Царовска: Високи 95 отсто искористеност на Оперативниот план за вработување лани


Скопје, 23 јануари, 2019 - 12:22 (META) 

Оперативниот план за активни програми и мерки за вработување и услуги на пазарот на трудот за 2018 година има високи 95 проценти реализација, информираше министерката за труд и социјална политика Мила Царовска. Со него биле опфатени вкупно 6,374 лица, од кои 3.359 или 53 проценти млади лица до 29 години.

Царовска како посебно значајна ја потенцираше вклученоста на жените во активните програми и мерки кои водат до намалување на невработеноста и зголемување на вработливоста.

„Оперативниот план за активни програми и мерки за вработување и услуги на пазарот на трудот за 2018 година претставува одличен пример за родова еднаквост, во него 54 проценти односно 3.456 лица од учесниците во активните програми и мерки за вработување беа жени, што за нас претставува посебен успех и голем придонес за поголема инкузивност на жената на пазарот на трудот“, изјави Царовска.

Директорката на Агенцијата за вработување, Билјана Јовановска информираше дека преку учество во програмата Самовработување, сопствен бизнис отвориле 1.191 лица, мерката Субвенционирање на плати овозможила да се вработат 759 лица, а преку учество во мерката Вработување и раст на правни субјекти биле вработени 347 лица.

Голем интерес имало и за обуките за стекнување на вештини кои се барани на пазарот на трудот, наменети за доквалификација на невработените лица.

Една од најбараните била програмата Практиканство и во неа се вклучиле 1.263 невработени лица до 34 годишна возраст. Одлични резултати покажала и програмата Општинско-корисна работа, во која учествувале 703 лица, кои обезбедуваат социјални услуги во 56 општини во државата, најмногу како образовни и лични асистенти.

Носител на Оперативен план за активни програми и мерки за вработување и услуги на пазарот на трудот 2018 е Министерството за труд и социјална политика, а имплементатор е Агенцијата за вработување. За негова реализација биле потрошени 975.240.683 денари.


Новогодишна поплава од огласи за вработување во државните институции


Скопје, 18 декември, 2018 - 12:19 (META) 

Од почетокот на декември, годинава речиси и да нема ден во кој не е објавен оглас за вработување во државните институции и јавните претпријатија. Се вработуваат државни службеници преку огласи што ги објавува Агенцијата за администрација, но и различни профили работници и раководители во огласи кои ги објавуваат самите претпријатија и институции.

Меѓу другите, Агенцијата за администрација објави оглас за вработување на 15 државни службеници во Владата на Република Македонија – Генерален секретаријат. Се бараат кандидати за следните работни места: виш соработник за поддршка од областа на правото, помлад соработник за оперативна поддршка, советник за поддршка на генералниот секретар на Владата, помлад соработник за логистичка поддршка за имплементирање на препораките на Државниот завод за ревизија, виш соработник за организациона поддршка.

Агенцијата за администрација исто така објави оглас за вработување на 10 државни службеници во Министерството за труд и социјална политика. Во огласот се бараат заинтересирани за вработување како помлад соработник за буџетска анализа, советник за имплементација на демографски политики, помлад соработник за административно-техничка поддршка и обработка на податоци и документи за судски постапки и за одговори на жалби од работен однос, раководител на одделение за задолжително и доброволно капитално финансирано пензиско осигурување. Платите во зависност од работното место се движат од 20.900 до 28.303 денари.

Агенцијата за администрација објави и оглас за вработување на 14 раководители во Агенцијата за вработување. Се бараат кандидати за раководители во центрите за вработување во Свети Николе, Охрид, Крушево, Неготино, Македонски Брод и Струга… Платата за сите работни места изнесува 28.277 денари.

Јавното претпријатие за железничка инфраструктура Македонски железници – Скопје овој месец распиша оглас за вработување на 18 лица.

