„Волците“ и „Тигрите“ на експертска обука со американските „Фоки“


Скопје, 30 декември, 2018 - 11:19 (META) 

Македонските армиски и полициски специјалци имале заедничка експертска обука со американските „Фоки“ – SEAL тимовите на Воената морнарица на САД, информираше Генералштабот на АРМ.

– Обуката се реализираше во периодот од 17 до 21.12.2018 година на полигоните во касарната „Илинден“, касарната „Ѓорче Петров“ и Армискиот Полигон „Криволак“. За време на обуката тимовите се запознаа со најновите тактики, техники и процедури од процесот на планирање, медицинската обука, реализацијата на снајперски задачи, борба во урбана средина итн. – информира АРМ.

На обуката учествувале тимови од составот на баталјонот за Специјални намени на АРМ – „Волци“, и полициските единици за брзо распоредување (ЕБР) и за специјални задачи (ЕСЗ-„Тигар“), заедно со инструкторски тим од морнаричките „Фоки“.

– Како круна на петдневната обука беше реализацијата на заедничка завршна вежба во која беа опфатени сите елементи од експертската обука – наведува АРМ.


Волци што одат „по риба“ – буквално (видео)


Национален парк „Војажер“, 16 декември, 2018 - 13:04 (META) 

Тим биолози во американската држава Минесота направиле снимки на волци кои скокаат во вода и ловат риби од поток.

Првите вакви снимки на волци беа објавени деновиве на страницата на Фејсбук на Националниот парк „Војажер“ и се резултат на повеќегодишен проект кој опфаќа следење на движењето на волците со ГПС-околувратници.

Откритието на тимот предводено од докторантот Томас Гејбл е објавено преку труд во научното списание Mammalian Biology („Биологија на цицачите“).

Тие забележале дека една  од глутниците во националниот парк поминува многу време покрај еден поток. Истражувајќи на локацијата, забележале дека волците во текот на ноќта стојат на брегот и повремено скокаат во водата откако ќе слушнат звуци на прскање. Кога поставиле камери за ноќно снимање утврдиле дека волците според звуците го откриваат присуството на риби кои ги ловат и потоа ги јадат на брегот.

„Може да видите како волците одеднаш скокаат во водата неколку пати откако слушаат плискање – научиле дека звукот е поврзан со рибите и знаат дека значи храна“ – изјавил истражувачот Том Гејбл за Њујорк Тајмс на 14 декември.

Волците обично се поврзуваат со лов на копнени животни и до сега само во многу ретки случаи е забележено дека ловат риби во приморски подрачја. Такви случаи имало во Аљаска и канадска Британска Колумбија, при мрестењето на лососите.

Според научниот труд, волците од Националниот парк „Војажер“ во Минесота ловат слатководни риби како штуки и бели чистачи. Истото истражување открило дека ова група волци, во недостаток на вообичаен плен како што се елените, јадат боровинки и ловат дабари.

Професорот Џозеф Бамп од Универзитетот од Минесота, специјалист за истражување на дивиот свет, изјавил дека ова ново однесување не е целосно изненадувачко, со оглед на тоа што волците се исклучително адаптибилни во поглед на барање храна.


Волци задавија крава во Пробиштипско


Штип, 14 октомври, 2016 - 15:51 (META) 

Стоката на Ангел Василков од осоговското село Припор, синоќа, околу 19 часот, ја нападнале волци. Задавена е една од десетината крави, кои Василков ги водел низ шумата. Глутницата волци се стрчале кон кравата, која бегајќи завршила во дол. Стопанот потрчал и брзо го потерал стадото кон шталата. Плашејќи се за сопствениот живот, Василков не слегол во долот сè до утрото.

– Утрината, кога отидов таму, ја најдов само главата од кравата. Другото, сè беше изедено. И пред една недела ми снема теле, ама мислев дека некој ми го украл. Го барав, ама не го најдов. Сигурно го изел волк – раскажува Василков.

Сточарот бара организирана заштита од волците. Тој самиот нема со што да ја заштити стоката, па ни сопствениот живот.

– Немам вооружување, ама ако ме нападне, ќе се бранам со секира. Страв ми е, си кажувам. Синоќа многу ми беше страв. Стоката трча, јас викам, нема што да направам, сам тука што ќе направам – сведочи Василков.

Десетина крави и телиња во кочанското село Пресека пред три дена беа задавени од глутница волци. Сточарите во Осоговието сметаат дека е потребно сериозно решение, бидејќи хајките само ги протеруваат волците од еден крај на друг, по што тие напаѓаат ново стадо.


Волци задавиле коза и куче во Средно Нерези


Скопје, 13 август, 2016 - 14:10 (META) 

Синоќа волци влегле во дворови на куќите во населбата Средно Нерези во Скопје и задавиле едно домашно куче-загар, а во соседниот двор убиле и изеле една коза, соопшти денеска Општина Карпош.

Жителите на Нерези забележале голем црн волк кој ги нападнал и куќите од Горно Нерези и предизвикал паника меѓу животните и жителите на овие населби.

Општина Карпош ги предупредува граѓаните на крајна внимателност и да се воздржат од ноќни прошетки по Водно.

Ова не е прв пат во Општина Карпош „на гости” од планината Водно да се спуштаат и да напаѓаат домашни животни меѓу жителите, стои во соопштението.

Случајот во полиција денеска го пријавил жител на Горно Нерези, чии биле убиените животни.


Хајка на волци во Битолско


Битола, 3 октомври, 2015 - 16:53 (META) 

Глутница волци ги преполовија стадата овци на жителите од пелагониските села Ивањевци и Подино, се жалат сопствениците на стадата со добиток. На нивно барање, утрово, ловното здружение „Сокол“ од Битола организираше хајка на волци, при што застрела пет волци од кои три се усмртени веднаш.

Жителите на овие пелагониски села велат дека секоја година стадата им се десеткувани.

– Секоја година волците ни дават по пет до десет овци. Секое излегување на пасиште е погубно за стадата – вели Борис Велевски, жител на Ивањевци.

Од ловното здружение „Сокол“ велат дека на ридиштата опстојуваат глутници волци и дека потребни се неколку хајки по ред.

– Денеска се собравме десетина ловци за да направиме хајка на волците. Во овие ридови ги има многу, па прават големи штети. Денеска застрелавме три, а два ранивме. Претпоставуваме дека ги има уште десетина – вели ловецот Димче Боревски од здружението „Сокол“.