!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Скопјанец дивеел пред Брза помош во Чаир оти не му се јавувале на телефон


Скопје, 17 ноември, 2017 - 14:32 (META) 

Гневен на лекарот и на сестрата во единицата на Брза помош во поликлиника Чаир, кои не одговориле на телефонските повици, скопјанец вчера дошол пред вратата, удирал по неа, се заканувал на сестрата, а потоа го влечел докторот и му се заканувал дека ќе го убие ако нешто се случи на неговата внука.

Е.С., заедно со неговиот брат, вчера ја донел внуката, која имала грчеви, на преглед на детското одделение во Поликлиниката, при што лекарот рекол дека девојчето со возило на Брза помош мора да биде пренесено на Детската клиника во Скопје. Тогаш било побарано лекарот да телефонира на Брза помош, а откако никој не одговорил на повикот, Е.С., заедно со неговиот брат и со девојчето, отишол до единицата, која е во истиот објект, по што почнал да вика и да удира на стаклената врата. Кога ја забележал сестрата, почнал да ѝ се заканува, а кога излегол лекарот, го нападнал и му се заканил, извести СВР Скопје.


ВМРО-ДПМНЕ го повика Заев јавно да каже од кого добива закани за ликвидација


Скопје, 9 ноември, 2017 - 17:10 (META) 

ВМРО-ДПМНЕ преку соопштение го повика премиерот Зоран Заев јавно да каже од кого добива закани и колку тие се реални, откако Заев за црногорското радио „Анетна-М“ рече дека некои безбедносни аналитичари му кажале дека му е загрозена безбедноста и дека е потенцијална мета на атентат.

„Ако не го стори тоа, тогаш сите негови изјави во тој правец се резултат на неговата желба да привлече внимание по секоја цена, во отсуство на реални проекти и достигнувања, во ситуација кога имаме зголемување на акцизи за нафта, зголемување на цените на паркингот, и кога се зголемуваат општите трошоци за живот на граѓаните. Сето ова делува за несериозен и несмасен обид да се дефокусира“, велат од партијата.

На изјавата на Заев денеска реагираше и руската амбасада а темата се најде и на редовниот брифинг на портпаролката на Руското министерството за надворешни работи, Марија Захарова, која рече дека „ваквите изјави не само што претставуваат неосновани инсинуации и манијакални конструкции, туку во суштината наликуваат на обиди за само-прикажување како жртва“.


Заев две години е под постојани закани од атентат, вели Спасовски


Скопје, 8 ноември, 2017 - 14:08 (META) 

Министерот за внатрешни работи, Оливер Спасовски, на денешниот брифинг со новинарите изјави дека премиерот, Зоран Заев, додека бил само лидер на СДСМ, но и сега, откако е претседател на Владата, е под постојани закани од атентат.

Заев добивал индиректни закани додека како лидер на СДСМ пред две години ги објавувал материјалите од незаконското прислушување, односно проектот „Вистината за Македонија“. Овие закани биле пријавени во МВР, по што на Заев му било доделено полициско обезбедување.

– Од 2015 година, Заев е под постојани закани за атентат. Службите преземаат сериозни мерки за обезбедување на премиерот, но и за сите други функционери – рече Спасовски.

Во тој контекст, вели Спасовски, Заев ја дал изјавата во интервјуто за црногорското радио „Антена М“, во кое вели дека бил предупреден од безбедносни аналитичари дека животот може да му биде загрозен.

– Некои аналитичари ми велат „Сега си ти на ред“. Ако нешто треба да се случи, нека се случи. Јас ја прифатив работата на премиер, на мојата земја ѝ треба лидер и подготвен сум да носам одлуки какви што очекуваат нашите граѓани, по секоја цена, па нека биде што биде – изјави премиерот Зоран Заев во интервјуто за црногорското радио „Антена М“.

Сепак, Спасовски денеска изјави дека во моментов нема никакви директни закани за атентат врз премиерот.


