Заев: Во ПИОМ фалат 500 милиони евра, може ќе треба да се зголеми возраста за пензионирање


Скопје, 22 февруари, 2018 - 16:37 (META) 

Jавноста треба да знае некои работи за дупката во Фондот за пензиско и инвалидско осигурување на Македонија (ПИОМ), некои првпат ќе ги соопштам… Секоја година државата ја покрива дупката во ПИОМ и оваа година таа е приближно 500 милиони евра. Тоа се пари што државата мора да ги внесува во Фондот и ако не е тоа, тие пари би се користеле за изградба на патишта, школи, болници, рече премиерот Зоран Заев во Собранието во попладневната сесија на седницата за пратенички прашања. Тој најави можно зголемување на возраста за пензионирање и на придонесите за вработени.

За разлика од првата сесија, попладневната ја водеше новоизбраниот потпретседател на Собранието, Горан Мисовски.

Одговарајќи на прашањето на пратеничката од СДСМ, Фросина Ташевска – Ременски за дупката во ПИОМ, Заев рече дека за побараните информации секако ќе мора да се одговорат во писмена форма, но и дека поради сериозноста на прашање „се чувствува должен да каже некои работи“.

– Oва е важно прашање зашто актуелнитe пензионери се загрижени, но идните пензионери треба да бидат уште позагрижени. Треба да бидеме загрижени за стабилизирање на ПИОМ. Логиката за падот на невработеноста значи дека тој треба да се полни, но тој создава се поголем дефицит. Знаете дека годините на пензионирање пораснаа опционо 67 за маж, 65 за жени, и тоа треба да значи дека Фондот се полни, но тој создава се поголем дефицит. Фондот постојано се празни. Ако сакаме нормално и здраво да зборуваме, чесно треба да зборуваме и некои работи да ги донесеме во нормала – рече Заев обвинувајќи ја претходната власт.

Тој рече дека е ангажирана Светската банка да се направи комплетна анализа на ПИОМ, на сите влезни и излезни податоци, но и да се провери дали секој што добива пензија, има законска основа да ја прима, како и за тие работни места што се субвенционирани. Според премиерот, ако не се постигне целта да се заздрави економијата и да се крене стандардот, ќе мора, поради дупката во ПИОМ, да зголеми возраста за пензионирање и височината на придонесите.

– Веројатно ќе треба да се повлечат непопуларни мерки. Но, сакаме да го надминеме проблемот со заздравување на економијата. Ете, Македонија излезе од криза, има заинтересирани за инвестиции и тоа е стабилната основа и за ПИОМ и за нови работни места и за повисоки плати, до нивото додека економијата порасне до степен за достоинствени плати во Македонија, тоа е моментот когоа треба да се прекрши заминуваањето во странство од младите. Но ако не биде така, јас мора да ги соопштам и непопуларните мерки што би се презеле. Тоа се покачување на годините за пензија и да ги зголемиме придонесите. Но, тоа мора да го издржи економијата, оти ваквата мерка може да одврати инвестиции. Затоа сме насочени кон издржани мерки. Но и опозицијата мора да биде тука, да испраќаме сигнали за силна држава. Целото ова како механизам мора да биде ставено на здрави основи, без популизам. Се надевам нема да се покачи старосната граница и нема да се покачат придонесите. Но, тоа ќе значи дека е јака економијата – рече Заев.


Манчевски: Институциите мора да ги регистрираат вработените за да исплатат плати


Скопје, 22 февруари, 2018 - 12:33 (META) 

Јавната администрација нема да може да земе плата, ако државните институции не ги регистрираат своите вработени во информатичкиот систем за управување со човечки ресурси, најави денеска министерот за информатичко општество и администрација, Дамјан Манчевски.

Институциите кои не ги внеле податоците за вработените во регистарот, имаат рок од три месеци тоа да го сторат. Законските прописи со кои се предвидува оваа мерка, веќе се поминати во Собрание и според Манчевски, се чека објавата во Службен весник за да стапат во сила.

Тој додаде дека податоците од регистарот се од исклучителна важност за следење на состојбите во повеќе од 1.300 институции.

– Целосното ажурирање на податоците и пополнет регистар ќе дадат јасна слика за моменталната состојба во администрацијата, бројот на слободни работни места, старосната структура, бројот на лица пред пензија и др. За пополнување на слободните работни места ќе може да се најде соодветен кадар кој ќе ги исполнува потребните критериуми и ќе може да се преземе од трансфер листата, онака како што пишува во законот – изјави Манчевски.

