!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Врховниот суд на САД делумно ја врати на сила забраната за влез на државјани од шест земји


Вашингтон, 26 јуни, 2017 - 21:44 (META) 

Врховниот суд на САД врати на сила дел од извршната наредба на американскиот претседател Доналд Трамп, со која им се забранува влез во земјата на државјани на шест муслимански земји.

Ваквиот исход следува откако највискиот суд во САД денеска оспори дел од одлуките на пониските судови во земјата, кои претходно ја поништија наредбата на американскиот претседател.

Трамп ја поздрави одлуката на Врховниот суд, нарекувајќи ја чиста победа на националната безбедност.

Врховните судии одлучија во октомври повторно да ја разгледаат наредбата на Трамп и да донесат конечна пресуда дали забраната ќе биде целосно вратена во сила или, пак, ќе биде укината.

Трамп на 27 јануари потпиша извршна наредба со која на 90 дена им се забранува влезот во САД на државјани на Иран, Ирак, Либија, Сомалија, Судан, Сирија и на Јемен. Со истата наредба им се забранува влез во САД на сите бегалци во период од 120 дена. По масовните протести, на 6 март Трамп објави ревидирана верзија на извршната наредба во која Ирак беше исклучен од забраната и беа отстранети дел од прописите во наредбата кои не беа во согласност со федералните закони на САД.

Трамп претходно изјави дека забраната ќе стапи на сила 72 часа откако Врховниот суд ќе ја донесе одлуката.


Поради лошото време, забранет e влезот на камиони во Грција на преминот Евзони


Гевгелија, 11 јануари, 2017 - 11:01 (META) 

На тешките товарни возила кои транзитираат меѓу Македонија и Грција, преку граничните премини Богородица и Евзони не им се дозволува влез во Грција поради лошите временски услови и состојбата на патиштата. Вакво известување утрово добиле македонските полициски служби на граничниот премин Богородица од своите колеги на преминот Евзони, од грчката страна на границата.

Поради забрната за влез, како што информираат од МВР, во граничниот меѓупростор, за влез во Грција чекаат околу 70 товарни возила.

„Министерството за внатрешни работи ги известува граѓаните дека утринава (11 јануари 2017 година) остварен е контакт помеѓу раководител на смена на полициската станица за граничен премин и граничен надзор Богородица со раководител на смена на граничниот премин Евзони во врска со застој при влез во Грција за товарен сообраќај. Од страна на грчките полициски службеници добиено е известување дека од 2 часот, не им се дозволува на тешките товарни возила влез во Грција поради лошите временски услови и состојбата на патиштата“, стои во соопштението од МВР.


Израел привремено го забрани влезот за сите Палестинци на нејзина територија


Ерусалим, 10 јуни, 2016 - 11:37 (META) 

Израелската војска денеска соопшти дека привремено им го забранува влезот на сите Палестинци во Израел, со што ги заостри мерките што властите ги воведоа откако вооружени напаѓачи завчера вечерта убија четири лица во Тел Авив.

Портпаролката на израелската војска, пренесуваат светските агенции, изјавила дека во согласност со владините директиви и со проценката на моменталната ситуација, од денеска премините од Појасот Газа, Јудеа и во Самарија ќе бидат отворени за Палестинците само во случај на потреба од медицинска и од хуманитарна помош.

Забраната за влез во Израел, според информациите, ќе биде на сила до недела на полноќ.

Израел вчера соопшти дека ги суспендирал дозволите за влез на нејзина територија за 83.000 Палестинци за време на светиот муслимански месец Рамазан, по пукањето во Тел Авив.

Во нападот, кој, како што е соопштено, го извеле Палестинци, беа убиени четири лица, а седум беа ранети.

Шефот на полицијата во Тел Авив, Моше Едри, изјави дека двајцата напаѓачи се членови на исто семејство од палестинското село Јата, во близина на Хеброн на Западниот Брег, кој беше жариште на неодамнешниот бран насилства.