17-годишна девојка се удави во Вардар бегајќи од куче-скитник.


Владата ќе менува закон за да ги утврди платите на вицепремиерите


Скопје, 30 октомври, 2018 - 13:49 (META) 

Министерство за труд и социјална политика подготвува измени на Законот за плата и надоместоци на избраните и именуваните лица во Република Македонија за да може да утврди плата за вицепремиерите Кочо Анѓушев, Радмила Шекеринска, Оливер Спасовски, Бујар Османи и Хазби Лика.

„Со донесување на Одлука У.бр.87/2017 на Уставниот суд на седницата одржана на 21 февруари 2018 година се укина членот 14 содржан во Закон за плата и надоместоци на избраните и именуваните лица во Република Македонија во делот на ‘потпретседател на Владата’. Со укинување на овој дел од членот 14 од Законот се појави правна празнина за утврдување на платите на замениците на претседателот на Владата на РМ“, се вели во образложението на Министерството за труд и социјална политика објавено на ЕНЕР.

Се додава дека предлог на Законот за изменување на Законот за плата и надоместоци на избраните и именуваните лица во Република Македонија се менува членот 14 со кој се дава можност за утврдување на платите на замениците на претседателот на Владата на Република Македонија.

Според досегашната регулатива, вицепремиерите земаа плата од 91.712 денари со оглед на тоа што основица за пресметување на платата е просечната исплатена месечна плата по вработен во Републиката за претходната година, која според податоците на Државниот завод за статистика изнесувала 22.928 денари помножено со коефициент 4 колку што во спорниот член 14 беше предвидено за функцијата потпретседател на Владата.

Коефициентот за пресметка за член на Владата односно министер е помал и изнесува до 3,70.

Инаку, Уставниот суд на Република Македонија во февруари, годинава укина дел од членот 14 од Законот за плата и другите надоместоци на пратениците и утврди дека функцијата потпретседател на влада не постои во правниот промет на Република Македонија и со тоа не може да се пресметува посебен коефициент на плата за таа функција.

Во одлуката на Уставниот суд, меѓу другото, е наведено дека од анализата на Законот за плата и другите надоместоци на пратениците во Собранието на Република Македонија и другите избрани и именувани лица во Републиката произлегува дека законодавецот определил коефициент за утврдување плата на претседателот на Владата, на потпретседателот на Владата и на членовите на Владата.

„Меѓутоа од одредбите на Уставот и Законот за Владата произлегува дека Владата ја сочинуваат претседателот на Владата и министрите и дека не постои функција потпретседател на Влада. Оттука произлегува дека со Законот за плата и другите надоместоци на пратениците во Собранието на Република Македонија и другите избрани и именувани лица во Републиката им се утврдува коефициент за утврдување плата за функција што не постои во Република Македонија“, пишува во одлуката.


ВМРО-ДПМНЕ го поднесе законот за амнестија за учесниците и организаторите на 27 април


Скопје, 29 октомври, 2018 - 16:50 (META) 

ВМРО-ДПМНЕ го поднесе во Собранието предлог законот за амнестија на учесниците и организаторите на нападот во Собранието на 27 април лани.

Координаторот на пратеничката група на ВМРО-ДПМНЕ, Драган Данев, на прес-конференција рече дека предложено е Собранието да го донесе законот по скратена постапка.

– Со овој закон се предвидува и се уредува начинот на ослободување од кривично гонење, запирање на поведените постапки и целосно ослободување од издржување на казната затвор, а за кои постои основано сомнение дека сториле кривични дела: учество во толпа што ќе спречи службено лице во вршење на службено дејствие, насилство, учество во толпа што ќе изврши кривично дело и дело за терористичко загрозување на уставниот поредок и безбедност. Со овој предлог закон се предвидува и бришење на осудата на лицата осудени заклучно со денот на влегување на сила на овој закон – рече Данев.

