Косово ги донесе законите за формирање армија, Србија на готовс


Приштина, 14 декември, 2018 - 13:01 (META) 

Косовските пратеници претпладнево ги изгласаа трите закони кои се однесуваат на промена на мандатот на Косовските безбедносни сили (КБС) во војска, со што Косово и официјално влезе во процес на добивање своја армија.

Министерот за одбрана на Србија, Александар Вулин, порача дека војската е на готовс.

Седницата на косовскиот парламент, започна со едноминутен молк во знак на почит за, како што рече парламентарниот спикер Кадри Весели, „сите поколенија кои во различни околности, ги жртвуваа своите животи за овој ден“.

– Да ги испочитуваме генерациите на политички затвореници, студентите од студентските движења, интелектуалците и рударите на Косово. Да ги испочитуваме нашите сонародници секаде низ светот, политичките дејци на мировниот отпор, момчињата и девојките на Ослободителната војска на Косово. Ние денеска стоиме тука благодарение на таа натчовечка жртва, горди на минатото и сигурни во нашата евроатлантска иднина – изјави Весели.

Првиот закон што е донесен е законот за трансформација на косовските безбедносни сили во министерство за одбрана, а вториот за трансформација на КБС во оружени сили. Во 11:20 усвоен е и последниот, третиот закон, за служба во безбедносните сили со што официјално заврши процедурата за формирање косовски оружени сили.

-Со ова гласање денеска почнува една нова епоха за нашата држава. Од овој момент официјално имаме војска на Косово – рече Весели.

Министерот за одбрана на Србија Александар Вулин изјави дека е направена процена на ситуацијата на Косово и Метохија и дека за сѐ е информиран и српскиот претседател Александар Вучиќ.

-До доцна синоќа имавме средби со претседателот на Србија и врховен командант на српската војска Александар Вучиќ. Тој е информиран за секој детаљ за сѐ она што се случува на просторот на Косово и Метохија, не само од претставниците на српската војска, туку од сите безбедносни служби – кажа Вулин.

Тој додаде дека српскиот претседател е многу загрижен и заинтересиран за сѐ што се случува на просторот на Косово и дека сите одлуки ќе ги донесе врз основа на директните информации за сѐ што се случува на тој простор.


Вучиќ ги повика Србите да не учествуваат во формирање војска на Косово


Белград, 30 октомври, 2018 - 16:20 (META) 

Претседателот на Србија, Александар Вучиќ денеска ги повика Србите од Косово да не учествуваат во формирање војска во Косово затоа што, како што рече, „Албанците ја формираат не за било што друго туку за да еден ден ја искористат и пукаат на Србите“.

После состанокот во Белград со претставниците на Србите од Косово, Вучиќ рече дека „зборот и молбата“ се единствениот механизам кој го има да спречи учество на Србите во „валканата работа“ на формирање косовска војска.

– Мојата молба до меѓународната заедница е да не го прават тоа. Не ги доведувајте Србите во позиција од која нема излез, затоа што од ние нашиот народ и држава не можеме и нема да се откажеме – рече Вучиќ.

Тој претходно изјави дека има сознанија дека Албанците на Косово планираат на 28 ноември, Денот на албанското знаме, да го одбележат со формирање на косовска војска. Тој рече дека е уплашен поради тоа што може да им се случи на Србите и на Србија, дека Србија е во тешка позиција, но дека ќе се зачува мирот и стабилноста на секој начин.

– Ние ќе го чуваме мирот и стабилноста на секој начин, но на никој нема да му дозволиме да протерува, прогонува или убива српско население – вели Вучиќ.


Шекеринска: Бројот на жените во одбраната не е на задоволително ниво


Скопје, 8 март, 2018 - 13:30 (META) 

Состојбата со бројот со жените во АРМ не е доволно добра, но таква е ситуацијата во речиси сите армии и во европските, кои се неколку чекори понапред во однос на Македонија, порача денеска вицепремиерката и министерка за одбрана Радмила Шекеринска на трибината на тема „Родова перспектива во одбраната”, организирана по повод 8 Март – Меѓународниот ден на жената.

Нагласи дека бројот на офицерки во АРМ се зголемува, но не доволно брзо и додаде оти е уверена дека наскоро ќе има подобрување на ова поле.

