ВМРО-ДПМНЕ бара невладините да не издаваат препораки за членовите на Советите на ААВМУ и МРТ


Скопје, 17 мај, 2018 - 17:17 (META) 

Во собраниската Комисија за транспорт, врски и екологија денеска се одржа четвртото продолжение на амандманската расправа за Предлог-законот за изменување и дополнување на Законот за аудио и аудиовизуелни медиумски услуги, во второ читање. Се дискутираше за 5-от амандман на ВМРО-ДПМНЕ, со кој се бара да се избрише ставот од предложениот закон со кој се предвидува кандидатите за членови во Советот на Агенцијата за аудио и аудиовизуелни медиумски услуги (ААВМУ) и на Македонска радио телевизија (МРТ) да достават писмо за поддршка од две невладини организации.

Според Благоја Деспотовски од ВМРО-ДПМНЕ, нема независни граѓански организации, бидејќи се или со едната или со другата политичка опција.

Со ова темпо на долги дискусии  опозицијата го блокира носењето на законот со цел да ги задржат партиските членови во советите, порача министерот за информатичко општество и администрација, Дамјан Манчевски, кој беше на седницата како претставник на предлагачот на законот, односно на Владата.

Во четирите досегашни продолженија на седницата на собраниската комисија се дискутираше за пет амандмани, а остануваат уште 70.

За помалку од еден месец, на четирите  амандмански продолженија на седниците на Комисијата за транспорт и врски, пратениците поминаа едвај 5  амандмани од над седумдесетина кои ги поднесе ВМРО-ДПМНЕ.

 
foom-logo-disklejmerТекстот е изработен во рамки на проектот „Опсерваторија на медиумските реформи“, што го спроведуваат Фондацијата за интернет и општество „Метаморфозис“, „Агора“ Центар за промовирање на граѓански вредности и Платформата за истражувачко новинарство и анализи (ПИНА), со финансиска поддршка на Фондацијата Отворено општество – Македонија.
Содржината на текстот е единствена одговорност на авторите и на ниту еден начин не може да се смета дека ги одразува гледиштата на Фондацијата Отворено општество – Македонија.


Манчевски: Медиумите треба да ги мотивираат граѓаните да бидат коректив на власта


Скопје, 3 мај, 2018 - 10:45 (META) 

Слободни, безбедни, независни и одговорни медиуми се основа за развој на едно демократско општество. Тие се важна алка за градење на развиена држава, за социјален и економски напредок и одржлив развој. Нападот врз слободата на медиумите, е напад врз владеењето на правото и напад врз човековите права, порача министерот за информатичко општество и администрација, Дамјан Манчевски по повод 3 Мај, Светскиот ден на слободата на медиумите.

„Јавноста мора да биде постојана контрола на власта. Важноста на медиумите е огромна, особено во областите на правдата и владеењето на правото. Затоа важна е транспарентноста на политичките процеси, независноста на медиумите и медиумската писменост. А од најголема важност за тоа да се постигне е отчетноста на државните институции кон јавноста. Измените во законот за АВМУ, подготвени заедно со сите засегнати страни, гарантираат услови за професионализација на медиумските тела. Овозмужуваат слободно и независно работење на медиумите во државата. Најважно од се, даваат шанса за политичарите да ги тргнат рацете од медиумите. Медиумската заедница треба да ја превземе контролата врз медиумскиот сектор. Овој закон овозможува дополнителни механизми за саморегулација“, порача министерот.


На собраниски комисии извештајот на СЈО и предлог-законот за АВМУ


Скопје, 23 април, 2018 - 10:01 (META) 

Во Собранието денеска седници ќе имаат комисиите за одбрана и безбедност, за надзор над работата на УБК и Агенцијата за разузнавање, комисијата за труд и социјална политика и Законодавно-правната комисија.

Извештај за сработеното во периодот од 15 септември 2017 до 15 март 2018 година ќе поднесе Специјалното јавно обвинителство (СЈО), пред Комисијата за политички систем и односи меѓу заедниците. Ова е петтиот шетмесечен извештај за работата на СЈО.

Законодавно-правната комисија ќе одржи три седници. Ќе се разгледуваат и предлог – законот за изменување и дополнување на Законот за аудио и аудиовизуелни медиумски услуги и предлог – закон за изменување и дополнување на Законот за основање на Јавно претпријатие Македонска радиодифузија, во второ читање.

Членовите на Комисијата за надзор над работата на УБК и Агенцијата за разузнавање ќе ги разгледаат извештаите на двете институции за работата во 2017 година, како и програмата за работата на УБК за оваа година.

