!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

„ЕУ за тебе“ утре во Желино и во Брвеница


Желино, 5 јули, 2017 - 10:52 (META) 

Шефот на Делегацијата на Европската Унија во Македонија, Самуел Жбогар, утре ќе биде во општините Желино и Брвеница, во рамки на кампањата „ЕУ за тебе“.

Тој ќе се сретне со градоначалниците на Желино, Фатмир Измир, и на Брвеница, Енвер Пајазити, и ќе направи увид во некои проекти во овие општини што се финансирани од Проектот на ЕУ за инвестиции во рурални општини.

Со 260.000 евра што ЕУ ги подарува во рамките на овој проект, треба да се обезбеди пивка вода за селата Палатица, Требош, Узурмиште, Желино, Добарце, Чифлик, Ларце, Копачин Дол, Рогле, Ново Село, Групчин, Долна Лешница и Церово, сите во општина Желино, а 40.000 евра од планираните пари ќе ги обезбеди Општината.

Во Брвеница, со 260.000 евра што ЕУ ги подарува, треба да се реконструираат локалните патишта меѓу селата Милетино и Челопек, како и да се изгради ново училиште за 168 ученици во селото Гургурница. Другите 420.000 евра Општина Брвеница ќе ги обезбеди со заеми од Проектот на ЕУ за инвестиции во рурални општини.


На Меѓународниот ден на водите, „Арсена“ потсети на загадената вода во Гевгелија


Гевгелија, 22 март, 2017 - 18:09 (META) 

Граѓанската иницијатива „Арсена“ подели пакувања чиста вода на штанд поставен на градското шеталиште во центарот на Гевгелија, по повод Меѓународниот ден на водите.

Мотото на оваа акција беше „Здрава вода за здрав живот“, а целта беше да се актуелизира долгогодишниот проблем на гевгеличани со потребата од чиста вода за пиење, поради присуството на енормно високи концентрации на отровниот металоид арсен во водите од градскиот водовод.

„Ова што се случува со водата во Гевгелија е трагично и неодговорно. Сите сакаме чиста вода и сите заслужуваме да ја имаме дома како корисници на јавниот водоводен систем. Но, работите се надвор од секаква контрола на локалните власти. Изгледа, сиве овие години, поважан им беше мирниот мандат и бенефициите од мандатот, наместо задоволување на потребите на граѓаните за чиста вода“, изјавија од „Арсена“.

Од оваа иницијатива најавуваат формирање на правен тим кој ќе се занимава со правните консеквенци на одговорните за долгогодишното труење на гевгеличани со арсенот во гевгелиската вода.


Почна изграбата на нов водоводен систем во Гевгелија во рамки на проектот „ЕУ за тебе“


Гевгелија, 15 февруари, 2017 - 14:17 (META) 

Со финансиска поддршка од ИПА фондовите, во Гевгелија денеска почна реализација на проект за унапредување на водоводниот систем со кој треба да се подобри водоснабдувањето на 17.000 жители во Гевгелија, Мрзенци, Моин, Богородица, како и Селеми и Стојаково во општина Богданци.

Евроамбасадорот Самуел Жбогар нагласи дека ваков проект се спроведува првпат во рамки на неодамна започнатата кампања „ЕУ за тебе“.

– Морам да потенцирам дека на многу успешен начин општина Гевгелија успеа да искомбинира различни извори на фондови за финансирање на проектот и мислам дека токму овој начин на реализација на пионер-проект треба да служи како пример на другите општини како треба да спроведат големи проекти и како да ги реализираат – рече Жбогар.

Почетокот на изградбата на новиот водоводен систем, чија вредност изнесува 1,7 милиони евра, освен евроамбасадорот Жбогар, го означија и министерот за финансии Кирил Миноски и градоначалникот Иван Франгов.

Предвидена е изградба на четири бунари, пупмпна станица, станица за хлорификација на водата, цевки, и резервоар за вода од капацитет од илјада метри кубни.

Новиот водоснабдителен систем треба да биде готов до ноември.


„ЕУ за тебе“ утре во Гевгелија


Скопје, 14 февруари, 2017 - 13:13 (META) 

Евроамбасадорот Самуел Жбогар, утре во рамки на кампањата „ЕУ за тебе“ ќе ја посети Гевгелија каде што ќе се сретне со градоначалникот Иван Франгов и ќе присуствува на промоција на проектот „Подобрување на системот за водоснабдување во општина Гевгелија“.

