!На 1 февруари 2017 година, завршува промотивниот период на слободно користење, без регистрација и без претплата, на содржините на „Мета“, кое беше воведено за да им овозможиме полесен пристап на корисниците до навремени и проверени вести. За начинот на пристап и за претплата, од 1 февруари 2017 година ќе информираме дополнително. При пренесувањето и преземањето на содржините од „Мета“, задолжително е атрибуирање и линкување.

Рама ја поздрави одлуката за условно ослободување на Харадинај


Тирана, 12 јануари, 2017 - 20:42 (META) 

Премиерот на Албанија, Еди Рама, денеска ја поздрави одлуката на францускиот суд условно да го ослободи Рамуш Харадинај, кој на 4 јануари беше уапсен и притворен од француските власти врз основа на потерница од Србија поради воени злосторства, извршени во текот на 1998 и 1999 година.

Рама рече дека во моментот треба да се истакнат политичките и дипломатиските напори на властите во Тирана и во Приштина. Албанскиот премиер им заблагодари на сите граѓани кои дале придонес и го кренале гласот против „спектакуларната неправда“.

Лидерот на албанската опозиција, Лулзим Баша, побара правдата да биде што поскоро исполнета и Харадинај да се врати во Косово. Тој додаде дека потерниците на Србија не само што се неправедни кон Харадинај, туку и кон тие што се жртвувале за слободата на Косово.

„Овие потерници се напад на независноста на Косово и на нејзиниот политички интегритет“, рече Баша.

Рамуш Харадинај денеска беше условно ослободен од францускиот суд, а одлуката е донесена два дена откако српското министерство за правда побара негова екстрадиција.

Харадинај, според одлуката на судот, нема да може да ја напушти Франција и ќе мора двапати неделно да се јавува во француската полиција.


Проширени обвинувањата против Харадинај


Белград, 11 јануари, 2017 - 12:47 (META) 

Обвинителството за воени злосторства на Србија ги прошири обвинувањата против еден од поранешните команданти на Ослободителната војска на Косово, Рамуш Харадинај, кој беше уапсен во Франција по налог на Србија која го товари за воени злосторства.

Одлуката е донесена затоа што обвинителството дошло до нови докази.

Се работи за собрани докази за одговорноста на Харадинај за воените злосторства на Косово, кои не биле предмет на разгледување во Хашкиот трибунал и претставување на дополнителни докази кои веќе се испратени во Франција.

Новата документација ќе биде испратена до надлежен суд во Франција откако ќе биде преведена на француски јазик. Се очекува дека тоа би можело да биде завршено пред крајот на оваа недела.

Министерството за правда на Србија вчера во Франција го проследи барањето за испорачување на Харадинај, кој беше уапсен на 4 јануари по налог на Србија поради сомневања дека во 1998 и 1999 година на Косово извршил воени злосторства над Србите и над други неалбански етникуми.

Судот во Франција одлучи на 5 јануари Харадинај да го задржи во притвор додека Србија не го достави барањето за екстрадиција.

Харадинај беше суден пред Хашкиот трибунал за воени злосторства, но во 2012 година беше ослободен од сите обвиненија.

Тој по налог на Србија беше уапсен и во 2015 година на аеродромот во Љубљана, но по неколку дена беше ослободен.


Анте Готовина назначен за советник на хрватскиот министер за одбрана


Загреб, 17 ноември, 2016 - 17:59 (META) 

Поранешниот генерал на хрватската војска, Анте Готовина, е назначен за советник на министерот за одбрана на Хрватска, Дамир Крстичевиќ, пренесува балканскиот сервис на „Радио Слободна Европа“. Ваквата одлука ја донела Владата на Хрватска на седница одржана во Вуковар, а неа ја потврдил и министерот Крстичевиќ на својот фејсбук-профил.

„Мило ми е што мојот голем пријател и наш херој го прифати мојот предлог и споменатиот ангажман и уверен сум дека генералот со своето знаење и способности значајно ќе придонесе за националната безбедност и за развојот на вооружените сили. Добро ни дојдовте генерале“, напишал Крстичевиќ.

Готовина, иако има право на финансиски надомест за вршењето на функцијата, ја одбил платата.

Пред четири години Хашкиот суд за воени злосторства на просторите на поранешна Југославија, донесе пресуда со која од одговорност ги ослободи генералите Анте Готовина и Младен Маркач. Судот на 16 ноември 2012 година ги отфрли заклучоците и во најголем дел ја поништи првостепената пресуда со која Готовина и Маркач беа осудени на 24, односно на 18 години затвор за воени злосторства извршени за време и по акцијата „Бура“ во 1995 година.


Меркел: Воените акции во Сирија се граничат со воени злосторства


Берлин, 15 октомври, 2016 - 17:13 (META) 

Германската канцеларка Ангела Меркел изјави дека некои од воените акции во Сирија се граничат со воени злочини.

Меркел додаде дека бомбардирањето на болници и на подземни објекти во Алепо се нехумани.

– Мислам дека тоа се граничи со воени злосторства, а дали се навистина тоа нека одлучи Меѓународниот суд на правдата. Сега единствено важно е сето тоа да запре и да се премине на политички процес – изјави канцеларката.

