Проширувањето на ЕУ, тема на состанок на министрите од Западен Балкан


Сараево, 16 март, 2018 - 15:52 (META) 

Министрите за надворешни работи на земјите од Западен Балкан, меѓу кои и македонскиот министер Никола Димитров, одржуваат состанок во Сараево посветен на Стратегијата на ЕУ за проширување со земјите од Балканот и спроведувањето на заклучоците од Самитот во Трст во 2017 година, составен дел од Берлинскиот процес.

На состанокот учествуваат и заменик-премиерот и министер за надворешни работи на Бугарија, Екатерина Захариева, државниот министер за Европа и Америка на Обединетото Кралство на Велика Британија и Северна Ирска, Сер Алан Данкан, генералниот директор во Европската комисија, Кристијан Даниелсон и генералниот секретар на Регионалниот совет за соработка(РСС), Горан Свилановиќ.

Свилановиќ изјавил дека една од главните активности на Советот во овој период е учество во заедничките подготовки на Дигиталниот самит на шесте земји од регионот што треба да се одржи во Скопје на 18 и 19 април.

„Подготовките на овој амбициозен Самит се во поодмината фаза и на него ќе се разговара за бројни практични и стратешки прашања – од намалување на цените на роамингот, интеграција на Западен Балкан во бројни дигитални иницијативи на ЕУ, до реформите на јавните управи преку дигитализација“, соопшти РСС.

Димитров, како што официјално е соопштено претходно во Скопје, ќе учествува и на министерската конференција за Фондот за Западен Балкан, каде ќе се разгледаат досегашните резултати од работата на оваа организација, како и нејзините идни активности.

За време на престојот во Сараево, Димитров ќе учествува и на конференцијата „Бергедорф раунд тејбл“ (Bergedorf Round Table) која оваа година се организира на тема „Долгиот пат кон Европа: Западниот Балкан меѓу домашните предизвици и геополитиката“, а на која ќе учествуваат високи владини претставници и меѓународни експерти.


Владата ги отвори седниците – дневниот ред и записниците достапни на интернет


Скопје, 17 август, 2017 - 21:04 (META) 

Јавноста од денеска има можност да ги види дневните редови и заклучоците од сите седници на Владата на нејзината официјална интернет страница.

Ваквата новина Владата ја соопшти попладнево, преку својот „твитер профил“.

На интернет-страницата е додадено ново „прозорче“ – „Седници на Влада“, каде во табела се наведени датумите, дневниот ред и записниците и соопштијата од седниците со можност за преземање на материјалите.

На страницата активни се и можат да се видат дневните редови на сите седници, функционираат и можат да се преземат сите записиници од досегашните 23 седници, освен записниците од 20. и последната 23. седница, одржана во вторникот, оваа недела, како и најголем дел од соопштенијата.

Претходната владина гарнитура, меѓудругото беше критикувана и поради штурите или немањето никакви информации од седниците, а термините на нивно одржување се чуваа во тајност, особено по инцидентот од крајот на октомври 2014 година, кога проектили со поголем калибар завршија во фасадата од зградата на Владата.

 

foom-logo-disklejmerТекстот е изработен во рамки на проектот „Опсерваторија на медиумските реформи“, што го спроведуваат Фондацијата за интернет и општество „Метаморфозис“, „Агора“ Центар за промовирање на граѓански вредности и Платформата за истражувачко новинарство и анализи (ПИНА), со финансиска поддршка на „Фондацијата Отворено општество – Македонија“.
Содржината на текстот е единствена одговорност на авторите и на ниту еден начин не може да се смета дека ги одразува гледиштата на Фондацијата „Отворено општество – Македонија“.


Србија очекува следните три дена да се најде решение за проблемот со извозот во Хрватска


Белград, 9 август, 2017 - 13:57 (META) 

Српскиот министер за трговија и туризам, Расим Љајиќ, очекува во следните три дена да биде најдено решение за спорот помеѓу Хрватска и земјите во регионот, поради новиот правилник за увоз на овошје и на зеленчук, што Хрватска го донесе на 15 јули, а со кој значително се зголемуваат трошоците при извоз на свежото овошје и зеленчук.

– Никому не му е во интерес заострување на односите и оваа состојба да трае долго, бидејќи трговските војни на крајот само бројат штети и тука никој не може да профитира – ијзавил Љајиќ за телевизија „Пинк“.

