Едно лице загина откако воз со членови на Конгресот на САД удри во камион


Ричмонд, 31 јануари, 2018 - 21:15 (META) 

Патнички воз во кој се наоѓале членови на Конгресот на САД од редовите на републиканците, кои патувале од Вашингтон кон Западна Вирџинија, удрил во камион за превоз на отпад во Кросет, Вирџинија, јавуваат светските агенции.

Во несреќата загинало едно лице, кое не било во возот.

Инцидентот го потврди и Белата куќа.

„Претседателот Доналд Трамп е информиран за ситуацијата во Вирџинија. Имаме потврда дека едно лице смртно настрадало, а едно е сериозно повредено. Нема посериозно повредени меѓу членовите на Конгресот или меѓу нивниот персонал“, се наведува во соопштението на Белата куќа.

Железничката компанија „Амтрак“ соопштила дека до несреќата дошло во 11.20 часот според локално време и дека нема информации за повредите на патниците и на членовите на посадата на возот.

Полицијата ги истражува причините за инцидентот, додека надлежните ги утврдуваат штетите од несреќата.

Конгресменот Карлос Курбело за телевизијата МСНБЦ (MSNBC) изјавил дека имало помал број полесно повредени, но дека „најголем дел од патниците се во ред“.

„Ние сме добро, но нашиот воз удри камион за превоз на смет. Членови со медицинска обука им помагаат на возачите на камионот“, напиша конгресменот Грег Валден на „Твитер“.


Ракети од Сирија паднале во Турција, еден загинат


Анкара, 24 јануари, 2018 - 19:48 (META) 

Едно лице загинало, а 13 се повредени во ракетен напад од северот на Сирија на пограничниот турски град Килис, соопштија турските власти.

Една ракета погодила џамија, а друга ракета погодила куќа. Набрзо потоа се слушнала повратна турска артилериска акција во правец на Сирија.

Во тек е пети ден на големата турска офанзива против курдската милиција во енклавата Африн на северот на Сирија.

Турските медиуми лансирањето на ракетите им го препишаа на курдските борци од Единицата за заштита на народите која Турција ја смета за терористичка.


Такси-возач загина во верижен судир на булевар Србија


Скопје, 29 декември, 2017 - 11:03 (META) 

Едно лице загина, а друго е тешко повредено во сообраќајна несреќа што ноќеска, околу еден часот по полноќ се случила на булеварот Србија во Скопје, а во која учествувале повеќе возила.

Како што информираат од МВР, несреќата се случила кога автомобил, марка „ауди а4“, управувано од 28-годишниот Ѓ.Д. се судрил со возило „пежо 206“, а потоа преку тревникот преминало на коловозните ленти од спротивата насока, по што удрило во оградата на бензинска пумпа, а потоа во такси-возило. По незгодата, аудито се запалило и целосно е опожарено.

Во незгодата загинал возачот на такси-возилото, 58-годишниот Т.Ј. Тешка телесна повреда – фрактура на колено, била констатирана кај сопатникот во „аудито“, 21-годишниот Б.М. од селото Сопиште.

Увид на местото извршиле јавен обвинител и екипа од СВР Скопје. По наредба на јавниот обвинител телото на починатиот било предадено на обдукција.

Поради несреќата, сообраќајот на булеварот Србија, на делот од крстосницата со булевар Јане Сандански до крстосницата со булевар Трета Македонска Бригада, бил во прекин во двате насоки од 1.30 часот до 5.30 часот.


Скопјанец загинал во сообраќајка на бул. Трета македонска бригада


Скопје, 19 декември, 2017 - 10:24 (META) 

Во тешка сообраќајка што ноќеска се случила на булеварот Трета македонска бригада, животот го загубил 51-годишен скопјанец.

Како што соопшти СВР Скопје, во 45 минути по полноќ на раскрсницата на булеварот со улицата Фрањо Клуз, З.В.(51) од Скопје, управувајќи автомобил „бмв“ со скопски таблички загубил контрола и автомобилот удрил во бетонски ѕид.

По несреќата била повикана Итна медицинска помош, која констатирала дека возачот З.В. починал, а неговите сопатници М.К.(17) и К.К.(24), двајцата од Скопје, биле се пренесени во Ургентен центар Скопје и се задржани на лекување.


Во сообраќајка на патот Радовиш – Струмица загина 19-годишно момче


Радовиш, 18 ноември, 2017 - 13:47 (META) 

Деветнаесетгодишно момче од Радовиш утрово загина во сообраќајка помеѓу два автомобили, „голф“ и „мерцедес“, која се случила на магистралниот пат Радовиш – Струмица кај клучката Воиславци, информира МВР.

Со „голфот“ управувал Кристијан Р., роден 1998 година, кој починал на местото на несреќата. Неговата сопатничка, Елена Г., исто така родена во 1998 година, добила тешки телесни повреди и е пренесена во Здравствениот дом Радовиш, со возило на итна медицинска помош.

Со „мерцедесот“ управувал 48-годишниот Тодорче Ј.