Во огласот се бараат повеќе профили работници меѓу кои помлад инженер соработник за пруги, помлад градежен техничар, помлад ракувач на машина, помлад инженер соработник за енергетска ефикасност, помлад. инженер соработник за електротехнички постројки, помлад одржувач на сигнално сигурносни постројки…

Платите во зависност од работното место се од 18.158 денари до 23.746 денари.

Бранот вработувања доаѓа по најавата дека деполитизација на администрацијата ќе биде приоритет на Министерството за информатичка технологија и администрација.

„Наши императиви во следниот период ќе бидат деполитизација на администрацијата, реорганизација и оптимизација на институциите, зголемување на капацитетите за скрининг и за преговори и ефикасни и поевтини услуги за граѓаните“, рече неодамна ресорниот министер Дамјан Манчевски и додаде дека ниту еден од вработените нема да остане без работа, туку во случај на потреба ќе има доброволно распределување во приватниот сектор.


Бранителите од Прилеп бараат нивните семејства да имаат приоритет при вработување


Прилеп, 3 декември, 2018 - 12:21 (META) 

Во чест на 16-годишнината од формирањето на Здружението на резервни воени обврзници, учесници во настаните од 2001 и 2002 година од Прилеп, како и во знак на почит кон своите загинати соборци, но и 30-ина бранители коишто поради пост-трауматски шок починаа подоцна, тие посадија зимзелени дрвја во Меморијалниот комплекс во селото Лениште –Прилепско.  Притоа ја искажаа својата загриженост, поради неповолната позиција во која се наоѓаат.

-Социјалните прашања, невработеноста и правото на адекватно здравствено згрижување се прашања коишто нè тиштат. Веруваме дека со оваа влада конечно ќе ги оствариме своите барања – велат дел од членовите на ова Здружение.

Бранителите побараа и нивните деца да имаат приоритет при вработување.

-Кога се објавуваат конкурси за вработување, доколку децата на бранителите ги исполнуваат условите, сметаме дека треба да имаат приоритет пред друтите кандидати. Ова особено во случаи, кога семејствата на бранителите се социјално загрозени – порачуваат бранителите.

Во прилепското здружение на бранители членуваат околу 1.000 луѓе.


РСС: Во Македонија во последните осум години отворени 103.000 нови работни места


Брисел, 5 јули, 2018 - 15:42 (META) 

Западен Балкан се враќа на патеките на порастот, бидејќи во земјите во регионот од 2010 досега се создадени 600.000 работни места,  (од кои дури 103.000 во Македонија!), а во работната сила во регионот се влезени дополнителни половина милион високообразувани луѓе, велат од Регионалниот совет за соработка (РСС).

Во Македонија во последните осум години се отворени 103.000 нови работни места, односно тоа е вториот најдобар резултат во Западен Балкан во оваа категорија.

EBU

Од РСС велат дека во земјава е забележан и импресивен раст на трговијата, односно македонската економија во последните осум години  речиси двојно го зголемила обемот на трговијата – од 6,9 милијарди евра на 12,5 милијарди евра.

Македонија е во врвот на статистиките и по тоа што во истиот период биле нововработени 71.062 висококвалификувани луѓе.

Во истиот период во Западен Балкан трговијата пораснала за дополнителни 33 милијарди евра, а трговскиот дефицит се намалил од 23,1 на 19,7 проценти од БДП. Тоа се должи на одличниот обем на извозот, што сигнализира за зголемена конкурентност на производите и услугите од регионот на меѓународните пазари.

Тоа беше соопштено на денешниот состанок на Управниот одбор на „Стратегијата за Југоисточна Европа 2020“ на РСС.

– Среќен сум што Западен Балкан се врати на патеките на растежот и постигнува добри резултати – вели Горан Свилановиќ, генерален секретар на РСС.


Стотици административци вработени по Рамковен уште седат дома и примаат плата


Скопје, 29 јуни, 2018 - 10:58 (META) 

Сè уште не е изготвен план за распоредување на работни места на втората група административци што се вработени според Рамковниот договор и тие уште примаат плата иако седат дома и не одат на работа, пишува „Порталб.мк“.