Коментирајќи ги разговорите помеѓу Русија и САД, Меркел рече дека досегашните разговори, за жал, не довеле до траен прекин на огнот.


Кери: Русија и Сирија намерно го тероризираат цивилното население


Вашингтон, 7 октомври, 2016 - 18:04 (META) 

Американскиот државен секретар Џон Кери изјави дека Русија и Сирија ќе мора да се соочат со истрага за воени злосторства поради нападот на сириски цивили.

Кери истакна дека најмалку 20 луѓе загинале, а повеќе од 100 се ранети синоќа, кога сириските сили бомбардирале уште една болница.

– Таквите постапки бараат адекватна истрага за воени злосторства – изјави Кери.

Тој додаде дека тие напади не можат да се сметаат за случајност, туку дека руските и сириските воени сили имаат цел да ги тероризираат цивилите.


Францускиот амбасадор во ОН тврди дека во Алепо се извршени воени злосторства


Њујорк, 26 септември, 2016 - 10:38 (META) 

Францускиот амбасадор во ОН, Франсоа Делатр, пред почетокот на заседанието на Советот за безбедност, рече дека во сирискиот град Алепо се извршени воени злосторства.

Непосредно пред заседанието на Советот на безбедност по повод ескалацијата на воената кампања во Сирија, францускиот амбасадор во ОН истакна дека во Алепо се извршени воени злосторства и побара тоа да биде санкционирано.

– Воените злосторства во Сирија не смеат да минат неказнето, тоа едноставно не е опција – рече Делатр.

Вонредната седница на Советот за безбедност на ОН заврши без да бидат преземени какви било активности бидејќи постојаниот претставник на Русија, Виталиј Чуркин, влезе во отворен конфликт со претставниците на САД, Велика Британија и на Франција.


Германија: Откриени осум лица осомничени за нацистички воени злосторства


Берлин, 9 август, 2016 - 20:29 (META) 

Во Германија најмалку осум лица кои се осомничени за нацистички воени злосторства и кои се на возраст од околу 200 години, соопштија германските власти.

Како што соопшти шефот на Централното биро на провинциските судски власти за изјаснување на злосторствата на национализмот, Јенс Ромел четворица од осомничените се мажи, а четири се жени, а сите работеле во концентрациониот логор Штутхоф, во близина на полскиот град Гдањск, кој своевремено се викал Данцинг.

Според податоците на Ромел, мажите работеле како чувари во логорот, додека жените биле дактилографки или телефонистки.

Осомничените, кои се се родени во периодот од 1918 до 1927 година, може да бидат обвинети за соучество во убиство.


Босанец обвинет за воени злосторства уапсен во Бразил


Сао Паоло, 31 јули, 2016 - 10:55 (META) 

Бразилските власти вчера го уапсија 47-годишниот Никола Чераниќ кого властите во БИХ го гонат од 1992 година за извршени воени злосторства за време на војната во поранешна Југославија.

Бразилското федерално обвинителство соопшти дека Чераниќ е уапсен во градот Индајатуба, на околу 45 километри северозападно од Сао Паоло.

Интерпол и бразилските власти немаат повеќе детали за злосторствата за кои е обвинет Чераниќ, а засега не се знае ниту колку долго тој престојувал во Бразил.

Според бразилските закони, Врховниот суд одлучува за сите барања за екстрадиција. Засега не се знае кога судот ќе ја донесе одлуката.


ОН бараат судења за воени злосторства пред да завршат судирите во Сирија


Њујорк, 15 март, 2016 - 14:23 (META) 

Известувачите за човековите права на ОН во Сирија денеска соопштија дека не треба да се чека завршувањето на судирите за да се почне со подготовките на судењата за воени злосторства.

– Не треба да се чека постигнување на конечен мировен договор за да се усвојат мерките за поставување на основата на одговорност – рече претседателот на Меѓународната комисија за истрага во Сирија, при Советот за човекови права на ОН, Паоло Пинхеиро.

Тој ги повика сириската влада и опозицијата на мировните преговори во Женева да се согласат на мерки за градење доверба, вклучувајќи и безусловно и итно ослободување на сите произволно притворени затвореници, како и воспоставување механизам за следење на исчезнатите лица.


Судот за воени злосторства на Косово ќе биде основан во Хаг


Хаг, 15 јануари, 2016 - 17:59 (META) 

Специјалниот суд за воени злосторства на Косово ќе биде основан во Хаг, соопшти денеска холандската влада. Одлуката судот да биде во Хаг е донесена по консултацијата меѓу ЕУ, Косово и холандските власти. Судот ќе се финансира од средства на ЕУ.

Холандската влада истакна дека сведоците би можеле да се чувствуваат загрозено ако судските процеси не се одвиваат во странство. Како што се наведува во соопштението објавено на веб-страницата на владата, судот треба да почне да работи годинава.

Лани во август, косовскиот парламент со мнозинство гласови го поддржа усвојувањето на измените на уставот, кои овозможија формирање на специјален суд за злосторства на Ослободителната војска на Косово.

Судот во Хаг ќе биде сместен во поранешната зграда на Европската полициска агенција.