Седум доживотни и 26 долгогодишни затворски казни добија обвинетите во „Диво Насеље“


Скопје, 2 ноември, 2017 - 14:55 (META) 

Седуммина обвинети за настаните во кумановско Диво Насеље од 9 и 10 мај 2015 година добија доживотни казни затвор, 13 обвинети добија по 40 години затвор, шестмина по 20 години, еден обвинет 18 години, двајца по 14 години, двајца по 13 години затвор и двајца по 12 години затвор.

Ова се пресудите за 33 обвинети во случајот „Диво Насеље“ што денеска ги соопшти судијката Верка Петковска. Четворица од вкупно 37 обвинети добија ослободителни пресуди.

Денешното рочиште помина во тензична атмосфера, со големо полициско обезбедување, внатре и пред комплексот судови во Скопје.

Пред да бидат прочитани пресудите, обвинетите станаа од своите места и почнаа да ја пејат албанската химна, да извикуваат „УЧК“ и да се закануваат дека крвта на убиените нема да остане неодмаздена и дека во Македонија ќе нема мир.

Судијката ги острани од судницата повеќето обвинети кои правеа неред, по што ги прочита пресудите.

Обвинителството за гонење организиран криминал и корупција бараше доживотен затвор за сите 37 обвинети за тероризам и терористичка организација, додека адвокатите на обвинетите, пак, бараа ослободителни пресуди бидејќи, според нив, има недостиг од докази за стореното кривично дело.

Адвокатот Насер Рауфи, бранител на дел од обвинетите, по завршувањето на рочиштето, рече дека тие како одбрана не очекувале коректни казни, но не очекувале ниту вакви драконски казни.

– Обвинителството сè уште не е реформирано. Со најавената меѓународна истрага, ќе докажеме дека овие луѓе се донесени овде за туѓи интереси. Сите бранители ќе поднесат жалба на пресудите за обвинетите. Има информации за докази со кои ќе се докаже дека ова е монтирано рочиште. Со меѓународна истрага ќе се реши овој случај. Тајните служби се тие што го измонтираа овој случај – рече Рауифи.

Инаку, министерот за внатрешни работи на 20 септември изјави дека Владата ќе бара дополнителна – меѓународна истрага за настаните во Диво Насеље за да се дознае вистината за овој настан.

– Во однос на кумановските настани, ќе кажам две работи. Прва работа е дека тој случај добива некаква судска разврска, меѓутоа ние, како Влада, презедовме обврска дека ќе направиме дополнителна и тоа меѓународна истрага, за на еден соодветен начин јавноста да ја дознае вистината за овој настан и за тоа што се случувало во кумановските настани и согласно на таа истрага, да имаме една постапка во која ќе веруваат мнозинството граѓани на Република Македонија – изјави тогаш Спасовски.

Во настаните во Куманово од 9 и 10 мај 2015 година, каде вооружена група се судри со македонските безбедносни сили, загинаа осум припадници на безбедносните сили, а околу 40 беа повредени. Целиот случај го следат многу контроверзии кои сè уште не се разјаснети.

Судскиот процес за случајот „Диво Насеље“ почна на 9 февруари минатата година.


Груевски: Вториот круг помина со масовен поткуп, системски закани и со уцени


Скопје, 29 октомври, 2017 - 19:11 (META) 

Колку што имаше нерегуларности во првиот круг на гласањето, тие уште повеќе се зајакнаа во вториот круг, рече лидерот на ВМРО-ДПМНЕ, Никола Груевски, откако гласаше во ОУ „Кузман Јосифовски-Питу“ во Општина Кисела Вода.

– Демократската атмосфера, за жал, во овој период не можеме да ја видиме. Имаше масовен поткуп на граѓаните како никогаш досега во Македонија, како и закани, притисоци и уцени врз луѓето, претежно кон наши активисти од страна на СДСМ – изјави Груевски.