Тој потенцираше дека со оваа мерка конечно ќе се добие прецизен одговор, на едно од најчесто поставуваните прашања, колкав е бројот на вработените во јавниот сектор.

– И по две години од воспоставувањето на регистарот, за кој се платени над 2.153.000 евра пари од граѓаните, тој се уште не ги дава потребните информации, за бројот на вработени во јавниот сектор.Тоа е затоа што, системот воопшто не бил дизајниран да го дава бројот на вработени. Тоа не се барало. Во времето кога системот е правен, тоа било државна тајна – додаде Манчевски.

Тој информираше дека, во моментов од 1303 институции, 259 институции немаат внесено податоци, односно 173 немаат побарано воопшто согласност од МИОА и немаат активна систематизација, а 86 и покрај одобрената администрација не внеле податоци за своите вработени во регистарот.

Директорката на Управата за јавни приходи УЈП, апелираше до работодавците од јавниот сектор дека имаат рок од три месеци за да ги регистрираат вработените.

– Доколку работодавачот од јавниот сектор не ја исполнил законската обврска за внес на податоците во регистарот на вработени лица во јавниот сектор, системот за интегрирана наплата во декларацијата за прием ќе пријави грешка со порака дека обврската не е исполнета. Контролата на податоците за вработените во јавниот сектор од страна на УЈП ќе започне да се врши по истекот на три месеци од стапување на сила на законските измени – додаде Лукаревска.


Манчевски: Со реформите ќе се деполитизирa администрацијата и ќе се отворат податоците


Скопје, 21 февруари, 2018 - 13:15 (META) 

Стратегијата за реформа на јавната администрација 2018-2022 година која вчера беше усвоена на владина седница предвидува четири клучни области – креирање и размена на политики, јавна служба и управување со човечки ресурси, одговорност, отчетност и транспарентност и давање услуги и ИКТ поддршка на администрацијата, информираше денеска на прес-конференција министерот за информатичко општество и администрација, Дамјан Манчевски.

Тој истакна дека во стратегијата се предвидува и план за деполитизација на администрацијата кој, како што рече, е еден од основните проблеми кои што биле детектирани во изминатиот период. Деполитизацијата, вели Манчевски, ќе се врши, преку унапредување на постапките за селекција, вработување и унапредување врз начелата на заслуги, еднаков и фер третман, како и правична застапеност на сите заедници. Посебно внимание ќе се посвети на професионализацијата на високите раководни структури и ќе се воведе категорија на високи државни службеници.

Во Стратегијата е предвидено и дефинирање на системот на плати и подготвување на нов закон за плати во јавниот сектор. Целта, вели Манчевски, е утврдување на правичен систем на плати кој ќе биде заснован на принципот „еднаква плата за еднаква работа“.

– Значаен дел од Стратегијата претставува и системот за отворени податоци. Тоа е стратешки пристап на отвореност и достапност на информации за што е потребна сериозна кадровска и техничка подготвеност на сите институции. Сега на различно ниво е подготвеноста на институциите и тоа е најголемиот предизвик. Голем дел од овој проект е обуката но и подигнувањето на свесноста внатре во институциите за важноста на овој систем. Преку системот ќе бидат достапни голем број на бројки, анализи, конкретни податоци извлечени од документи. Сите институции ќе ја имаат обврската сите документи да ги преработат во мета податоци за да може да бидат лесно поврзливи и да може да се прават споредби, анализи и да се согледуваат состојбите – рече Манчевски.

Тој информираше дека од оваа година ќе профункционира и Централниот електронски регистар на населението и дека значително ќе се зголеми бројот на електронски услуги достапни за граѓаните.

– Реформата на јавната администрација е од клучно значење и за животот на граѓаните и за евроатлантските интеграции и затоа одлучивме Советот за реформи во јавната администрација да го води премиерот Зоран Заев – додаде Манчевски.

На прашањето што се случува со оние луѓе кои се вработени и земаат плата, а не доаѓаат на работа, Манчевски рече дека со законските измени кои веќе се во процедура овие луѓе, согласно нивните квалификации, ќе можат да бидат прераспределени во целиот јавен сектор, како болници, училишта и јавни претпријатија, а не како до сега само во министерствата и уште мал број други институции.


Железничкиот сообраќај е нормализиран, вработените го прекинаа штрајкот


Скопје, 13 декември, 2017 - 20:00 (META) 

Патничкиот и товарниот железнички сообраќај е нормализиран, откако попладнево, на вработените во „МЖ-Транспорт“, им беше исплатена платата  за октомври.