Секретаријатот за спроведување на Охридскиот рамковен договор веќе два месеца е во фаза на подготовки на планот за нивно распоредување на работните места каде ќе извршуваат работни обврски.

„Порталб.мк“ пишува и дека и по три месеци, од 29 март, кога испратиле барање според законот за слободен пристап до информации од јавен карактер да се каже колку долго луѓе примале плата за седење дома, какво се нивното образование и квалификации и колкави плати добиваат, одговор од Секретаријатот нема.

Во однос на првата група кои требаше да почнат со работа, над 90 отсто од 958 административци потпишале договори за систематизација во релевантните институции, од Владата велат дека мал дел од нив почнале да одат на работа.


Решенија за вработување и договори за 1.159 полицајци и приправници


Скопје, 1 јуни, 2018 - 17:09 (META) 

Решенија за работно место „полицаец“ денеска добија 594 полицајци-приправници, а 565 кандидати што по огласот во март 2017 година успешно ја завршиле обуката добија договори за вработување како полицајци-приправници, соопшти МВР.

Новите 594 полицајци се распредели во сите седум сектори за внатрешни работи (СВР), а најмногу во СВР Скопје и СВР Битола.

На 565-те приправници, пак, од денеска им трае пробниот стаж, а по шест месеци ќе полагаат приправнички испит.


Годишната програма за вработување ги опфаќа младите и социјално ранливите лица


Скопје, 25 април, 2018 - 13:20 (META) 

Министерството за труд и социјална политика, Агенцијата за вработување и УНДП денеска потпишаа договор за Годишната програма за вработување 2018, за која се предвидени 8,3 милиони долари.

Премиерот Зоран Заев рече дека се таргетирани 16.259 лица, но најголем бенефит ќе имаат младите бидејќи имат можност да конкурираат за работни места со плата во износ поголем од 18.000 денари.

Постојаната амбасадорка на ОН во Македонија, Лујза Винтон рече дека недостатокот на пристојна работа е предизвик за развој на државата и дека 50 отсто од младите постојано си заминуваат. Истовреме пак, растечките приватни бизниси имаат недостиг од обучен кадар.

– Со Годишната програма е предвидено отворање 980 мали бизниси, од кои 50 на лица со попреченост, како и ангажирање лица во 45 до 50 општини кои ќе им помагаат на деца од предучилишна возраст, лица со попреченост и постари лица – рече Винтон.

Министерката за труд и социјална политика, Мила Царовска додаде дека активните мерки за вработување се прилагодени на потребите на работодавачите, но и на профилот на младите и ранливите групи.

– Тоа што е различно од претходните оперативни планови и што дава подобар ефект е тоа што мерките се прилагодени на потребите на работодавачите, на потребите и квалификациите на младите и ранливите групи и има можност за поврзување на мерките, што досега не беше случај. Дадовме можност мерките да ги користат и социјални претпријатија, но и граѓанските организации, бидејќи знаеме дека голем број млади луѓе се неформално вработени во овие организации и сега имаме можност за нивна формализација. И ниту една од овие мерки не значи ослободување од придонеси за здравствено и социјално осигурување, затоа што ние сме одговорна Влада, која што се грижи за иднината на фондовите и за идните генерации – рече Царовска.

Директорката на Агенцијата за вработување Билјана Јовановска рече дека сите невработени лица имаат еднаков пристап до мерките и Програмата за вработување предвидени со Оперативниот план иако на младите им се дава предност и тие треба да бидат застапени со најмалку 30 отсто.Таа информираше дека интересот за мерките е голем, посебно за субвенциите за вработување, програмата за самовработување и обуката за побарувачки занаети.


За четири години со поддршка на УСАИД се вработиле 115 лица со попреченост


Скопје, 12 март, 2018 - 14:07 (META) 

Повеќе од 115 лица со попреченост се вработиле во периодот од 2012 до 2016 година како резултат на соработката на агенцијата на САД за меѓународна помош (УСАИД) со над 360 компании од приватниот сектор, со 40 организации кои работат во областа на застапување на правата на лицата со попреченост и со јавни институции и асоцијации. Притоа, 12 од нив отвориле сопствен бизнис, а повеќе од 70 лица добиле практична работа во различни компании, јавни институции и невладини организации. Преку 250 лица од приватниот сектор ги поминале обуките за менторство на лица со попреченост, посочија од агенцијата.

