!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Меѓународната заедница загрижена поради актуелната ситуација на Косово


Приштина, 13 август, 2017 - 16:41 (META) 

Амбасадорите на Франција, Германија, Италија, Велика Британија и САД се загрижени поради актуелната ситуација на Косово. Ставот на амбасадорите денеска го соопшти американската амбасада во Приштина.

„Косово се соочува со многу предизвици, како актуелни, така и долгорочни, вклучувајќи ја програмата со ММФ, енергетската ситуација, но исто така и потребата за економски развој, јакнење на владеењето на правото, европската перспектива и односите со Србија. Граѓаните на Косово заслужуваат парламент и влада која може да ги исполни овие предизвици“, стои во соопштението.

Во него се наведува дека одговорност на косовските лидери е да ги формираат овие институции на власта и да ги спроведат неопходните реформи за да нема блокади во иднина.

„Се надеваме дека косовските лидери, како во политиката, така и во граѓанското општеството, ќе го преземат водството во решавањето на ова прашање, вклучително и давањето на конкретни предлози. Првиот и важен принцип е избраните пратеници во парламентот на Косово да присуствуваат на седниците на парламентот и да овозможат да почне неговата работа“, се наведува во соопштението што го објави амбасадата на САД во Косово.


ЦК на ВМРО-ДПМНЕ загрижен поради новата предлог-стратегија за бегалците


Скопје, 31 јули, 2017 - 16:18 (META) 

Од централниот комитет на ВМРО-ДПМНЕ денеска соопштија дека на саботната седницата, меѓу другото, изразиле загриженост од најавената нова стратегија за мигрантите на Владата на Република Македонија, со која, како што оцениле, „Владата се подготвува да прифати поголем број мигранти во Република Македонија“.

„ВМРО-ДПМНЕ укажува дека давање државјанства на десетици илјади мигранти во Република Македонија и нивно трајно населување со сигурност ќе предизвика сериозна дисторзија на пазарот на работна сила во земјата и ќе ја влоши и онака тешката состојба со невработеноста, која принуди многу наши граѓани да се отселат во други земји за да обезбедат работа и егзистенција. ВМРО-ДПМНЕ е партија која во време на своето владеење понуди и пружи голема помош и подршка за мигрантите кои транзитираа низ Република Македонија. Но, со вакво ниво на сиромаштија и невработеност да се прифати трајно населување на десетици илјади мигранти, би било сериозен удар на сите досегашни напори за намалување на невработеноста во земјата за граѓаните на Македонија“, се вели во соопштението.


Ахмети: Постои можност за поттикнување немири во земјава за геополитички интереси


Скопје, 5 мај, 2017 - 12:38 (META) 

Новата реформска влада ќе се формира наскоро, а новоименуваниот претседател на Собранието го врши својот дел од обврските за да се олесни и да се забрза овој процес, истакнал лидерот на ДУИ, Али Ахмети, на синоќешната средба со специјалниот претставник на претседавачот на ОБСЕ, амбасадорот Кристијан Штрохал, и со амбасадорката на ОБСЕ во Македонија, Нина Суомалаинен.

Ахмети и Штрохал разговарале за политичката ситуација во земјава по настаните во Собранието од 27 април. Во тој контекст, лидерот на ДУИ ѝ се заблагодарил на мисијата на ОБСЕ во Македонија за постојаниот контакт со пратениците во текот на насилствата во Собранието.

Ахмети, како што соопштуваат од ДУИ, на средбата зборувал за приоритетите на новата влада, како реформите во судството, евроатланската интеграција, Охридскиот рамковен договор, добрите меѓуетнички и соседски односи, како и за отварањето нови работни места.

Истовремено, лидерот на партијата изразил загриженост за „можноста за поттикнување немири во земјата за геополитички интереси“ и побарал од меѓународната заедница своето внимание да го фокусира кон случувања во земјава и во регионот.


Могерини: Тоа што го видовме во Скопје е многу тажно за сите нас


Валета, 28 април, 2017 - 11:01 (META) 

Тоа што го видовме вчера во Скопје е особено загрижувачко и многу тажно за сите нас, изјави денеска во Валета на Малта, високата претставничка за надворешна политика и за безбедност на Европската Унија, Федерика Могерини.