Кампањата „ЕУ за тебе” има за цел да ја подигне свеста и да ја информира јавноста за помошта на ЕУ во земјата.

Прва тема на кампањата е животната средина при што се посетуват местата каде што ЕУ дава помош за борба против загадувањето и обезбедување на чиста животна средина за сите.

Целокупната помош на Европската Унија во областа на животната средина е повеќе од 80 милиони евра во рамките на ИПА 1 (2007-2013), додека натамошна поддршка од 100 милиони евра се планираат во рамки на ИПА 2.

„Подобрување на системот за водоснабдување во општина Гевгелија“ е проект кој има за цел подобрување на системот за водоснабдувањето, односно на квалитетот на водата за пиење во градовите Гевгелија и Богданци.

Благодарение на проектот, ќе се зачува здравјето на населението, ќе се подобри економијата на домаќинствата и ќе се унапреди локалната економијата, информираат од Делегацијата на ЕУ.

Целиот проект вклучува изградба на 4 бунари, пумпни станици, хлорирање на станици, водовод и резервоар за вода со капацитет од 1.000 метри кубни.

Вкупната вредност на проектот е 1,7 милиони евра, а грантот од ИПА обезбедува 17,5 отсто од вкупната вредност односно 260.000 евра.


„Арсена“: Новиот водовод е само предизборен маркетинг и медиумско замајување


Гевгелија, 5 септември, 2016 - 9:51 (META) 

Здружението „Арсена“ од Гевгелија, кое со години предупредува дека е загадена водата во овој град, вели дека конкурсот за изградба на нов водоснабдителен систем е само изборен маркетинг на градоначалникот Иван Франгов.

Од здружението велат дека ова е четврта по ред медиумска објава на тендер за копање нови бунари за водоснабдување на Гевгелија и доаѓа само еден ден по најавата за распишување вонредни парламентарни избори во декември годинава.

– Прашање е зошто досега Општината не го спроведе и првично најавениот тендер во февруари 2014 година, кога рекоа дека ги чекаат резултатите од анализата на ископите кај Вардар, за издашноста на водата и за квалитетот, дали воопшто има арсен. Вториот тендер го најави поранешниот министер за финансии Ставрески за март годинава, кога одговараше по амандманот за одвојување буџетски средства за водоснабдување на Гевгелија во ноември минатата година, што тој го одби. Третиот тендер, насловен како оглас за јавна набавка за два нови бунари, Општината го најави во јуни годинава и не видовме ниту тендер, ниту објава за избран најповолен понудувач. Зошто ѝ треба четврта медиумска објава на Општината за ископ на нови бунари само еден ден по договорот на лидерската четворка? Ова за нас е малку симптоматично – реагираат од здружението.

Тие додаваат дека ако ова не е медиумско замајување на граѓаните, какво што се случувало и претходно, тогаш е признание на Општината дека има арсен во водата, проблем што општинарите и градоначалникот со години го игнорираа.

– Изборите или најавата за избори секогаш носат промени. Се надеваме дека гевгеличани нема да бидат излажани од власта повторно со нереализиран тендер, зошто секој човек заслужува чиста вода, а не отров – велат од здружението.

Вчера градоначалникот на Гевгелија во изјава за „Мета“ рече дека новиот водоснабдителен систем се гради затоа што градот има потреба од дополнителни количества вода. Тој тврди дека водата во Гевгелија е чиста, но дека локалните власти сакаат да го тргнат секој сомнеж.

– Одлучивме да градиме нов водоснабдителен систем затоа што имаме потреба од дополнително количество вода. Исто така, и по сите обвинувања дека водата е загадена, сакаме да ги тргнеме сите сомнежи, иако ние тврдиме дека водата за пиење е чиста – рече Франгов.

Како што пишува во огласот објавен на веб-страницата на Општината, водоснабдителниот систем ќе се гради со кредит од Светска банка и со грант од ИПА-програмата.

Со проектот е предвидено да се изградат два нови бунари кај реката Вардар, потисен цевковод и резервоар на Мрзенски рид.

Проценетата вредност на водоснабдителниот систем изнесува 105.258.839 денари, од кои 70.738.500 денари се обезбедени од Светската банка, додека 260.000 евра се грант од европските ИПА-фондови.

Понудите од заинтересираните компании треба да се достават најдоцна до 4 октомври.


