Заев: Tочно е дека има партиски вработувања, но поголем дел се бираат на конкурси


Скопје, 20 февруари, 2019 - 15:26 (META) 

Премиерот Зоран Заев на денешното отворање на салата за јавни услуги „Една точка за услуги” на новинарско прашање во врска со партиските вработувања рече дека на граѓаните гледа како еднакви и рамноправни.

– Ние не можеме да ги ограничиме младите луѓе кои членуваат и не членуваат во партија. Но етичкиот основ, јавноста го доловува. Не само законот туку и етичкиот дел треба јасно да го поставиме. Болно е прашањето кога гледаме вработувања на членови на семејства кои се партиски припадници, а други чекаат работа. Тоа не е фер. Апелирам, работам, разговарам со луѓето одредени чекори ќе се преземат со одредени функционери и од парламентарната и од извршната власт, верувам и од локалната власт за да можеме да се корегираме, бидејќи не сакам да бидам ист како претходните. Ќе креираме политики. Побаравме поддршка од граѓански организации, да ни помогнат. Сакаме да ни помогнат да изградиме систем на вредности – одговори Заев.

Тој рече дека има голема разлика со претходната Влада, но и слабостите се покажале.

– Медиумите се сериозен коректив на слабостите и аномалиите кои се случуваат во општеството. Ги поздравувам позитивните примери на исчекор на повлекување на одредени членови на семејствата кои се партиски припадници. Точно е дека има партиски припадности во вработувањата, но поголемиот дел се луѓе кои се бираат на конкурси. За жал поради големата миграција и напуштања на работни места, имаме дефицит, никаде не можеме да најдеме луѓе. Ако зборуваме за член на семејство кое има партиска припадност, а е кадар што го бараме како специјалист, архитект, градежник, информатичар дали треба да се повлече? Тоа го кажувам не да избегнеме одговорност, туку да се направи јасна дистинкција – додаде тој.

Во однос на изјавата на министерот за економија Крешник Бектеши дека нема да бара неговите блиски да се повлечат од работните места во МЕПСО и ЕЛЕМ, Заев рече „секој со својата одговорност“.

„Секој ќе си ја носи својата одговорност, има и политичка и етичка одговорност. Ако има одредено образложение, а народот тоа го сфаќа, јас немам воопшто проблем со тоа. Ако нема образложение, критериум, нормативи, нема транспарентност, не се видела конкурентноста, болно е кога гледате дека има протекционизам, посебно кога е политички. Знам и луѓе што се членови на семејства на одредени функционери, па добиле петта шанса. Некои чекале по 20 години, без разлика од кој профил се. Секој треба да добие еднаква шанса – додаде Заев.


Партиските вработувања не можат да се оправдаат


Скопје, 12 февруари, 2019 - 17:13 (META) 

Изјавата на министерот за информатичко општество Дамјан Манчевски, со која тој сака да ги оправда вработувањата на личности блиски до функционерите од власта, „Вистиномер“ ја оцени за недоследна.

Да се правда непотизмот на власта при вработувањето на блиските роднини и партиските кадри, со образложение дека „десет години членовите и симпатизерите на СДСМ биле најдискриминирани граѓани во државата со тоа што им беше забрането да се вработуваат во јавен и приватен сектор“, во најмала рака е некоректно. А прашањето „каде да одат овие луѓе, треба да ја напуштат државата ?(!), кое Манчевски им го упати на новинарите, е целосно нетактично и прозвучува дрско.

На ваквото прашање на Манчевски, само по себе се наметнува едно друго прашање: А каде да одат оние кои немаат никаква партиска книшка? Каде да се вработат децата, сестрите, мајките, на тие кои не припаѓаат на ниту еден партиски табор? Што да прават оние кои 11 години додека ВМРО-ДПМНЕ беше на власт, исто како и симпатизерите на СДСМ, не можеа да најдат вработување, бидејќи не го исполнуваа најглавниот услов – немаа партиска книшка или некаков директен роднинско-пријателски линк со власта. Или, пак, можеби, не е грев да ја напуштат државата само тие без партиска книшка?!

