!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Координаторот на републиканците во Конгресот на САД ранет во вооружен напад


Вашингтон, 14 јуни, 2017 - 15:53 (META) 

Висок претставник на републиканците во Конгресот на САД, денеска бил ранет во вооружен напад за време на бејзбол-тренинг во Вирџинија, јавуваат американските медиуми.

Полицијата од Александрија, предградие на Вашингтон, соопштила дека во тек е истрага поврзана со „повеќекратни пукотници“ и дека осомничениот е уапсен и се наоѓа во притвор.

Конгресменот од Алабама, Мо Брукс, за „Си-ен-ен“ изјавил дека во нападот бил ранет координаторот на републиканците во Конгресот, Стив Селис.

Нападот се случил додека конгресмените се подготвувале за годишниот бејзбол-натпревар помеѓу демократите и републиканците, кој треба да се одржи утре на стадионот на бејзбол-клубот „Вашингтон нешнлс“.

Засега не е познат идентитетот на напаѓачот, ниту мотивите за пукањето.

Претседателот на САД, Доналд Трамп, по нападот изјави дека тој и неговата администрација се длабоко погодени од оваа трагедија.

Според конгресменот Мо Брукс, по првите пукотници дошло до престрелка помеѓу напаѓачот и обезбедувањето на конгресменот Селис и дека на местото на настанот биле испукани помеѓу 50 до 100 куршуми.

Републиканскиот сенатор од Јута, Мајк Ли, за „Фокс њуз“ изјавил дека Селис бил ранет во колкот, но дека е надвор од животна опасност.


Еден полицаец е убиен, а друг ранет во престрелка во центарот на Париз


Париз, 20 април, 2017 - 22:23 (META) 

Еден полицаец е убиен, а друг е ранет во вооружен напад што вечерва се случил во центарот на Париз, соопштила француската полиција, пренесува „Би-би-си“.

Според информациите на дел од француските медиуми, напаѓачот кој отворил оган кон полицајците бил застрелан и убиен. Престрелката се случила на авенијата Шанзелизе, која е целосно блокирана и каде во тек е операција на француските безбедносни сили.

В недела во Франција се одржува првиот круг од претседателските избори, а џихадизмот е главната тема на изборите по нападите што беа извршени од Исламска држава.

Причините за нападот засега се непознати, а како што пренесува „Би-би-си“, засега нема индиции ниту дека станува збор за терористички напад.


Шест лица убиени и осуммина ранети во терористички напад на џамија во Квебек


Квебек сити, 30 јануари, 2017 - 9:56 (META) 

Шест лица се убиени, а осуммина се ранети во вооружен напад на џамија за време на вечерна молитва, што синоќа се случил во канадскиот град Квебек Сити, сооошти канадската полиција, пренесува „Би-би-си“.

Во нападот учестувале две лица, кои отвориле оган во исламскиот културен центар во Квебек, додека во него имало околу 50 верници кои биле на молитва.

Еден од напаѓачите, како што пренесува „Би-би-си“, бил уапсен на самото место, додека другиот во близина на џамијата.

Канадските власти, како што соопштиле од полицијата, нападот го третираат како терористички напад.

„Го осудуваме овој терористички напад на муслимани во центарот, кој е место за молитва и засолниште. Канаѓаните муслимани се важен дел на нашето национално ткиво и за ваквите бесмилени дела нема место во нашите заедници, градови и во земјата“, изјавил канадскиот премиер Џастин Трудо.

Загинатите, според полицијата, се на возраст од 35 до 70 години, а дел од повредените биле во критична состојба.

Во јуни минатата година, истата џамија беше мета на инцидент од исламофоби, кога пред нејзините порти беше оставена свинска глава, со порака „добар апетит“.


Најмалку 13 убиени во напад на пазар во индиската држава Асам


Диспур, 5 август, 2016 - 19:35 (META) 

Најмалку 13 луѓе се убиени, откако вооружена група отворила оган на пазар во индиската североисточна држава Асам, јавуваат светските медиуми.

Локалната полиција за нападот ги обвини припадниците на бунтовничката група Национален демократски фронт на Бодоланд, фракција која се бори за формирање на посебна држава на етничката група Бодо, независно од Асам.

Според информациите, еден од напаѓачите бил убиен во борбите со безбедносните сили во областа Кокрајхар.

Шефот на полицијата на Асам за „Би-би-си“ изјавил дека нападот се случил на пазарот во Балаџан, кој се наоѓа на периферијата на Кокрајхар и додал дека во него, покрај убиени, имало и повеќемина ранети цивили.

Бунтовничката група Националниот демократски фронт на Бодоланд, која е забранета во државата, е една од многуте племенски организирани фракции во зафрлениот североисточен дел на Индија.

