ЕК: Новинарите да работат непречено, сите злоупотреби да се истражат


Брисел, 7 февруари, 2019 - 12:18 (META) 

Портпаролката на Европската комисија, Маја Коцијанчич, ги потсетува сите политички актери во Македонија дека слободата на медиумите и новинарите е од посебна важност за ЕУ, јави дописничката на МИА од Брисел.

Европската Комисија, преку портпаролката Маја Коцијанчич, реагираше на изјавите на вицепремиерот Бујар Османи и на соопштение на Министерството за здравство. Во двата случаи се формулирани закани за „правни последици“ кон медиуми за начинот на известување. Европската Комисија, која редовно ги следи настаните во земјата во пресрет на одлуката за старт на преговори со Македонија, потсетува дека ЕУ „и дава посебна важност на слободата на медиумите“.

-Нашиот извештај во 2018 истакна дека иако постои подобрување на медиумската клима, нулта толеранција треба да има за физичко и вербално вознемирување, како и закани кон новинарите – вели Коцијанчич

Таа додаде дека за Европската Унија е многу важно новинарите да можат да си ја извршуваат задачата во атмосфера која им овозможува да работат.

Портпаролката на ЕК за МИА исто така додаде дека Унијата очекува сите наводи за можна злоупотреба на јавни фондови да бидат предмет на истрага од страна на надлежните тела.


ЗНМ: Османи, евроинтегративецот, само декларативно се залага за слобода на духот


Скопје, 30 јануари, 2019 - 10:53 (META) 

Одговарајќи на забелешките на министерот Роберт Поповски, но пред сè на вчерашниот настап на вицепремиерот Бујар Османи, кој се закани со тужби на медиуми поради пишувањата за скандалот со непрефрлање пари од ПИОМ на сметките на осигурениците во вториот пензиски столб, Здружението на новинарите на Македонија (ЗНМ) порача дека министрите треба да се воздржат од такви настапи кои може да се сфатат како закани или етикетирање на медиумите.

„ЗНМ смета дека јавните функционери, особено министрите, треба да се воздржат од изјави кои што на кој било кој начин може да се сфатат како закани или како етикетирање на медиумите. Приниципиелно, таков начин на комуникација не може да влијае на професионализацијата на медиумите. Вицепремиерот Бујар Османи говорејќи за скандалот во ПИОМ се закани со тужби до сите медиуми кои овој скандал го поврзуваат со функционери на ДУИ. Напоменуваме дека работа на медиумите е да истражуваат и изразуваат сомневања за сите функционери, без разлика од која партија доаѓаат, а владините претставници, во случајов Вицепремиерот кој е задолжен за евроинтеграциите, треба да се воздржат од закани со тужби во духот на слободниот говор за кој декларативно се залагаат“, порача новинарската организација реагирајќи на настапот на Бујар Османи.

Според ЗНМ, евентуалните недоразбирања треба да се решаваат по пат на транспарентност и отвореност, а не со закани за тужење.

Според новинарскиот еснаф, и министерот задолжен за комуникации, отчетност и транспарентност, Роберт Поповски се огрешува кон медиумите и новинарите, етикетирајќи медиумски куќи.

„Во контекст на изјавата на министерот Роберт Поповски каде се сугерира дека во ТВ Алфа има влијание на структури од претходната власт, пак, сметаме дека коментари со кои на политичка основа се етикетираат медиуми, не придонесуваат за подобар медиумски амбиент и европски вредности. Професионализацијата на медиумите, вклучително и на оние кои со години ги кршеа или ги кршат професионалните стандарди е долг процес во кој се бара конечно и целосно одлепување на сите политички влијанија во медиумите, во насока на стандардизирање на етичките и морални принципи на новинарството, а во тој процес сите општествени чинители, вклучително и членовите на Владата треба да бидат повнимателни“, вели ЗНМ.

Истовремено, организацијата ги повика медиумите да ги почитуваат етичките и професионалните стандари.

„Потсетуваме дека телата за саморегулација и јавноста може да ценат за професионалноста или непрофесионалноста на медиумите и начинот на кој тие работат и известуваат. Сите граѓани, а меѓу нив и функционерите и министрите, ги охрабруваме, преку овие тела да овозможат подигање на стандардите на медиумите, бидејќи кршењето на тие стандарди не е во ничиј интерес, а најмалку во полза на довербата во медиумите“, порачува Здружението на новинарите на Македонија.


