!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Граѓаните не видоа бенефит од задолжувањето од 100 милиони евра, велат од ВМРО-ДПМНЕ


Скопје, 9 август, 2017 - 15:23 (META) 

СДС, откако е на власт, за два месеци, само врз основа на аукции на државни хартии од вредност, ја задолжи државата за повеќе од 100 милиони евра, од кои граѓаните не видоа никаков бенефит, изјави на прес-конференција Христијан Делев од ВМРО-ДПМНЕ.

Тој додаде дека со тие пари не се почнала изградба на нови училишта, ниту се почнала изградба на нови градинки, канализации, водоводи или слично.

– Напротив, со ребалансот тие дури и предвидоа кратење на овие проекти. Оттука, отворено се прашуваме за што новата влада на СДС ги потроши овие пари? Дали овие 100 милиони евра се за партиски вработувања, договорни услуги и за вдомување на шарени револуционери, твитер-ликови и комедијанти за дебели хонорари? – изјави Делев.


Тевдовски: Обвинувањата за големи задолжувања се манипулација


Скопје, 4 август, 2017 - 14:42 (META) 

На третиот ден на расправата за ребалансот на буџетот, пратениците на ВМРО-ДПМНЕ ја обвинија власта дека со овој буџет ќе има ново задолжување, нема да се заврши ниту еден проект и дека ќе се зголеми буџетскиот дефицит.

Според пратеникот на ВМРО-ДПМНЕ, Крсто Мукоски, ребалансот на буџетот ги признава успешните политики на претходната влада и здраво поставените економски фундаменти.

– На глас ја критикувавте несразмерноста на буџетот од три милијарди евра, а со новиот ребаланс имате минимално намалување на буџетот од 1,5 отсто, односно висината на буџетот ја задржавте. Преку буџетскиот дефицит велевте дека минатата влада била недомаќинска, трошела непродуктивно, а вие со ребалансот дефицитот го здржувате на исто ниво од 302 милиони евра. Зошто, кога кратите на капитални инвестиции, не го намалите буџетскиот дефицит – праша Мукоски.

Тој додаде дека со вака поставените макроекономски показатели, буџетскиот дефицит ќе се зголеми на 3,5 проценти, а тоа значи и зголемување на задолжувањето, при што ќе мора да се повлече капитал од домашниот пазар и преку издавање на нова еврообврзница.

Министерот за финансии, Драган Тевдовски, одговори дека се неточни бројките околку задолжувањето.

– Во јуни и во јули нето-задолжувањето беше 1,8 милијарди денари на домашниот пазар. Кон странство беше вратен долг од 81,9 милиони евра. Ако некој треба да врати нечиј кредит од сума од 500 денари и денеска за тој кредит земе нов кредит од 550 денари, дополнителното нето-задолжување е 50 денари. Не правете манипулации  со бројките – одговори Тевдовски.

Тој рече дека има потреба од задолжување бидејќи во јануари 2018 година треба да се врати стар кредит од 90 милиони евра, а во 2020-2021 година треба да се вратат една милијарда евра, што, според Тевдовски, е двегодишна плата за цела администрација.

Пратениците на опозицијата обвинија дека со ребалансот нема поголеми плати, пензии, субвенции и нема поголем стандард на граѓаните, а на сметка на тоа има изградба на кампови за мигранти.

– Ребалансот на буџетот е чист популизам за да се вдомат партиските кадри за на 15 октомври да излезете на локални избори – обвини пратеникот Драган Данев од ВМРО-ДПМНЕ.

Благојче Трпковски од СДСМ рече дека ребалансот на буџетот е одраз на домаќинското работење на новата влада.

По паузата, расправата за ребалансот на буџетот ќе продолжи во 15.30 часот.


ВМРО-ДПМНЕ: Манчевски лаже за бројката од 7.708 лица вработени во администрацијата


Скопје, 28 јули, 2017 - 17:02 (META) 

Во врска со 7.708 лица кои наводно се вработени во државната администрација во периодот од донесување на одлуката за распишувањето на изборите на 17 октомври лани до денот на формирањето на новата влада на 31 мај годинава, министерот за информатичко општество и администрација, Дамјан Манчевски, лаже на нему својствен и дрзок начин, реагираат од ВМРО-ДПМНЕ на прес-конференцијата на Манчевски.

Од опозициската партија велат дека вистината е дека во тој период се вработени само 160 лица во државната администрација заради итни и неодложни работи, што е дозволено и со Изборниот законик кој е испочитуван.

