Седум милиони луѓе годишно умираат поради изложеност на загаден воздух


Женева, 2 мај, 2018 - 12:47 (META) 

Приближно седум милиони луѓе секоја година умираат како последица на изложеност на загаден воздух, објави Светската здравствена организација.

Само загадениот воздух предизвикал 4,2 милиони смртни случаи во 2016 година, додека загадувањето на воздухот од несоодветни горива и технологии предизвикало 3,8 милиони смртни случаи во истиот период, наведува СЗО.

Бројките се на исто ниво со бројот на смртни случаи регистрирани во претходна студија објавена пред две години.

Според студијата на СЗО, нивото на загадување на воздухот останува опасно високо во многу делови од светот. Новите податоци покажаа дека девет од 10 луѓе дишат високо загаден воздух.

Повеќе од 90 проценти од смртните случаи поврзани со загадувањето на воздухот се јавуваат во земјите со низок и среден приход, главно во Азија и Африка, по што следат земјите со ниски и средни приходи од регионот Источна Медитеран, Европа и Америка.


Скопје го надмина годишниот ЕУ-лимит за аерозагадување уште во февруари


Скопје, 21 февруари, 2018 - 10:04 (META) 

И оваа година Скопје ги надмина годишните дозволени ЕУ граници за аерозагадување уште во февруари, што е показател дека еколошката и здравствена голгота на Скопјани продолжува и во 2018 година, информира групата „Скопје Смог Аларм“.

Како што објаснуваат екологистите, дозволената граница за концентрации на ПМ10 честички во просек во 24 часа е 50 микрограми на кубен метар. Во ЕУ, дозволениот број на надминувања на лимитите за PM10 честички е 35 денови во една календарска година.

„На 21 февруари 2018, овие ЕУ лимити се надминати на сите мерни станици во Скопје, освен Миладиновци, Општина Илинден“, велат од „Скопје Смог Аларм“.

Така, во однос на 35 пати дозволено пречекорување на нивото на загадување според стандардите на ЕУ, во Центар од почетокот на годинава се регистрирани 40 случаи на пречекорување, во Карпош 42  случаи, во Лисиче 47, на Гази Баба 45 и кај Ректоратот на УКИМ дури 54 пати.

„Апелираме до локалните и централните власти за итни и одржливи мерки за подобрување на воздухот во Скопје и низ цела Македонија. Воздухот во Скопје не смее да се користи како канализација на тешката индустрија и градежната индустрија. Мерки како дводневен бесплатен превоз се премали за еден од најзагадените градови во светот. Како за пример, Германија планира да воведе целосно бесплатен јавен превоз во пет најзагадени градови. Исто така, Кина ја ангажира армијата за да засади дрвја, најмногу во околината на главниот град Пекинг, и привремено затвори голем број на фабрики со цел да се намали загадувањето. Париз неколку пати воведе „ден без автомобили“ во центарот на градот“, порачува „Скопје Смог Аларм“.


Европската комисија во март ќе одлучува за земјите-членки со загаден воздух


Брисел, 13 февруари, 2018 - 10:43 (META) 

Европската комисија соопшти дека, од средината на март ќе се разгледува случајот со девет земји во кои состојбата со загадениот воздух се смета за најлоша во Европска Унија, и на кои, им се заканува судска постапка, пренесуваат светските медиуми.

Комисијата која е задолжена да обезбеди докази дека земјите-членки ги почитуваат заедничките правила за емисија на штетните гасови, им даде последна шанса на Германија, Шанија, Франција, Унгарија, Италија, Чешка, Романија, Велика Британија и Словачка на кои во петокот им истече рокот за доставување на дополнителни информации.

Тие земји, според извештаите на Европска комисија, редовно ја надминуваат границата на емисија на гасови, кои биле поставени со цел да се заштити здравјето на Европјаните од ПМ-10 честичките и азот диоксид.

И покрај постојаните предупредувања од Комисијата, наведените земји не ги ограничиле емисиите во согласност со прописите.

Комисијата одлучила против нив да покрене последна фаза постапка пред Европскиот суд на правдата, освен ако земјите не достават дополнителни ефикасни мерки.

Загадениот воздух се смета за причинител на повеќе од 400.000 предвремено починати во ЕУ. Во оваа статистика не влегуваат Европјаните кои добиле респираторни и кардиоваскуларни болести.