Министерот за земјоделство, шумарство и водостопанство, Љупчо Николовски, вчера телефонски разговарал со министерот за земјоделство на Хрватска, Томислав Толушиќ, при што хрватскиот колега покажал интерес за наоѓање решение за настанатиот проблем.

Министрите во регионот одржаа  состанок во Сараево, каде што беа донесени заеднички заклучоци во однос на правилникот од Хрватска.

Тие ја повикаа Хрватска итно да ги укине дискриминаторските одредби од правилникот, а трошоците за инспекцискиот надзор да се сведат на нивната реална висина. Меѓу другото, во заклучоците се наведува дека секоја земја, сè до решавање на проблемот, за да ги заштити сопствените економски интереси, ќе преземе соодветни конкретни мерки и механизми.


Заев ќе им го даде на пратениците договорот со Бугарија да го разгледаат на затворена седница


Скопје, 14 јули, 2017 - 16:14 (META) 

Премиерот Зоран Заев, кој денеска во Собранието го презентираше реформскиот план „3-6-9“ пред Комисијата за европски прашања, вети дека договорот со Бугарија, сепак, ќе им го достави на увид на пратениците.

Тој рече дека пратениците ќе имаат можност да го разгледаат договорот на седница затворена за јавноста, бидејќи станува збор за документ кој сè уште не е финализиран, односно потпишан.

Реакцијата на премиерот дојде откако координаторот на првата од десетте пратенички групи на ВМРО-ДПМНЕ, Илија Димовски, обвини дека Владата ја игнорира опозицијата за договорот со Бугарија, дека молчи за деталите од посетата на шефот на македонската дипломатија Никола Димитров на Атина, а не ја консултирал ниту за законот за јазиците.

– На бугарските пратеници им е доставен на таен увид договорот, а ние немаме увид. Денеска се гласаше и против тоа да има собраниска расправа за ова прашање. Бараме консултации со другите партии, за постигнување национален и државен консензус за проблемите со Бугарија и со Грција – рече Димовски, кој побара опозацијата да биде консултирана и за Законот за јазиците.


Бошкоски ги повика „браќата и сестри вмровци“ да му дадат поддршка на Заев


Велес, 27 март, 2017 - 10:59 (META) 

Излез од политичката криза преку прифаќање на волјата на најголемиот број граѓани на Македонија и формирање на реформска влада од страна на мандатарот, кој обезбеди 67 мандати. Ова се заклучоците од редовната седница на претседателството на партијата на Љубе Бошкоски – Обединети за Македонија, одржана вчера во Велес, соопштуваат од партијата.

На редовната седница на претседателството на Обединети за Македонија, одржано во Велес на 26.03.2017, на дневен ред меѓу другото беше завземање став, околу актуелната општествено-политичка ситуација која што продуцира продолжена политичка криза. Обединети за Македонија притоа донесе заклучок дека: Македонија мора и може да излезе од криза со конституирање на парламентот; Прифаќање на волјата на најголем број граѓани на Република Македонија, изразена преку мандати; Формирање реформска влада од мандаторот кој обезбеди 67 мандати“, стои во соопштението од ОМ.

Од партијата на Бошкоски велат дека ќе ги прифатат сите решенија кои се во рамки на Уставот на Република Македонија, кои преку дебати ќе отворат го отворат патот на земјата кон Европската Унија и НАТО.

„Обединети за Македонија како партија, со јасна вмровска идеологија ги повикува своите браќа и сестри вмровци на разбирање на сериозноста на ситуацијата, да дадат поддршка на демократските процеси“, нагласуваат од Обединети за Македонија.


ДУИ: За албанскиот јазик, членството во НАТО и во ЕУ и за СЈО не може да има преговарање


Скопје, 12 јануари, 2017 - 21:01 (META) 

Демократската унија за интеграција (ДУИ) нема префериран партнер во македонскиот политички блок, а интересот за одржување на стабилноста на државата го става над партиските интереси. Ова се заклучоците од денешната седница на централното претседателство на ДУИ.