Предлог – законот за изменување и дополнување на законот за оружјето во второ читање, како и предлог – законот за странци се во прво читање пред Комисијата за одбрана и безбедност.

Пратениците од Комисијата за труд и социјална политика ќе расправат за предлог – законот за изменување и дополнување на Законот за вработување инвалидни лица во прво читање.


Предлог-законот за АВМУ повторно на мета на експертите и фелата


Скопје, 12 април, 2018 - 17:42 (META) 

На денешната јавна расправа за предлог-законот за аудио и аудиовизуелни медиумски услуги, која беше организирана од Комисијата за транспорт, врски и екологија при Собранието, експертите, новинарските здруженија и луѓе од медиумските дејности критикуваа решенија од текстот, за кои велат дека ќе ги влошат состојбите.

Според претседателот на Здружението на новинари на Македонија, Насер Селмани, тоа што за МРТ како јавен радиодифузен сервис се предвидени помалку пари ќе ја оневозможи куќата да ја извршува својата функција во целост.

– Јавните сервиси треба да информираат, да едуцираат и да забавуваат. Приватните телевизии не мораат тоа да го прават. Добро би било да го прават, но не се обврзани. Единствено, МТВ е обврзана, а не може да го прави тоа ако има помалку пари. Дали забележувате дека вестите на МРТВ почнуваат и завршуваат со информации од Скопје? Нема да слушнете вести од други градови се додека не се развие дописничката мрежа. МРТВ нема дописничка мрежа, ќе треба да се вработат најмалку уште 100 луѓе – новинари и камермани – рече Селмани.

Тој вели дека отворањето на нови канали, за кои владата треба да обезбедува пари надвор од предвидениот буџет за МРТ, ќе ја наруши независноста на јавниот радиодифузен сервис

– Со новите законски измени ќе се отворат нови канали, а од друга страна ние ги намалуваме средствата. Таа одредба која вели дека „ако има потреба ние би дале за техничко опремување“, тоа е сериозен упад во автономијата на јавниот сервис – рече претседателот на ЗНМ.

Претседателот на  Советот на Агенцијата за аудио и аудиовизуелни медиумски услуги (ААВМУ),  Лазо Петрушевски, пак, смета дека професионалното вработување на членовите на Советот ќе предизвика промена на карактерот на ова регулаторно тело.

– Тоа ќе биде нешто помеѓу агенција и совет за радиодифузија, нема да функционира и ќе направи проблеми – рече Петрушевски.

Програмскиот совет на МРТ го спори член 46 од Законот, кој исто така се однесува на финансирањето.

– Во него се вели дека за 2018 година тоа ќе бидат 0,7 проценти од Буџетот, а до 2021 1 процент. Во овој член има и став кој вели дека процентите од став 1 на овој член ќе се реализираат доколку со тоа не се нарушува праведната распределба на буџетските средства. Мислиме дека овој став дозволува политичко влијание. Се кажуваат процентите, но потоа се релативизираат. Предлагаме овој став да се избрише – рече Смилка Јаневска – Саркањац, претседател од Програмскиот совет.

Министерот за информатичко општество и администрација, Дамјан Манчевски истакна дека Законот со кој, како што вели, целта е да се тргнат рацете на политичарите од медиумите,  ќе биде појдовна основа за реформите во областа. Побара да се даде шанса за законското решение за кое, како што рече, досега има 38 објавени и дебатирани верзии, и пак има 200 отворени прашања.

Сите конструктивни забелешки кои произлегоа од дискутантите учесници на јавната расправа во однос на Предлог-законот  ќе се земат предвид и ќе се поднесат во форма на амандмани од страна на овластени предлагачи во второ читање на Комисијата закажана за 16 април 2018 година, информираат од Собранието.
foom-logo-disklejmerТекстот е изработен во рамки на проектот „Опсерваторија на медиумските реформи“, што го спроведуваат Фондацијата за интернет и општество „Метаморфозис“, „Агора“ Центар за промовирање на граѓански вредности и Платформата за истражувачко новинарство и анализи (ПИНА), со финансиска поддршка на Фондацијата Отворено општество – Македонија.
Содржината на текстот е единствена одговорност на авторите и на ниту еден начин не може да се смета дека ги одразува гледиштата на Фондацијата Отворено општество – Македонија.


Во Собранието денеска предлог-законот за АВМУ


Скопје, 19 март, 2018 - 11:15 (META) 

На 38-та седница во Собранието на Република Македонија денеска, покрај другите точки, пратениците треба да расправаат и за предлог-законот за аудио и аудиовизуелни медиумски услуги (АВМУ).

