!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Сончево и топло време, попладне облачноста ќе се зголемува


Скопје, 11 септември, 2017 - 9:07 (META) 

Времето денеска ќе биде претежно сончево и топло, со натпросечна дневна температура на повеќе места во земјава. Утринската температура ќе се движи од 8 до 16 Целзиусови степени, а дневната од 26 до 35 степени. Вредноста на УВ-индексот ќе изнесува 7.

Во Скопје се очекуава слично време. Утринската температура ќе се спушти до 12 Целзиусови степени, а дневната ќе се искачи до 35 степени.

Под влијание на нов влажен бран, попладне, почнувајќи од запад, облачноста ќе се зголемува, а кон крајот на денот и во вторник претпладне повторно на повеќе места ќе има поројни дождови и грмежи. Локално се очекува процесите да бидат и поинтензивни, особено во западните делови од земјата. Ќе дува и засилен јужен ветер.


Сончево и многу топло време, на некои места со температура и повисока од 40 степени


Скопје, 2 август, 2017 - 10:04 (META) 

Времето денеска во Македонија ќе биде сончево и топло, со слаб до умерен североисточен ветер. Утринската температура ќе се движи од 11 до 20 Целзиусови степени, а дневната од 32 до 39 Целзиусови степени.

Во Скопје се очекува слично време. Утринската температура ќе достигне до 19 Целзиусови степени, а дневната до 39 степени.

Во поголем дел од земјава максималната температура ќе достигнува и повеќе од 35 Целзиусови степени, а на места долж Повардарието ќе надмине и 40 степени. УВ-индексот ќе биде многу висок со вредност 9.


Истражување: Во Македонија германската плата вреди двојно повеќе


Диселдорф, 4 јануари, 2017 - 12:41 (META) 

Македонија и другите земји долж балканската магистрала (Србија, Босна и Херцеговина, Албанија и Црна Гора) се најевтини за живот и во нив германски државјанин за истите пари што во својата земја ги троши за основни работи, може да добие двојно повеќе. Ова го покажува обемното истражување на Институтот за економски и општествени науки од Диселдорф, кој ги анализирал статиските на Европскиот завод за статистика (Евростат), националните заводи за статистика за да ги спореди трошоците за живот во 37 европски земји, САД и во Јапонија, пренесува „Дојче веле“.

Целта на истражувањето била да одговори на прашањата на германските граѓани како што се: Колку моите пари вредат во странство?; Каде се најевтини подароците за празници?; Во која земја можам да одам на одмор за најмалку пари?

Кога станува збор за трошоците за живот – станарина, сметки, храна, облека, трошоци за автомобил, образование, забава, според истражувањето, германската плата најмалку вреди во Швајцарија, а нејзината вредност е двојно поголема во Македонија, Србија…

Според методологијата, ако на германското евро му се даде индекс 100, тогаш Швајцарија има индекс 158,5, што значи дека оваа земја е за 58,5 отсто поскапа во однос на Германија. Покрај Швајцарија, меѓу најскапите се Исланд (со индекс 147,8), Норвешка (141,8), Данска (136,7), Ирска (121,4), Финска (119,7), Луксембург (119,2) итн.

Македонија спаѓа меѓу најевтините земји, каде германската заработувачка има вредност повеќе од половина од својата вредност. Македонското „евро“, според диселдорфскиот институт, има индекс 45,3, односно Македонија е за 54,7 отсто поевтина земја од Германија. Србија има индекс 48,5, Словенија – 79,9, Хрватска – 65,6, Црна Гора – 55,4, Босна и Херцеговина – 50, Албанија – 48,2 и Бугарија 46,1.

Во истражувањето нема податоци за можеби најсиромашните земји во Европа – Косово и Молдавија.

Нордиските земји и Швајцарија се најскапи и кога станува збор за цените во хотелите и во рестораните, додека од балканските земји, овие услуги се најевтини во Македонија и во Албанија, кои имаат идентичен индекс – 41,8.

Според достапните податоци, што ги пренесува „Дојче веле“, просечната заработувачка на вработен во Германија, кој работи со полно работно време е околу 2.200 евра, со одбиени даноци, здравствено и социјално осигурување.

Во Македонија просечната месечна нето-плата, според последните пресметки на Дражавниот завод за статистика за октомври е 22.460 денари, односно 365 евра.


Девизните резерви во ноември се намалени за 177,6 милиони евра во однос на октомври


Скопје, 9 декември, 2016 - 10:42 (META) 

Нивото на државни девизни резерви во ноември изнесува 2.551,4 милијарди евра и се намалени за 177,6 милиони евра во однос на октомври, кога изнесувале 2.729 милијарди евра, покажуваат најновите податоци на Народна банка.

Вредноста на девизните резерви во ноември првпат падна по четиримесечен континуиран пораст.

Во ноември е забележан и пад кај вредноста на монетарното злато за 9,7 милиони евра, кое достигна вредност од 248,3 милиони евра.


По победата на Трамп, вредноста на доларот почна да се зголемува


Вашингтон, 16 ноември, 2016 - 14:55 (META) 

Трговците со валути сметаат дека постојат 45 проценти шанси за вредноста на доларот спрема еврото да се зголеми на еден долар до крајот на идната година, пишува „Блумберг“.

Пазарот денеска се потпира на ветувањето на новиот американски претседател Доналд Трамп дека ќе ги намали даноците и дека ќе ја зајакне потрошувачката. Тоа би требало да го зголеми економскиот пораст, а тоа на крајот би довело до побрзо зголемување на каматните стапки на централната банка.