Инспекторатот со дрон го снимал и следел дивото фрлање и палење отпад


Скопје, 1 февруари, 2018 - 11:23 (META) 

На подрачјето на Скопје состојбата со загадениот воздух е веќе под прагот на алармирање, извести Државниот инспекторат за животна средина на својата Фејсбук страница, повикувајќи се на податоците од Државниот автоматски мониторинг систем за квалитет на воздухот од 31 јануари.

„Се прекинува епизодата за надминување на прагот за алармирање за две мерни места во Скопје Лисиче и Ректорат за два последователни дена, бидејќи концентрациите за PM10 се под дефинираниот праг согласно легислативата“, соопшти Инспекторатот.

Оваа институција вчера вршела набљудување со изнајмен дрон над местата од кои може да се создава загадување на воздухот и откривање на прекршителите.


Јавниот превоз од денеска повторно е бесплатен, поради загадениот воздух


Скопје, 30 јануари, 2018 - 11:31 (META) 

Градот Скопје од денеска воведува бесплатен јавен превоз во автобусите на ЈСП и на приватните превозници, а мерката ќе трае се до моментот на намалување на загадувањето.

Мерките се преземаат по добиеното известување од Министерството за животна средина и просторно планирање дека прагот на алармирање за ПМ-10 честичките во воздухот е надминат во текот на два дена последователно, односно над 200 микрограми на кубен метар воздух.

Градот Скопје ги прекинува сите градежни активности на градилиштата под своја надлежност и ги повикува сите градоначалници да го сторат истото. Од таму најавуваат дека ќе ја интензивираат контролата на градилиштата.

Град Скопје бараат од МВР да ги зајакне контролите за почитување на забраната за движење тешки товарни возила чија што крајна дестинација не е градот, а кои се упатуваат да ја користат скопската обиколница. Од МВР исто така се бара да врши зачестени контроли на издувните гасови на возилата што учествуваат во сообраќајот, како и ограничување на обуките на автошколите од 9.30 до 14.30 и по 18 часот.

Градоначалниците на општините во Градот Скопје се повикуваат да ги интензивираат инспекциските надзори над субјектите кои управуваат со отпадни гуми и отпадни масла.

„Градот Скопје, исто така, апелира до граѓаните да не ги користат возилата без потреба, повеќе лица да се возат во едно возило, да се користи јавниот превоз и тоа да премине во навика без разлика на загадувањето. За затоплување на домовите да не се користат отпадни материјали, прегорено машинско масло, лакирани и обоени отпадоци од дрво, стиропор, ПЕТ амбалажа, гуми и каков било синтетички материјал, да се користи суво и чисто дрво без примеси од земја и од отпадоци, а печките на дрво да се користат и одржуваат според упатствата на производителот“ се вели во соопштението на Град Скопје.


На протестот против загадувањето на воздухот само педесетина луѓе


Скопје, 14 јануари, 2018 - 21:42 (META) 

Од вчера најавените помалку од 600 луѓе на настанот на Фејсбук, денеска пред Владата на Република Македонија се појавија педесетина луѓе за да протестираат против загадувањето на воздухот.

„Вие и вашите деца дишете ли друг водух?“ „Чист воздух – здрави деца“ беа само дел од транспарентите изложени пред владата. Присутните се разочарани од одзивот на протестот и порачаа граѓаните да бидат гласни сите денови, а не само во деновите на преголема загаденост.

Луѓето што протестираа денеска велат дека досегашните владини мерки се само декорации, а не и трајни решенија за борба со ПМ10 и ПМ2,5 честичките.


Бујароска: Од Владата очекувавме повеќе против загадувањето


Скопје, 14 јануари, 2018 - 16:29 (META) 

Посериозно почна да се решава проблемот со загадувањето, но не со брзината со која очекувавме да се остварат барањата нa еколошките организации, вели Александра Бујароска од Фронт 21/42, во неделното интервју на Радио Слободна Европа.

За печката за медицински отпад на депонијата „Дрисла“ таа вели дека во времето кога е инсталирана одговарала и на европските норми, но проблемот е што цели 17 години не е направена нејзина преправка за да одговара на нормите.