По девет месеци од првите активности за донесување нов закон, кој треба да донесе департизација и професионализација на јавниот радиодифузен сервис, односно Македонската радиотелевизија (МРТ), и регулаторното тело – Агенцијата за аудио и аудиовизуелни медиумски услуги (ААВМУ) и неколку измени на текстот, постапката влегува во завршница. Досега беа одржани две јавни расправи и неколку консултации во организација на Министерството за информатичко општество и администрација (МИОА).

Меѓу побитните измени се тие што членовите на Советот на ААВМУ,  за разлика од досега, ќе бидат професионално ангажирани во Агенцијата и ќе добиваат месечен надоместок во висина од најмногу четири просечни месечни плати исплатени во Македонија. Притоа ќе имаат петгодишен мандат, со право за избор во уште еден мандат, наспроти сегашното решение за седумгодишен мандат. Советот ќе може да покренува прекршочна постапка против медиуми или оператори на јавни електронски комуникациски мрежи.

Предлог-законот забранува и емитување програми кои, освен загрозување националната безбедност или поттикнување на насилно уривање на уставниот поредок или на оружен конфликт, содржат дискриминација или шират нетрпеливост и омраза по која било основа.

Исто така, програмата на радијата и телевизиите во текот на еден ден ќе мора да вклучува 30 отсто програма изворно создадена како македонско дело, а за МРТ тој процент ќе изнесува 40 отсто.

Законот го поставува финансирањето на МРТ, ААВМУ и ЈП Македонска радиодифузија на од 0,7 до еден отсто од државниот буџет. Нивото од еден отсто ќе стане правило од 2021 година.

Од државните пари, 74,5 отсто ќе одат за МРТ, 19,5 за Македонска радиодифузија, а шест отсто за агенцијата. МРТ и понатаму ќе може да емитува платени комерцијални реклами.

Со предлог-законот се укинува можноста за реклами од државните тела по пат на нетранспарентни постапки и постапки со исклучоци и се оневозможува појавата Владата да биде доминантен огласувач во медиумите.

Телевизијата од јавниот радиодифузен сервис ќе има најмалку еден канал на македонски јазик, еден канал на албански јазик и еден канал за останатите националности, додека Радиото ќе мора да има два канала на македонски јазик и еден на албански јазик и на јазиците на останатите етнички заедници.


Владата го усвои Предлог-законот за аудио и аудиовизуелни медиумски услуги


Скопје, 20 февруари, 2018 - 14:48 (META) 

Владата на Република Македонија на својата 55-та седница попладнево го усвоила Предлог-законот за изменување и дополнување на Законот за аудио и аудиовизуелни медиумски услуги (АВМУ), извести на Твитер-профилот портпаролот на Владата, Миле Бошњаковски.

Сега Предлог-законот ќе биде испратен во Собранието, каде следува расправа, а потоа и негово изгласување.

Во прашање е четвртата верзија на предлог-законот, која Министерството за информатичко општество и администрација ја објави во четвртокот.

Постапката за донесување на новите законски измени почна на 14 јули минатата година, со првата јавна дебата, а оттогаш се одржа уште една дебата и низа консултации. Како што вели Министерството, во текстот се внесени и коментарите добиени на Единствениот национален електронски регистер (ЕНЕР) за претходната работна верзија, објавена на 4 ноември минатата година.

„Исто така, во објавената верзија на Законот, имплементирани се коментарите добиени од Европската Комисија и Канцеларијата на ОБСЕ“, вели МИОА.

foom-logo-disklejmerТекстот е изработен во рамки на проектот „Опсерваторија на медиумските реформи“, што го спроведуваат Фондацијата за интернет и општество „Метаморфозис“, „Агора“ Центар за промовирање на граѓански вредности и Платформата за истражувачко новинарство и анализи (ПИНА), со финансиска поддршка на „Фондацијата Отворено општество – Македонија“.
Содржината на текстот е единствена одговорност на авторите и на ниту еден начин не може да се смета дека ги одразува гледиштата на „Фондацијата Отворено општество – Македонија“.


Измените на Законот за аудио и аудиовизуелни медиумски услуги денеска на владина седница


Скопје, 20 февруари, 2018 - 10:02 (META) 

Во 12 часот Владата ќе ја одржи својата редовна 55-та седница на која ќе биде разгледан Предлог законот за изменување и дополнување на Законот за аудио и аудиовизуелни медиумски услуги, како и Предлог законот за изменување и дополнување на Законот за основање на Јавно претпријатие Македонска радиодифузија.