Целата статија прочитајте ја на „Вистиномер.мк“.


Владата го усвои Оперативниот план за 2019 година, предвидени 1,1 милијарда денари


Скопје, 5 февруари, 2019 - 15:55 (META) 

На денешната владина седница се усвои новиот Оперативен план за варботување за 2019 година, за кој издвоивме рекордни 1,1 милијарда денари што е највисок износ досега и е за речиси три пати поголем од 2014 година, кога за истата намена беа исплатени 406 милилони денари, соопштуваат од Министерство за труд и социјална политика (МТСП).

„Мерките се фокусираат на доквалификација, вработување на најранливите категории, поддршка за стартапите и иновативните бизнис идеи. Во процесот на креирање на овие мерки за првпат се вклучени сите чинители.Со Оперативниот план за 2019 година посебен акцент се става на младите невработени лица до 29 години како и на корисниците на гарантирана минимална помош. Новите работни места ги планиравме заедно со работодавците, односно за првпат мерките ги работевме во соработка со сите чинители и според реалните потребите во државата и на локално ниво“, се вели во соопштението.

Оперативниот план за вработување за 2018 година имаше високи 95 проценти реализација.


Државните вработувања се оправдуваат со зголемен обем на работа


Скопје, 22 јануари, 2019 - 9:59 (META) 

Институции, јавни претпријатија и установи се почесто распишуваат огласи за вработување на определено време поради зголемен обем на работа. Најнов пример за тоа е огласот на Клиниката за гинекологија и акушерство Скопје која објави оглас за вработување на 38 лица на определено време поради зголемен обем на работа до 31.12.2019 година.

Во огласот се бараат медицински сестри, правник, инженери, економсти, административен работник и други профили работници. Платите во зависност од работното место се движат од 14.500 до 24.000 денари.

Министерството за финансии пред неколку дена објави оглас за вработување на 9 лица на определено време, за работа на проект, за период од пет години. Се бараат кандидати за советници, помлад соработник, педагог, дефектолог, виша медицинска сестра и други профили работници. Платите се движат од 8.588 денари до 25.023 денари.

Царинската управа неодамна објави оглас за вработување на 78 извршители на определено време до крајот на тековната фискална година, а како главна причина за тоа е наведен привремено зголемен обем на работа до крајот на 2019 година.

Во огласот се бараа советници, цариници, виши цариници, кандидати за началник на Одделение кабинет на директор во Царинска управа, инспектор со мобилен скенер, шеф на служба за проекти во Одделение за меѓународна соработка и за други работни места. Платите варираат од 16.571 денар до 39.899 денари.

Службата за општи и заеднички работи на Владата поради привремено зголемен обем на работа претходно објави јавен оглас за ангажирање на 16 лица на определено време, додека трае потребата на институцијата, a најдолго 1 година.

Во огласот се се бараа готвачи, келнери, возачи, архивари, благајници и други профили работници.


Царинската управа вработува 78 лица поради зголемен обем на работа


Скопје, 8 јануари, 2019 - 10:12 (META) 

Царинската управа објави оглас за вработување на 78 извршители на определено време до крајот на тековната фискална година, а како главна причина за тоа е наведен привремено зголемен обем на работа до крајот на 2019 година.

Во огласот се бараат советници, цариници, виши цариници, кандидати за началник на Одделение кабинет на директор во Царинска управа, инспектор со мобилен скенер, шеф на служба за проекти во Одделение за меѓународна соработка и за други работни места.

Основната нето плата за работно место началник на одделение е 39.899 денари, за шеф на служба е 34.067 денари, за водител на смена е 33.432 денари, за самостоен советник е 32.401 денари, за советник е 30.724 денари, за виш цариник е 31.053 денари, за работно место цариник е 22.887 денари, за администартивен оператор е 24.060 денари и за наплатувач е 16.571 денари.


Новата година донесе нов бран државни вработувања


Скопје, 4 јануари, 2019 - 10:01 (META) 

Уште во првите неколку денови од новата 2019 година јавни претпријатија, агенции, установи и други државни институции распишаа огласи за вработување на повеќе од 120 лица.

