Унгарска вечер во Прилеп


Прилеп, 6 август, 2018 - 10:34 (META) 

Со почеток во 20.30 часот на просторот околу Градскиот Саат во Прилеп, денеска ќе се одржи Унгарска вечер, на која ќе настапат оркестарот „Фокош“ и ФГ „Селенце“. Овој културен настан е организира од Центарот за култура „Марко Цепенков“ од Прилеп, во соработка со Здружението на Унгарци „Телехаз“ и Амбасадата на Унгарија.

Интересно е што Фолклорната група „Селенце“ доаѓа од Бечеј, Војводина, односно Србија. Од истиот град доаѓа и оркестарот „Фокош“.


Заев: Србија е земјата со која односите најмногу ни напреднаа во последните пет години


Белград, 21 ноември, 2017 - 13:32 (META) 

Перцепцијата на граѓаните во Република Македонија е дека Србија е на прво место од соседите со кои најмногу се подобрени односите во последните пет години, сосед со кој граѓаните имаат најдобри лични искуства, сосед чија историја и култура најдобро ги познаваат, сосед за кој се има најдобро мислење, како и сосед со кој би сакале најблиски односи, рекол македонскиот премиер Зоран Заев на заедничката прес-конференција со премиерката на Србија, Ана Брнабиќ, во Белград.

Зборувајќи за регионалната соработка, Заев нагласил дека таа ќе се базира на принципот за еднакви услови за сите, пренесува владината служба за информирање.

– Планот за регионална економска област на Западен Балкан, кој се базира на принципите на еднакви услови за сите во регионот, предвидува наши заеднички интереси: промовирање на понатамошна трговска интеграција, воведување динамичен регионален инвестициски простор, олеснување на регионалната мобилност и креирање агенда за дигитална интеграција – нагласи Заев.

Македонскиот премиер посочил дека со премиерката Брнабиќ се согласиле дека од особен интерес на двете земји е соработката во областа на дигитализацијата, партнертво на отворени влади, ИТ-секторот, како и креирање на култура на иновативни бизниси и претприемачки дух кај младите.

Заев ја оценил економската соработка меѓу Македонија и Србија како константно добра, укажувајќи на фактот што Србија е трет по обем на размена трговски партнер на Македонија, веднаш зад Германија и Велика Британија.

Српската премиерка Брнабиќ истакнала дека унапредувањето на односите меѓу двете земји е од особен интерес на Република Србија, со оглед на фактот дека двете земји делат многу заеднички интереси како што се евроинтеграциите, инфраструктурните проекти во рамките на Коридорот 10 и многу други.

Зборувајќи за малцинските прашања, Заев рекол дека српскиот народ е еден од конститутивните народи наведени во Уставот на Република Македонија и српскиот е службен јазик во општините Старо Нагоричане и Чучер-Сандево, како и еден од службените во Општина Куманово. Зборувајќи за Македонците во Србија, тој истакнал дека е добро што е во службена употреба во повеќе места, се изучува во неколку училишта во Србија, а во Статутот на Војводина, Македонците се наведени како конститутивен народ.


Иванов ќе присуствува на 70-годишнината од доселувањето на Македонците во Војводина


Белград, 27 октомври, 2016 - 10:24 (META) 

Претседателот Ѓорге Иванов ќе присуствува на свечена академија по повод 70-годишнината од доселувањето на Македонците во Војводина, на 30 октомври во Панчево, јави дописничката на „Мета“ од Белград.

Националниот совет на македонското национално малцинство во Србија најавил дека на централната свеченост во Центарот за култура на Панчево ќе присуствува и српскиот претседател, Томислав Николиќ.

Пред одржување на свеченоста, двајцата претседатели ќе посадат дрво на пријателство во паркот на градското собрание.

Николиќ и Иванов ќе присуствуваат и на потпишувањето на документ за збратимување на македонската општина Македонски Брод и на српската месна заедница Јабука.


Дачиќ: Нема да има референдуми за одвојување на Војводина и за спојување на Косово


Белград, 30 септември, 2016 - 14:35 (META) 

Шефот на српската дипломатија, Ивица Дачиќ, денеска ја отфрли можноста за одржување референдуми за одвојување на Војводина од Србија и за спојување на Косово кон Албанија.

– Референдумот во Војводина секако не е можен затоа што за тоа треба да се донесе одлука, а оние кои го предлагаат тој референдум немаат мнозинство да донесат одлука ни во месна заедница, а камоли во покраинско собрание – изјави Дачиќ, коментирајќи ја неодамнешната изјава на лидерот на Лигата на социјалдемократи на Војводина (ЛСВ), Ненад Чанак.
Чанак на 27 септември ја критикуваше поддршката на претседателот на Србија, Томислав Николиќ за референдумот во Република Српска и рече дека ако тоа е во ред, тогаш и во Војводина треба да се одржи референдум.

– Ако е легална одлуката највисоките правосудни институции на една суверена држава да се уриваат на референдум организиран на дел од државна територија, тогаш ЛСВ предлага слична ваква практика да биде воведена и во Србија. Прелагаме во Војводина да се распише референдум за тоа дали граѓаните ја прифаќаат срамната одлука на Уставниот суд на Србија од пред две години, за укинување на статутот на Војоводина и за тоа дека Нови Сад не може да биде наш главен град – изјави Чанак.

Запрашан за коментар на наводите дека и партијата на косовскиот претседател Хашим Тачи, Демократската партија на Косово, предлага референдум за спојување на Косово со Албанија, Дачиќ денеска кажа дека е добро што сите тие коментари се појавиле за меѓународната заедница да може да види дека Србија била во право и дека суштината на нивната политика била обединување на Косово и на Албанија.

– Ние за тоа говоревме 20-30 години. Таму не живеат два народи туку еден народ, тоа не се Косовари, туку се Албанци кои живеат на Косово – додаде Дачиќ.

Тој додаде дека албанскиот народ остварил право на самоопределување преку Албанија, а дека на Косово Албанците се национално малцинство во рамки на Србија, кое нема право на самоопределување.

– Додека не им намигне некој од Западот, тие референдум сигурно нема да организираат – изјави Дачиќ.


Војводина: 19 ученици затруени со гас на час по физичко


Шајкаш, 10 февруари, 2015 - 16:20 (META) 

Деветнаесет ученици од основно училиште во местото Шајкаш во Бојводина се оснесвестиле за време на часот по физичко воспитување, најверојатно, поради труење со плин, јавуваат војводинските медиуми.

– Дошло до масовно труење на деца со гас, а 10 ученици се хоспитализирани во Детската болница во Нови Сад – соопшти портпаролот на болницата, Душан Вуковиќ, додавајќи дека децата се во стабилна состојба и оти ситуацијата е под контрола.

Како што наведува белградски „Блиц“, во салата за физичко образование дошло до течење на гас, поради што на децата им се слошило.

Најпрво едно дете се пожалило, а „додека професорите дошле да видат за што станува збор, одеднаш децата масовно почнале да се оснесвестуваат“, наведува весникот.

Истрагата е во тек, а се проверува дали нешто друго би можело да предизвика масовното труење.