!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Убиениот напаѓач од аеродромот „Орли“ бил на листата на радикализирани поединци


Париз, 18 март, 2017 - 15:54 (META) 

Напаѓачот кој денеска беше убиен на аеродромот „Орли“ во Париз, бил на листата на радикализирани поедници и имал долго криминално досие, вклучувајќи и пресуди за вооружено разбојништво, соопштиле француските власти, пренесува „Би-би-си“.

Тој беше застрелан и убиен од француските безбедносни сили, откако се обидел да одземе пиштол од припадничка на воена патрола на јужниот терминал на аеродромот.

Станува збор за 39-годишен маж, чиј идентитет сè уште не се открива.

Тој, како што пренесуваат француските медиуми, повикувајќи се на информации од полицијата, утрово бил вмешан во вооружен инцидент во северниот дел на Париз, по што украл автомобил и со него дошол на аеродромот „Орли“, каде ја нападнал припадничката на воената патрола и се обидел да ѝ го земе оружјето.

Мотивите за нападот засега не се познати. Таткото и братот на напаѓачот биле веднаш приведени, што е стандардна процедура кога станува збор за сомневања за терористички напад.

Од француската полиција соопштиле дека напаѓачот не носел експлозив. Во двата инциденти нема други повредени лица.

Откако беше затворен и евакуиран, делови од аеродромот „Орли“ се повторно отворени по, како што го опишуваат француските власти, екстремно сериозниот инцидент.


Маж убиен на аеродромот „Орли“ во Париз, откако одзел пиштол од војник


Париз, 18 март, 2017 - 9:58 (META) 

Француските безбедносни сили утрово застрелале и убиле маж на парискиот аеродром „Орли“, откако тој посегнал и му го зел пиштолот на војник, соопштиле француските власти, јавува „Би-би-си“.

Делови од аеродромот биле веднаш евакуирани, а безбедносните операции по инцидентот продолжуваат и понатаму. Во нив, како што пренесува британскиот национален сервис, биле вклучени и експерти за деактивирање на експлозивни направи.

Минатиот месец, во инцидент во музејот „Лувр“ во Париз, беше застрелан и ранет напаѓач, кој со ножеви се нафрли на војници во музејот.


Кавадарци одбележа 25 години од загинувањето на Сашко Гешовски


Кавадарци, 6 мај, 2016 - 13:50 (META) 

Во Кавадарци денеска беа одбележани 25 години од смртта на Сашко Гешовски, кој загина во Сплит во 1991 година, на 20-годишна возраст, како војник. На неговото вечно почивалиште цвеќе положија претставници на АРМ, гарнизон Криволак, борците од НОБ и граѓани.

Сочувство до семејството изрази и градоначалникот Александар Панов.

– Респект и поклонение пред оваа жртва и симболика на распадот на Југославија. Секогаш ваквите настани и настаните што следуваа по загинувањето на Сашко, треба да бидат поука за да не се повторат. Уште пред некое време посакав Македонија и Кавадарци да не бидат во средината на интересите на поголемите сили. Истото тоа го препорачувам и сега, Кавадарци и Македонија да стојат што понастрана од глобалните интереси и Македонија да не биде предмет на интересирање за каква било алчност на некоја од големите сили. Се надевам дека и ние, како Македонци, ги извлековме историските поуки, како од распадот на Југославија, така и од претходниот период – рече Панов.


Украински војник загина во близина на Доњецк


Доњецк, 6 декември, 2015 - 16:21 (META) 

Еден украински војник е убиен изминатите 24 часа во проруските сепаратистички региони, каде вчера повторно почнаа спорадични борби.

Војникот загинал во селото Зајцево, кое се наоѓа на граничната линија меѓу војските, на 50 километри северно од бунтовничкото упориште Доњецк.

– Сепаратистите ги напаѓаа со минофрлачи позициите на украинската армија – изјави на прес-конференција портпаролот на украинските сили, Олександер Мотузјаник.

Украинските сили изутринава соопштија дека во петокот учествувале во судири во истата зона, каде стотици бунтовници ги нападнале нивните позиции.


САД: Војник со експлозив се обидел да влезе во база


Вашингтон, 2 ноември, 2015 - 10:00 (META) 

Американски војник, кој се обидел да влезе во базата Форт Брег во сојузната држава Северна Каролина, облечен во костум на бомбаш-самоубиец, предизвикал тревога, вклучувајќи и потрага по експлозивот, наведуваат воените медиуми.

