Прв случај на западнонилска треска во Грција по две години


Атина, 19 јули, 2017 - 11:58 (META) 

Грчкиот центар за контрола и за превенција на болести соопшти дека во Грција е потврден првиот случај на човек заразен со вирусот на западнонилската треска. Во минатата година и во 2015 година во Грција немало случаи на заболени луѓе.

Станува збор за лице кое живее во земјоделската област Арголида, на Пелопонез.

Од Центарот за контрола и превенција соопштија дека не е можно да се предвиди каде може да се појави вирусот, советувајќи ги жителите и туристите да се заштитат од комарци, кои ја пренесуваат болеста. Во Грција западно-нилската треска првпат се појави во 2010 година, кога заболеа 262 лица, од кои 35 починаа.


Прв случај на вирусот зика во Русија


Москва, 15 февруари, 2016 - 12:06 (META) 

Првиот случај на заразен со вирусот зика е регистриран во Русија, јавува новинската агенција ТАСС.

Заразеното лице веќе е хоспитализирано на клиника за инфектологија, а здравствената состојба му е задоволителна. Членовите на семејството на хоспитализираниот не се заразени.

Руските медиуми јавуваат дека заразениот претходно бил на одмор во Доминиканската Република.


Ученик од скопска гимназија заболел од туберкулоза


Скопје, 10 декември, 2015 - 21:34 (META) 

Ученик од трета година во средното училиште „Зеф Љуш Марку“, во скопската населба Бутел, од понеделник е на болничко лекување во Институтот за ТБЦ, откако му била дијагностицирана туберкулоза, пренесува порталот „Здравство 24“.

Од Здравствен дом Скопје за порталот соопштиле дека во согласност со законските прописи, било испратено писмо до училиштето во кое било побарано соучениците на заболеното момче да дојдат во диспанзерот и да направат контрола.

Инкубацискиот период на болеста е шест недели.

Како што пренесува „Здравство 24“, по откривањето на случајот, скопскиот центар за јавно здравје и државниот санитарен и здравствен инспекторат направиле увид во училиштето, каде не нашле забелешки, но препорачале повеќе проветрување и одржување на личната хигиена. Денеска била направена и дезинфекција во училиштето.

Оваа година се регистрирани два случаи на туберкулоза во образовни установи.