Министерката истакна дека при приемот на питомците оваа година во Воената академија повеќе од половината од кандидатите биле девојки, кои биле меѓу најдобро пласираните во однос на успехот, тестирањата и физичката подготвеност.

– Ако се откажете од 50 проценти од своето население, со образложение дека таму едноставно не треба да има амбиции, сте се откажале од потенцијално добри офицери, подофицери, војници. Анализите на НАТО во одреден дел од мисиите покажуваат дека има одредени предности, кои ги имаат жените, полесно можат да остварат контакт со локалното население, на пример со жените во некое авганистанско село – посочи Шекеринска.

Потпретседателката на Собранието, Фросина Ташевска – Ременски, на присутните им порача дека се надева дека во блиска иднина на ваквите настани на пример ќе биде промовирана првата жена генерал во Македонија.

– Ќе бев многу посреќна ако денеска тука промовиравме генерал-жена, можеби да испромовираме женска единица за специјални задачи. Можеме да се пофалиме дека направивме голем чекор напред, пробивме многу бариери – порача Ташевска – Ременски.

Вицепремиерот задолжен за европски прашања Бујар Османи истакна дека од процената на состојбата на жените во едно општество може да се направи проекција за можноста за избувнување на конфликт, односно војна.


Во Турција издадени налози за апсење на 360 лица од редовите на војската


Анкара, 29 ноември, 2017 - 10:33 (META) 

Турското обвинителство издало налози за апсење на 360 лица, повеќето војници, во рамки на операцијата против приврзаниците на муслиманскиот свештеник Фетулах Ѓулен.

Во операцијата, која е фокусирана на Истанбул, се уапсени 333 војници, меѓу кои 216 лица на активна должност.

Истанбулската полиција продолжува со операцијата на апсење осомничени, а приватната турска новинска агенција „Доган“ наведува дека меѓу уапсените има и седум пилоти.

Операцијата против приврзаниците на Ѓулен секојдневно продолжува, 16 месеци по обидот за пуч во Турција, па минатата недела беа приведени околу 700 лица.

Анкара ги обвинува Ѓулен и неговата мрежа за организирање на минатогодишниот неуспешен пуч, но Ѓулен ги негира ваквите тврдења.

Повеќе од 50.000 лица се уапсени и ставени во притвор до почетокот на судењето поради сомнеж за поврзаност со Ѓулен, додека 150.000 лица се сменети или суспендирани од позиции во јавниот и во приватниот сектор откако на 15 јули минатата година, при обидот за пуч во Турција, беа убиени 250 лица.

Турските власти велат дека само таквата чистка може да ја неутрализира заканата од мрежата на Ѓулен, за која тврдат дека е инфилтрирана во институциите како што се војската, судството и образованието.


Египетската војска гаѓала и уништила возила користени во нападот на Синај


Каиро, 25 ноември, 2017 - 11:45 (META) 

Египетската војска денеска соопшти дека нејзини авиони извршиле напади во кои биле погодени повеќе возила користени во нападот во Северен Синај, во кој беа убиени 235 лица, јавуваат светските агенции.

Војската соопштила дека возилата се уништени, а лицата кои биле во нив се убиени.

Возилата, според соопштението, се наоѓале во близина на џамијата каде вчера беше извршен нападот, во градот Бир ал Абд. Станува збор за најкрвавиот напад извршен од исламистите во модерната историја на Египет.

Египетскиот претседател Абдел Фатах ал-Сиси вчера најави „брутален“ одговор по нападот врз џамијата во Синај.

Засега ниту една група не ја презеде одговорноста за нападот, но агенциите потсетуваат дека Ислмаска држава претходно вети дека на Синај и во Египет „ќе ги истреби суфиите“, припадници на мистичкото исламско движење, кои екстремистите ги сметаат за еретици.


Руските сили ќе се повлечат од Сирија пред крајот на годинава


Москва, 23 ноември, 2017 - 20:17 (META) 

Началникот на Генералштабот на вооружените сили на Руската Федерација, Валериј Герасимов, соопшти дека е можно значително да се намали бројот на руските сили во Сирија.

Повлекувањето на руските сили, како што рече Герасимов, би можело да почне пред крајот на годинава.

– Очигледно, по целосното исполнување на воените задачи, а останаа уште неколку, врховниот командант ќе донесе одлука за намалување на силите – рече Герасимов.