Јавното претпријатие за државни патишта распиша оглас за вработување 84 инкасанти за наплата на патарина за плата од 19.760 денари. Во друг оглас за вработување на 16 лица, ЈП за државни патишта бара кандидати за советници и референти.

Управата за хидрометеоролошки работи објави оглас за вработување на 11 лица на определено време до крајот на годината. Се бараат кандидати за референти, помлади референти, помлади соработници и други профили работници на повеќе локации во Македонија.

Распишан е оглас за вработување на 4 државни службеници во Агенцијата за финансиска поддршка во земјоделството и руралниот развој каде што се бараат советници и помлади соработници.

Во оглас за вработување на 3 лица во Агенцијата за лекови и медицински средства се бараат кандидати за инспектори и помлади соработници.

Агенцијата за администрација објави оглас за вработување на 8 лица во казнено-поправниот дом Идризово во кој се бараат помлади соработници, виши соработници и референти. Платите во завиност од работното место се движат од 15.689 до 23.257 денари.

Ваквиот наплив на огласи од буџетски институции е само продолжение на трендот од декември минатата година, кога „Мета“ пишуваше дека во пресрет на новогодишните празници речиси и да нема ден во кој не е објавен оглас за вработување во државните институции и јавните претпријатија.


Новите возила на Итната помош не се во употреба, се најавуваат нови вработувања


Скопје, 14 декември, 2018 - 10:13 (META) 

Дванаесетте нови амбулантни возила се уште не се примени од Министерството за здравство, и не се во употреба, а во меѓувреме министерот Венко Филипче најави и вработувања на стручен кадар во службата за Итна медицинска помош, пренесува „Порталб.мк“.

„Тие возила ќе дојдат. Очекуваме и донации од Република Чешка. Постои финансиска согласност за прием на лекари и медицински сестри кои ќе работат во Итната медицинска помош. На почетокот ќе реализираме 40 вработувања, а до средината на следната година ќе имаме уште 60 вработувања“, рече Филипче во емисијата „Економски магазин“ на „Алсат М“.

Службата за Итна медицинска помош ќе подлежи на физибилити студија да се најде подобар начин на функционирање. Анализата ќе ја спроведе еден оператор, од три кои се пријавија на повикот на Министерството. Но, имињата не се обелоденети. Од Министерството за здравство изјавија дека по изборот на операторот и завршување на физибилити студијата, ќе следи јавна дебата за да се даде одговор на прашањето „Кој е најдобриот начин на функционирање на Итната помош?“.

Физибилити студијата ќе се спроведе во јавно-приватно партнерство, што доведе до сомневање дека и Итната медицинска помош ќе се приватизира, како и Детската кардиохирургија. Дилемите се дали граѓаните ќе плаќаат двојно поскапи медицински услуги? Дали се инвестира во приватното здравство и се занемарува јавното здравје? Дали се блокира пристапот на новинарите до информациите?

Министерството за здравство одлучи дека Детската кардиохирургија на Универзитетскиот клинички центар ќе биде префрлена во болницата „Жан Митрев“. Услугите ќе бидат покриени од Фондот за здравство, додека здравствените работници ќе фигурираат како вработени во „Жан Митрев“.

За „Левица“, истата судбина – приватизација ќе ја има и Итната медицинска помош.

„Овој чин може да се гледа како класична интервенција и уништување на јавното здравство.  Министерството за здравство изјави дека овој модел на јавно-приватно партнерство ќе се користи во случајот на Итната помош, доколку анализата која се нарачала покаже дека тој модел е подобар отколку поделбата помеѓу приватното и јавното здравство. Иако досега оваа анализа не е објавена во јавноста на транспарентен начин, тие сепак донеле таква одлука“, велат од „Левица“.


Истражување: Во општините не постои добар пристап до услуги и услови за жените


Скопје, 22 октомври, 2018 - 16:19 (META) 

Разликите помеѓу мажите и жените остануваат на многу високо ниво во области како вработувањето, економијата, политичкото учество, покажуваат податоците од Индексот на родова еднаквост на општините во Македонија.

