Џафери: До сега се преведени 17.000 амандмани, поднесени се за да направат блокада


Скопје, 30 јануари, 2018 - 11:01 (META) 

Претседателот на Собранието, Талат Џафери, вели дека до овој момент се преведени 17.000 амандмани, од вкупно 35.569 амандмани кои опозицијата ги поднесе за Законот за употреба на јазиците.

„Има членови кои имаат и по 300 амандмани, како што е случајот со членот 5, за кој ќе треба време да се преведат. Очигледно е дека ова е политичко прашање и амандманите се донесени да го блокират Законот за употреба на јазиците. Секое можно прифаќање на еден амандман би претставувало закана за Уставот. Во парламентарната процедура законот е усогласен со Уставот и не постои основа за да се смета за неуставен“, изјави Џафери на брифингот со новинарите.

Денеска во Собранието, во 12 часот ќе продолжи 32. седница на која како осма точка е ставена расправата за Законот за јазиците.

Претседателот на Собранието, Талат Џафери вчера ја прескокна оваа точка, бидејќи како што рече, „немало технички услови“ за расправата.


Трамп се закани дека ќе ја прекине помошта за Палестинците


Вашингтон, 3 јануари, 2018 - 13:01 (META) 

Соединетите Американски Држави би можеле да ја прекинат помошта за Палестинците, кои, „повеќе не сакаат да разговараат за мир“ порача американскиот претседател, Доналд Трамп, пренесува „Би-би-си“.

Трамп на „Твитер“ напиша дека, „САД не добиле ниту признание, ниту почит за помошта од стотици милиони долари што годишно им ја даваат на Палестинците.“

Заканите на Трамп следуваат по острите реакции на Палестинците на неговата одлука да го признае Ерусалим за главен град на Израел.

Кратко време по објавувањето на одлуката на Вашингтон во декември, минатата година, палестинскиот претседател Махмуд Абас изјави дека нема да прифати никаков мировен план на САД за Блискиот исток.

Одлуката на Трамп, исто така, беше осудена и од Обединетите нации.

На 21 декември мнозинство од 128 земји-членки на Обединетите нации ја поддржаа резолуцијата со која се бара САД да ја повлечат одлуката за признавање на Ерусалим како главен град на Израел.


Маж се заканил дека ќе ја запали зградата на Општина Арачиново


Скопје, 24 ноември, 2017 - 15:02 (META) 

Вчера попладне, во канцеларијата на градоначалникот на Општина Арачиново влегол маж и се заканил дека ќе ја запали општинската зграда, по што заминал.

Како што извести полицијата, случајот бил пријавен вчера, пет часа по заканата.


Непознати лица се заканувале со молотов коктел за гласање во Советот на Гази Баба


Скопје, 11 ноември, 2017 - 15:45 (META) 

Четириесет и четиригодишната И.Т. од Скопје вчера пријавила во полицијата дека две непознати лица вчера ја побарале нејзината ќерка З.Т. 26 години за да се договорат за гласање во Советот на општина Гази Баба.

Како што пријавила во полиција И.Т. двајцата на возраст од околу 50 години, дошле со „мерцедес“ и понудиле помош околу семејниот бизнис и поубаво работно место за З.Т. Во спротивно, според пријавеното, лицето се заканило дека ќе фрли молотов коктел во продавницата на И.Т. во Ќерамидница.

На лице место се упатени полициски службеници од полициска станица Гази Баба и известен е јавен обвинител. Се преземаат мерки за расчистување на случајот.


СДСМ Карпош го осуди инцидентот пред штабот на ГРОМ


Скопје, 16 октомври, 2017 - 16:57 (META) 

Општинската организација на СДСМ од Карпош преку соопштение го осуди насилството и синоќешниот инцидент што се случи пред штабот на политичката партија ГРОМ, каде едно лице излезе од автомобил, извади лисици и нож и им се закануваше на присутните.

„Очекуваме надлежните институции во најкус рок да го расчистат случајот докрај и сите виновници да бидат изнесени пред лицето на правдата во согласност со законите. Насилството е недозволиво и секој насилен чин, без разлика од кого е сторен, треба да биде соодветно санкциониран од надлежните институции“, велат од партијата.

Лидерот на ГРОМ, Стевчо Јакимовски, денеска на прес-конференција побара кривично да биде гонет напаѓачот и запраша како може СДСМ да не се огради и да не го осуди овој настан.

– Тие што дојдоа да се тепаат се хулигани, поранешни затвореници и членови на подземјето. Како може СДСМ да не се огради и да не го осуди ваквиот настан? Уште помага делото да биде прекршочно, а не кривично. Ова кажува дека политиката и криминалот се заедно, дека СДСМ и криминалот се заедно и дека и понатаму ќе продолжат да вршат насилство – изјави Јакимовски кој го повика Основното јавно обвинителство да реагира.

Инцидентот е забележан и во денешниот полициски билтен, во кој се вели дека возило „мерцедес“ застанало пред штабот на ГРОМ, по што од автомобилот излегол С.Р. кој извадил нож и лисици, упатил закани на присутните и заминал со возилото.


Трамп ѝ се закани на „Ен-би-си“ со одземање на лиценцата


Вашингтон, 11 октомври, 2017 - 19:19 (META) 

Претседателот на САД, Доналд Трамп, денеска повторно ги нападна медиумите, кои, според него, шират лажни вести и праша дали треба да им бидат одземени дозволите за работа.

„Со сите лажни вести кои доаѓаат од „Ен-би-си“ и од мрежите, кој момент е соодветен да им бидат оспорени лиценците? Лошо за земјата!“, напиша Трамп на „Твитер“.