Синоќешните случувања во македонското собрание беа првата тема што пред новинарите ја отвори Могерини, непосредно пред почетокот на неформалниот состанок на министрите за надворешни работи на земјите членки на Европската Унија и на земјите-кандидати за членство во ЕУ – Македонија, Албанија, Црна Гора, Србија и Турција.

– Тоа што го видовме вчера во Скопје е особено загрижувачко и многу тажно за сите нас. Насилството секогаш го сметаме за неприфатливо, уште повеќе кога се случува во куќа на демократијата – во парламент. Веруваме дека сите во Скопје треба да ги следат принципите на Уставот, демократијата и да се обидат да ја извлечат земјата од оваа сериозна криза, која може да биде опасна – изјави Могерини.

На состанокот, како што соопштија денеска од Министерството за надворешни работи, на покана на Могерини, учествува и шефот на македонската дипломатија во заминување, Никола Попоски.


Битолски средношколци со неписмени соопштенија се повикуваат на протести


Битола, 20 март, 2017 - 13:56 (META) 

„Бојкотираме за да учиме на македонски јазик, не бојкотираме за партија!“ Вака гласи повикот на социјалните мрежи со кои средношколци од повеќе училишта во Битола ги организираат своите соученици да ја прекинат наставата и да излезат на протести.

Притоа, се повикуваат претседателите на класовите да прават списоци и да бележат кој сè излегол на протестите. Протестот кој беше најавен за денеска во 11.30 часот, ги вознемири дел од родителите на ученици во гимназијата „Јосип Броз Тито“, особено зашто ученици од други училишта дошле да ги повикаат на протест гимназијалците, со зурли и со тапани, скандирајќи „Македонија“ и читајќи соопштение „како треба да се сака татковината“.

– Децата ни јавуваат дека други ученици со зурли и со тапани се во училишниот двор и ги повикуваат на протести. Само оваа гимназија досега не ја има прекинато наставата и не го има поддржано бојкот, освен поединци – вели еден од родителите.

Во техничкото училиште, пак, ученик од втора година читал соопштение по училниците зошто треба да се излезе на протестите. Ученикот пред професорите што не го дозволувале ваквиот чин, се правдал дека за сè знае директорот. Директорот, меѓутоа, не одговара на нашите телефонски повици и пораки.

Ученици од повеќе средни училишта денеска, сепак, излегоа на протест.


Народен правобранител: Да престанат обидите за политичко инволвирање на учениците


Скопје, 16 март, 2017 - 13:43 (META) 

Народниот правобранител на Република Македонија денеска, преку соопштение, изразува сериозна загриженост за обидите за инвловирање на деца во протестите што се организираат во повеќе градови во земјава.

Омбудсманот истовремено ги осудува настапите на раководни лица во училиштата и ги повикува училишните одбори, градоначалниците, Државниот просветен инспекторат и Министерството за образование и наука веднаш, секој во рамките на своите надлежности, да преземат соодветни мерки против лицата што агитираат или дозволуваат во училиштата да се врши агитација и обиди за политичко инволвирање на учениците.

Ваквите настапи, стои во соопштението на Народниот правобранител, се спротивни на Законот за средното образование, со кој е забрането секакво политичко и верско организирање и дејствување во училиштата.


Сите повици, совети и сугестии до Иванов да ја ревидира одлуката


Скопје, 10 март, 2017 - 12:15 (META) 

Генералниот секретар на ОБСЕ, двајца еврокомесари, неколку министри на земји членки на ЕУ, амбасадорот на САД во Македонија, министерката за надворешни работи на Канада и заменик-помошникот државен секретар на САД за европски и евроазиски прашања досега побараа македонскиот претседател, Ѓорге Иванов, да ја преиспита својата одлука да не го додели мандатот на СДСМ, кој обезбеди 67 пратенички потписи, односно мнозинство во Собранието.