Во општините не постои добар пристап до услуги и услови за жените како што се услугите  здравствената заштита, пристапот до градинки, институции за згрижување на возрасни лица, а нивото на вложувањата во програмите кои се однесуваат на родовата еднаквост останува на прилично ниско ниво.

Претседателката на „Реактор-Истражување во акција“ појасни дека Индексот покажува дека во многу голем дел од општините недостасуваат основни јавни услуги неопходни за жените.

– Она што дополнително загрижува е што Индексот покажува дека општините дури и кога имаат родово одговорни програми, честопати воопшто не се распределуваат буџетски средства за реализација на тие програми и поддршка на активности кои го подобруваат животот на жените во општините – рече Башевска.

Според податоците од Индексот, Општините Центар и Вевчани имаат најдобар пристап до градинки, а најлош Пласница, Арачиново и Студеничани.

Со Индексот се опфатени 81 општина и нивната работа во три главни области: родов јаз, соодветни услови и родово одговорна општина.


„Еуромакс ресорсис“ ја објави структурата на 488 работни места во Иловица-Штука


Гевгелија, 23 мај, 2018 - 14:54 (META) 

„Еуромакс ресорсес“ објави список на 488 директни работни места во проектот Иловица-Штука, за кои ќе организира конкурси откако ќе ги добие потребните дозволи за експлоатација, информираат од компанијата.

Од таму додаваат дека опсегот на работните места е усогласен со потребите објавени во Физибилити студијата за проектот, а земени се предвид сугестиите од локалните засегнати страни.

„Еуромакс има стратешка определба за вработување на локалното население во проектот. Компанијата ќе организира серија Саеми за вработување и други настани од отворен тип за да објасни како потенцијалните вработени можат да аплицираат за работните места откако ќе ја добие потребната дозвола за експлоатација. Процесот на одбирање ќе се одвива со индивидуален пристап со цел на кандидатите да им се помогне да го најдат најдоброто работно место за себе. „Еуромакс“ ќе обезбеди и сеопфатна обука за работните места во рамките на Проектот, директно или преку своите изведувачи“, се вели во соопштението.

Во него се додава дека со почетокот на работењето на рудникот во Иловица – Штука, ќе се отворат и три пати повеќе дополнителни индиректни работи места за локалните добавувачи, како резултат на определбата на компанијата да соработува со локални компании.


Манчевски: Од вработените по Рамковен договор, 958 ќе почнат да одат на работа


Скопје, 28 март, 2018 - 13:38 (META) 

Направен е план за распределба на работни места во институциите од јавниот сектор на 958 лица од вкупно 1.600 кои се вработени согласно Рамковниот договор, соопштија денеска министерот за информатичко општество и администрација Дамјан Манчевски и вицепремиерот за спроведување на Рамковниот договор, Хазби Лика.

– По анализата на која што работевме изминатиот период и спој на потребите на институциите и професионалните квалификации на вработените, направивме план за распределба на 958 лица, вработени по Рамковен договор. Основни критериуми по кои се водевме при распределбата се образованието, работното искуство, моменталната состојба со бројот на вработени во институциите каде се распределуваа и местото на живеење – објасни министерот Манчевски.

На процесот им претходеа измени во Законот за административни службеници, Законот за вработените во јавниот сектор, Законот за Управата за јавни приходи, Законот за даночна постапка и Законот за придонеси од задолжително социјално осигурување.

На вработените им се дава една шанса да одбијат некое работно место. Повторното одбивање ќе значи „отказ“, односно раскинување на договорот.

-Тоа што е важно да се напомене е дека доколку овие лица одбијат да бидат распределени на работните места предвидени за нив според споменатите критериуми, ќе бидат префрлени на трансфер листата на МИОА. Во моментот кога ќе бидат побарани за превземање, имаат обврска да ја прифатат понудата. Доколку повторно одбијат, со нив договорот ќе биде раскинат – информираше Манчевски.

Вработувањата на овие лица започнало во 2008 година, и се до 2014-15 година, биле вработувани во согласност со објавените огласи во Секретаријатот за спроведување на Рамковниот договор.