Денеска, со менаџерскиот тим на компанијата се сретнаа вицепремиерот за економски прашања, Кочо Анѓушев и министерот за транспорт и врски, Горан Сугарески.

Од Министерството за транспорт и врски информираа дека денеска, најдоцна до утрешниот ден, ќе се обезбеди дел од потребните пари за покривање на загубите за патнички сообраќај во „Македонски Железници – Транспорт“, а вработените треба во најбрз рок да овозможат повторно да профункционира железничкиот сообраќај.

Вработените, два дена штрајкуваа поради неисплаќање на вториот дел од платата за октомври.


Министерството за транспорт и врски до утре исплати дел од платите во МЖ-Транспорт


Скопје, 13 декември, 2017 - 13:31 (META) 

Министерството за транспорт и врски (МТВ) денеска, најдоцна до утрешниот ден, ќе обезбеди дел од потребните пари за покривање на загубите за патнички сообраќај во Македонски Железници – Транспорт, но вработените треба во најбрз рок да овозможат повторно да профункционира железничкиот сообраќај.

Ова го соопштиле вицепремиерот за економски прашања Кочо Анѓушев и министерот за транспорт и врски Горан Сугарески  на денешната средба со менаџерскиот тим на МЖ Транспорт и со претставници на штрајкувачкиот одбор. Вработените втор ден штрајкуваат поради неисплаќање на вториот дел од платата за октомври.

„Министерството за транспорт и врски во рамките на своите надлежности и понатаму ќе продолжи со исплата на средства на име на трансфери и субвенции кон Железница, но потребно е да се создадат услови за нормално функционирање на железничкиот систем. Во случај на продолжување на блокада на железничкиот сообраќај ќе се доведе во прашање исплатата на заостанатите плати за сите вработени во железничките претпријатија“, стои во соопштението од МТВ.


Патничкиот и товарниот железнички сообраќај се во прекин, поради штрајк на работниците


Скопје, 12 декември, 2017 - 10:51 (META) 

Железничкиот товарен и патнички сообраќај се во целосен прекин, бидејќи вработените штрајкуваат и си го бараат вториот дел од платите за октомври.

Вчера, од „МЖ-Транспорт“ информираа дека најпрво беше прекинат товарниот сообраќај, а патничкиот, од синоќа на полноќ.

Нема информација до кога возовите нема да сообраќаат и дали барањето на вработените ќе биде исполнето, што е услов за прекин на штрајкот.


ВМРО-ДПМНЕ: Заев и Анѓушев ги лажат 1.700 вработени во „Фени“, „Колска“ и „Еурокомпозит“


Скопје, 9 ноември, 2017 - 15:12 (META) 

СДСМ си поигрува со судбините на над 1.700 вработени од фабриките „Фени Индустри“, „Колска“ и „Еурокомпозит“ и од доаѓањето  на власт па се до денес ги лаже вработените во овие три фирми, обвини Дарко Костовски на прес-конференција во седиштето на ВМРО-ДПМНЕ.

Според Костовски, премиерот Зоран Заев и вицепремиерот Кочо Анѓушев во два наврати од септември досега ги уверувале вработените во „Фени Индустри“ дека владата се грижи за нивните интереси и ќе најде решение за проблемот, но наспроти тоа дошло само до блокирање на сметката на компанијата.

–  Единствено што се погрижија СДС и Анѓушев за „Фени Индустри“ според медиумите е да ја блокираат сметката заради набавката на струја од страна на ЕДС – фирма која е на Кочо Анѓушев – обвини Костовски.

Според него, Анѓушев и Заев од 28 јуни ги излажале вработените на прилепски „Еурокомпозит“ дека ќе им се исплатат платите и ќе се најде решение за фирмата, но тоа не е остварено досега. Костовски вели дека ситуацијата е иста и со вработените во велешка „Колска“.


Владата ќе го решава статусот на „Еурокомпозит“


Скопје, 24 октомври, 2017 - 16:23 (META) 

Премиерот Зоран Заев денеска се сретнал со синдикални претставници на фирмата „Еурокомпозит“, со кои разговарал за решавање на проблемите на 240 вработени.

На средбата, Заев ги информирал синдикалните претставници дека следната недела на владина седница ќе се донесе одлука за обезбедување средства за една плата на вработените во „Еурокомпозит“.