Авганистанските сили спасиле 30 луѓе од талибански затвор


Кабул, 19 ноември, 2017 - 12:15 (META) 

Најмалку 30 лица се спасени во рација што ја спровеле авганистанските сили заедно со специјалните странски сили во талибански затвор во провинцијата Хелманд.

Ова го соопштија војската и локалните власти.

Помеѓу спасените се и четири деца кои имаат помалку од 12 години и двајца полицајци.

Талибанците уапсиле повеќе од 20 лица поради давање помош на владата или затоа што се членови на семејствата на авганистански војници или полицајци.

Во меѓувреме, талибанците соопштија дека луѓето кои се спасени се криминалци осудени поради грабежи, киднапирања и други кривични дела.


Илјадници луѓе на протести во Зимбабве, го чекаат падот на Мугабе


Хараре, 18 ноември, 2017 - 12:29 (META) 

Илјадници граѓани на Зимбабве ги преплавија улиците на главниот град Хараре, мавтајќи со националното знаме, и со песна го чекаат падот на претседателот, Роберт Мугабе.

– Ова се солзи радосници. Целиот живот го чекав овој ден. Конечно сме слободни – изјави 34-годишниот Френк Муциндикв.

Учесниците на протестот против Мугабе ги гушкаат војниците извикувајќи „Заминувај генерале наш“ и носејќи транспаренти со натпис „Не за династијата на Мугабе“.

Членовите на опозицијата и други противници на Мугабе го организираа денешниот протест за да го повикаат Мугабе да си замине од власт, а војската на Зимбабве соопшти дека го поддржува собирот.

Војската на Зимбабве претходно соопшти дека продолжува со преговорите со Мугабе за негова оставка, додека истовремено е во потрага по соработниците на лидерот и по неговата сопруга.


Мугабе преговара со војската за својата иднина


Хараре, 16 ноември, 2017 - 21:00 (META) 

Долгогодишниот лидер на Зимбабве, Роберт Мугабе, води директни преговори со војската за неговата иднина, пренесува „Би-би-си“.

Медиумите во Зимбабве објавија фотографии од 93-годишниот Мугабе со началникот на војската на Зимбабве и двајца пратеници од Јужна Африка во неговата резиденција во Хараре.

Мугабе од вчера се наоѓа во домашен притвор, откако војската ја презеде контролата во земјата.

Извори блиски до војската соопштиле дека Мугабе денеска одбил да поднесе оставка, додека други извори пренесуваат дека е блиску договор за негово заминување.

Лидерот на опозицијата во Зимбабве, Морган Чвангирај, изјавил дека Мугабе мора да си поднесе оставка од позицијата претседател на земјата.


Војската ја презеде контролата во Зимбабве, Мугабе и семејството во притвор


Хараре, 15 ноември, 2017 - 10:51 (META) 

Владејачката партија во Зимбабве – Зану ПФ преку „Твитер“ соопшти дека Емерсон Мнангагва е именуван за привремен претседател на оваа африканска држава и дека досегашниот претседател Роберт Мугабе и членови на неговото семејство се приведени, јавуваат светските медиуми.

Мнангагва претходно беше сменет од функцијата потпретседател на земјата поради „нелојалност“. Медиумите потсетуваат дека тој тогаш бил сменет на иницијатива на сопругата на Мугабе, Грејс Мугабе, пренесува „Би-би-си“.

Војската на Зимбабве, пред објавата на владејачката партија, го зазеде седиштето на државната телевизија, а силни експлозии и пукотници одекнувале ноќеска во главниот град на земјата, Хараре.

Офицери на војската на Зимбабве соопштија дека ноќеска интервенирале за да ги елиминираат „криминалците“ од опкружувањето на претседателот Мугабе, но демантирале дека се обиделе да извршат воен удар против шефот на државата, кој владее со Зимбабве 37 години.

Интервенцијата на војската доаѓа по отворените несогласувања помеѓу Мугабе и начачникот на генералштабот на војската по смената на Мнангагва од функцијата потпретседател. Мнангагва важеше за можен наследник на Мугабе.

Мугабе, кој е роден во 1924 година и беше дел од ослободувањето на Зимбабве од колонијалното владеење, стана премиер во 1980 година, функција која ја извршуваше до 1987 година од кога е претседател на државата.

Поради авторитарниот начин на владеење и одговорноста за состојбите во Зимбабве, Мугабе од 2002 година беше цел на санкции од Европската Унија и од САД.