На местото на настанот извршен е увид од јавен обвинител и од увидна екипа од полициската станица Радовиш.


Алпинист од Чешка загина во Демиркаписката Клисура


Демир Капија, 25 октомври, 2017 - 11:05 (META) 

Петр Шпеган, алпинист од Чешка, вчера го загубил животот откако, околу 12 часот, паднал од карпите кај тунелите кај Демир Капија, информираат од полицијата.

Алпинистот паднал качувајќи се со јаже по карпите десно во кањонот, во тунелите на секторот Малчек Спалчек и починал на самото место.


Ураганот Ирма на Флорида донесе паника и однесе една жртва


Мајами, 10 септември, 2017 - 17:16 (META) 

Ураганот Ирма стигна до Флорида, носејќи силни ветришта и обилни врнежи дожд. Центарот на ураганот ги погоди островите јужно од Флорида, а метеоролозите предупредуваат дека „најстрашното допрва следи“. Седум милиони луѓе беа посоветувани да се евакуираат.

Ирма повторно е ураган од категорија 4, а први се погодени островите на крајниот југ на Флорида, соопшти американскиот Национален центар за урагани. Во соопштението се истакнува дека на меѓународниот аеродром „Ки Вест“ се измерени ветришта од 80 километри на час.

Метеоролошката служба извести и дека над неколку населби се формираат торнада, што дополнително влеваат страв кај жителите.

Центарот на ураганот Ирма е над заливот Тампа и се движи кон север, а се очекува да продолжи и кон јужните држави Алабама и Џорџија. Синоптичарите велат дека вакво невреме е од историски размери и не е забележано во САД.

Локалните власти потврдија дека Ирма ја однела првата жртва на Флорида. На Ки Вест загинал маж во камионет, потврди полицијата. Тој најверојатно поради силниот ветер ја загубил контролата врз возилото и удрил во дрво.


Едно лице загина во сообраќајна несреќа кај село Злеово


Радовиш, 26 август, 2017 - 13:27 (META) 

Едно лице загина, а едно е тешко повреденo во сообраќајна несреќа што се случила ноќеска, 45 минути по полноќ на локалниот пат од село Злеово кон магистралниот пат Радовиш-Струмица, соопшти МВР.

Несреќата се случила откако патничко возило „рено-еспејс“, со струмички регистерски ознаки управувано од 29-годишниот П.П. излетало од патот при што на самото место починал 23-годишниот сопатник Т.В., а со тешки телесни повреди се здобил 19-годишниот Д.С. и двајцата од струмичкото село Владевци. Д.С. по укажаната лекарска помош во Медицинскиот центар-Струмица е пренесен во Ургентниот Центар-Скопје.

Возачот П.П. исто така од село Владевци, по сообраќајката го напуштил местото на настанот. Увид извршиле јавен обвинител и увидна екипа од полициска станица Радовиш, а телото на починатиот е дадено на обдукција.

Полицијата трага по возачот на возилото и работи на целосно расчистување на случајот.


Најмалку еден загинат и 32 повредени во терористичкиот напад во Барселона


Барселона, 17 август, 2017 - 20:13 (META) 

Најмалку едно лице загинало, а 32 се повредени, од кои 10 сериозно откако комби удри во група пешаци на улица во близина на плоштадот „Каталуња“ во центарот на Барселона, јавуваат светските медиуми.

Шпанската полиција потврдила дека инцидентот го третира како терористички напад.

Властите апелирале граѓаните да го избегнуваат тој дел од градот и да не ги напуштаат своите домови, а побарано е и затворање на трамвајските и на метро-страниците.

По нападот луѓето на плоштадот „Каталуња“, почнале да се засолнуваат во околните продавници и кафулиња.

Полицијата сè уште трага по возачот на комбито, кој побегнал откако удрил во групата луѓе на улицата Ла Рамбла.

Инаку, улицата Ла Рамбла и плоштадот „Каталуња“ се меѓу најпопуларните места во Барселона, кои дневно ги посетуваат илјадници турсти.

Шпанскиот премиер Мариано Рахој изјавил дека е во контакт со властите во Барселона и дека во моментов најважно е згрижувањето на повредените.

Американскиот државен секретар Рекс Тилерсон изјавил дека САД се подготвени да и помогнат на Шпанија.

„Заедно со сојузниците, САД се одлучи да ги пронајдат терористите и да ги изведат пред лицето на правдата“, изјавил Тилерсон.


Едно лице загина, а три се повредени во сообраќајка на патот Прилеп – Крушево


Прилеп, 2 јули, 2017 - 22:26 (META) 

Едно лице загина, а три се повредени во сообраќајна несреќа што денеска се случи на патот Прилеп – Крушево, во близина на селото Големо Коњари.

Несреќата се случила околу 19.15 часот, кога возилo, марка „венто“, од засега непознати причини, излетало од патот. Во несреќата на самото место починало 24-годишно момче од селото Славеј, Прилепско, а три лица со тешки повреди биле пренесени во прилепската болница.

Сообраќајот е во прекин, а полицијата врши увид на местото на несреќата.