Саудиска Арабија почна да им издава возачки дозволи на жените


Ријад, 6 јуни, 2018 - 11:21 (META) 

Властите на Саудиска Арабија почнаа да издаваат возачки дозволи на жени, само три недели од стапување на сила на кралската наредба со која им се дозволува на жените да управуваат со возило.

Агенцијата за сообраќај на Саудиска Арабија наведе дека почнала да ги менува меѓународните возачки дозволи за саудиски дозволи, непосредно пред 24 јуни кога жените и службено ќе почнат да возат.

Саудиска Арабија е единствена земја во светот во која жените до сега немаа право да управуваат со возило.

Во септември 2017 година кралот Салман најави дека забраната ќе биде укината во јуни 2018.


Најмалку шест лица се ранети во пукотници од автомобил во Мачерата


Мачерата, 3 февруари, 2018 - 17:36 (META) 

Најмалку шест лица се ранети во пукотници од возило во движење во центарот на италијанскиот град Мачерата, јавуваат светските медиуми. Едно лице е уапсено, а на мета биле мигрантите.

Градоначалникот, Романо Каранчини ги повикал жителите на градот да не излегуваат од своите домови додека трае истрагата.

Во Мачерати неделава беше убиена една млада девојка, а нејзиното распарчено тело било пронајдено во два куфери. Главен осомничен за тоа убиство е имигрант од Нигерија.


Утврдено потеклото на возилото користено во убиството на Оливер Ивановиќ


Приштина, 19 јануари, 2018 - 12:35 (META) 

Истражните органи на Косово потврдија дека со помош не меѓународните организации го утврдиле потеклото на возилото кое било користено во убиството на Оливер Ивановиќ, еден од лидерите на Србите на Косово.

Заменик-директорот на регионалната полиција „Север“ на Косово, Бесим Хоти за „Радио Слободна Европа“ изјавил дека преку меѓународните организации, кои на барање на косовската полиција излегле во пресрет, е утврдено потеклото на возилото, кое беше пронајдено запалено по убиството на Ивановиќ, како и синџирот на сопственици на возилото, од кои последниот е со престојувалиште во Србија.

Хоти изјавил дека во тек е анализа на собраниот материјал, како што се видео-снимки, а земени се и изјави од неколку сведоци.

Тој додал дека истрагата за убиството на Ивановиќ се одвива со полн интензитет од страна на истражната група, а со овластување на јавните обвинители.

– Истражната група ја сочинуваат истражни полицајци и разни експерти од централно и локално ниво – кога велам од локално ниво мислам на регионалната полициска дирекција „Север“ и работна група на истражни полицајци од главната дирекција (од Приштина), а во тесна соработка со припадниците на Еулекс – вели Хоти.

Оливер Ивановиќ, кој беше советник во собранието на општина Северна Митровица и водач на иницијативата „Слобода, демократија, правда“, беше убиен пред својата канцеларија на 16 јануари, оваа година.

Извршителите на убиството сè уште не се пронајдени, а наодот од обдукцијата покажа дека Ивановиќ е убиен со шест куршуми.


Маж со возило влетал во седиштето на СПД во Берлин


Берлин, 25 декември, 2017 - 11:59 (META) 

Педесет и осумгодишен маж се обидел да се самоубие така што со автомобил влетал во седиштето на Социјалдемократска партија на Германија (СПД) во центарот на Берлин, при што се здобил со полесни повреди.

Како што се наведува, возилото минало низ стаклената врата на седиштето, а во него полицијата пронашла канистри со бензин и боци плин.

Од ударот настанал мал пожар, но автоматскиот систем за гаснење пожар во зградата брзо го изгасил.

Полицијата не го соопшти името на мажот, а нејасно е зошто го избрал седиштето на СПД како своја мета.

Возачот е пренесен во болница, а полицијата и државните безбедносни служби го истражуваат случајот.


Возило влета во толпа во Мелбурн – 19 лица се повредени


Мелбурн, 21 декември, 2017 - 10:51 (META) 

Најмалку 19 лица се повредени откако џип влета помеѓу пешаци, соопшти австралиската полиција, додавајќи дека возачот е уапсен. Засега нема информации дали станува збор за терориристички напад.

„Би-Би-Си“ јави дека полицијата во Мелбурн соопшти дека станува збор за „намерен чин“, но дека се уште е рано да се зборува за мотивите за нападот.

– Врз основа на тоа што го видовме, веруваме дека станува збор за намерен чин. Мотивите не се познати – рече Расел Барет, началник на полицијата на австралиската сојузна држава Викторија.

Очевидецот Кри Гет вели дека стоел на аголот на улиците Флиндерс и Елизабет со кафе во рака кога слушнал врескање.

– Кога се свртев, видов многу тела на земја. Видов автомобил кој гази луѓе. Летаа тела на сите страни – рече Гет.

Тој наведува дека помеѓу 60 и 100 лица ја минувале раскрсницата кога во толпата влетал автомобил, кој се движел со брзина од околу 70 километри на час.

Локалните медиуми јавуваат дека полицијата ги повикала граѓаните да го избегнуваат ова подрачје.


