!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Руско МНР: Еди Рама и понатаму ги турка големоалбанските амбиции


Москва, 17 јануари, 2018 - 20:48 (META) 

Одделот за медиуми на Министерството за надворешни работи на Русија вечерва порача дека изјавата на албанскиот премиер и претседател на Социјалистичката партија на Албанија, Еди Рама, за Законот за употреба на јазиците во Македонија е потврда дека тој и понатаму сака да ја реализира „тиранската платформа“ и да се заканува на уставните темели на македонската државност и на Охридскиот рамковен договор.

„Ваквата реторика на Еди Рама ја потврдува намерата и понатаму да ја турка одиозната ”тиранска платформа“ создадена со неговото лично учество. Реализацијата на одредбите на овој документ се заканува со поткопување на уставните темели на македонската државност, на Охридскиот рамковен договор и како последица – со нови меѓуетнички потреси на Балканот. Сето тоа е дел од големоалбанските амбиции кои се повеќе се шират и го доведуваат во прашање територијалниот интегритет на низа држави во регионот. Давајќи му големо значење на прашањето за употреба на јазиците, сметаме дека од принципиелна важност е таквите решенија да се донесуваат врз основа на согласност од сите гранки на државна власт и со широк консензус во општеството“, се вели во реакцијата од руското МНР.

Одделот за медиуми напоменува дека албанскиот премиер истовремено се пофалил и дека Социјалистичката партија на Албанија, на чие што чело е тој, имала врска со формирањето на „Ослободителната армија на Косово“ и со „битката за Косово“ во соседната Србија.


Иванов не го потпишал указот за Законот за јазиците


Скопје, 17 јануари, 2018 - 17:57 (META) 

Претседателот на Република Македонија, Ѓорге Иванов, попладнево објави дека не го потпишал указот за Законот за јазиците, затоа што e, како што рече, неуставен.

– Имајќи ги предвид моите согледувања за неусогласеноста на Законот за употреба на јазиците со Уставот, но и изнесените укажувања на експертската  и пошироката јавност за противуставноста на овој закон, а врз основа на член 75 од Уставот на Република Македонија, донесов одлука да не го потпишам указот за прогласување на Законот за употреба на јазиците. Денес упатив писмо до Собранието на Република Македонија со кое информирам дека не го потпишувам – рече Иванов.

Претседателот на Република Македонија вели дека овој закон е донесен неправилно – без јавна расправа, научна дебата и сосема неоправдано му било додадено европското знаменце.

– На 11 јануари 2018 година, Собранието на Република Македонија го изгласа Законот за употреба на јазиците, без јавна расправа, без научна дебата, без вклученост на академската и експертската јавност и без опозицијата. Во последното годишно обраќање потенцирав дека овој закон е донесен со европско знаменце, без притоа да постои европска директива што налага усогласување на македонското законодавство со законодавството на Унијата. Со овој закон, Република Македонија ќе стане можеби единствената европска држава која сама си поставува услови за членство во Унијата кои никој не ги бара. За апсурдот да биде поголем, дури и укажувањата на претставниците на Европската Унија не беа испочитувани и беа игнорирани – порача Иванов.

Според претседателот, со законот се фаворизира албанскиот јазик и се воведува скап паралелизам во државната власт, што ќе донесе блокада и нефункционалност.

– Со овој закон се воведува многу скап паралелизам во сите органи на државната власт што води кон нивна целосна блокада и нефункционалност.  Во услови на блокада постои опасност да се отвори прашањето за уставното редефинирање и загрозување на унитарноста, суверенитетот и територијалниот интегритет на Република Македонија. Наместо во духот на дијалогот и соживотот да градиме мултиетничко општество преку праведни и општоприфатени закони, ние донесуваме неправеден и репресивен закон со кој се фаворизира само албанскиот јазик – порача Иванов.


ОМД го повика Иванов да не го потпишува Законот за јазиците


Вашингтон, 12 јануари, 2018 - 9:48 (META) 

Обединетата македонска дијаспора во реакција до јавноста ги осуди пратениците кои вчера гласаа за усвојувањето на Законот за употреба на јазици и порача дека македонската заедница надвор од Македонија нема да го толерира редефинирањето на македонскиот национален идентитет, како и дека историјата ќе им суди на оние кои го изгласале законот.

„Овој закон, усвоен без демократски процес или вистинска јавна дебата, ќе ги чини македонските даночни обврзници милиони, и ќе го наруши Уставот на Република Македонија. Законот не е потврден од Венецијанската комисија на Советот на Европа и ја придвижува земјата на чекор понатаму да стане федерална држава, загрозувајќи го унитарниот територијален интегритет на Македонија. Нема историска основа или демографски причини за Македонија да има биетнички идентитет како Белгија“, се вели во соопштението од ОМД.

ОМД го повикува претседателот Ѓорге Иванов да не го потпишува законот, а САД и ЕУ веднаш да го осудат овој акт на Собранието. Од таму бараат Македонија итно да спроведе попис на населението, а опозицијата да престане да го бојкотира Собранието, да се врати на работа, претставувајќи ги интересите на нивните изборни единици.