Според него, со законот ќе се обезбеди правда за сите, вистинско национално помирување наместо селективност и поделби кои, кои како што рече, ги нуди СДСМ.

Во судскиот случај за упадот во Собранието на 27 април минатата година, обвинети се 33 лица од кои 31 за терористичко загрозување на уставниот поредок и безбедноста, а двајца за помагање


УСАИД и Владата потпишаа меморандуми за енергетските реформи


Скопје, 15 октомври, 2018 - 17:11 (META) 

Со новите меморандуми потпишани денеска меѓу Владата, Министерството за економија и Меѓународната агенција на САД за развој (УСАИД), како и помеѓу Регулаторната комисија за енергетика (РКЕ) и УСАИД, за „Проектот за развој на регионални енергетски пазари – поддршка на реформите во секторот енергетика“, ќе се овозможи подобра иднина на енергетскиот сектор во Македонија, порача вицепремиерот за економски прашања, Кочо Анѓушев.

–  Со техничка помош од УСАИД беше создаден текстот на Законот за енергетика изгласан во мај, а оваа поддршка продолжува и преку креирање на преку 80 подзаконски акти кои произлегуваат од Законот и кои се неопходни за целосна имплементација на овој Закон. Сите засегнати страни напорно работат во создавање на подзаконските акти и истите ќе бидат завршени во предвидената динамика, со што ќе се обезбеди заштита на потрошувачите и ќе се овозможи развојот на обновливите извори на енергија – потенцираше Анѓушев.

Амбасадорот на САД, Џес Бејли, истакна дека транспарентните услови и конкурентните енергетски пазари се витални за домаќинствата и развојот на индустријата и економијата.

– Сигурното снабдување со енергенси е возможно преку користење на микс на енергетски извори како што се ветер, соларна енергија, природен гас и фосилни горива. Преку реализација на овој проект, во кој соработуваат Владата, Министерството за економија, Регулаторната комисија за енергетика и УСАИД, ќе се озвозможи разновидно  и конкурентно енергетско портфолио на Македонија, а воедно ќе се овозожи усогласување на националното енергетско законодавство со енергетските регулативи и директиви на Европската Унија – рече Бејли.


ОБСЕ за референдумот: И покрај празнините во законите, темелните слободи беа почитувани


Скопје, 2 октомври, 2018 - 9:30 (META) 

Иако законската рамка не ги покри доволно сите аспекти на процесот, референдумот од 30 септември во Поранешната Југословенска Република Македонија беше администриран непристрасно, а темелните слободи беа почитувани, заклучија меѓународните набљудувачи во нивната денешна изјава.

„Темелните слободи на собирање, здружување и изразување беа почитувани низ целиот процес, а, иако непостоењето на официјална кампања „Против“ значеше дека гледиштата на кампањата „За“ доминираа, медиумите обезбедија опсежни информации и широк спектар на мислења. Државната изборна комисија донесе регулатива за да ги пополни празнините во правната рамка, што покрена прашања околу нејзините законски овластувања да го прави тоа. Иако властите вложија извесни напори да обезбедат јавни информации во врска со договорот, неговата содржина беше недоволно објаснета“, рече амбасадорот Јан Петерсен, шеф на мисијата на ОДИХР за набљудување на референдумот.

Набљудувачите исто така оценија дека „Собранието, првенствено преку владејачките партии, ја предводеше кампањата „За“, која содржеше и висок степен на ангажман на странски лидери и претставници на ЕУ, НАТО и Соединетите Американски Држави.“

Тие оценија дека „иако немаше активна кампања „Против“, коалиција од граѓански здруженија и две помали политички партии се залагаше за бојкот, преку митинзи и на социјалните медиуми, а често користејќи потпалувачка, националистичка реторика, рекоа набљудувачите.“

„Доколку ги почитуваме оние кои одбраа да не гласаат, бездруго мораме да ги почитуваме и оние над половина милион – кои сериозно го сфатија референдумот и одлучија да го дадат својот глас за иднината на земјата. Во оваа пригода, тие ја изразија својата волја во мирно опкружување. За во иднина, се надеваме дека прашањето на точноста на избирачките списоци ќе биде најпосле
решено“, рече Штефан Шенах, шеф на делегацијата на Парламентарното собрание на Советот на Европа.