„Свесни за одговорната и за одлучувачка улога на ДУИ во ориентирањето на политичките процеси во државата, во духот на унифицираниот став на албанските политички партии во Македонија и врз основа на платформата на партијата, ДУИ почна сеопфатен консултативен процес со партиската структура и со граѓаните, анализирајќи ги геополитичките, регионалните и домашните случувања и импликации“, стои во соопштението од партијата.

Како што се наведува во соопштението, рамноправната употреба на службениот албански јазик, интеграцијата во НАТО и во Европската Унија, како и продолжување на мандатот на Специјалното јавно обвинителство за расветлување на сите сомнежи што произлегуваат скандалот со прислушувањето, „се целите кои како услови не можат да бидат предмет на преговарање“.

Централното претседателство на ДУИ, како што додаваат од партијата, останува во континуирано заседавање сè до завршување на консултативниот процес.


Собранието донесе заклучоци за настраданите во поплавите


Скопје, 14 август, 2016 - 22:19 (META) 

Собранието вечерва усвои заклучоци за тоа што треба да се преземе за санирање на последиците од невремето од 6 август и поплавите што следеа во скопскиот и тетовскиот регион, во кои загинаа 22 лица, десетици се повредени, а причинета е огромна материјална штета.

Со усвоените заклучоци, меѓу другото, Собранието се заложува државните и сите надлежни институции да продолжат да излегуваат во пресрет на жителите од погодените подрачја се до конечно остранување, санирање и ублажување на последиците од катастрофалната временска непогода. Се бара Владата да го реализира заклучокот за авансно обесштетување на погодените семејства и да продолжи да се ангажира за брза проценка на штетите, а државните институции да преземат законски мерки против оние кои ја злоупотребуваат настанатата состојбата за финансиска корист.

Владата треба да изврши проценка и доколу е потребно да пренасочи средства од одредени тековни буџетски ставки во надлежни институции со цел справување со последиците од катастрофалната временска непогода. Министерството за финансии и Владата да подготват, а Собранието да разгледа одлука за прераспределба меѓу буџетските корисници со кои ќе се обезбедат средства за обесштетување на семејствата на загинатите лица, загрозените семејства, како и за санирање на штетите.

Средствата за кои досега не се преземени договорни обврски преку склучени договори, а предвидени за набавка на возила кои не се поврзани со основната дејнсот на буџетскиот корисник, изградба на репрезентативни објекти, купување мебел и друга опрема, како и средства за репрезентација, доколку е потребно делумно или целосно да бидат пренаменети за оваа намена.


В недела, 14 август, вонредна седница на Собранието за штетите од поплавите


Скопје, 11 август, 2016 - 14:28 (META) 

Претседателот на Собранието, Трајко Вељаноски за в недела, 14 август, закажа посебна собраниска седница која ќе биде посветена на состојбите во поплавените подрачја, информираат од кабинетот на Вељаноски.

Ова значи дека пратениците ја прекинуваат летната ферија. Според редовниот распоред, првата седница требаше да се одржи 10 дена подоцна – на 24 август.

„Претседателот на Собранието на Република Македонија,  Трајко Вељаноски во договор со координаторите на пратеничките групи, одлучи да закаже посебна седница на Собранието на Република Македонија посветена на состојбата во поплавените подрачја, за 14 август 2016 година. До тогаш, се очекува Владата на Република Македонија да изготви информација со која ќе го извести Собранието за состојбата и за превземените мерки во насока на санирање на последиците“, пишува во соопштението од Собранието.

Инаку денеска, пратеничката група на опозицијата го повика Вељаноски да свика итна седница на која ќе се расправа за поплавените подрачја, како и за конкретни мерки и заклучоци со кои ќе им се помогне на граѓаните, а владејачката ВМРО-ДПМНЕ го поддржа предлогот на опозицијата.

Вчера, поранешниот претседател на Македонската академија на науките и уметностите, Владо Камбовски го повика Вељаноски да свика вонредна седница за поплавените подрачја.


Владата прогласи Ден на жалост и кризна состојба во Скопско и Тетовско


Скопје, 7 август, 2016 - 21:57 (META) 

Владата на вечерашната вонредна седница донесе одлука за прогласување на 8 август за Ден на жалост на Република Македонија, како и одлука за постоење на кризна состојба во скопскиот и во тетовскиот регион, кој најмногу беа погодени од невремето, соопштија доцна вечерва од Владата.