Запален автомобил во населбата Ѓорче Петров


Скопје, 23 ноември, 2017 - 13:54 (META) 

Ноќеска, околу еден часот по полноќ, бил запален автомобил на паркиралиште на улицата Борис Сарафов, во скопската населба Ѓорче Петров, информира МВР.

Станува збор за возило марка „опел астра“, сопственост на 38-годишниот Г.Т. од Скопје. Од полицијата велат дека засега не се познати причините за опожарувањето на возилото, кое целосно изгорело.

Огнот, како што додаваат од МВР, делумно зафатил и автомобил „даеву матиз“, сопственост на Н.С. (35), кое било паркирано до „опелот“.

Поражот го изгаснала екипа на скопската противпожарна бригада.

Увид на местото ќе се врши во текот на денот.


Возило со 14 мигранти откриено кај селото Удово


Валандово, 9 октомври, 2017 - 13:31 (META) 

Полициска екипа од Валандово вчера на бензинската пумпа кај селото Удово, пронашла автомобил, марка „ауди а6“ со скопски регистарски ознаки, во кое имало 14 мигранти од Пакистан, информира МВР.

По извршениот увид, автомобилот и мигрантите биле преземени од екипа од полициската станица од граничниот премин Богородица, а за случајот бил известен јавен обвинител. По негова наредба, возилото било задржано во полициската станица на преминот Богородица, а мигрантите биле однесени во Прифатниот центар за странци во Скопје.

Инаку, како што информираат од МВР, регистарските таблички на возилото биле од товарно возило „застава“.

Се преземаат мерки за целосно расчистување на случајот, велат од полицијата.


Причините за пожарот во возилото на таткото на Боки 13 засега непознати за полицијата


Скопје, 3 октомври, 2017 - 13:26 (META) 

Возило, марка „бмв икс 5“, ноќеска било опожарено на улицата Варшавска, во скопската населба Тафталиџе, информираат од полицијата.

Причините за пожарот, кој избувнал околу 1.40 часот, засега се непознати, а возилото, сопственост на Ј.Ј., било целосно опожарено.

Пожарот, како што информираат од полицијата, бил изгаснат од екипа на скопската противпожарна бригада во 2.25 часот.

Увид на местото ќе се врши денеска.

Инаку, медиумите пренесуваат дека запаленото возило било паркирано пред семејната куќа на Бојан Јовановски, познат како Боки 13, а бил сопственост на неговиот татко.

Инаку, Бојан Јовановски е поранешен шоумен и активист, а недоамна беше избран за претседател на Меѓународниот сојуз за цивилно општество и социјално загрозени категории на граѓани – Скопје.


Полицијата трага по скопјанец осомничен за убиство на поранешната партнерка


Гостивар, 17 септември, 2017 - 17:54 (META) 

Полицијата и гостиварското јавно обвинителство трагаат по скопјанец, осомничен дека ја убил својата поранешна партнерка, чие тело денеска било пронајдено на улица во Гостивар, соопшти Јавното обвинителство.

Како што информираат оттаму, првично било пријавено дека жената настрадала во сообраќајна несреќа, откако жители на Гостивар забележале возило како го напушта месотото на кое веднаш потоа бил пронајден трупот. Но, при увидот, јавниот обвинител од ОЈО Гостивар утврдил дека починатата има убодни рани по телото и дека станува збор за насилна смрт.

Екипите од крим-техника констатирале дека „пред ударот од возилото, жената била неколкупати прободена со остар предмет“. Јавниот обвинител издал наредби за обдукција на телото и за вештачење на трагите од местото.

Истрагата утврдила дека починатата жена во последните пет месеци живеела во Гостивар, каде се преселила од Скопје поради нарушени односи со партнерот со кого била во вонбрачна врска.

„По насока на јавното обвинителство, истражено е местото на живеење на поранешниот партнер на сега починатата, при што е пронајдено возилото и истото е дадено на понатамошно вештачење. Осомничениот, жител на Скопје, во моментов е недостапен на органите на прогонот. Основното јавно обвинителство Гостивар издаде наредби за посебни проверки на граничните премини и на патарините за пронаоѓање и за утврдување на идентитетот на осомничениот“, стои во соопштението на обвинителството.


Семејна расправија во Шпанија заврши како терористички напад


Мадрид, 6 септември, 2017 - 9:55 (META) 

Најмалку две лица се повредени откако автомобил влета во група луѓе пред бар во шпанскиот град Хуелва, што предизвика страв од тероризам.

Полицијата доцна синоќа соопшти дека причината за нападот најверојатно е семејна расправија, која се случила нешто пред инцидентот. Повредени се двајца мажи, на возраст од 18 и од 31 година.

Очевидци направиле видеоснимка, на која се гледа црн автомобил сред улица и луѓе собрани околу возилото, како фрлаат на него столици и други предмети. Потоа се гледа маж како излегува од возилото и бега. Полицијата соопшти дека го уапсила возачот, но не е познато со какви обвиненија ќе се соочи.

– Граѓаните претрпеле напад на паника затоа што виделе автомобил како влетува меѓу луѓе – изјави советникот за безбедност на градот Хуелва, Енрике Гавин.