Набљудувачите оценија дека „ДИК го администрираше референдумот непристрасно и одржуваше ефикасни и колегијални јавни состаноци, иако на нив недостигаше суштествена дебата за клучни прашања.“

„Комисиите на пониско ниво генерално работеа професионално, а, и покрај некои мали неправилности, гласањето на денот на референдумот беше оценето позитивно на 98 проценти од избирачките места посетени од меѓународните набљудувачи. Правилата за финансирање на кампањите не зборуваат за лимити на трошењето и им недостигаат јасни барања за поднесување финансиски извештаи за кампањите и за ревизија, или санкции во врска со тоа, рекоа набљудувачите. Владата распредели околу 1,3 милиони евра за Собранието, за трошоците на телевизиско рекламирање, но опозицијата тоа го одби, па се потроши само делот јавни средства наменет за кампањата „За“. Законската рамка предвидува мониторинг од страна на меѓународни и граѓански набљудувачи. Предлагачот на референдумот – во овој случај Собранието – имаше право да именува свои претставници да набљудуваат на избирачките места, но тоа реши тоа да не го стори“, оценија набљудувачите.


Заев: Деновиве ќе се знае дали ќе има договор со опозицијата или ќе се оди на избори 


Скопје, 1 октомври, 2018 - 13:49 (META) 

За неколку дена ќе се знае дали постои амбиент за постигнување договор со опозицијата за двотретинско мнозинство кое е потребно за да се изгласаат уставните измени во Парламентот кои произлегуват до Договорoт со Грција.

Ова денеска го истакна премиерот Зоран Заев во изјава дадена по свечениот час на новозапишаните студенти на ФИНКИ.

Заев истакна дека денеска е ден за сублимирање на сите анализи и планови и додаде дека од утре ќе почнат разговори. Според него, постои капацитет за одржување предвремени избори кои се последна опција доколку не се постигне договор.

– Секако дека има капацитет за избори. Законот и Уставот ги предвидуваат следните чекори. Но, се надевам дека ќе успееме да се договориме. Процесите не можат да бидат замрзнати и да стојат на место, работите мора да се движат напред – рече премиерот.

Доколку не се постигне договор и се оди на предвремени избори, според него, изборите ќе се случат брзо. Постои можност тие да се организираат до крајот на ноември, временска одредница која ја спомена и вчера. Тој напомена оти во тој целиот тој процес мора да се мисли и на другите рокови, на пример на изборите за Европскиот парламент кои ќе се одржат во мај следната година, а на кој ќе учествува и Грција.


Оваа недела Европскиот парламент гласа дали да го зачува или „да го убие“ интернетот


Стразбур, 10 септември, 2018 - 14:19 (META) 

Оваа недела, на 12 септември, Европскиот парламент ќе гласа за нацрт-закон со кој се заканува за да го оштети интернетот како што го знаеме. Под маската на реформата на авторските права, постојат голем број на „реформи” кои ќе ги повредат основните права на интернет, ишува Internet Freedom Blog.

Една од нив е членот 11 од законот, со кој се сакаше да се забрани креирање линкови до статиите, освен ако некој претходно не побара и не добие дозвола за тоа. Во текот на преговорите, тоа беше малку разводнето, па од забрана за поврзување се премина на забрана за прикажување на фрагменти од поврзаната содржина, односно цитати од статијата.

Другата е членот 13 од законот, кој, како што е напишан сега, ќе овласти имплементација на поставување филтри од страна на сите интернет-платформи даватели на услуги. Ова би имало длабоки последици врз основните права, како што се слободата на говорот, слободата на здружување и слободата на печатот .