СЗО: Загадениот воздух и „антиваксерите“ се меѓу 10-те најголеми закани за здравјето


Скопје, 18 јануари, 2019 - 16:18 (META) 

Загадениот воздух и климатските промени се на врвот на листата за најголеми закани по човековото здравје во светот во 2019 година, што ја подготви Светската здравствена организација (СЗО). На списокот со 10 точки, на 9. место се противниците на вакцинирањето.

Истовремено, во Скопје продолжува епидемијата на морбили, а со оваа болест најновите пациенти примени на Инфективна клиника се двајца возрасни и едно дете од Скопје.

Според СЗО, девет од десет луѓе дишат загаден воздух секој ден, што доведува до загуба на седум милиони човечки животи секоја година од болестите предизвикани од ова зло, како што се рак, мозочни и срцеви удари, потоа други заболување на крвоносниот систем и на белите дробови.

Главниот загадувач на воздухот е согорувањето фосилни горива, што истовремено предизвикува и климатски промени. Се проценува дека поради нив во периодот од 2030 до 2050 година само поради неухранетост, маларија, дијареја и топлотни удри секоја година ќе умираат дополнителни 250.000 луѓе, вели СЗО.

Втората по сериозност закана за здравјето на луѓето во целиот свет се непреносливите болести, како дијабетес, рак и болестите на срцево-садовиот систем и на нив отпаѓаат 70 отсто од сите смртни случаи, односно 41 милион луѓе годишно.

Трета по сериозност закана би била евентуална глобална епидемија, односно пандемија, на грип, а на четвртото место се лошите и загрозувачки услови за живот, во кои се смета дека се наоѓаат 1,6 милијарди луѓе.

Според СЗО, следна закана е отпорноста на микробите на лекови, а потоа следуваат еболата и другите високозаразни вирусни и други преносливи болести.

Во списокот на 10 глобални закани по здравјето на човекот е впишана и слабата примарна здравствена заштита, а по неа, на 9-тото место е противењето на вакцинирањето. Последната набројана закана е денга-треската.

Се смета дека со сегашната стапка на вакцинирање се спасуваат 2-3 милиони човечки животи секоја година, а бројката би можела да порасне за дополнителни милион и пол доколку се зголеми опфатот на вакцинирањето. Светската здравствена организација ги посочува како пример морбилите, односно малите сипаници, за кои е прогласена епидемија во Скопје.

Според СЗО во последните години случајот на заболени од оваа болест се зголемила за 30 отсто како резултат на отпорот кон примање вакцини.

Таканаречените „антиваксери“ станаа погласни и побројни во изминатите 5-6 години на Балканот и во Македонија,  а во последните години во Скопје одржаа и два три протестни марша против вакцинирањето.

Инаку, токму Скопје е градот во кој е прогласена епидемија на морбили, која почна во детска градинка во Радишани.

Како што соопшти Министерството за здравство, на Инфективната клиника се примени уште тројца пациенти со морбили, од кои еден возрасен од Карпош и еден возрасен и едно дете од Чаир.

Од почетокот на епидемијата до вчера, вакцинирани против МРП (вакцината против морбили, рубела, паротитис, односно мали сипаници, големи сипаници и заушки) биле вакцинирани 2.925 деца, од кои само денеска до 13 часот вкупно 181 дете.


Кривична пријава за скопјанец што на Фејсбук им се заканувал на пратеници


Скопје, 10 јануари, 2019 - 15:12 (META) 

Секторот за компјутерски криминал и дигитална форензика при МВР, во координација со Основното јавно обвинителство – Скопје, почнал постапка поради објава на Фејсбук од страна на Б.Б. (49) од Скопје. Од полицијата велат дека тој „предизвикал загрозување на сигурноста на пратеници во Собранието“ и „ширел расистички и ксенофобичен материјал“.

Б.Б. вчера бил повикан на службен разговор во полициска станица, а му биле и одземени предмети за вештачење.