Лидерот на ВМРО-ДПМНЕ рече дека и во минатото се случувале обиди за поткуп, но биле изолирани, ретки и мали, а сега, како што рече, „станува збор за масовен поткуп што е под заштита на полицијата, контролирана од СДСМ“.

– Луѓето отворено се уценуваат со губење работно место, особено администрацијата, со кривични пријави, недобивање субвенции. Тоа е масовно, организирано, системски – рече Груевски.

Тој порача дека ВМРО-ДПМНЕ нема да биде скршена, туку нивната борба допрва почнува.


„Цивил“: Регистрирано е семејно гласање, кршење на молкот и закани по набљудувачите


Скопје, 29 октомври, 2017 - 15:59 (META) 

Невладината организација „Цивил“ нотирала три случаи на притисок врз нивните надзорни тимови и тоа во општините Штип, Кавадарци и Сарај, информираат од таму.

Поради, како што велат, крајно сериозните закани, „Цивил“ ги повлече набљудувачите од село Ласкарци, општина Сарај. Заканите дошле од член на избирачкиот одбор, кој било револтиран од присуството на набљудувачите на „Цивил“, односно од извештаите на „Цивил“ од првиот круг на изборите.

– Не веруваме дека во Ласкарци ќе се одржат слободни избори. Ги повикуваме институциите, особено ДИК, да ја провери кондицијата на лицата ангажирани во своите тела. Препорачуваме МВР да ја засили својата контрола во овој дел од општина Сарај и да помогне изборниот процес да се одвива непречено – изјави Џабир Дерала од „Цивил“.

Набљудувачките тимови на „Цивил“ регистрирале 29 нерегуларности како фотографирање  гласачки ливчиња, семејно и групно гласање и кршење на изборен молк.

– Изборниот молк се крши како воопшто да не постои забрана за партиска активност во текот на изборниот ден. Семејно гласање е често и вообичаено во Студеничани и во Шуто Оризари, без реакција од избирачките одбори – додаде Дерала.

Од „Цивил“ апелираат до политичките партии веднаш да престанат со притисоците врз граѓаните и да престанат со кршењето на изборниот молк.


Полицаец нападнал членови на комисијата оти ќерка му не го положила возачкиот испит


Кавадарци, 5 октомври, 2017 - 14:15 (META) 

Полицаец од полициската станица во Кавадарци вчера им се заканувал на претседателката на испитниот центар на Здружението на возачи – Велес и на уште еден вработен дека ќе ги убие со пиштол, а потоа и физички ги нападнал бидејќи неговата ќерка не го положила возачкиот испит.

Како што информираат од МВР, полицаецот Ј.К. вчера околу пладне влегол во испитниот центар и почнал да ѝ се заканува на претседателката С.Н. (41). Пред да излезе од канцеларијата, тој се заканил дека со пиштол ќе ги убие С.Н., нејзиниот колега Ц.П. и другите од комисијата, доколку неговата ќерка не го положи возачкиот испит.

По кратко време, според полицијата, тој повторно се вратил во канцеларијата и физички ги нападнал С.Н. и Ц.П., кои со помош на нивна колешка успеале да го отргнат полицаецот и да го изнесат во ходникот, каде тој продолжил да се заканува дека ќе оди да го земе пиштолот за да ги убие.

По пријавата за случајот и по преземените мерки, полициски екипи на својот колега Ј.К. му го одзеле службеното оружје и муницијата. Против него, како што информираат од МВР, ќе биде поднесена кривична пријава за насилство, а за случајот бил известен и одделот за внатрешна контрола, криминалистички работи и професионални стандарди.


Трамп скапо ќе плати за заканите, порача севернокорејскиот лидер


Пјонгјанг, 22 септември, 2017 - 11:33 (META) 

Севернокорејскиот лидер Ким Џонг-ун денеска изјави дека американскиот претседател Доналд Трамп е „ментално пореметен“ и дека „скапо ќе плати“ поради заканите кои ги упати кон Северна Кореја пред Генералното собрание на Обединитетите нации (ОН), јавуваат светските медиуми.