„Меѓу другото, мораме да споменеме дека бројот на вработени во јавниот сектор на денешен датум, во согласност со опфатот на Законот за вработените во јавниот сектор е намален за околу 2.000 лица во однос на 31 декември 2016 година. Грубите лаги и манипулации што денеска ги изнесе Дамјан Манчевски очигледно се по насока на Заев за да се скријат масовните партиски вработувања и незаконски разрешувања изминативе два месеци, како и грубата партизација на државата од чистачка до министер“, се вели во соопштението на ВМРО-ДПМНЕ.


Манчевски: Владата досега вработила 96 лица, сите ангажирани преку конкурси


Скопје, 28 јули, 2017 - 13:26 (META) 

Новата Влада од почетокот до денеска вработила вкупно 96 лица во сите институции заедно, од кои 32 посебни кабинетски советници на министрите, а само во Владата вработени се вкупно 26 лица, информираше денеска на прес-конференција министерот за информатичко општество и администрација, Дамјан Манчевски.

Сите нови вработувања во државните институции биле направени преку претходно објавени конкурси.

– Во согласност со законот, секој министер има право на тројца внатрешни советници од редот на администрацијата и по тројца надворешни посебни кабинетски советници. Премиерот Зоран Заев има тројца советници, а за споредба поранешниот премиер Никола Груевски имал 86 советници. Од друга страна, од 1 јуни до 25 јули преку општините каде градоначалниците се од редот на ВМРО-ДПМНЕ, вработени се повеќе од 300 лица – изјави Манчевски.

Тој нагласи дека претходната влада незаконски вработувала лица во периодот од распишување на изборите на 17 октомври 2016 година до денот на формирање на новата влада.

– Во овој период биле ангажирани вкупно 7.708 лица, а само на 17 октомври биле ангажирани 4.473 лица, од кои со договор на дело, авторски договор или договор за волонтирање биле ангажирани 2.312 лица. Ќе ги повикаме надлежните инспекторати да преземат соодветни мерки за санкционирање на сите институции и лица што ги прекршиле законите – додаде Манечвски.

Министерот најави анализа на целата администрација која ќе покаже каде има вишок кадар, каде има недостиг, но најави и контакт со приватниот сектор за прераспределба на кадри. Освен тоа, МИОА ќе подготви и извештај за вкупниот број на вработени во администрацијата, кој ќе го вклучува и бројот на вработени со договор на дело и со авторски договори.

– Има сериозен недостиг од менаџерски кадар, а истовремено има превработување на најниско ниво. Во МИОА има осум сектори, а само еден има раководител – рече Манчевски, кој нагласи дека бркање од работа во јавната администрација на политичка основа нема да има.


Манчевски: Ќе има детален извештај за новите вработувања во Владата


Скопје, 24 јули, 2017 - 18:34 (META) 

Министерот за информатичко општество и администрација, Дамјан Манчевски, денеска изјави дека во текот на оваа недела, Владата ќе соопшти детали за сите нови вработувања, но дека ќе излезе и со извештај за, како што рече, измамата околу вкупниот број на вработени во јавната администрација.

– Во текот на оваа недела, многу побргу од предвидениот рок, ќе доставиме детална информација за сите вработувања. Ќе се види дека се создава фама околу нешто што е апсолутно согласно закон и не постои никакво гломазно вработување. Но, исто така, ќе излеземе и со детални информации за сите илјадници незаконски вработувања во периодот од распишување на парламентарните избори до креирањето на новата влада, како и со многу детален извештај за измамата околу вкупниот број на вработени во јавниот сектор – изјави Манчевски, одговарајќи на новинарско прашања при промоцијата на новата инвестиција „Ин плејер“.

Во врска со поставувањето нови кадри на клучни позиции во власта, тој рече дека за разлика од претходната влада, оваа влада не поставува кадри насилно во еден ден, туку дека ги наоѓа соодветните луѓе што треба да ги исполнат соодветните услови за да може соодветно да одговорат на задачите. Тој појасни дека станува збор за процес во кој сите коалициски партнери во Владата наоѓаат соодветни кадри за соодветна позиција.

Вчера од ВМРО-ДПМНЕ ја обвинија Владата дека почнала со реализација на планот да ја направат партијата држава, а државата партија.