-Во 2001 кога оваа печка е дел од системот на Дрисла, важеле малку поинакви правила во однос на животната средина. Она што е важно е дека од 2005-2006, со усогласување на нашето законодавство со законодавството на Европската унија, оваа инсталација имала обврска да ја усогласи својата технологија со најдобрите технологии од областа на согорување на отпадот. Уште во 2013 е издадена дозволата за усогласување со оперативен план, односно еколошка дозвола. Тоа што е страшно е што од тогаш до денес операторот, односно сопственикот на Дрисла не исполни ниту една од мерките за намалување на загадувањето – вели Бујароска.

Таа вели дека не се одвиваат според очекувањата владините чекори за подобра животна средина.

-Можам да кажам дека посериозно почна да се решава проблемот, но сепак не со онаа брзина и со остварување на оние барања што ние ги имавме како граѓански сектор генерално, и не зборувам само за нашата организација, туку и за другите кои дадоа придонес за решавање на проблемот со загадувањето, ние очекувавме многу повеќе – вели Бујароска.


Протест пред Влада утре поради загадениот воздух


Скопје, 13 јануари, 2018 - 17:45 (META) 

Нов протест против загадениот воздух ќе се одржи утре напладне пред Владата на Република Македонија. Зад протестот стојат граѓани организирани преку социјалните мрежи.

„Британската влада во 2000 ни подарила согорувач за медицински отпад, кој не ги задоволува ЕУ-стандардите и не дава заштита од отровите при согорувањето. Овој согорувач не ги филтрира гасовите и токсините кои предизвикуваат рак и многубројни други нарушувања“, пишуваат организаторите во најавата за настанот на Фејсбук.

Засега бројот на пријавените е околу 250, па можно е да помине како претходниот протест кога се појавија само стотина луѓе иако своето учество го најавија неколку илјади, или како на последниот организиран пред околу две седмици, кој беше откажан пред да се одржи.


ДОМ бара нова опрема за уништување на отпадот во Дрисла


Скопје, 10 јануари, 2018 - 13:54 (META) 

Демократската обнова за Македонија (ДОМ) смета дека поради загадениот воздух, потребни се интервентни набавки на опрема за уништување медицински и друг биолошки отпад во Дрисла, пречистувачи на воздух, апсорбери на чад од оџаци на домаќинствата, филтри на индустриски оџаци и слична опрема.

Од таму потсетуваат дека финската студија за загадувањето на воздухот во скопскиот регион од 2016 година покажа дека извори се загревањето на домаќинствата (32 отсто ), сообраќајот (20 отсто), градежништвото (19 отсто) и индустријата (18 отсто).

„Затоа од денес до крајот на февруари да важат итните мерки пар- непар, за да биде поефикасен бесплатниот јавен превоз, забрана за тешки товарни возила низ град, забрана за возила под стандард „еуро 4“, затворање на градилиштата, преполнување на производството или затварање на загадувачки погони“, се вели во соопштението на ДОМ.

Во него се додава дека е потребно редовно собирање на отпадот, редовно миење на улиците и зголемени инспекциски контроли на општинските и државните инспектори за животна средина.


ССМ: На отворено да се работи до 17 часот и да се зголемат контролите на градилиштата


Скопје, 9 јануари, 2018 - 10:23 (META) 

Сојузот на синдикатите на Македонија (ССМ) бара да се почитуваат мерките на Владата за заштита од загадениот воздух што почнаа вчера. Лицата на отворено да работат од 11 до 17 часот, да се зголемат инспекциските контроли на градилиштата и да се ограничи до 50 отсто употребата на службените возила.

Според ССМ, секоја институција треба да дејствува во својот домен.

– Министерствата за животна средина и за здравство се должни да ги oслободат од работни обврски бремените жени, лицата постари од 60 години, лицата со хронична астма, со прележан инфаркт или мозочен удар, без разлика на возраста, да ја спроведат забраната за одржување спортски натпревари и други манифестации на отворено, како и да обезбедат услови за зголемени активности на службата за брза помош, домашната посета и патронажната служба, наведува ССМ во денешното соопштение.

Синдикатот потсетува дека МВР треба да ги спроведе Одлуката и контролата на веќе воведениот сообраќаен режим за тешки товарни возила чија крајна дестинација не е Скопје, да се користи обиколницата, а општините се должни да ги реализираат издавањето на одобренијата за дотур на роба во забранети зони за сообраќај со важност до 7.30 часот.

„Градежните компании имаат обврска да користат вода за намалување на прашината при градежни активност, а градежните машини (багери, булдожери, виљушкари) да се пренесат до градилиштата до 7:30 часот наутро“, додаваат од ССМ.