Аналитичар во „Дојче банка“, која е четврти најголем трговец со валути во светот, предвидува дека курсот ќе се зголеми на 1,05 долари за едно евро, а до крајот на следната година едно евро би можело да чини 95 центи.

На тој начин еврото во однос на доларот би било најслабо од 2002 година.


Опозицијата ги злоупотребува аукциите на државни записи за пропагандни цели


Скопје, 8 ноември, 2016 - 16:48 (META) 

„Со пласирање невистини и полувистини во јавноста, опозицијата ги злоупотребува аукциите на државни хартии од вредност во пропагандни цели. Доказ за тоа е што и дополнителниот заменик-министер за финансии Наумов и одредени медиуми, во настојувањето да прикажат дека државата се задолжува, испуштија да споменат дека вчера во стопанството се вратени 12,2 милиони евра врз основа на државни хартии од вредност“, се вели во реакцијата на Министерството за финансии на соопштението на дополнителниот заменик-министер за финансии, Кире Наумов.

– Секаде во светот економиите издаваат државни хартии од вредност и тие се значаен дел од пазарот на капитал. Доколку опозицискиот СДСМ смета дека овој фискален инструмент е негативен, тогаш зошто го вовеле во 2004 година и организирале аукции – се вели во соопштението на Министерството за финанасии.

Оттаму велат дека државните хартии од вредност се најсигурни хартии од вредност на пазарот на капитал и затоа и побарувачката за нив е голема.

– Големата побарувачка од страна на инвеститорите е доказ за нивната доверба во домашната економија и во економските политики што се спроведуваат од Владата. Сите средства од нето-повлекувањето со државни хартии од вредност остануваат на депозитната сметка – се додава во соопштението.


Компаниите извршиле градежни работи во странство во вредност од 15 милиони евра


Скопје, 25 август, 2016 - 14:11 (META) 

Во првите шест месеци од годинава, вкупната вредност на договорените градежни работи во странство изнесува 2.583.557.000 денари (42.009.056 евра) што е за 21,7 отсто помалку во споредба со истиот период од претходната година, објави Државниот завод за статистика.

Во овој период, градежната оператива од Македонија во странство извршила градежни работи во вкупна вредност од 961.396.000 денари (15.632.455 евра) што е за 11 проценти помалку во споредба со истиот период од претходната година.

Во истиот период е забележан зголемен обем на извршените градежни работи во Косово, Србија, Босна и Херцеговина и во Германија, додека на другите пазари е регистриран намален обем.


ВМРО-ДПМНЕ: Средствата од ДХВ се за финансирање на редовните расходи од буџетот


Скопје, 3 мај, 2016 - 17:02 (META) 

„Уште во 2003 година, тогашниот министер за финансии има донесено стратегија за развој на пазарот на државни хартии од вредност, во која се вели дека државните хартии од вредност (ДХВ) ќе ѝ помагаат на Владата за поефикасно финансирање на буџетскиот ликвидносен јаз кој е детерминиран од временската неусогласеност на јавните приходи и расходи, односно буџетскиот дефицит, и истовремено за поддршка на развојот на финансиските пазари. Во стратегијата се наведува и дека овој начин на финансирање на буџетскиот дефицит е многу поевтин и помалку ризичен на надворешни шокови и на финансиски кризи“, се вели во реакцијата на ВМРО-ДПМНЕ на соопштението на дополнителниот заменик-министер за финансии во оставка, Кире Наумов.

Во него се додава дека СДСМ се обидува „по секоја аукција на државни хартии од вредност да манипулира со јавноста и да нанесе штета“.

– Ние уште еднаш ќе истакнеме дека средствата од државните хартии од вредност се користат за финансирање на редовните расходи предвидени во буџетот кој е изгласан од Собранието и ако нешто имаа да кажат од СДСМ, требаше да кажат кога се гласаше буџетот – се вели во реакцијата на ВМРО-ДПМНЕ.


Вредноста на договорените градежни работи помала за 52,7 проценти во однос на 2014 година


Скопје, 15 февруари, 2016 - 14:45 (META) 

Вкупната вредност на договорените градежни работи во странство изнесува 55.481.121 евро, што е за 52,7 отсто помалку во споредба со истиот период од претходната година, објави Државниот завод за статистика.

Во наведениот период, градежната оператива од Македонија во странство извршила градежни
работи во вкупна вредност од 43.354.715 евра, што е за 136,7 проценти повеќе во споредба со истиот период од претходната година.

Во истиот период е забележан зголемен обем на извршените градежни работи во Хрватска, Италија, Србија, Босна и Херцеговина и во Холандија, додека на другите пазари е регистриран намален обем.

Како нови пазари се јавуваат Полска, Словенија, Малта и Грција.


Вредноста на договорените градежни работи помала за 53,3 проценти во однос на лани


Скопје, 13 ноември, 2015 - 15:28 (META) 

Вкупната вредност на договорените градежни работи во странство од јануари до септември годинава изнесува 3.286.333.000 денари, што е за 53,3 проценти помалку во споредба со истиот период од лани, објави Државниот завод за статистика.

Во истиот период е забележан зголемен обем на извршените градежни работи во Косово, Албанија, Италија,Србија, Хрватска, Босна и Херцеговина и во Холандија, додека на другите пазари е регистриран намален обем.

Како нови пазари се јавуваат Полска, Словенија и Грција.