Се урнаa воени авиони во Србија и во Алжир, загинаа над 200 луѓе


Белград, 11 април, 2018 - 11:57 (META) 

Во две одвоени несреќи на воени авиони, во Јужен Банат во Србија и во Алжир, загинаа над 200 луѓе.

Според српските медиуми, во 9.30 часот во регионот Јужен Банат во Србија, меѓу селата Ковачица и Идвор, се урнал школско-борбен авион Супергалеб Г4, откако претходно двајцата пилоти се катапултирале, но за жал едниот од нив загинал при падот на земја. Другиот со тешки повреди бил префрлен на Војно-медицинската академија (ВМА) во Белград.

Увидот е во тек.

Во големата несреќа што се случила утрово во Алжир, пак, загинале најмалку 200 луѓе. Воен транспортен авион што превезувал војници и воена опрема се урнал околу 8 часот недалеку од аеродромот „Буфарик“ на југот на Алжир. Од авионот се извлекуваат десетици мртви тела.


Се урна воен авион во Конго, загинаа 12 луѓе


Киншаса, 30 септември, 2017 - 19:55 (META) 

Воен товарен авион се урна во главниот град на Демократска Република Конго, Киншаса, при што животот го загубија сите 12 лица во авионот.

Претставник од Авијациската агенција на Конго нагласи дека станува збор за авион „антонов ан-12“, кој патувал кон градот Букаву, во источниот дел на земјата. Авионот се урнал откако претходно се обидел да се врати назад кон аеродромот кратко време по полетувањето поради техничка грешка.

Според медиуми од Конго, со авионот управувал руски екипаж, а тој превезувал две возила и муниција.

Поради премногу либералните закони за безбедност, авионските несреќи во Конго се многу чести.


Хрватска се подготвува да ги „пензионира“ старите aвиони


Загреб, 24 јули, 2017 - 17:03 (META) 

Министерството за одбрана на Хрватска испрати официјален повик за прибирање понуди за купување на 12 ловци за военото воздухопловство на земјата, јави „Џејнс Дифенс Викли“. Набавените летала треба да ги заменат 12 советски „миг-21бис“ и школските „миг-21ум“.

Хрватската војска испрати повик за понуди до амбасадите на САД, Израел, Грција, Шведска и на Јужна Кореја. Од првите три држави предмет на набавка би биле користени ловци „F-16“ од составот на воените воздухоповства на соодветните земји, во случајот со Шведска – за купување на ловци „JAS-39 Gripen“ на компанијата СААБ, а со Јужна Кореја – за купување на авион „FA-50“ (лесен јуришен авион врз база на школскиот „T-50 Golden Eagle“).

Земјите имаат 75 дена да испратат одговор на повикот, а по крајниот рок, кој е на почетокот на октомври, ќе уследи оценување на понудите, кое ќе трае најверојатно до крајот на годинава. Три критериуми се битни – цената,  пакетот за економска и индустриска соработка, како и тоа дека авионите ќе се купат директно од владата на земјата.

Во моментов военото воздухопловство на Хрватска располага со 12 авиони „миг-21бис“ и „миг-21ум“ произведени 1970-тите, кои ѝ останаа во наследство од военото воздухопловство на Југославија.

Хрватска бара замена за „миг-21“ повеќе од 10 години. Во 2008 година Министерството за одбрана на Хрватска испрати барање за информација, но поради економската криза, набавката беше одложена.


Исчезна малезиски воен авион


Џакарта, 15 јуни, 2017 - 10:57 (META) 

Во тек е потрага по малезискиот воен авион што исчезна денеска.

„Авионот полетал од воената база Куантан во 11 часот (по локално време), а контактот со леталото е изгубен во 11.30“, јави телевизија „Ченел њуз Азија“.

Веста за исчезнувањето на воениот авион ја потврди и министерот за одбрана Хишамудин Хусеин, кој рекол дека се надева дека пилотите се безбедни.