По документирање на случајот, против Б.Б. ќе биде поднесена кривична пријава, велат од Секторот за компјутерски криминал и дигитална форензика, порачувајќи им на граѓаните вакви и слични случаи да  пријавуваат во најблиската полициска станица или на мејлот/адресата cybercrime@moi.gov.mk.


Tелефонската линија 0800-11-011 за помош при напад на новинари ќе биде отворена 24/7


Скопје, 21 декември, 2018 - 14:14 (META) 

Мисијата на ОБСЕ во Скопје во партнерство со Самостојниот синдикат на новинари и медиумски работници (ССНМ) денеска во Скопје на прес-конференција ја промовираше бесплатната телефонска линија 0800-11-011 за помош на новинари во случај на закани, напади и насилство кон новинарите.

Бесплатната телефонска линија ќе функционира 24/7 и ќе овозможи помош и поддршка на новинарите и медиумските работници во случај на заплашувања, закани, вербални или физички напади, онлајн вознемирување, родово насилство, уцени и останато загрозување на безбедноста.

Телефонскиот оператор ќе ги советува новинарите и медиумските работници како да постапат во одредени специфични ситуации преку информирање за механизмите на делување кои им се на располагање.

„Нападот врз новинарот е напад врз демократијата. Заканите и заплашувањата често доведуваат до самоцензура, го ограничуваат просторот за проток на идеи и мислења.ОБСЕ со својот сеопфатен пристап кон безбедноста, работи на обезбедување услови медиумите да работат слободно и новинарите да можат непречено и безбедно да ја вршат својата работа – без страв од заплашување или закани“, рече  заменикот шеф на Мисијата на ОБСЕ во Скопје, Џеф Голдстајн.

В.д. претседателот на ССНМ, Ѕвездан Георгиевски, додаде дека квалитетно новинарство не е можно без постоење услови за безбедна работа на новинарите и медиумските работници.

„Клучно е на нашите колеги да им овозможиме помош кога ќе се соочат со кој било вид на насилство“, рече Георгиевски.

За време на прес-конференцијата, Мисијата донираше елеци и заштитни капи за репортери членови на Здружението на новинари (ЗНМ).


Јанчев: Добивам закани по живот, Мицкоски ме уверува дека не се од ВМРО-ДПМНЕ


Скопје, 31 октомври, 2018 - 9:48 (META) 

Досегашниот потпретседател на ВМРО-ДПМНЕ и актуелен градоначалник на Кавадарци, Митко Јанчев, синоќа не дојде на гостувањето на „Телевизија 24“, бидејќи, како што рече, добил закани по живот на неговата сопруга ако се појави во емисијата. Тој потоа телефонски се вклучи и објасни што се случило.

– Последниот месец дена константно добиваме закани на „Фејсбук“ и по СМС. Меѓутоа денеска добивме закана по телефон на мојата сопруга и тоа беше причината да сакам да останам вечерва со семејството. Јас имам пријавено во полиција. Пред референдумот имав закани дека ако излезам, ќе цитирам: На Јанчев во сон му се јави татко му и му рекол дека ако гласа за брзо време ќе се видат. А, мојот татко е починат од 2005 година. Ми се чини дека „Фејсбук“ ботовите се лажни ботови, а за СМС пораките се пријавени броевите така да очекувам да се откријат. Сум разговарал за ова со Мицкоски и сега пред 5 минути, тој ме уверува дека не е од негова страна и од страна на ВМРО-ДПМНЕ и би сакал да верувам во тоа. Би сакал моето семејство да може да функционира нормално – рече Јанчев.


Кривична пријава за маж што се заканувал на пратениците преку Фејсбук


Скопје, 22 октомври, 2018 - 9:34 (META) 

СВР Скопје и Секторот за компјутерски криминал и дигитална форензика при МВР ќе поднесат кривична пријава против 38-годишниот А.Н. од скопско Коњари, поради закани преку Фејсбук. Кривичната пријава ќе биде за загрозување на сигурноста и за ширење расистички и ксенофобичен материјал преку копјутерски систем.

Полицијата вчера извршила претрес во домот на осомничениот, при што се одземени предмети, а тој бил повикан на службен разговор во полициска станица.

