Снежните врнежи до понеделник ќе престанат, најмногу наврнало на Маврово


Скопје, 11 јануари, 2019 - 10:02 (META) 

Сообраќајот на државните патишта се одвива во зимски услови, по влажни коловози, наместа со остатоци од снег на коловозот. Врнежи од снег со променлив интензитет се бележат во Тетово, Попова Шапка, Маврово и Дебар.

Намалена видливост поради појава на магла до 100 метри има на планинскиот превој Стража, соопшти Автомотосојузот на Македонија (АМСМ).

Забрана за движење на тешки товарни возила има на патните правци крак Маврово – Дебар, Гостивар – Кичево преку планинскиот премин Стража, Кичево – Охрид преку планинскиот премин Пресека, Струга – граничен премин Ќафасан и  Тетово – Попова Шапка,  каде забраната важи и за автобуси, а за останатите возила е задолжително користење на зимска опрема.

Снеготот што во изминатите денови интензивно паѓаше, во Маврово формира покривка од 95 см, на Попова Шапка 50, во Крушево 44, а во Скопје 12 сантиметри.


Сончево со умерена облачност и слаб снег


Скопје, 11 јануари, 2019 - 9:44 (META) 

Времето денеска ќе биде сончево со умерна облачност и со слаб до умерен северен ветер. Претпладне во западните делови ќе има услови за слаб снег.

Утринската температура ќе се движи од минус девет до минус два, а дневната од минус четири до три Целзиусови степени.

Во Скопје слично време, сончево со умерена облачност и со слаб до умерен северен ветер. Утринската температура ќе се спушти до минус седум, а дневната ќе достигне до еден степен.

Од утре попладне до недела времето ќе биде стабилно и суво со ниски утрински температури и со услови за магла по котлините. Во понеделник во текот на денот ќе има нови врнежи од снег со слаб до умерен интензитет.


Снежните врнежи го отежнаа сообраќајот, забрана за камиони на неколку патни правци


Скопје, 10 јануари, 2019 - 9:51 (META) 

Студениот бран со снежни врнежи што ја зафати Македонија, го отежна одвивањето на сообраќајот, но засега без застои и посериозни проблеми.

Врнежи на снег со променлив интензитет има на целата територија, а поради ниските температури можна е и појава на голомразица, информира Автомотосојузот на Македонија (АМСМ).

Забрана за движење на тешки товарни возила има на патните правци Маврово – Дебар, Гостивар – Кичево, преку планинскиот премин Стража, Кичево – Охрид, преку планинскиот премин Пресека, планинските премини Ѓавато и Буково, Струга – граничен премин Ќафасан, патот Прилеп-Македонски Брод на планинскиот премин Барбарос како и на патниот правец Тетово – Попова Шапка, каде забраната важи и за автобуси, а за останатите возила е задолжително користење на зимска опрема, синџири.

Сообраќајот на патниот правец Велес-Штип, кој претходно се одвиваше отежнато и беше забранет за сообраќање на тешки товарни возила, е нормализиран.

Дирекцијата за заштита и спасување апелираше до градоначалниците и општините да ги преземат сите неопходни мерки за расчистување на снегот и снежните наноси, заради нормално одвивање на сообраќајот и заштита на населението согласно обврските од Законот за заштита и спасување.

Најмногу снег има во Маврово 73 см, на Попова Шапка 40 и во Крушево 39 см.


Снежните врнежи продолжуваат, ќе дува умерен северен ветер


Скопје, 10 јануари, 2019 - 9:38 (META) 

Времето денеска ќе биде облачно со врнежи од снег, повеќе во западните и северните делови. Снежната покривка во овие делови дополнително ќе се зголеми за 10 до 20 сантиметри. Ќе дува слаб до умерен ветер од северен правец.

Утринската температура ќе се движи од минус шест до еден, а дневната од минус четири до три Целзиусови степени.

Во Скопје слично време, облачно со врнежи од снег. Ќе дува слаб до умерен ветер од северен правец. Утринската температура ќе се спушти до минус пет, а дневната ќе достигне до минус еден степен.

Од петок до недела времето ќе биде стабилно и суво со ниски утрински температури и со услови за магла по котлините.


Сончево и студено време, од утре нови обилни врнежи од снег


Скопје, 8 јануари, 2019 - 9:27 (META) 

Времето денеска ќе биде сончево и студено време со мала до умерена облачност. Утрото ќе биде ведро и студено со многу ниски температури, кои во целата земја ќе се спуштат под минус 10 Целзиусови степени, а во Пелагонија и Малешевијата и до минус 18 Целзиусови степени.

Дневните температури скоро насекаде ќе бидат под нула. Утринската температура ќе се движи од минус осум до минус 12 Целзиусови степени, а дневната температура ќе се движи од минус еден до два Целзиусови степени.

Во Скопје ќе биде сончево и студено со мала до умерена облачност. Утринската температура ќе достигне до минус 11 Целзиусови степени, а дневната температура до минус еден Целзиусов степен.

