Инстутуциите се координираат за утврдување на причините за автобуската несреќа


Скопје, 18 февруари, 2019 - 13:55 (META) 

Заради координација и поголема динамика во постапувањето на сите надлежни институции при утврдување на причините за автобуската несреќа што се случи на автопатот Скопје-Тетово, кај село Ласкарци, во Основното јавно обвинителство Скопје денеска се одржа работен состанок на претставници од надлежното обвинителство, Министерството за внатрешни работи, Бирото за судски вештачења, Машинскиот факултет во Скопје и на Институтот за судска медицина, криминалистика и медицинска деонтологија.

Од ОЈО Скопје информираат дека во текот на денешниот ден почнале со испитување на очевидците на настанот, а во текот на неделата свој исказ пред надлежен јавен обвинител ќе даде и возачот на автобусот.

„Од Министерството за внатрешни работи до Обвинителството денеска е доставени скицата, фотодокументацијата и други писмени прилози во поглед на сообраќајната несреќа, а во текот на денот ќе биде доставен и записникот за извршениот увид на местото на настанот“, се наведува во соопштението од Јавното обвинителство.

Претходно, постапувајќи по првичното известување од Министерството за внатрешни работи доставено во петокот, Обвинителството уште истиот ден изготвило наредби за обезбедување други писмени докази од правното лице „Дурмо турс“ – сопственик на автобусот, како и од ресорните министерства за транспорт и врски и за внатрешни работи.

Од Јавното обвинителство информираат дека до Институтот за судска медицина, криминалистика и медицинска деонтологија беа доставени наредби за обдукции на сите починати лица, а од здравствените установи беше побарана комплетната медицинска документација за повредените.

Исто така, биле побарани листинзите од мобилниот телефон на возачот, а за самиот телефон била изготвена наредба за вештачење, со цел да се утврди дали во критичното време возачот активно користел некоја од комуникациските врски на тој телефон. До Машинскиот факултет во Скопје во петокот била доставена наредба за вештачење на техничката исправност на автобусот во моментот на несреќата, велат од Јавното обвинителство.


Два дена жалост во Македонија, се чекаат причините за автобуската несреќа со 14 загинати


Скопје, 15 февруари, 2019 - 11:32 (META) 

Два дена жалост во Република Северна Македонија по тешката сообраќајна несреќа која се случи во средата (13.02.19), на автопатот Е-65, кој ги поврзува Скопје и Гостивар. Загинаа 14 лица а 39 се повредени. Автобусот на компанијата „Дурмотурс“ со над 50 патници, околу 17 часот поминал преку 3 ленти, излетал од автопатот и се превртел во близина на стариот пат. Tој превезувал главно патници кои биле вработени во Скопје и се враќале кон Гостивар.

Надлежните институции го утврдија идентитетот на 14 загинати жртви, завршен е увидот на местото на несреќата, а автобусот е однесен на вештачење. Петмина од хоспитализираните повредени се во критична состојба.

Се чекаат причините за трагедијата

Возачот кој управувал со автобусот се здобил со полесни телесни повреди, тој е пуштен на домашно лекување. Според тестирањата нарачани од Јавното обвинителство, тој немал алкохол ниту други психотропни супстанции во крвта и урината. Се истражува дали возачот во моментот на трагедијата разговарал на мобилен телефон.

„Веднаш по несреќата Јавниот обвинител имаше првичен разговор со него и притоа тој не даде релевантни податоци за целиот настан“, соопштија од Јавното обвинителство.

Од досегашните сознанија е утврдено дека автобусот бил набавен во 2001 година, а последен пат бил регистриран во јануари 2019 година. Вешт наод и мислење треба да достави и Бирото за судски вештачења.

„Дурмо турс“, треба да достави целосна документација за дозволите кои ги поседува за јавен превоз, за одржувањето на возилата, бројот на патници и продадени карти во автобусот, како и податоци за работното време и релациите кои ги поминал возачот на критичниот ден.

По несреќата Владата на вонредна седница прогласи дводневна жалост во целата држава. Комеморативни седници одржаа општините Гостивар и во Врапчиште, од каде се починатите во несреќата, во присуство на државниот врв и владини и партиски делегации.

Автобуската несреќа е петта по бројот на жртви во поновата историја на Македонија.

Пет пријави за говор на омраза на социјалните мрежи за трагичната сообраќајна несреќа

Министерството за внатрешни работи покренало пет постапки за говор на омраза на социјалните мрежи во врска со трагичната сообраќајна несреќа и се работи на откривање на други профили на социјалните мрежи од кои се шират говори на омраза, информираше министерот за внатрешни работи, Оливер Спасовски.