И во моментов УСАИД работи на проект кој има за цел да ја зголеми  интеграцијата на младите лица со попреченост на пазарот на трудот во Македонија, со акцент на ИКТ индустријата, па е изработена иновативна платформа со онлајн обуки за интерактивно учење, развој на деловно работење и меки вештини, како и обуки од полето на информатичката технологија. Сите курсеви се достапни за сите заинтересирани млади, без разлика дали имаат некој вид на попреченост или не, при што курсевите во комбинација со практично искуство во компаниите ќе им овозможат на младите да се стекнат со потребните вештини за да ги надминат бариерите што го спречуваат нивното учество во работната сила на пазарот на информатичката технологија.


Од Стопанска комора бараат законски измени за вработувања во комуналните претпријатија


Скопје, 22 јануари, 2018 - 14:46 (META) 

Здружението на комуналните дејности при Стопанската комора бара измени на законските прописи кои го регулираат вработувањето работници во комуналните претпријатија на локално и на државно ниво.

– Постојните закони го отежнуваат вработувањето во еден дел, пред се при ангажирање сезонски работници, но и во други услови кога е потребно да се направат одредени поместувања поради работните активности на одредени работни позиции во компаниите – информираше претседателот на Здружението, Звонко Јованоски.

Од таму исто така ќе бараат интервенција во Законот за јавни набавки и активно вклучување во изработка на новиот закон за управување со отпад.

– Здружението ќе се вклучи во активностите околу донесувањето на новиот закон за управување со отпад кој е во почетна фаза и согласно укажувањата на Министерството за животна средина треба да се донесе до октомври годинава. Здружението има забелешки и на постојниот Закон за јавни набавки, согласно кој голем дел од тековните работи на комуналните претпријатија се отежнуваат. Проблемот е во понудената најниска цена која не соодветствува со квалитетот, како и во лимитот од 500 евра согласно кој може да се вршат интервентни набавки, што е многу мал износ – додаде Јованоски.


ЕУ обезбеди 37,5 милиони евра за вработување, образование и за социјална инклузија


Скопје, 21 ноември, 2017 - 12:45 (META) 

Еврокомесарот за проширување и за соседска политика, Јоханес Хан, денеска ја промовираше кампањата „Веруваме во тебе, вложуваме во тебе, ЕУ за тебе“, со која Европската Унија ќе обезбеди 37,5 милиони евра за унапредување на состојбите во секторите вработување, образование и социјална инклузија, финансирани од ИПА оперативната програма за човечки ресурси 2007-2013.

– Во земјава досега бев многупати за да помогнам во справување со политичката криза, но во моментов сум особено задоволен што сега можеме нашето внимание да го тргнеме од кризни прашања и да се посветиме на активности кои се насочени кон иднината. Постепено се враќаме во нормала. Ова е мошне добро за земјата, бидејќи сега може да се фокусира на посуштински работи, а тоа подразбира да се работи во служба за граѓаните, да им се овозможи да се квалифицираат, да се вработат – изјави Хан.

Хан додаде дека со оваа кампања, всушност, ЕУ покажува дека има цврста верба во иднината на Македонија, а со неа освен што ќе им се помогне на луѓето во земјава, ќе се спречи и одливот на мозоци во другите делови во Унијата.

Во рамките на кампањата, Хан ќе ја посети Агенцијата за вработување, ќе се повози со автобусот на ЕУ и ќе им се обрати на корисниците во рамките на проектот „Поддршка на вработувањето на младите“, спроведен од Агенцијата за вработување.

Двокатниот автобус на ЈСП брендиран за кампањата „Веруваме во тебе, вложуваме во тебе, ЕУ за тебе“ денеска беше промовиран пред Инфо-центарот на ЕУ.