!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Изменет сообраќаен режим поради натпреварот помеѓу „Вардар“ и „Фенербахче“


Скопје, 17 август, 2017 - 15:59 (META) 

СВР-Скопје денеска воспостави посебен сообраќаен режим на движење на возила и на пешаци кон Градски стадион, поради вечерашниот натпревар помеѓу фудбалските клубови „Вардар“ и „Фенербахче“, кој ќе почне во 20 часот.

„Идентично на мерките од неодамна одржаниот Суперкуп на УЕФА, се пропуштаат само возила и лица кои имаат посебни акредитации за движење кон стадионот и кон објектите лоцирани во непосредната околина на Градски парк, како и оние лица кои што имаат билети за најавениот фудбалски натпревар“, се вели во соопштението на МВР.


Уапсени двајца Срби во Грција за кражба на луксузни возила


Солун, 9 август, 2017 - 12:47 (META) 

Грчката полиција уапсила двајца државјани на Србија осомничени за кражба на неколку луксузни автомобили на Халкидики.

Уапсени се 24-годишна девојка и 33-годишно момче за кои се наведува дека биле јадрото на групата која секојпат крадела автомобили во различен состав.

Украдените возила биле криени во куќа која привремено ја изнајмиле на Халкидики.

Во соопштението на полицијата се наведува дека осомничените од 13 јули во поширокиот регион на Касандра украле четири возила марка „ленд ровер“, а се обиделе да украдат уште едно.

Истрагата продолжува за да се истражи дали осомничените учествувале во уште некои кривични дела.

Приведените ќе бидат изведени пред обвинителот на регионот Халкидики.


Експлозија и пожар во стан во Охрид, еден повреден, седум автомобили оштетени


Охрид, 9 август, 2017 - 11:55 (META) 

Едно лице било потешко повредено во експлозија што вчера во 22.24 часот се случила во стан на улицата Сатеска во Охрид, соопшти денеска полицијата.

Како што информираат од СВР Охрид, од експлозијата, која најверојатно била предизвикана од плинска боца, дошло до пожар, кој бргу ја зафатил покуќнината и почнал да се шири низ собите. Сопственикот на станот со тешки повреди бил префрлен на Хируршкото одделение во Општата болница во Охрид.

Од пожарот и експлозијата, покрај штетите на мебелот и на прозорците на станот, оштетени биле и седум возила, паркирани во близина на зградата.


Возила го блокираа булеварот пред судот, продолжува протестот против обвиненијата на СЈО


Скопје, 30 јуни, 2017 - 13:19 (META) 

Неколку десетици граѓани денеска со своите автомобили го блокираа булеварот Гоце Делчев пред Кривичниот суд во Скопје, во знак на протест против обвиненијата што вчера ги поднесе Специјалното јавно обвинителство. До судот се поднесени и барања за одредување притвор на високи функционери на ВМРО-ДПМНЕ и поранешни министри, меѓу кои и за лидерот на партијата и поранешен премиер, Никола Груевски.

Инаку, денеска истекува рокот од 24 часа во кој судот треба да донесе одлука по барањата за притвор и за мерки за претпазливост против дел од обвинетите во случаите на СЈО.

Пред судот нема никакви скандирања, а демонстрантите само седат во своите автомобили и го блокираат булеварот, пренесува порталот „А1 он“. Околу судот е зголемено полициското обезбедување.

Синоќа околу 300 граѓани се собраа пред Кривичниот суд на протест против обвиненијата на СЈО, каде извикуваа „Македонија“ и „Нема да ви помине“.

Вчера, Никола Груевски на прес-конференција во партиското седиште рече дека ВМРО-ДПМНЕ била нападната и дека завршила нивната конструктивност.

– Ако мислат дека ВМРО-ДПМНЕ ќе го преспие ова, длабоко се излажале. Сакам да објавам дека конструктивноста кои некои ја нарекуваа попустливост во нашето дејствување завршува денеска. Сега е време историја да оценува и да суди – рече Груевски.

Специјалното јавно обвинителство поднесе 17 обвиненија против 94 физички и седум правни лица. СЈО побара и да им биде одредена мерка притвор на Груевски, на поранешниот директор на УБК, Сашо Мијалков, на поранешните министри Миле Јанакиески, Гордана Јанкулоска и Елизабета Канческа-Милевски и на уште 13 други лица.

Кривичниот суд вчера доцна попладне соопшти дека ги примиле сите обвиненија на СЈО и дека ги распределиле кај судии. Оттаму најавија дека по барањата за определување мерки за претпазливост и притвор одлучуваат судии од кривичните совети.