– Се разгледува можноста за решавање на егзистенцијалното прашање на вработените, кои со месеци не примаат плата, преку Законот за материјално обезбедување невработени лица, поради приватизација на претпријатија со доминантна сопственост на државата. Ставот на Владата е да се разгледа можноста за системско решавање на статусот на претпријатието „Еурокомпозит“ – соопштил Заев.

Владата разгледува колку средства се потребни за набавка на потребните репроматеријали, за да се овозможи производство. Една од опциите е претпријатието да биде во државна сопственост и да продолжи да функционира.

– Со добро менаџирање и ако се има добра волја да му се помогне на претпријатието, „Еурокомпозит“ може добро да работи и да произведува за потребите на Министерство за внатрешни работи, Министерство за одбрана, други договорни страни – е ставот што го пренесоа синдикалните претставници, на премиерот Заев.

Потребно е да биде решен и проблемот со неисплатени придонеси на вработените во временски период од пет години, поради што сметката на претпријатието е блокирана.


Царовска: Зголемувањето на платата во градинките ќе биде до 2.040 денари


Скопје, 12 октомври, 2017 - 11:59 (META) 

Eфектот од зголемувањето на минималната плата и зголемувањето од 2 процента кај вработените во градинките ќе биде до 2.040 денари во зависност од нивното работно место, рече денеска министерката за труд и социјална политика, Мила Царовска.

– Основната бруто-плата пред зголемувањето од 2 процента за септември за одредено работно место би изнесувало 15.090 денари, со зголемувањето од 2 отсто на бруто-платата добиваме сума од 15.392 денари, а со зголемувањето на минималната плата за истата бруто-плата добиваме 17.130 денари. Тоа значи дека зависно од одредено работно, место ефектот од зголемувањето од 2 процента и зголемувањето на минималната плата за вработените во градикните ќе изнесува до 2.040 денари – рече на денешната прес-конференција министерката за труд и социјална политика, Мила Царовска.

Овие средства на вработените во градинките им се исплатени со септемвриската плата, која се исплаќа во октомври.

Царовска додаде дека минималната плата во иднина ќе мора да се исплаќа бидејќи тоа е регулирано преку Управата за јавни приходи, каде нема да можат да поминат плати пониски од законски предвидената минимална плата од 12.000 денари.


Анѓушев: „Фероинвест“ и другите мои компании нема да учествуваат на државни тендери


Скопје, 19 септември, 2017 - 10:45 (META) 

Вицепремиерот за економски прашања, Кочо Анѓушев, најави дека „Фероинвест“ и другите компании кои се во негова сопственост, а законски имаат други управители, нема да учествуваат на државни тендери.

Тој во емисијата „Топ-тема“ на телевизијата „Телма“, појасни дека тендерот за компанијата ЕЛЕМ, случај кој предизвика бурни реакции во јавноста, бил распишан во февруари уште пред да се знае дека тој ќе биде дел од новата влада.

– Тендерот за ЕЛЕМ беше распишан во февруари кога јас не разговарав за вицепремиерско место и никој не знаеше кога ќе има влада. Ние дадовме понуда во рамките на законскиот рок од 60 дена. Понудата е дадена на 14 април, кога повторно воопшто никој не знаеше дали ќе има нова влада и дали ќе бидам составен дел од неа. Потоа постапката продолжи, заврши со две наддавања кои беа распишани од претходното раководство на ЕЛЕМ, во кои „Фероинвест“ доби одредени делови од тендерот, но истите беа поништени. Кога станав потпретседател на Влада, немаше начин како „Фероинвест“ и партнерот да се откажат од тендерот. Вистината е дека „Фероинвест“ не доби ништо на тендерот – појасни Анѓушев.

Тој додаде дека „Фероинвест“ не само на овој тендер, туку нема да добие на ниту еден друг тендер, каде што од другата страна ќе биде партнер државата.

– „Фероинвест“ ќе си работи како што знае да работи на интернационалниот пазар. Фирмите 96 проценти извезуваат. Компаниите имаат 800 вработени кои и понатаму треба да продолжат да живеат и ќе бидат активни во економскиот живот во државата – додаде Анѓушев.

Тендерот со ЕЛЕМ предизвика големо внимание во јавноста бидејќи компанијата „Фероинвест“ е во сопственост на Анѓушев. Тој тогаш не гледаше ништо спорно фирмата да учествува на тендери, бидејќи се запазени сите законски процедури и бидејќи е назначен друг управител.

За овој случај се произнесе и премиерот Зоран Заев, кој кажа дека покрај законите, важен е и етичкиот кодекс и ја повика јавноста будно да следи што ќе се случува.