Неименуван војник, кој на себе носел костим сличен на појас со експлозив, се обидел да мине низ контролниот пункт.
Инцидентот предизвикал вонредна состојба, вклучувајќи и затворање на капијата додека експертите за отстранување експлозиви вршеле проверка.

Официјалните претставници наведуваат дека сè уште не е познато дали против војникот ќе биде покрената тужба.


Ослободени 70 курдски заложници во воена операција на САД и на Ирак


Багдад, 22 октомври, 2015 - 19:06 (META) 

Седумдесетина Курди кои биле држени како заложници од милитантите на Исламска држава (ИД) во Ирак, биле ослободени во воена операција што денеска ја извеле сили на Соединетите Американски Држави (САД) и на Ирак, пренесуваат американските медиуми.

Според сè уште непотврдени информации, во спасувачката операција загинал еден војник на САД.

Воената операција се случила утрово, во близина на градот Хавиџа, во провинцијата Киркук, населена претежно со курдско население. Во неа, како што пренесува „Њујорк тајмс“, биле заробени и неколку милитанти на ИД.

Според извештаите на медиумите во САД, во акцијата, покрај американски и ирачки војници, учествувале и специјалци на курдските сили, кои изминативе недели се борат за преземање на селата во провинцијата Киркук што се под контрола на милитантите на ИД.


Професионален војник се самозастрелал во Прилеп


Прилеп, 4 септември, 2015 - 9:54 (META) 

Вчера, додека бил на стража во касарната „Мирче Ацев“ во Прилеп, професионален војник на АРМ добил прострелна рана од автоматска пушка која ја имал до себе.

АРМ извести дека од засега неутврдени причини, кај професионалниот војник, стар 27 години, оловното зрно завршило во стомакот, а неговите колеги кои биле на должност, веднаш му пружиле прва помош и за кратко време војникот бил пренесен во градската болница во Прилеп, каде било констатирано дека кај него има влезно-излезна прострелна рана во пределот на стомакот.

 


Одбележана годишнина од загинат македонски војник на боиштата во Вуковар


Тетово, 28 август, 2015 - 15:50 (META) 

Одбележана 24 годишнината од загинувањето на војникот Драгослав Петровски Чиче од тетовското село Ратае, кој животот го загуби во војната во Вуковар во 1991 година.

На денешното одбележување на 24 годишнината од неговата смрт, букети цвеќиња пред неговиот гроб положија неговите роднини и пријател и Одборот на бранители.

– Наша обврска е да се потсетуваме на сите македонски бранители, без разлика дали загинале во воениот конфликт во 2001 година, за време на Првата или Втората светска војна или, пак, за време на војните во поранешна Југославија. Затоа што сите бранители своевремено си ја бранеле својата таковина – изјави Марин Најдов, претседател на Одборот на бранители.

Воениот рок, Драгослав го почнал во Рума, по што е префрлен во Вуковар, Хрватска каде веќе се одвивале воените дејствија.

Таму тој загинува во заседа, на последниот ден од одслужувањето на воениот рок. Тогаш имал 21 година.

Драгослав е еден од 54 војници од Македонија кои загинале на боиштата во поранешна Југославија.


Тројно убиство: Осомничениот најден обесен во близина на селото?!


Пробиштип, 25 ноември, 2014 - 13:31 (META) 

Во близина на Злетово, полицијата пронашла обесен маж, за кој се претпоставува дека е професионалниот војник Д.М. (40), осомничен за тројното убиство што утрово се случи во селото, неофицијално дознава „Мета“ од полициски извори.

Во тек е постапка за утврдување на идентитетот на лицето, чие тело е пронајдено.


Тројно убиство: Осомничениот, вооружен до заби, дошол во Злетово


Пробиштип, 25 ноември, 2014 - 12:38 (META) 

Четириесетгодишниот професионален војник Д.М. пред да го изврши тројното убиство во Злетово бил на стража и по завршувањето на работните обврски, со комлетна воена опрема, дошол во селото, јавува дописинкот на „Мета“ од Штип.

Тој првин се упатил во домот на М.Д. (50), вработен во државниот пазарен инспекторат. Соседите сведочат дека слушнале расправија, по што осомничениот го убил М.Д.

Потоа, осомничениот заминал на другиот крај на селото, каде што ги убил родителите на својата сопруга, со која водел бракоразводна парница.

Според изјавите на соседите, убиениот М.Д. бил во блиски односи со сопругата на осомничениот.

Според засега непотврдени информации, братот на неговата сопруга успеал да му го земе оружјето со кое пукал.

Полицијата го потврди идентитетот на осомничениот, по кого сè уште се трага.

Поголема полициска екипа и јавен обвинител, се на терен и вршат увид.