Ламберто Заниер, генералниот секретар на ОБСЕ, минатата недела на „Твитер“ изрази загриженост поради одлуката на претседателот Ѓорге Иванов да не го додели мандатот на лидерот на СДСМ, Зоран Заев.

Федерика Могерини, високата претставничка за надворешна политика на Европската Унија, за време на посетата на Македонија, побара од Иванов да ја ревидира својата одлука во интерес на граѓаните.

Јоханес Хан, еврокомесарот за проширување и за соседска политика, порача дека „во демократија мора да се признае парламентарното мнозинство, иако некому тоа можеби не му се допаѓа“.

Џес Бејли, амбасадорот на САД во Македонија, минатата недела го повика претседателот на државата, Ѓорге Иванов, повторно да ја разгледа својата одлука.

Сер Алан Данкан, британскиот министер за Европа, со порака објавена на веб-страницата на британската канцеларија за надворешни работи, истакна дека „67 од 120 пратеници се јасно мнозинство, а претседателот Иванов треба да си ја преиспита одлуката“.

Зигмар Габриел, шефот на германската дипломатија, изјави дека е вознемирен од состојбата во земјава и побара Иванов да ја преиспита одлуката.

Едвард Кукан, Кнут Флекенштајн и Иво Вајгл, испратија повик да се почитува демократската одлука на граѓаните и да се прифати секое демократски договорено мнозинство.

Кристија Фриленд, канадската министерка за надворешни работи, на почетокот на оваа недела, испрати соопштение во кое ги повика македонските политички лидери да дозволат формирање влада без одложување, а претседателот Иванов да ја изврши својата уставна обврска.

Берт Кундерс, холандскиот министер за надворешни работи, изрази загриженост за актуелната состојба и повика на почитување на парламентарното мнозинство и на смирување на тензиите.

Хојт Брајан Ји, заменик-помошникот државен секретар на САД за европски и евроазиски прашања, од Загреб ги повика сите страни во Македонија да бидат подготвени на компромис и да се формира нова влада.

Арлем Дезир, државниот секретар на Франција за европски прашања, во изјава за актуелните политички случувања во Македонија порача дека Уставот, резултатите од парламентарните избори од 11 декември 2016 година и демократските принципи треба да се почитуваат.

Кристијан Хелбах, специјалниот ополномоштеник на Министерството за надворешни работи на Германија за Југоисточна Европа, Турција и за ЕФТА-државите, по средбата со претседателот Ѓорге Иванов, шефот на македонската дипломатија, Никола Попоски, и со лидерите на политичките партии во Македонија, рече дека е потребно брзо формирање влада која ќе биде посветена на имплементирање на реформските приоритети.

Кејт Брнс од Мисијата на САД во ОБСЕ истакна дека Соединетите Американски Држави се разочарани што претседателот Иванов одби да им понуди можност да ја формираат новата влада на претставниците што имаат јасно парламентарно мнозинство и бара од него да ја преиспита својата одлука.

Од друга страна, пак, Иванов за одлуката да не го додели мандатот за формирање влада на Зоран Заев, поддршка доби само од руското Министерство за надворешни работи и од европратеничката Маријана Петир.

Руското МНР со соопштението од 2 март и со изјавата следниот ден го поддржа Иванов и ги обвини Хан, Могерини и Столтенберг дека „бесрамно вршат пртисок врз Иванов“.

Маријана Петир, европратеничката која претседава со групата на пријатели на Македонија во Европскиот парламент, изрази загриженост за политичката состојба во Македонија и за „прифаќањето на платформата на албанските партии од страна на СДСМ“ и побара да се разгледа можноста за одржување нови избори.

(Поопширно на http://meta.mk/koj-pobara-ivanov-da-ja-povleche-odlukata-a-koj-go-poddrzha/)


Заев со амбасадорите: Неопходно е Иванов веднаш да го даде мандатот


Скопје, 7 март, 2017 - 13:25 (META) 

Лидерот на СДСМ, Зоран Заев, заедно со неговата заменичка Радмила Шекеринска, денеска имал средба со амбасадорите на Германија, Велика Британија, Шведска и на Холандија во земјава, Кристине Алтхаузер, Чарлс Гарет, Матс Стефансон и Ваутер Пломп.