Според Законот за кривична постапка, судот има рок од 24 часа да одлучи по барањата за одредување притвор и мерки за претпазливост.


Скопјанец осомничен за серија кражби од возила во Охрид


Охрид, 26 јуни, 2017 - 12:46 (META) 

Секторот за внатрешни работи Охрид поднел кривична пријава против 30-годишниот Д.Д. од Скопје поради основан сомнеж дека извршил серија кражби во автомобили на туристички локации во Охрид.

Полицијата го сомничи скопјанецот дека користејќи соодветен алат и физичка сила провалувал во автомобили, сопственост на македонски и на странски државјани, од кои одземал пари, лаптоп-компјутери, хард-дискови, видеокамери, облека, обувки, сувенири, спортска опрема, мобилни телефони и кредитни картички.

Осомничениот, како што соопштија од СВР Охрид, кражбите ги извршил во текот на март и на април оваа година, во туристичкиот комплекс „Свети Наум“ и на паркиралиштето кај комплексот „Музеј на вода“ во близина на Заливот на коските.

Имотната корист што ја стекнал осомничениот дополнително ќе се утврдува, велат од полицијата.


Град Скопје: Фонтаната е квалитетна, но не е за тешки товарни возила


Скопје, 8 јуни, 2017 - 11:10 (META) 

Градот Скопје денеска преку соопштение реагира на информациите што се појавија во медиумите поради пропаѓањето камион во површинската фонтана на плоштадот Македонија, како и на обвинувањата дека станува збор за неквалитетна градба на оваа фонтана.

„Сакаме да нагласиме дека површинската фонтана на плоштадот Македонија е градена според сите стандарди за изведба на ваков тип фонтани. Станува збор за површинска, таканаречена сува фонтана со вкопано армирано-бетонско корито. Водата што прска од фонтаната понира меѓу плочите, се прочистува и се враќа во системот. Поради таквиот начин на работа, површинските фонтани никаде во светот не се предвидени по нив да се движат возила, а особено не тешки товарни возила“, стои во реакцијата.

Од Градот Скопје наведуваат дека околу плоштадот Македонија има кружна црна патека од гранит којашто е предвидена да издржи тежина на камиони и оти возачот на камионот е виновен за инцидентот бидејќи не се придржувал до препораките на чуварите, кои ги насочувале камионите на плоштадот.

„Но, и покрај укажувањата на чуварите, возачот на камионот го завртел возилото кон фонтаната и пропаднал. Други камиони кои ги почитувале укажувањата од чуварите да се движат по црната гранитна патека без пречки ја транспортирале опремата за бината. Оттука, грешката за пропаѓањето на камионот во површинската фонтана на плоштадот Македонија е исклучиво кај возачот на камионот кој претходно бил предупреден дека возењето по оваа фонтана е забрането“, се вели во соопштението и се додава дека веќе е направен увид на фонтаната и дека наскоро ќе биде поправена и повторно ставена во функција.


Тодоров ги довел во ризик и бебињата во возилата на итната помош, обвинува СДСМ


Скопје, 19 март, 2017 - 15:21 (META) 

Набавените 69 возила на итната медицинска помош, до кои се сликаше Никола Тодоров, немаат приклучок за инкубатор за бебиња, па бебињата за кои е потребна итна интервенција се превезуваат со стари возила кои често се расипуваат, обвинија денеска од СДСМ.

– Откако завршија два човечки животи во возило на итната медицинска помош, кое се расипа на патот од Крива Паланка кон скопските клиники, деновиве во ризик е доведен и живот на бебе! Според информациите што ги имаме, од Охрид кон Скопје било превезувано бебе во старо возило на итна медицинска помош, кое се расипало на Стража. Поради тоа бебето на Стража било префрлено во друго возило на итната помош. Во старо возило на итна помош и завчера било пренесувано друго бебе, исто така од Охрид кон Скопје – изјави денеска на прес-конференција пратеничката во Собранието и претседател на комисијата за здравство на СДСМ, Јагода Шахпаска.

Таа истакна дека ова е уште еден доказ за несовесните политики во здравството, кои, како што рече, мора да бидат спречени.

– Несоодветните возила на итната помош за коишто се дадени милиони евра пари на граѓаните и негрижливото одржување на возилата уште еднаш покажуваат дека Никола Тодоров беше министер за тендери, а не за здравство. Тодоров, Груевски и нивните соработници наштетија на граѓаните и го доведоа во ризик нивното здравје. Во програмата на новата реформска влада, здравјето на граѓаните е врвен приоритет – рече Шахпаска.