Во Куба се урна воен авион, загинаа осум војници


Хавана, 30 април, 2017 - 14:00 (META) 

Кубански воен авион падна во провинцијата Аремиса на западот од Куба, а во несреќата загинаа осум војници, соопшти кубанската влада.

Војската во писмено соопштение наведе дека авионот „ан-26“ од советско производство, полетал од аеродромот „Плаја Баракоа“ во 6.38 часот наутро по локално време и дека се урнал во близина на градот Канделарија, оддалечен 65 километри.

Формирана е специјална комисија што ќе ја истражи несреќата.


Се урна воен авион во Србија, загинаа двата пилоти


Шабац, 7 април, 2017 - 20:42 (META) 

Два пилота на Војската на Србија погинаа денеска во уривање на школско-борбен авион Супергалеб Г-4 кај селото Слатина кај Шабац, соопшти српското министерство за одбрана.

Погинале потполковникот Ненад Ќулибрк од Командата на Военото воздухопловство и противвоздушна одбрана и капетанот Дејан Пандуровиќ од 252. Школско тренажна авијациска ескадрила од аеродромот Батајница.

Авионот се урнал во 10.30 часот при редовна летачка обука. Почната е обемна истрага.

Некои сведоци тврдат дека авионот експлодирал во воздух, а некои велат дека авионот се забил во земја и се распаднал.

Српскиот премиер Александар Вучиќ и министерот за одбрана Зоран Ѓорѓевиќ им изразија сочувство на семејствата на загинатите пилот.


Пронајдено телото на пилотот на урнатиот швајцарски воен авион


Цирих, 31 август, 2016 - 16:40 (META) 

Швајцарските спасувачки екипи денеска го пронашле телото на пилотот чиј борбен авион падна пред два дена во швајцарските Алпи, соопштија швајцарските власти.

Телото на пилотот е пронајдено во близина на остатоците на авионот, кој вчера беше лоциран во Сустен во централниот дел на Швајцарија, стои во соопштението на швајцарската влада.

Идентитетот на пилотот не е објавен, но се наведува дека станува збор за 27-годишен војник и оти неговото семејство е известено за несреќата.

Воените истражни органи се обидуваат да ја утврдат причината за падот на борбениот авион на швајцарските воздухопловни сили.

Швајцарските власти привремено забранија прелетување на висина под 3.000 метри на локацијата каде се урна авионот.

Авионот едносед „ф/а-18ц“ во понеделникот полета од воената база во Мајринген, во рамки на обука за летање. Пилотот одговори на првата порака од базата, но не и на втората, кога авионот е прогласен за исчезнат и почна потрагата по него.


Индиски воен авион исчезна над Бенгалскиот Залив


Њу Делхи, 22 јули, 2016 - 11:43 (META) 

Транспортен авион на военото воздухопловство на Индија, „ан-32“, исчезна од радарите. Во него имало 29 лица.

Во авионот имало шест членови на екипажот, а другите патници биле припадници на военото воздухопловство на Индија.

Авионот полетал во 9 часот по локално време од базата Порт Блер и летал кон градот Ченај, на југоистокот на Индија.

Воената морнарица на Индија и крајбрежната служба поведоа голема спасувачка операција.


Еквадор: Се урна воен авион, 22 лица загинаа


Кито, 16 март, 2016 - 9:42 (META) 

Дваесет и две лица загинаа при пад на еквадорски воен авион, соопшти претседателот на Еквадор, Рафаел Кореа.

„Нема преживеани. Ова е трагедија“, напиша Кореа на „Твитер“.

Несреќата се случила во Амазонската Прашума, а во авионот се наоѓале 19 подобранци, два пилота и еден механичар.


Воен авион падна во Египет


Каиро, 28 јануари, 2016 - 11:40 (META) 

Египетската војска соопшти дека нејзин ловец „ф-16“ паднал за време на воени вежби, на локација која не се наведува, при што загинал целиот екипаж.

Во соопштението не се наведува колку лица загинале, ниту дополнителни детали за несреќата.

Портпаролот на египетската војска, Мохамед Самир, на новинарско прашање за падот на „ф-16“ рече дека деталите се важни само за војската.