 

 


Заев: Ќе сториме сè да ги расветлиме причините за трагичната несреќа


Гостивар, 14 февруари, 2019 - 14:54 (META) 

Премиерот Зоран Заев со вицепремиерите, Оливер Спасовски и Бујар Османи и со министрите, Венко Филипче и Сухејл Фазлиу, денеска присуствуваа на комеморативната седница организирана од градоначалникот на Oпштина Гостивар, Арбер Таравари, во сеќавање и чест на загинатите граѓани од овој град во страотната собраќајна несреќа во која до сега 14 луѓе го загубија животот.

„Како Влада и како надлежни органи, ве уверувам дека ќе сториме се, да ги расветлиме причините за трагичната несреќа. Денешниот и утрешниот ден ги прогласивме денови на жалост во целата наша држава и молитвите на сите граѓани во нашата држава се упатени кон покој на загинатите сограѓани. Нека почиваат во мир вашите сакани и нашите сограѓани“,  рече Заев.

На комеморацијата присуствуваше и претседателот Ѓорге Иванов.


Несреќата кај Ласкарци, петта по број на жртви во поновата историја на Македонија (инфографик)


Скопје, 14 февруари, 2019 - 14:46 (META) 

Автобуската несреќа кај Ласкарци во која загинаа 14 лица е петта по бројот на жртви во поновата историја. На црната листа води скопскиот земјотрес со околу 1.100 загинати и 3.000 повредени. По него следат авионските несреќи кои навистина биле бројни и крвави, а најголемата се случи на 22.11.1993 година кога патнички авион „Јак-42Д“ на „Авиоимпекс“ се урна поради грешка на пилотот. Во оваа несреќа загинаа 115 луѓе.

Ако се направи дистинскиција и се земат предвид само природните катастрофи, тогаш поплавата со 22 загинати, според жртвите е втора, веднаш зад катастрофалниот земјотрес од 1963 година.

Овде не се земени предвид катастрофалните поплави од 1962 и 1979 кога немаше загинати.

Во оваа листа не се ставени загинатите во вооружените конфликти и полициските и воени акции.

22.10.1951 година – Авион на ЈАТ што полета од Белград се урна на аеродромот во Скопје. Загинаа 12 лица.

26.07.1963 година – Катастрофален земјотрес во Скопје. Загинаа околу 1.100 жители. Најмалку 3.000 лица беа повредени, а 200.000 останаа без покрив над главата.

24.07.1992 година – Карго авион „Антонов“ се урна на 26 километри југоисточно од Скопје, за време на приоѓање кон аеродромот. Авионот удри во планина близу селото Лисец. Во оваа несреќа животот го загубија 8 лица.

05.03.1993 година – На полетување од скопскиот аеродром, се урна патнички авион „Фокер 100“ на компанијата „Палер Македонија“ со 97 патници. Во несреќата загинаа 86 лица. Тогаш министерот за транспорт и врски, Антони Пешев си поднесе оставка од морални прични, што е преседан во македонската историја. Од тогаш, до денес, ниту еден министер не поднесе оставка од морални причини.

22.11.1993 година – Патнички авион „Јак-42Д“ на „Авиоимпекс“ се урна поради грешка на пилотот и однесе во смрт 115 лица – само едно преживеа. Авионот леташе од Женева до Скопје каде што требаше да слета. Меѓутоа поради лошите временски услови беше пренасочен кон Охридскиот аеродром на принудно слетување. Се урна во блиската Тројан-планина.

18.09.1995 година –  Авион „Антонов“ која беше ангажиран во гасење пожари се урна во близина на Скопје. Загинаа два члена на екипажот.

17.03.2001 година – Во текот на воениот конфликт во Македонија, воен хеликоптер МИ-17 удри во бетонски столб на Попова Шапка. Загинаа пилотот и инженерот, а десетина војници беа повредени.

26.02. 2004 година – Во близина на Мостар загинаа македонскиот претседателот Борис Трајковски, шест негови соработници и двајцата пилоти на владиниот „Кингер“.

12.01.2008 година –  Хеликоптер на АРМ се урна кај месноста катлановско Блаце. Притоа загинаа 11 мировници на АРМ кои се враќаа од мисијата „Алтеа“ во БиХ.

28.08. 2008 година – Авион од типот „Цесна“ се урна во месноста Скребатно кај селото Лескоец, во близина на Охрид. Во несреќата животот го загубија пилотот и тројца патници во авионот. Избегната е поголема катастрофа бидејќи авионот удри во автомобил фиќо во кој во моментот се наоѓаше малечко девојче.

05.09. 2009 година – Во 10.30 часот, потона бродот „Илинден“ во Охрид, а животот го загубија 15 лица, туристи од соседна Бугарија.

04.08.2015 година – Во невремето во Тетовско, 6 лица загинаа од наноси во селото Шипковица.

06.08.2016 година – Поплави во Скопско – 22 загинати.

13.02.2019 година – Автобуска несреќа кај Ласкарци, на патот Скопје – Тетово – 14 загинати.