Од охридската болница за „Телма“ потврдиле дека овој месец имале два случаи во кои бебиња биле префрлени од Охрид во Скопје, но негираат дека возилата со кои биле пренесувани бебињата се расипале по пат.


Полицијата пронајде 42 килограми марихуана во Струга


Охрид, 25 февруари, 2017 - 13:14 (META) 

При координирана акција на криминалистичката полиција од Струга и од Охрид, пронајдени се околу 42 килограми зелена тревкаста материја во патнички автомобил.

Од СВР Охрид информираат дека акцијата била реализирана околу 22 часот, во близина на еден хотел на улицата Димче Ковачески во Струга.

– Полициските инспектори заедно со полициски службеници од полициската станица во Струга, извршија запирање на патничко моторно возило „мини купер“ со струшки регистарски ознаки, управувано од Ф.И. (31) од струшкото село Калишта. При извршен преглед во возилото, забележани се пет вреќи со тревкаста материја, завиткана во повеќе јутени и платнени пакувања. Дополнително, во предната лева врата од автомобилот, пронајдена е едно мало најлонско пакување со бела прашкаста материја – информираат од СВР Охрид.

Оттаму велат дека при извршен претрес во домот на Ф.И. во селото Калишта, пронајдени се две црни најлонски кеси со траги од тревкаста материја.

Пронајдените предмети се одземени и предадени на вештачење во Министерството за внатрешни работи во Скопје, по што ќе биде поднесена соодветна кривична пријава.


Алтхаузер – Нухиу: Создавањето правна држава е главен столб за развој


Скопје, 6 февруари, 2017 - 11:41 (META) 

Германската влада на Министерството за внатрешни работи на Македонија му донираше опрема за потребите на граничната полиција. Договорот за примопредавање на опремата денеска во МВР го потпишаа министерот за внатрешни работи, Агим Нухиу, и амбасадорката на Германија во земјава, Кристине Алтхаузер.

Станува збор за донација вредна 60.000 евра, а која се состои од четири возила од марката „дачија дастер“ за граничната полиција.

По тој повод, министерот Нухиу истакна дека донацијата ќе ги зајакне капацитетите на граничната полиција во справувањето со предизвиците и дека интензивните реформски зафати што се одвиваат во полицијата се должат на партнерството и на помошта што МВР ја добива од повеќе европски земји, меѓу кои и Германија.

Германската амбасадорка изјави дека возилата се симбол на соработката меѓу двете земји, односно меѓу германската сојузна полиција и македонската гранична полиција.

Алтхаузер нагласи дека во краткиот разговор што го имале со министерот Нухиу, главна тема било создавањето правна држава како главен столб за развојот на земјата.

Таа рече дека опремата што денеска беше донирана на МВР е дел од планот мерки договорен меѓу германската сојузна полиција и македонската гранична полиција за 2017 година.

– Покрај техничката опрема, договорот, исто така, опфаќа и обука за проверка на документи, обука на возачи, гранича контрола, обработка и анализа и безбедност на воздушниот сообраќај. Оваа година ќе се спроведат вкупно седум обуки на граничната полиција во Германија – рече Алтхаузер.


Снегот и силниот ветер го блокираа сообраќајот на автопатот Белград – Ниш


Белград, 6 јануари, 2017 - 12:18 (META) 

Поради снегот и силниот ветер во прекин е сообраќајот на автопатот Белград – Ниш, кај клучката Трупале, во околината на Ниш, а дел од возилата се пренасочуваат по стариот пат преку Алексинац, јавува дописникот на „Мета“ од Белград.

Во прекин е и сообраќајот на патот Ниш – Југ, на излезот од Ниш, каде дојде до верижен судир на возила, во кој се повредени 17 луѓе, од кои шест деца.

Поради снегот, кој на некои од локалните патишта достигнува висина и до два метри, во Ниш и во околината утрово беа скратени голем број од приградските автобуски линии, а скратени се и дел од градските автобуски линии поради снежните наноси на коловозите.

Силниот ветер и снегот предизвикаа и дефекти на електричната мрежа на периферијата на Ниш, поради што утрово без електрична енергија останаа седум села и приградски населби, а без струја неколку часа остана и центарот на Ниш.

Прекини во сообраќајот има и на делниците Врање – Баревиќ, Влас – Крива Феја, Долни Милановац – Мајданпек и на патот Зајачар – Бољевац. Снегот, кој од синоќа непрекинато врне во Србија, завеа и неколку села во околината на Пирот, но засега нема проблеми со снабдувањето со електрична енергија и со храна на населението.