Законот, според ОМД, е неуставен и служи за понатамошна поделба на Македонија по две етнички и религиозни линии.

„ОМД смета дека ниту едно малцинство во Македонија не треба да има преференцијален третман врз другите, а Македонија мора да престане да создава паралелни општества“, се додава во соопштението.


Нов обид на Собранието да обезбеди кворум да гласа за уставните судии и Законот за јазиците


Скопје, 11 јануари, 2018 - 9:48 (META) 

Откако пред два дена Собранието не можеше да обезбеди кворум за гласање, претседателот Талат Џафери за денеска ги закажа петте продолженија на пет седници за гласање на повеќе закони.

Пратениците денеска треба да гласаат за новите судии во Уставниот суд на предлог на претседателот на државата, проф. д-р Осман Кадриу и д-р Дарко Костадиновски кои во вторникот не беа избрани бидејќи во салата на Собранието немаше доволно пратеници за да биде изгласано нивното назначувањe.

Како точки на дневен ред на седниците е и второто читање на предлог-законот за употреба на јазиците како и измените на Законот за заштита на сведоци што ги бараше Специјалното јавно обвинителство и законот со кој се укинува Советот за утврдување на факти и покренување на постапка за утврдување одговорност за судија, по скратена постапка.

За денеска е закажано и продолжението на седницата за интерпелациите на министрите за земјоделство, шумарство и водостопанство, за труд и социјална политика, за финансии, за култура и за животна средина и просторно планирање, Љупчо Димовски, Мила Царовска, Драган Тевдовски, Роберт Алаѓозовски и Садула Дураку.

Иако имаше услови некои од седниците да продолжат со другите точки, претседателот на Собранието, Талат Џафери, ги прекинуваше седниците со образложение дека станува збор за предлози од опозицијата, која сега не учествува во работата на Собранието, па ќе се продолжи со тие точки кога пратениците на ВМРО-ДПМНЕ ќе се врателе во собраниските фотелји.


Груби: Седницата за законот за јазиците не ја одложив поради изјавата на Хан


Брисел, 21 ноември, 2017 - 19:52 (META) 

Претседателот на Комисијата за европски прашања, пратеникот Артан Груби, ја одложил утрешната комисиска седница за законот за јазиците за да не се дефокусира јавноста од итните прашања.

– Проценив дека неделава е многу значајна за други реформски прашања и дадов предност на тоа за да не овозможам дефокусирање на јавноста од тоа што во моментов е најзначајно и итно – вели Груби.

Тој истакнува вели дека одложувањето не е поврзано со вчерашната изјава на еврокомесарот Јоханес Хан дека владата треба да се фокусира на приоритетните реформи за кои ќе биде оценувана и дека законот за јазиците не е во Договорот од Пржино, ниту, пак, е нешто кое Брисел го бара.

Пратениците минатата недела со 66 гласа „за“ и со 41 глас „против“, дадоа виза предлог-законот за употреба на јазиците да оди на второ читање, а за него досега се поднесени 90 амандмани, од кои 84 од ВМРО-ДПМНЕ, четири од СДСМ и два од Беса. Опозициската ВМРО-ДПМНЕ денеска, еден ден по изјавата на Хан, побара да се тргне европското знаменце од законот.


Груби ја одложи комисиската седница за законот за јазиците


Скопје, 21 ноември, 2017 - 18:02 (META) 

Претседателот на собраниската Комисија за европски прашања, Артан Груби, ја одложи утрешната комисиска седница на која во второ читање требаше да се расправа за предлог-законот за употреба на јазиците, соопштија од Комисијата.

Во соопштението не се наведува причината за откажувањето на седницата, која требаше да се одржи на 22 ноември – Денот на албанската азбука. Датумот кога ќе биде одржана ќе биде дополнително соопштен.

Одложувањето на седницата доаѓа еден ден откако еврокомесарот за проширување и за добрососедска политика, Јоханес Хан, рече дека Владата треба да се фокусира на приоритетите за кои ќе биде оценувана и оти Брисел не го бара законот за јазиците, ниту пак тој е дел од Договорот од Пржино.

Пратениците минатата недела со 66 гласа „за“ и со 41 глас „против“, дадоа виза предлог-законот за употреба на јазиците да оди на второ читање, а за него досега се поднесени 90 амандмани, од кои 84 од ВМРО-ДПМНЕ, четири од СДСМ и два од Беса.


СДСМ со поддршка од ДУИ поднел четири амандмани за законот за јазици


Скопје, 21 ноември, 2017 - 15:46 (META) 

Пратеничката група на СДСМ и на коалицијата поднесе четири амандмани на предлог-законот за јазици, со кои ќе се унапредат правата на етничките заедници во земјата, изјави координаторот на пратеничката група на СДСМ, Томислав Тунтев, на прес-конференција во Собранието.