– Деца на коалициони партнери на Заев, комедијанти кои глумеле објективни критичари, граѓани кои глумеле независни и невладини корективи на власта – сите денес се вработени во Владата и се платени со стотици милиони денари пари на граѓаните. Без квалификации и без критериум, освен тоа дека одработувале на интересите на Заев и ги манипулирале граѓаните. Стотици милиони денари од буџетот секоја година наместо да се трошат за нови училишта, за болници и за градинки, Заев ќе ги троши за вработувања партиски војници и профитери од граѓанскиот сектор – изјави Колариќ.


Од ВМРО-ДПМНЕ тврдат дека од работа биле избркани успешни директори на институции


Скопје, 24 јули, 2017 - 15:01 (META) 

Зоран Заев и СДС почнаа со партиските чистки и со политичкиот прогон на неистомислениците, со нивно бркање и смена од работни места, изјави на прес-конференција Драган Данев од ВМРО-ДПМНЕ.

Тој додаде дека во еден ден биле сменети 1.500 членови на управни и на надзорни одбори.

– Фондот за здравство сè уште не може да носи одлуки за лекување на болни осигуреници во странство поради ваквиот дилетантски однос на антиреформаторската влада. Се бркаат од работна позиција успешни директори на институции само и само затоа што не одработувале за интересите на Заев и на СДС и затоа што над нив новиот режим нема контрола. Покрај партиските војници, се вработуваат и децата на коалиционите партнери, разно-разни комичари, поети и самонаречени експерти, кои со години одработувале за СДС и за Заев, лажејќи ги сите другите граѓани дека се граѓански коректив на власта – додаде Данев.


ВМРО-ДПМНЕ ќе побара информации за новите вработувања во институциите


Скопје, 22 јули, 2017 - 13:11 (META) 

Пратениците на ВМРО-ДПМНЕ и на Коалицијата за подобра Македонија ќе поднесат барање да им се достават информации за тоа колку нови луѓе се ангажирани или вработени во државните институции на определен, неопределен период, засновале работен однос врз основа на договор за дело, авторски или друг договор, информираше на денешната прес-конференција пратеникот од ВМРО-ДПМНЕ, Драган Данев.

Тој додаде дека во согласност со Законот за слободен пристап до информации од јавен карактер, ќе бараат да им биде доставена оваа информација бидејќи „јавноста секојдневно е бомбардирана со вработувања на партиски војници, членови на таканаречената „Шарена револуција“ и лица кои се во директни роднински релации со функционери од власта.“

– СДСМ дури и во ребалансот на буџетот кој е во собраниска процедура има предвидено повеќе средства за партиски вработувања во рамките на министерствата. Во буџетот има допoлнителни 12 милиони денари за привремени вработувања во Владата, односно буџетот е направен за да одговори на основната желба на СДСМ за партизација на институциите – изјави Данев.


Францускиот министер за внатрешни работи си поднесе оставка


Париз, 21 март, 2017 - 19:46 (META) 

Францускиот министер за внатрешни работи, Бруно ле Ру, си поднесе оставка поради скандалот со привремените вработувања на неговите ќерки во собранието на земјата, за што се води и истрага, јавуваат светските агенции.

Бруно ле Ру својата одлука ја соопшти денеска. Тој изјавил дека не сторил ништо погрешно со вработувањето на своите ќерки, но навел дека поднесува оставка од почитување кон владата и за да му овозможи на министерството за внатрешни работи на Франција да се бори против тероризмот и другите безбедносни закани.

Ле Ру тврди дека договорите за вработување биле „во склад со правилата на Народното собрание“ и „дека сите работи биле извршени ефективно“.

Оставката на Бруно ле Ру следува еден ден по телевизискиот извештај за 24 привремени ангажирања на неговите ќерки во парламентот. Пред два месеци, слична истрага, заради вработувања, сериозно ѝ наштети на предизборната кампања на кандидатот за претседател на конзервативците, Франсоа Филон.


На штипскиот универзитет му се потребни 200 нови вработувања, вели ректорот Боев


Штип, 14 март, 2017 - 17:26 (META) 

На Универзитетот „Гоце Делчев“ од Штип му се потребни 200 нови вработувања на млад, образован кадар, за зголемување на квалитетот на наставата. Меѓутоа, и покрај тоа што Министерството за финансии дало одобрување за дел од овие нови вработувања, актуелниот статус кво во државата по изборите, не дозволува овие вработувања докрај да се реализираат. Ова го вели ректорот на Универзитетот, кој идната недела ќе прослави 10 години од постоењето.