На предлог на Министерството за правда, пред владините министри денеска ќе се најде и Предлог законот за бесплатна правна помош.

Владата ќе ја разгледа и информацијата за реализација на Националната стратегија за земјоделството и руралниот развој за периодот 2014-2020 година.

На денешната седница ќе бидат разгледани финансискиот план на Централниот регистар за 2018 година, Годишната инвестициска програма во 2018 година и програмата за инвестиции за периодот 2019-2022 година на АД МЕПСО.

Министерството за внатрешни работи на денешната седница ќе ја презентира информацијата за спроведување на мерките за ограничување и забрана на сообраќајот во услови на надминување на прагот на алармирање и зајакнување на контролата на издувните гасови од возилата при нивна регистрација во техничките станици.


Манчевски: Владата не се меша, новинарите нека се договорат какви промени сакаат


Скопје, 24 ноември, 2017 - 18:49 (META) 

„Владата во последно време беше прозивана дека сака да се меша во уредувачката политика на медиумите. Но, Владата не сака да ги контролира медиумите и ниту треба, ниту сака да биде мотор на реформите, туку само сакавме да овозможиме на новинарската бранша простор и механизам да се направат реформите на законот, на кој и ние претходно бевме жртви“, рече министерот за информатичко општество и администрација, Дамјан Манчевски, на собраниската седница на која се одговараше на пратенички прашања.

Тој ги коментараше дебатите за измените на законот за аудио и аудиовизуелни медиумски услуги и критиките што се упатуваат до Владата како предлагач на законот.

– Ова не е првата верзија на законот, имаше можеби четири, имаше повеќе консултации, јавни дебати, сè е резулат на нечиј предлог, сите заинтересирани страни учествуваа. И одеднаш сме обвинувани дека се мешаме во уредувачката политика. Сега, откако ги прифативме сите сугестии и од дебатите што ги организиравме и од други дискусии, повторно има критики, па имам дилема дали воопшто треба Владата да предлага измени. Па, по она што го слушам, изгледа е добар овој закон и не треба да се прават измени – рече Манчевски.

Тој рече дека ако веќе не се прифаќаат решенијата што се предложени, веројатно треба новинарските здруженија и другите чинители да побараат друг начин за да се донесе закон каков што им одговара.

– Еве, има начини, нека собираат тука потписи во Собранието, нека предложат – рече Манчевски.

Одговарајќи на прашањата на пратеникот Артан Груби, Манчевски рече дека со укинувањето на радиодифузната такса, конечно телевизијата има стабилен извор на финансирање и точно ќе знае кога ќе има пари за да ги планира. Според Манчевски, во буџетот има доволно пари и за да се почне со работа со 24-часовниот телевизиски канал на албански јазик, само треба МРТ внатрешно да се организира и да го создаде тој канал, додека за 24-часовниот радио-канал проблемот ќе се реши полесно, само со статутарни измени.

За направените долгови на јавниот радиодифузен сервис, Манчевски посочи дека е станува збор за ненаменско трошење пари и за прескапо плаќање за одредени услуги и содржини.

На прашањето за вработените во Секретаријатот за Рамковниот договор, Манчевски смета дека тој проблем ќе се реши со новата систематизација. Според таквата замисла, би се направиле измени со кои би се овозможило вработените да бидат прераспределувани не само во државната администрација, туку во целата јавна администрација, а како можно одредиште на дел од кадарите ја посочи Управата за водење на матичните книги, каде треба да се спроведува дигитализација на изводите од матичните книги на родените, на венчаните и на умрените.

Претседателот на Собранието, Талат Џафери, ја прекина собраниската седница пред 18 часот поради протоколарни обврски на сите пратеници, откако пратеничката Лилјана Кузманоска постави три прашања за задолжувањето и за проблемите со ОХИС, за кои писмено ќе ѝ биде одговорено.


Селмани: Манчевски кажува флоскули, а Владата сака да владее со медиумите


Скопје, 22 ноември, 2017 - 13:22 (META) 

„Законот е премногу детализиран, до инфантилизирање, до карикатуралност, дотаму да се одредува која програма кога да се емитува. Со него се ограничува слободата на изразувањето и, уште повеќе, ќе се воведе цензура и автоцензура во медиумите“, наведе Катерина Колозова од Институтот за општествени и хуманистички науки – Скопје (ИОХН) на денешната презентација на нивниот извештај „Проценка на ефектите на постоечката регулатива за аудио и аудиовизуелни услуги врз уредувачката слобода“.