Во Боговиње протест против одлуката со водоводот да управува Општината


Тетово, 5 август, 2016 - 16:38 (META) 

Жителите од Боговиње четврти пат се собраа пред општинската зграда протестирајќи против одлуката со водоводот да стопанисуваат општинските власти. Велат дека нема да дозволат водоводот да премине во рацете на локалната самоуправа затоа што бил изграден со самопридонес на жителите, кои успешно менаџираат со водоводот повеќе од две децении.

– За да го изградиме тој водовод, ние сме ја продале сета стока, сега сака некој сосила да ни го земе. Нема да дозволиме. Додека се градел тој водовод, загина и едно лице. И жртва падна. Како што се жртвувавме да го изградиме, така ќе се жртвуваме и да не го дадеме – изјави Џезми Рамадани, жител на Боговиње.

Со селскиот водовод управува месната заедница. Оттаму велат дека формирале фирма, која би управувала со водоводниот систем.

– Фирма формиравме за да управува со водоводот. Но, за да почне со работа, треба да добие амин од градоначалникот на општината, Хазби Идризи. Тој не сака да оствари средба со нас – вели Ведит Садики, член на месната заедница на Боговиње.

Градоначалникот Идризи вели дека локалната власт нема да се откаже од намерата да управува со водоводниот систем во Боговиње. Според него, барањата на дел од жителите упатени на неколкуте протести што се одржаа во Боговиње, со водата и понатаму да менаџира локалното население се неосновани. Законот како, што рече Идризи, налага со јавните добра да управуваат општините.


Во Гевгелија промовиран „Арсеновиот столб на вистината“


Гевгелија, 15 јуни, 2016 - 12:29 (META) 

Граѓанската иницијатива „Арсена“ во соработка и „Центарот за современи уметности“ од Скопје, вчера попладне во Гевгелија го промовираше „Арсеновиот столб на вистината“, на кој се претставени резултатите од извршените анализи на примерок вода од гевгелискиот водовод, во кој е детектирано енормно количество од отровниот елемент арсен.

Во гевгелискиот водовод во април оваа година детектирани се 21,3 микрограми арсен на еден литар вода, во споредба со 14,56 микрограми на еден литар вода во 2013 година.

Портпаролката на „Арсена“, Јованка Дојранлиева, посочи дека резултатите од анализите на водата покажуваат дека арсенот е сè уште присутен.

Таа истакна дека јавното комунално претпријатие не ја почитувало забраната за употреба на токсичната вода изречена од Агенцијата за храна и ветеринарство и продолжила експлоатацијата на вода од бунарите кај Моин.

– Во 2012 година, кога е изречена забраната за употреба на водата од бунарското подрачје Моин, производственото ниво е два милиони метри кубни вода, а во 2015 година изнесува 2,35 милиони метри кубни. Ако експлотационите количества на вода се во пораст, значи дека мерката за забрана за употреба на водата од бунарското подрачје Моин ЈПКД „Комуналец“ не ја почитува. Присуството, пак, на арсенот во извршените анализи покажува дека комуналното претпријатие не обезбедило нови извори за водоснабдување на граѓаните ниту, пак, набавило деарсенификатор за вода, според препораките на специјалистот по хигиена од Институтот за јавно здравје на РМ – вели Дојранлиева.

„Арсеновиот столб на вистината“ е дел од проектот „Граѓаните и „Арсена“ до здрава вода за пиење за Гевгелија и населените места“ во мерките за информирање на граѓаните заради нивна самозаштита, но и потсетување на надлежните дека не ги извршиле своите законски обврски, а тоа е снабдување на жителите од општина Гевгелија со чиста вода за пиење.

Од „Арсена“ најавија дека ќе поведат постапка пред Управен суд против ценовникот за вода на „Комуналец“, според кој водата загадена со отровниот елемент арсен се наплаќа како чиста вода.


Тетовци жедни, новиот водовод сè уште се гради


Тетово, 11 јуни, 2016 - 16:24 (META) 

Граѓаните на Тетово и ова лето ќе го поминат жедни. Новиот градски водовод, иако беше најавено дека ќе се заврши во октомври минатата година, сè уште не е изграден.

Капацитетот на изворите од кои тетовци се снабдуваат со вода за пиење се намалуваат. Кај дел од граѓаните, чешмите веќе секнуваат.