„Ен-би-си“ претходно денеска пренесе дека Трамп сака за десет пати да го зголеми американскиот нуклеарен арсенал.

Трамп е во судир со повеќе медиуми во САД, а последен во низата е „Ен-би-си“, кој неодамна објави извештај за несогласувања меѓу претседателот на САД и американскиот државен секретар, Рекс Тилерсон.


Закана за убиство на градоначалничкиот кандидат на Беса за Сарај


Скопје, 6 октомври, 2017 - 15:38 (META) 

Закана за убиство вчера пред 17 часот добил кандидатот на Беса за градоначалник на општина Сарај, Башким Бакиу, објави „Порталб“. Случајот во полиција го пријавил Бакиу.

Според СВР Скопје, вчера, околу 19 часот, во Полициската станица Центар дошол Башким Бакиу, жител на селото Љубин, и кажал дека во текот на денот добил СМС со заканувачка содржина на неговиот мобилен телефон. Но, бидејќи се брзал за да овозможи ненајавен митинг во месноста Дервен во селото Сарај, се откажал од можноста формално да го пријави случајот и заминал. Потоа, во 19.50 часот, се јавил на телефонскиот број 192 и го пријавил митингот и побарал полициско обезбедување.

„Господине Бакиу, десет години поминав во затвор и ако е потребно, уште десет ќе ги заспијам. Тебе ќе те снема ако вечерва продолжиш со активности и одржуваш собири. Вечерва те чекам во Дервен, каде што ќе имаш собир“, гласи заканувачката порака што ја добил Бакиу.

Митингот завршил без проблеми, по што полицајците му кажале да го пријави случајот во Полициското одделение Сарај, соопшти СВР Скопје.

За „Порталб“, Бакиу изјави дека го информирал и меѓународниот фактор за заканата.

– Заканата нема да ме запре. Живот дава и зема само Бог! Случајот е пријавен и во полиција и на меѓународниот фактор – вели Бакиу, пренесува „Порталб“.


Претресен авион на „Туркиш ерлајнс“ во Германија


Келн, 14 септември, 2017 - 15:56 (META) 

Авион на „Туркиш ерлајнс“ е запрен на аеродромот „Келн-Бон“ додека се движел по пистата. Сите 111 патници се префрлени со автобуси до терминалите, а во леталото се внесено кучиња трагачи.

Германските власти го претресле авионот, по анонимен заканувачки повик.

Повикот бил добиен во 8.15 часот, а според федералната полиција, истиот бил веродостоен за да се изврши претрес.


Трамп ја продолжи важноста на црната листа за Македонија – 10 лица се закана за САД


Вашингтон, 22 јуни, 2017 - 15:52 (META) 

Американскиот претседател Доналд Трамп побара од Конгресот да ја продолжи важноста на т.н. „закана по националните интереси на САД“ од регионот на Западен Балкан, документ кој беше донесен во јуни 2001 година од Џорџ Буш.

Со него се опфатени Босна и Херцеговина, Косово и Македонија и тој пропишува дека од овие сè уште земји постои закана од „лица кои помагаат или поддржуваат екстремно насилство“.

Инаку, станува збор за прва одлука потпишана од Трамп која се однесува на Западен Балкан и на Македонија, откако тој ја презеде должноста претседател на САД во јануари оваа година.

Tramp crna lista odluka

За т.н. црна листа се вели дека опфаќа лица „кои се непријателски кон интересите на САД и кои претставуваат закана за националната безбедност и за надворешна политика на земјата“.

На неа од Македонија има 10 лица, повеќето поранешни команданти на Ослободителната национална армија (ОНА), од кои некои се во новиот состав на Собранието.

Станува збор за Џеват Адеми, Гафур Адили, Нури Беџети, Невзат Халили, Џавит Хасани, Кастриот Хаџиреџа, Џемаљ Хисени, Даут Реџепи, Џезаир Шакири и за Мендух Тачи.

Од нив во актуелниот парламентарен состав се Џеват Адеми од ДУИ и Мендух Тачи од опозициската ДПА.

Посебно за Македонија се вели дека таа листа била ревидирана во 2003 година „за да се преземат чекори против делата за попречување на имплементацијата на Рамковниот договор“.

Листата, на која се ставени лицата опфатени со оваа одлука, ја објавува Канцеларијата за контрола на странски средства (ОФАК), која работи во рамките на американското Министерство за финансии.


Русија: Амбициите на Северна Кореја се директна закана за Москва


Сингапур, 4 јуни, 2017 - 13:12 (META) 

Заменик-министерот за одбрана на Русија, Александар Фомин, денеска изјави дека амбициите на Северна Кореја во поглед на нуклеарните оружја се „директна закана“ за Русија, јавуваат светските агенции.

„Тоа не е само систем за противракетна одбрана, туку има конкретна цел. Затоа претставува вознемирувачка и директна закана за Русија. Наш принципиелен став е дека на тој начин се зголемува напнатоста во регионот“, рекол Фомин, зборувајќи на меѓународната конференција за безбедност што се одржува во Сингапур, на која учествуваат министри за одбрана и експерти од 39 земји.

Русија се граничи со Северна Кореја и еден од проектилите што ги тестира Северна Кореја падна во близина на руските територијални води. Сепак, ставот на Русија околу решевањето на проблемот со севернокорејската нуклеарна и ракетна програма се разликува од ставот на Соединетите Американски Држави и нивните сојузници.

Фомин истакнал дека „економските ограничувања треба да бидат средство за враќање на Пјонгјанг кон мирно решавање на спорот“.

На конференцијата учествува и министерот за одбрана на САД, Џејмс Матис.