Иако областа ужива извесна автономија во рамките на државата, Бодоланд бара да и биде дадена целосна независност.


Израел привремено го забрани влезот за сите Палестинци на нејзина територија


Ерусалим, 10 јуни, 2016 - 11:37 (META) 

Израелската војска денеска соопшти дека привремено им го забранува влезот на сите Палестинци во Израел, со што ги заостри мерките што властите ги воведоа откако вооружени напаѓачи завчера вечерта убија четири лица во Тел Авив.

Портпаролката на израелската војска, пренесуваат светските агенции, изјавила дека во согласност со владините директиви и со проценката на моменталната ситуација, од денеска премините од Појасот Газа, Јудеа и во Самарија ќе бидат отворени за Палестинците само во случај на потреба од медицинска и од хуманитарна помош.

Забраната за влез во Израел, според информациите, ќе биде на сила до недела на полноќ.

Израел вчера соопшти дека ги суспендирал дозволите за влез на нејзина територија за 83.000 Палестинци за време на светиот муслимански месец Рамазан, по пукањето во Тел Авив.

Во нападот, кој, како што е соопштено, го извеле Палестинци, беа убиени четири лица, а седум беа ранети.

Шефот на полицијата во Тел Авив, Моше Едри, изјави дека двајцата напаѓачи се членови на исто семејство од палестинското село Јата, во близина на Хеброн на Западниот Брег, кој беше жариште на неодамнешниот бран насилства.


Идентификуван напаѓачот кој усмрти седум лица во Мичиген


Лансинг, 21 февруари, 2016 - 15:47 (META) 

Полицијата во сојузната американска држава Мичиген го идентификувала напаѓачот што синоќа застрела и уби седум лица во градот Каламазу, јавуваат светските агенции.

Осомничениот, кој бил уапсен кратко по вооружениот напад, е идентификуван како Џејсон Далтон, на 45-годишна возраст, кој бил жител на Каламазу, соопштил претставникот на локалната полиција, Џеф Хедли.

Тој додал дека Далтон немал криминално досие.

Напаѓачот, како што претходно пренесоа медиумите, пукал во луѓето на три различни локации во градот. Тој не пружал отпор при апсењето, а при претресот на неговиот автомобил полицијата пронашла оружје.

Засега нема информации за мотивите за нападот.


Најмалку седум убиени во вооружен напад во Мичиген, САД


Лансинг, 21 февруари, 2016 - 10:24 (META) 

Најмалку седум лица се убиени, а три се ранети откако непознат напаѓач синоќа отворил оган на повеќе локации во градот Каламазу во американската сојузна држава Мичиген, пренесуваат светските медиуми.

Според „Би-Би-Си“, пет лица биле убиени во ресторан, а две на паркиралиште на локален салон за автомобили. Неофицијално, како што пренесува британскиот национален сервис, меѓу убиените е и осумгодишно дете.

Полицијата, според информациите, привела 45-годишен маж и соопштила дека нема повеќе опасност по јавната безбедност.

Осомничениот не пружал отпор при апсењето, а во неговиот автомобил полицијата пронашла оружје.

Заменик-шерифот на Каламазу, Пол Матијас, изјавил дека напаѓачот пукал во жртвите по случаен избор, а настанот го опишал како „најстрашен кошмар“.

Нападот, според извештаите на медиумите, се случил на три локации, пред ресторанот „Крекер барел“, во салон за автомобили на „Киа“ и пред станбен блок.


Тројца убиени во вооружен напад во болница во САД


Колорадо Спрингс, 28 ноември, 2015 - 10:50 (META) 

Двајца цивили и еден полицаец се убиени кога вооружено лице отворило оган во клиника за планирање на семејство во градот Колорадо Спрингс во Соединетите Американски Држави, јавуваат светските медиуми.

Според информациите, уште девет лица биле повредени во престрелката која траела пет часа пред напаѓачот да ѝ се предаде на полицијата.

Поголем број луѓе, како што јавуваат медиумите, биле заробени во зградата на клиниката додека траела престрелката меѓу напаѓачот и полицијата.

Засега нема информации за мотивите за нападот. Осомничениот за нападот е идентификуван како Роберт Луис Диар, од сојузната држава Северна Каролина, но повеќе детали засега не се соопштуваат.

Градоначалникот нa Колорадо Спрингс, Џон Сатерс, на прес-конференција изразил сочувство до семејствата и до блиските на убиените и го оценил инцидентот како ужасна трагедија.

Од полиција соопштиле дека меѓу повредените лица се и петмина полициски службеници кои се хоспитализирани во локалните клиники.