На прес-конференцијата, во која учествуваше и Насер Селмани, претседателот на Здружението на новинарите на Македонија (ЗНМ), Колозова истакна дека одредбите од законот за аудио и аудиовизуелни медиумски услуги се доказ на феноменот на „заробена држава“, каде преку прекумерна законска регулација ѝ се овозможува на извршната власт прекумерна контрола врз медиумите.

Одговарајќи на новинарско прашање за денешната изјава на министерот Дамјан Манчевски на конференцијата „Е-општество“ на „Метаморфозис“, кој рече дека Владата не смее да биде моторот на реформите во медиумската сфера и за предлог-законот за аудио и аудиовизуелни услуги, претседателот на ЗНМ рече дека на политичарите не смее да им се верува.

– Тоа е добра флоскула, но тие прават спротивно на таквите заложби, затоа што има тенденции што потсетуваат на однесувањето на претходни влади – рече Селмани.

Тој повторно ги изнесе барањата од ЗНМ за укинување на глобите во новиот предлог-закон за изменување на законот за аудио и аудиовизуелни медиумски услуги и побара државата повеќе да не се меша во регулацијата на приватните медиуми, туку да остави нивните содржини да бидат според вкусот на гледачите.

– Во Македонија има прекумерна регулација на приватните радиодифузни медиуми. Државата премногу се меша, а тоа влијае на програмската шема и на содржините, но и на финансиската кондиција на медиумите. Нашата препорака е државата да остави тоа каква програма ќе се емитува да биде одредено од вкусот на гледачите, а не на политичарите – рече Селмани.

Тој, како и Колозова, порача дека новиот владин предлог-закон мора да биде ослободен од глоби, а власта да остави медиумите да се саморегулираат, наместо да им наметнува правила.

foom-logo-disklejmerТекстот е изработен во рамки на проектот „Опсерваторија на медиумските реформи“, што го спроведуваат Фондацијата за интернет и општество „Метаморфозис“, „Агора“ Центар за промовирање на граѓански вредности и Платформата за истражувачко новинарство и анализи (ПИНА), со финансиска поддршка на „Фондацијата Отворено општество – Македонија“.
Содржината на текстот е единствена одговорност на авторите и на ниту еден начин не може да се смета дека ги одразува гледиштата на „Фондацијата Отворено општество – Македонија“.


СЕММ: Државата да не се меша во саморегулацијата на медиумите


Скопје, 21 ноември, 2017 - 15:49 (META) 

Советот за етика во медиумите на Македонија (СЕММ) денеска порача дека ниту една влада или политичка партија не треба да одлучува во име на медиумите, реагирајќи на најавените измени на Законот за аудио и аудиовизуелни медиумски услуги.

Според СЕММ, мора да се елиминира какво било влијание на државата врз процесот на саморегулација во медиумите, кој сè повеќе се прифаќа.

„Поставувањето какви било пречки од страна на Владата на тој пат и маргинализирањето на работата на Советот ќе резултира со намалување на одговорноста кај самите медиуми и поддршка на практиката на цензура и на самоцензура“, се вели во соопштението.

СЕММ нагласува дека саморегулацијата исклучува секакво сместување на професионалните новинарски стандарди во законската рамка и воведување санкции кон медиумите за нивното непочитување.

„Кога станува збор за етичкото и професионално известување, ниту една влада и политичка партија не треба да одлучуваат во име на медиумите. Во таа насока, СЕММ се спротивставува на предлог-измените на членот 61 во нацрт-законот за изменување и дополнување на Законот за аудио и аудиовизуелни медиумски услуги, кој се однесува на начелата и на стандардите во работата на радиодифузерите, како и на измените во член 145 со кои се предлага изрекување казни доколку професионалните стандарди не се почитуваат“, порачува СЕММ.

Вчера Министерството за информатичко општество и администрација ја одржа последната јавна дебата за законските измени што ги подготвува.

foom-logo-disklejmerТекстот е изработен во рамки на проектот „Опсерваторија на медиумските реформи“, што го спроведуваат Фондацијата за интернет и општество „Метаморфозис“, „Агора“ Центар за промовирање на граѓански вредности и Платформата за истражувачко новинарство и анализи (ПИНА), со финансиска поддршка на „Фондацијата Отворено општество – Македонија“.
Содржината на текстот е единствена одговорност на авторите и на ниту еден начин не може да се смета дека ги одразува гледиштата на „Фондацијата Отворено општество – Македонија“.