На средбата, како што соопштуваат од партијата, била изразена загриженост од кочењето на демократските процеси во Македонија, по изборите на 11 декември.

Лидерот на СДСМ пред амбасадорите истакнал дека претседателот на државата, Ѓорге Иванов, „предизвикува уставна криза и остава простор на Никола Груевски за провокации и за насилство за да спречи мирен трансфер на власта што ја изгуби“.

– Неопходно е Иванов веднаш да го даде мандатот за формирање нова влада во Р.Македонија, во интерес на граѓаните и на државата – рекол Заев.

На средбата било оценето дека е неопходно демократските процеси во Македонија да продолжат „за да се формира новата реформска влада“.

– Не смее да трпат последици државата и граѓаните само затоа што Никола Груевски ја изгуби власта и се плаши од соочување со одговорност за несовесното владеење. Нови избори би значеле само продлабочување на кризата. Ништо од тоа што лаже власта во заминување преку пропагандата не е точно. Ние сме определени кон унитарна Република Македонија, тоа е поддржано и од партиите со кои го обезбедивме парламентарното мнозинство. Ја имаме веќе основата на новата владина програма, за што ќе се разговара во процесот на формирање влада. Таа е поставена на реформи, нови работни места, квалитетно здравство, образование, правда, враќање на парите кон граѓаните и евро-атлантски развој на Македонија преку заедништво, а не на поделби – истакнал Заев, стои во соопштението на СДСМ за средбата.

На состанокот биле „изразени очекувања за зрелост од сите страни за Македонија и граѓаните што побргу да ја добијат новата влада, на мирен начин“.


Студентите Турци на Универзитетот во Штип загрижени од одлуката на Анкара за дипломите


Штип, 21 јануари, 2017 - 16:06 (META) 

Неизвеснот и загриженост кај турските студенти на Универизитетот „Гоце Делчев“ во Штип предзвика одлуката на властите во Анкара да го укинат договорот со Македонија за меѓусебно признавање на дипломите на сите образовни нивоа. Одлуката е донесена во декември минатата година, а на сила стапува на 11 февруари годинава.

На Универзитетот во Штип има 25 дипломирани турски државјани, а во моментов таму студираат 107 студенти од Турција. Само оваа студиска година на факултетите на Универзитетот „Гоце Делчев“ се запишани 30 нови студенти од Турција.

Од Универзитетот засега не сакаат да ја коментираат одлуката на турската влада. Портпаролот Кирил Барбареев кратко изјави дека ќе остават овој актуелен проблем да се решава на повисоко ниво, односно меѓу владите на двете земји.

Во крајно неповолна ситуација особено се турските студенти кои се на крај од своите студии, а кои во Штип имаат поминато дополнително една година само на изучување на македонскиот јазик. Турците на штипскиот универзитет во најголем број доаѓаат да студираат медицински науки, но и на техничките факултети.

Годишно за студии, еден студент од Турција плаќа по 1.000 евра за партиципација, односно 1.500 евра за студиите по медицина.

 


Бројот на раселени во Ирак можно е да се зголеми за уште еден милион луѓе


Женева, 29 јули, 2016 - 20:02 (META) 

Меѓународниот комитет на Црвениот крст денеска соопшти дека речиси уште еден милион луѓе во Ирак можно е да ги напуштат своите домови поради борбите со милитантите на Исламска држава (ИД), особено во градот Мосул, јавуваат светските агенции.

Во Ирак веќе има околу три милиони раселени лица од почетокот на војната против ИД, која пред две години зазеде големи делови од Ирак.

„Меѓународниот комитет на Црвениот крст стравува дека околу еден милион лица можно е да ги напуштат своите домови во наредните недели или месеци“, било наведно во соопштението.

Ирачката војска во текот на минатата година ослободи поголем дел од областите што беа под контрола на ИД. Сепак, групата и понатаму ги има под своја контрола градот Мосул и поголемиот дел од Северен и од Западен Ирак, како и дел во соседна Сирија.