„Скапо ќе плати тој човек кој е врховен командант на САД поради говорот во кој повикува на тотално уништување на Северна Кореја“, рекол Ким Џонг-ун, пренесува севернокорејската новинска агенција КЦНА.

Во говорот пред Генералното собрание на ОН, Трамп го нарече севернокорејскиот лидер „човек-ракета во самоубиствена мисија“, бидејќи САД ќе ја уништат Северна Кореја доколку бидат принудени да се баранат себе и своите сојузници.

Ким Џонг-ун рекол дека изјавите на Трамп само го зацврстиле неговото уверување дека патот што го избрал е исправен.

САД вчера воведоа нови санкции кон поединци и компании кои соработуваат со Пјонгјанг.


Реформаторите на ВМРО-ДПМНЕ почнаа да ги објавуваат заканите од сопартијците лојални на Груевски


Скопје, 19 септември, 2017 - 16:41 (META) 

Иницијативата за внатрепартиски реформи во ВМРО-ДПМНЕ од денеска ја почна акцијата „Ѕид на срамот“. Како што соопштија од иницијативата, почнуваат со објавување на имињата на членовите на ВМРО-ДПМНЕ лојални на Никола Груевски и притисокот и заканите што ги вршат врз останатото членство на партијата, кое бара реформи и промена на раководството.

Први на „Ѕидот на срамот“ се најдоа претседателот на општинскиот комитет на партијата во Бутел, Дарко Костовски, и директорот на Јавното претпријатие „Водовод и канализација“, Александар Атанасов, кои, како што тврдат од иницијативата за реформи во ВМРО-ДПМНЕ, се закануваат со физичко и со вербално насилство врз членовите на партијата доколку активно не се вклучат во поддршка на кампања за избор на градоначалник во Бутел.

„Заканите одат дотаму што веќе се прават списоци со членови на ВМРО-ДПМНЕ, инаку поддржувачи на реформите, кои се вработени во ЈП „Водовод и канализација“ и кои треба прераспределени на пониски позиции во претпријатието. Практиката на притисоци и закани за поддршка на паријата и кандидатите во кампањата нема да бидат дел од ВМРО-ДПМНЕ и јавно го осудуваме овој начин на дејствување на Дарко Костовски и на Александар Атанасов… Ќе ги објавуваме имињата на сите оние кои ќе се дрзнат да работат спротивно на идеалите на ВМРО-ДПМНЕ“, стои во соопштението од иницијативата за реформи во ВМРО-ДПМНЕ.


Пјонгјанг се заканува со силни контрамерки


Владивосток, 7 септември, 2017 - 14:43 (META) 

Северна Кореја денеска порача дека ќе преземе силни контрамерки како одговор на притисокот од САД или какви било санкции кои евентуално би ѝ биле наметнати поради тестирање ракетен систем и го обвини Вашигтон дека сака војна.

Ваквите закани на Пјонгјанг се изнесени во соопштението на официјалната делегација на економскиот форум во Владивосток, на истокот на Русија.

Во истото соопштение, обвиненија се упатени и на сметка на Јужна Кореја и на Јапонија дека го користат рускиот форум за да водат „расипана политика“, наведувајќи дека настанот е наменет за економска соработка во регионот, а не за критика за нејзината програма за ракетно тестирање.

Заканите на Пјонгјанг следат откако САД побараа од Советот за безбедност на ОН да наметнат санкции за нафтата на Северна Кореја, да се забрани изворот на текстил и вработување работници од Северна Кореја во странство и на Ким Јонг-ун да му се забрани патувањето во странство и да му се замрзне имотот.

Претходно, рускиот претседател Владимир Путин изјави дека не очекува севернокорејската криза да ескалира во судир со поголеми размери со нуклеарно оружје и предвиде дека здравиот разум ќе надвладее.