– Веќе се чуствува недостиг од вода за пиење. Летово ќе биде тешко, но веќе се навикнавме. Водоводот се гради две децеении. Секоја година властите велат дека тој проект ќе биде завршен, но од ветеното нема ништо – вели една тетовка.

Дел од граѓаните не веруваат дека новиот водовод, кој треба во градот да донесе дополнителни 200 литри вода во секунда, ќе биде изграден.

Градоначалничката на Тетово, Теута Арифи, изјави дека за време на нејзиниот мандат, изградени се околу 8,4 километри од трасата на новиот водовод.

Но, во меѓувреме, додека траела градбата, утврдено е дека дел од цевководот во должина од 300 метри, граден за време на минатата локална власт, не е стручно изведен. Поради овој пропуст, според неа, не се оствариле најавите дека проектот нов водовод ќе биде целосно завршен во октомври минатата година.

Таа уверува дека оваа година целосно ќе се заврши водоснабдителниот систем, заедно со пречистителната станица, која моментално се гради во непосредна близина на село Лисец.

– Ние, како локална власт, ќе ги изградиме и тие 300 метри. Се очекува за неколку месеци да се изгради и пречистителната станица и со тоа конечно ќе се заврши прашањето нов тетовски водовод – додаде Арифи.

За пречистителната станица, која ќе гарантира за чиста и безбедна вода, според локалната власт, ќе бидат одвоени речиси 3 милиони евра.


Градоначалникот на Боговиње не отстапува од намерата општината да управува со водоводот


Тетово, 2 април, 2016 - 14:31 (META) 

Градоначалникот на Општина Боговиње, Хазби Идризи вели дека локалната власт нема да се откаже од намерата да управува со водоводниот систем во Боговиње. Според него барањата на дел од жителите упатени на неколкуте протести кои се одржаа во Боговиње, со водата и понатаму да менаџира локалното население, се неосновани.

– Веќе ние како локална власт започнавме да наплаќаме за потрошената вода на повеќе семејства. Нема да дозволам и понатаму со водоводот да управуваат дел од жителите, тоа е незаконски. Тие незаконски протестираат, јас им кажувам јавно, јас не се кријам, тие немаат право да управуваат со водовдот. На ова мора да се стави крај и ќе се стави – изјави градоначалникот на Општина Боговиње Хазби Идризи.

За време на неколкуте протести изминативе 3 месеци, дел од жителите од Боговиње истакнаа дека општината сака на сила да им го земе водоводот, кои сами со нивни пари го изградиле.

Тие побараа со водоводот да управува Јавно приватно партнерство, со кое ќе менаџираат мештаните и локалната самоуправа.

Сметаат дека Општината не е способна сама да менаџира со јавни претпријатија, посочувајќи го Јавното комунално претпријатие на Општината кое е во големи долгови.

Со селскиот водовод во Боговиње управуваат неколку здруженија. Велат дека нема да отстапат од нивните барања, со водоводниот систем да менаџираат и во иднина.


Жителите на Боговиње протестираа против одлуката Општината да раководи со водоводот


Тетово, 11 март, 2016 - 16:31 (META) 

Жителите од Боговиње третпат пред општинската зграда протестираа против одлуката со водоводот да управува локалната власт. Тие истакнаа дека Општината сака насила да им го земе водоводот, кои сами со свои пари го изградиле.

Побараа со водоводот да управува претпријатие кое е јавно – приватно партнерство, а со кое ќе менаџираат локални жители и локалната самоуправа.

Жителите сметаат дека Општината не е способна сама да менаџира со јавни претпријатија, посочувајќи го Јавното комунално претпријатие на Општината, кое е во големи долгови.

– Само со јавно-приватно партнерство ќе се избегне ризикот нашето населено место да остане без вода за пиење – изјави еден учесник на протестот.

Жителите велат дека неколкупати се обиделе да разговараат со градоначалникот на Општина Боговиње, Хазби Идризи, околу оваа проблематика, но тој постојано ги избегнувал.

Од првиот човек на Општината не успеавме да добиеме став во врска со денешниот протест. Од неговиот кабинет ни посочија дека бил на службено патување.

Градоначалникот Идризи, кој присуствуваше на првиот протест во Боговиње околу проблемот со водоводот, им се обрати на протестантите посочувајќи дека законот налага со водоводите да управуваат општинските власти.

Со селскиот водовод во Боговиње засега управуваат неколку здруженија.