На седницата донесена е и одлука за доделување на еднократна парична помош во висина од 300.000 денари (околу 5.000 евра) за семејствата на жртвите од невремето.

„Владата ја задолжи Дирекцијата за заштита и спасување целокупната опрема на Дирекцијата од сите региони во државата да ја стави на располагање во кризните региони, а препорача на општините кои располагаат со вакум- цистерни, истите да ги стават на располагање на град Скопје. Владата ја задолжи Дирекцијата за заштита и спасување веднаш да изврши ангажирање на дополнителна градежна механизација (скипови, багери и камиони) преку склучените договори за користење на градежна механизација од приватните фирми и истите веднаш да бидат пратени и ставени во функција во кризните подрачја. Владата донесе одлука за доделување на нафта за потребите на Дирекцијата за заштита и спасување, ЈП Македонија пат, Министерството за одбрана и Министерството за внатрешни работи, а беше заклучено Јавното претпријатие за државни патишта да изврши санирање на обиколницата која беше оштетена во невремето“, стои во соопштението на Владата.

Заради поефикасно и побрзо проценување на штетите од невремето, Владата ги задолжила државните институции да делегираат лица кои ќе бидат ставени во функција на општинските комисии за проценка на штетите.

Владата, како што информираат оттаму, ќе одржи уште една седница на која повторно ќе биде разгледана моменталната ситуација и се очекува да бидат утврдени нови мерки и заклучоци во врска со справувањето со последиците од невремето.

Според последните информации во невремето животите ги загубија 21 лице, а околу 70 се повредени и побарале лекарска помош.

Најмногу погодени од вчерашното невреме се жителите на Стајковци, Сингелиќ, Смилковци и Арачиново, каде се пронајдени телата на загинатите, а пријавени се и големи штети, односно срушени и поплавени куќи и возила.

Според Законот за управување со кризи, состојбата предизвикана од ризици и опасности кои можат да ги загрозат добрата, здравјето и животот на луѓето и животните и безбедноста на Републиката, за чија превенција или справување е потребна употреба на поголем обем на ресурси, се дефинира како кризна состојба.

Законот предвидува дека во случај на кризна состојба со дел од своите сили може да учествува армијата, како поддршка на полицијата.

Одлуката за постоење на кризна состојба не може да трае подолго од 30 дена, а во случај да биде надминат овој период, владата треба да побара одобрување од Собранието за продолжување на рокот. Во случаи на кризна состојба можат да се употребат и ресурсите на јавните претрпијатија, установи и служби, како и на приватни фирми (трговските друштва) „кои се од пособено значење за работа во кризна состојба, како и за управување со нив во случај на кризна состојба“.

Лани во август, Владата поради мигранската криза прогласи кризна состојба во регинот на јужната и на северната граница, која по последното продолжување е предвидено да трае до крајот на оваа година.


НАТО: Политичката криза ја оддалечува Македонија од членство во Алијансата


Варшава, 9 јули, 2016 - 17:54 (META) 

Политичката криза во Македонија ја оддалечува државата од членството во НАТО. Ова е еден од заклучоците во завршниот извештај на Самитот на НАТО, кој се одржува во Варшава.

„Загрижени сме за развојот на политичките настани во поранешната југословенска Република Македонија, кои ја оддалечуваат земјата од вредностите на НАТО. Ги поттикнуваме политичките лидери во земјата целосно да ги исполнат своите обврски од Договорот од Пржино, донесен во јуни/јули 2015 година, како рамка за одржливо решение за политичката криза. Признавајќи ги првичните чекори за имплементација на договореното, го повторуваме нашиот повик до сите страни да се вклучат во демократски дијалог и да создадат услови за фер и демократски избори, како што е зајакнување на владеењето на правото, слобода на медиумите и независноста на судството“, пишува во извештајот.

Во заклучоците е повторен и ставот од 2008 година од Самитот во Букурешт дека Македонија ќе добие покана за членство во Алијансата, штом го реши проблемот со името.

„Од овие причини силно препорачуваме да се направат интензивни напори за да се најде решение за проблемот со името. Исто така, ги охрабруваме понатамошните обиди за развивање на добрососедските односи и градењето на целосно функционално мултиетничко општество кое се базира на Охридскиот договор“, наведено е во заклучокот.