Според Тунтев, со амандманските решенија ќе се унапредува позицијата на помалите етнички заедници што се наведени во преамбулата на Уставот, со што ќе се овозможи и овие заедници да остваруваат одредени права предвидени во предложениот закон.

– Истовремено, предлагаме намалување на висината на казните што беа наменети за институциите што нема да го почитуваат овој закон. Според нашиот предлог, казните од 4.000 евра до 5.000 евра се намалуваат на 1.000 до 2.000 евра. Ние како пратеници сме задоволни што за предложените амандмански решенија добивме поддршка и од нашиот коалициски партнер ДУИ. Наша заедничка цел е да дојдеме до квалитетно решение, кое и практично ќе биде применливо – рече Тунтев.

Координаторот на пратеничката група рече дека Владата преку МНР ќе побара мислење од Венецијанската комисија за целиот текст на законот по неговото усвојување, како и за отворените прашања што не се дел од овој закон, а веќе се доставени до Венецијанската комисија.


ВМРО-ДПМНЕ поднесе 50 амандмани за законот за јазици, СДСМ пет, Беса два, ДУИ – ниеден


Скопје, 20 ноември, 2017 - 17:27 (META) 

ВМРО-ДПМНЕ поднесе 50 амандмани за законот за употреба за јазиците, СДСМ пет, а два амандмани поднесе Беса. Денеска истече рокот во кој политичките партии можеа да поднесат амандмани за овој закон во второ читање.

ВМРО-ДПМНЕ со амандманите сака да интервенира во делот во кој, според партијата, се загрозува македонскиот јазик. Од СДСМ велат дека нивните амандмани се во насока на разјаснување на дилемите околу казните што ги предвидува законот и на обвинувањата дека тој ќе го загрози унитарниот карактер на Македонија.

Движењето Беса преку амандмани ќе бара официјализирање, а не само унапредување на употребата на албанскиот јазик.

Артан Груби, пак, рече дека пратеничката група на ДУИ нема да поднесе амандмански предлози оти нивните забелешки веќе се доставени до Венециската комисија.

Тој, како претседател на собраниската Комисија за европски прашања, комисиската седница на која во второ читање ќе се разгледува предлог-законот за употреба на јазиците, ја закажа за 22 ноември – Денот на албанската азбука.

По три дена за него ќе се расправа во Законодавно-правната комисија, а потоа на пленарна седница.

Во средата, на продолжението на 15. собраниска седница, пратениците со 66 гласа „за“ и со 41 глас „против“ му дадоа виза на предлог-законот за употреба на јазиците за второ читање во надлежните комисии.


Хан: Законот за јазиците не е дел од Договорот од Пржино и ЕУ не го бара


Скопје, 20 ноември, 2017 - 16:06 (META) 

Еврокомесарот Јоханес Хан денеска во Скопје оцени дека законот за јазиците е разумно барање, но дека властите треба направат приоритети и да се фокусираат на областите за кои ќе добијат позитивни оцени според постигнувањата.

– Ако законот за јазиците се усвои во следните неколку недели, врз основа на препораките на Венецијанската комисија, тогаш е во ред. Но, тоа што сега е важно е Владата и другите фактори во земјата да се фокусираат на законите и на условите во земјата кои се релевантни за позитивна препорака. Законот за јазици не дел од тоа што е договорено во Пржино – рече Хан, одговарајќи на новинарско прашање за тоа како го коментира носењето на законот.

Тој рече дека во Брисел се посветени и се залагаат за носење на ваков закон, но дека сега треба да им се даде приоритет на националните интереси.


Рокот за поднесување амандмани за законот за јазици истекува утре


Скопје, 19 ноември, 2017 - 18:29 (META) 

Рокот за поднесување амандмани за предлог-законот за употреба на јазиците истекува утре, а амандмани ќе поднесат сите партии освен ДУИ.

ВМРО-ДПМНЕ ќе интервенира во делот во кој, според партијата, се загрозува македонскиот јазик. Од СДСМ велат дека ќе поднесат амандмани во насока на разјаснување на дилемите околу казните што ги предвидува законот и на обвинувањата дека тој ќе го загрози унитарниот карактер на Македонија.

Движењето Беса преку амандмани ќе бара официјализирање, а не само унапредување на употребата на албанскиот јазик.
– Ние ќе направиме соодветни интервенции со амандмани во насока на целосно официјализирање на албанскиот јазик, како што е предвидено во заедничката декларација на албанските политички партии – изјави Реџеп Мемеди од Беса.

Артан Груби, пак, рече дека пратеничката група на ДУИ нема да поднесе амандмански предлози, оти нивните забелешки веќе се доставени до Венециската комисија.

Тој, како претседател на собраниската Комисија за европски прашања, комисиската седница на која во второ читање ќе се разгледува предлог-законот за употреба на јазиците, ја закажа за 22 ноември – Денот на албанската азбука.

Во средата, на продолжението на 15. собраниска седница, пратениците со 66 гласа „за“ и со 41 глас „против“ му дадоа виза на предлог-законот за употреба на јазиците за второ читање во надлежните комисии.