Секторот за компјутерски криминал и дигитална форензика при МВР ги повикува граѓаните што се изложени на вакви закани или ќе ги забележат некаде, случаите да ги пријавуваат во најблиската полициска станица или на адресата cybercrime@moi.gov.mk.


Палмер: ВМРО-ДПМНЕ да ги ослободи пратениците да гласаат без страв од закани и одмазда


Белград, 19 октомври, 2018 - 12:46 (META) 

Бараме од лидерството на ВМРО-ДПМНЕ да ги ослободи пратениците да гласаат по нивно уверување без страв од закани и одмазда, изјави Метју Палмер, заменик-помошникот државен секретар на САД, на панел на Белградскиот безбедносен форум.

– Историскиот договор од Преспа ѝ ги отвори вратите за европската иднина на Македонија. Нема алтернатива. Нема „Преспа плус“. Нема подобар договор од овој. НАТО ја покани Северна Македонија да ѝ се приклучи на алијансата – додаде Палмер.

Тој во понеделник ќе допатува во Македонија каде што е предвидено да се сретне со претставници на Владата и политичките партии, меѓу кои и премиерот Зоран Заев и министерот за надворешни работи, Никола Димитров.

Палмер исто така ги повика Белград и Приштина да ја видат „историската прилика“ и постигнатиот вин-вин договор, велејќи дека САД немаат никакво готово решение ниту дека се подготвени на било кој да му дадат бланко поддршка.

-Ги охрабруваме двете страни сами да го пронајдат патот напред и да најдат трајно и одржливо решение кое двете ќе го прифатат – наведе тој.

На прашањето дали постојат несогласувања помеѓу САД и ЕУ кога станува збор за идејата за размена на територии или промена на границите, Палмер рече дека САД ја разбираат загриженоста дека размената на територии може да предизвика криза на други места во регионот, но додаде дека и нерешениот конфликт е исто така ризик по регионалната стабилност.

Палер повтори дека САД силно ја поддржуваат европската перспектива на целиот Западен Балкан пред кој и покрај огромниот напредок се уште има долг пат до целосно вклучување во европското семејство на народи.


Обвинение за Тони Михајловски за закани кон Бранко Тричковски


Скопје, 17 октомври, 2018 - 15:25 (META) 

Основното јавно обвинителство соопшти дека е поднесен обвинителен предлог против актерот и член на Извршниот комитет на ВМРО-ДПМНЕ, Тони Михајловски, поради закани кон новинарот Бранко Тричковски во јуни минатата година.

„Обвинетиот се товари дека на 16.06.2017 година се заканил дека ќе стори кривично дело за кое е пропишана казна затвор од 5 години или потешка казна. Заканите биле објавени во форма на коментар на неговиот профил на една социјална мрежа и биле насочени кон оштетено лице – новинар, при што обвинетиот повикал на физичка ликвидација и ја загрозил сигурноста на новинарот“, соопшти Обвинителството, без да го посочи идентитетот на двете лица.

Тони Михајловски на 16 јуни минатата година напиша „Јас Бранко Тричковски можам да го убијам и да не ми трепне око. Прости ми боже“.

Михајловски е вработен во Македонскиот народен театар (МНТ), а член на Извршниот комитет на ВМРО-ДПМНЕ стана во јануари годинава.


Европските компании кои инвестирале во руски гасовод ќе се соочат со санкции од САД


Вашингтон, 12 јули, 2018 - 10:32 (META) 

Санкции за европските компании кои инвестирале во рускиот гасовод „Северен поток 2“ кон Германија, најави администрацијата на американскиот претседател Доналд Трамп.

– Бевме јасни дека постои ризик од воведување санкции за компаниите кои работат во секторот на рускиот енергетски извоз –  изјави претставник на американскиот Стејт департмент.

Тој додаде дека Вашингтон смета дека „гасоводот ќе ја поткопа целата енергетска безбедност и стабилност на Европа, давајќи и на Русија уште еден инструмент за вршење политички притисок врз европските земји, особено врз Украина“.

Доколку САД ги спроведе санкциите, засегнати ќе бидат компаниите „Унипер“ (Uniper), „Винтершел“ (Wintershall), „О-ем-ве“ (OMV), „Анжи“ (Engie) и „Шел“ (Shell).