– Нам ни се потребни можеби и 200 соработници во делот на вежбите, практичната работа со студентите. Можеби оваа бројка во квантум изгледа многу, но треба да се сфати дека имаме потреба од млади, од тоа да го подмладиме и да го развиеме универзитетот во насока на подобро и поквалитетно образование, бидејќи само образование кое вреди треба да се даде на студентите – рече ректорот Блажо Боев.

За овие десет години на штипскиот универзитет поминале меѓу 25.000-30.000 студенти. Меѓутоа, како што вели ректорот Боев, оваа бројка не минува 3.500 дипломи на прв циклус на студии, околу 500 на вториот и 50-60 дипломи на третиот циклус на студии.

– Значи, станува збор за една млада високообразовна установа, која со сите проблеми што ги има, со сите недоречености, незаокружената кадровска структура, недостигот на многу голема бројка на млади, пред сè асистенти и професори, мислам дека сепак, добро се носи со сите предизвици – вели Боев.

Деновиве почнуваат манифестациите за одбележување на јубилејот. Настаните ќе се заокружат со свечената академија на 23 март, на која ќе настапат Влатко Стефановски, Тони Китановски и Никола Ристановски. Ќе биде промовиран и филмот „10 години УГД“, во продукција на Филмската академија на УГД.


Петер: Инвеститорите не ја напуштија државата во криза, од новата влада очекуваат дијалог


Скопје, 27 февруари, 2017 - 15:53 (META) 

„И покрај тешкотиите со политичкиот систем изминатите две години, бизнисмените имаат добро чувство за иднината. Странските инвеститори се стабилни во работењето, некои од нив бројот на вработени го зголемија двојно,“ одговори претседателот на Советот на странски инвеститори при Стопанска комора, Штефан Петер, на прашањето на „Мета“ за влијанието на политичката криза врз инвеститорите.

– Ниту една странска компанија не се повлече. Бизнимените имаат добро чувство и со новата влада и реформи во образовниот систем, странските инвеститори ќе продолжат да инвестираат – вели Питер.

Тој информираше дека во фокусот на работата на Советот на странски инвеститори ќе биде организација на конференција нарачена „Средно стручно образование по мерка на фирмите“ бидејќи, како што истакна, компаниите се соочуваат со недостиг од стручна квалификувана работна сила. Потребни им се квалификувани стручни работници во сите сектори.

Во однос на напуштањето на високо-стручните кадри на земјата, тој истакна дека во земјите каде што заминуваат не им е лесно и не се збогатуваат, а ако се одвоени од семејството, тоа е дополнително тешко.

– Ако не ги образувате на вистински начин, не очекувајте компаниите да ги вработат. Ако не им се даваат фер и правични плати за да живеат со семејствата, се иселуваат – вели Петер.

За платите на вработените во странските компании, тој истакна дека тоа е индивидуална одлука на секоја компанија, но во тој поглед, како што рече, треба да се земе предвид дека многу од компаниите исплатуваат 13 и 14 плата, патни трошоци, оброци и сл.

Во однос на субвенциите што државата ги дава на странските инвеститори, тој вели дека системот на поттикнување е неопходен за привлекување странски компании, а дека друго прашање е колку треба да изнесуваат субвенциите.

– Факт е дека Македонија се наоѓа во глобален натпревар, а ако нема поволни услови во земјата, инвеститорите ќе отидат во друга земја. Бугарија и Србија се директна конкуренција на Македонија – вели Петер.

Од новата влада, странските инвеститори ќе бараат дијалог. Нивните идеи и предлози ќе бидат објавени во следното издание на т.н. „Бела книга“.

– Нашите идеи ги има во „Белата книга“, тие препораки се бесплатни. Другите држави треба да платат илјадници евра за консултации. Добро е да седнеме на маса и да слушнат што мислиме – вели тој.

Зошто не се исполнети дел од нивните барања, Петер упати да се праша владата, но како што рече, секогаш постои можност за подобрување на дијалогот. Наскоро, како што истакна, ќе објават и документ во кој ќе биде презентирана реалната слика за тоа што е побарано, а што е остварено.

На прашањето што ќе се случи ако новата влада ги укине субвенциите, тој изјави дека „не гледа во иднината, туку во минатото кое е побезбедно за него“.

– Ако не постојат субвенции, немаше инвестициите да бидат на ова ниво, така што ова нека биде одговор на прашањето – додаде Петер.

Странските инвеститори вработуваат 50.000 лица, а соработуваат со повеќе од 5.000 домашни фирми.