Под влијание на влажен и студен бран, во среда и во четврток претпладне ќе има нови пообилни врнежи од снег, особено во западните делови.

Потоа следува период на стабилно и суво време повторно со ниски утрински температури, а дневните ќе бидат во благо покачување.


Претпладне променливо облачно, попладне врнежи од снег


Скопје, 2 јануари, 2019 - 10:26 (META) 

Времето претпладне ќе биде сончево со мала облачност. Попладне облачноста ќе се зголеми и почнувајќи од запад ќе има врнежи од снег, кои во текот на ноќта ќе се прошират насекаде низ земјава. Ќе дува умерен северен ветер. Максималната температура ќе биде во интервал од 3 до 9 Целзиусови степени, соопшти УХМР.

Во Скопје претпладне сончево со мала до умерена облачност, попладне облачно, а кон крајот на денот и во текот на ноќта со повремени врнежи од снег. Ќе дува умерен северозападен ветер. Максималната температура ќе достигне околу 5 степени.

Утре ќе биде облачно со врнежи од снег, особено претпладне, а пообилни врнежи ќе има во западните и јужните делови од земјава. До крајот на денот насекаде ќе се формира нова снежна покривка, на западот и југот околу 10 сантиметри, на планините и над 20 сантиметри, а најмала во североисточните делови (околу 5 см или помала). Поради засилениот северен ветер утре можна е појава на снежни наноси.


Стабилно и суво време за новогодишната ноќ, со локални слаби врнежи од снег


Скопје, 31 декември, 2018 - 9:28 (META) 

Времето денеска ќе биде претежно облачно со повремени слаби локални проврнувања од снег. Ќе дува слаб до умерен ветер претежно од северозападен правец, повеќе ќе биде изразен на повисоките места и на планините.

Во новогодишната ноќ ќе преовладува претежно стабилно и суво време, локално се можни слаби проврнувања од снег, особено на планините. Максималната температура ќе биде во интервал од 2 до 8 Целзиусови степени.

Во Скопје претежно облачно со повремени проврнувања на слаб снег. Максималната температура ќе достигне 6 Целзиусови степени.

Утре ќе се задржи суво и ветровито време. Од среда кон крајот на денот се очекува ново наоблачување проследено со врнежи од снег кои ќе продолжат и во четврток.


Облачно време со услови за врнежи на замрзнат дожд и снег


Скопје, 21 декември, 2018 - 9:34 (META) 

Времето денеска ќе биде променливо облачно со слаби врнежи од дожд и снег, а ќе има и услови за појава на замрзнат дожд. Повеќе врнежи ќе има во западните и југозападните делови. По одделни котлини ќе има услови за појава на магла.

Утринската температура ќе се движи од минус еден до еден степен, а дневната температура од три до девет степени.

Во Скопје ќе биде променливо облачно со слаби врнежи од дожд и снег.

Утринската температура  до минус четири степени, а дневната темпереатураќе достигне до три степени.

Потоа до понеделник ќе биде стабилно и суво со пораст на температурата, а по одделни котлини ќе има услови за појава на магла. Нов влажен бран ќе има во понеделник кон крајот на денот и во вторник.


Сончево и ветровито време со температура до 6 степени


Скопје, 19 декември, 2018 - 9:40 (META) 

Претпладне времето ќе биде со умерена облачност, а од пладне претежно сончево со мала до умерена облачност и со слаб до умерен северен ветер. Максималната температура ќе биде во интервал од 1 до 6 Целзиусови степени.

Во Скопје, времето претпладне со мала до умерена облачност, а од пладне облачноста ќе се намали и ќе преовладува сончево време. Ќе дува слаб до умерен северен ветер. Максималната температура ќе достигне до 4 Целзиусови степени.

Следува период на претежно стабилно време со пониски утрински температури, кои насекаде ќе се спуштат под нула. Повремено по котлините ќе има услови за појава на магла, особено утре и за време на викендот. Утре кон крајот на денот ќе се зголеми облачноста од запад и в петок претпладне ќе има повремени врнежи, претежно од дожд, на пониските места.


Поради снежните врнежи, забрана за тешки товарни возила на неколку патни правци


Скопје, 18 декември, 2018 - 10:02 (META) 

Сообраќајот на државните патишта се одвива по влажни коловози, на некои повисоки места во северозападните делови, југозападните и источните делови од државата со остатоци од кашест снег на коловозот.

Забрани за сообраќај за тешки товарни возила има на патните правци крак Маврово – Дебар, Гостивар – Кичево преку планинскиот превој Стража како и на патниот правец Тетово – Попова Шапка кои се уште се на сила.

АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде се бележи појава на утринска магла, а исто така зголемена е и можноста од појава на одрони. На осојничавите места коловозите се наместа влажни, па поради ниските температури карактеристични за вечерните и утрински часови постои можност и од појава на голомразица.