Хан: Длабоко ме натажи трагедијата на автопатот Скопје – Тетово


Брисел, 14 февруари, 2019 - 13:50 (META) 

Еврокомесарот за проширување и соседска политика, Јоханес Хан, на својот „Твитер“ профил изрази сочувство за вчерашната сообраќајна несреќа на автопатот Скопје – Тетово во која животот го загубија 14 лица а триесетина се повредени.

„Длабоко ме натажи синоќешната трагична несреќа на автопатот Скопје – Тетово во Северна Македонија. Сочувствуваме со семејствата и пријателите на жртвите и повредените“, напиша на „Твитер“ еврокомесарот Јоханес Хан по вчерашната страшна сообраќајка кај селото Ласкарци.


Заев ќе ги посети повредените во „8 Септември“, комеморативна седница во Гостивар


Скопје, 14 февруари, 2019 - 9:26 (META) 

Премиерот Зоран Заев денеска во 10.30 часот ќе ги посети повредените граѓани во страотната сообраќајна несреќа што се случи вчера во близина на селото Ласкарци на автопатот Скопје – Тетово, кои се згрижени во болницата „8 Септември“.

Четири од повредените пациенти во болницата „8 Септември“ и три повредени пациенти во Ургентниот Центар во Скопје сé уште се во критична и тешка состојба, но се во стабилна здравствена состојба.

Потоа  Заев ќе се упати кон Гостивар, кадешто во 12 часот ќе присуствува и ќе се обрати на Комеморативната седница во Општина Гостивар во чест на загинатите граѓани.

Бројката на загинати доцна синоќа се искачи на 14.

Министерот за здравство Венко Филипче, утрово ги посети повредените пациенти. Денешниот и утрешниот ден се прогласени за денови на жалост во целата земја.


Бројката на загинати во автобуската несреќа се зголеми на 14, а шестмина се борат за живот


Скопје, 14 февруари, 2019 - 0:11 (META) 

По завршување на синоќешната вонредна владина седница по повод тешката сообраќајна несреќа на патот Скопје-Тетово, премиерот Зоран Заев соопшти дека бројката на загинати се зголеми на 14, а шестмина се борат за живот.

Телата на загинатите се дадени на обдукција на Институтот за судска медицина каде што се врши идентификација.

Министерот за внатрешни работи Оливер Спасовски информираше дека истрагата за причините за несреќата продолжува и денеска.

Владата денеска и утре ги прогласи за денови на жалост, а општините Неготино и Демир Капија ги откажаа сите настани предвидени за прослава на „Св.Трифун“.

Граѓаните на Скопје се мобилизираа и на социјалните мрежи нудеа помош за роднините на загинатите и повредени патници, од кои, најголем број се од Гостивар. По тој повод, Општина Гостивар денеска ќе одржи вонредна седница на која ќе се донесе одлука за прогласување на тридневна жалост.


Иванов изрази сочувство до семејствата на загинатите во сообраќајката кај Ласкарци


Скопје, 13 февруари, 2019 - 23:49 (META) 

Претседателот на државата Ѓорге Иванов изрази сочувство по сообраќајната несреќа кај селото Ласкарци во која загинаа 14 лица.

-Со длабоко жалење и тага ја примив веста за трагичната сообраќајна несреќа на автопатот Скопје – Тетово, што се случи попладнево. Во овие тажни мигови дозволете да изразам најдлабоко сочувство до семејствата на загинатите патници. Моите мисли се со нив. На повредените им посакувам што побрзо закрепнување – вели Иванов.

Длабоко жалење за несреќата изрази и бугарскиот премиер Бојко Борисов и упати сочувство до семејствата на загинатите патници и желби за побрзо оздравување на повредените.


Вонредна владина седница по сообраќајната несреќа во која загинаа 13 лица


Скопје, 13 февруари, 2019 - 22:25 (META) 

Владата вечерва ќе одржи вонредна седница, по автобуската несреќа што попладнево се случи на автопатот Скопје – Тетово околу 17 часот, кога животот го загубија 13 лица, над 30 се повредени, а осуммина се во животна опасност.

Министрите во Владата ќе ги договорат понатамошните чекори што ќе бидат преземени со цел да се расчисти случајот, а се очекува утрешниот ден да биде прогласен за ден на жалост.

Седницата е закажана за 22.30 часот.


Заев: Нема зборови што можат да бидат утеха, ги мобилизираме сите сили и капацитети


Скопје, 13 февруари, 2019 - 21:56 (META) 

Неизмерна е болката и тагата и нема зборови што можат да бидат утеха за тешката сообраќајна несреќа која беше кобна за повеќемина наши сограѓани, напиша на „Фејсбук“ премиерот Зоран Заев по трагичната сообраќајна несреќа на патот Скопје-Тетово во која загинаа 13 лица.

„Сочувствуваме со најблиските за нивните загуби. Ги мобилизираме сите сили и капацитети да им помогнеме на сите останати со животозагрозувачки и други повреди колку што може побрзо да ја добијат неопходната помош и да им се вратат на своите најблиски”, напиша Заев кој се очекува вечерва да ги посети повредените.