Шилегов: Јас сум им гарант на Скопјани – самоволие на Водно нема да има!


Скопје, 23 септември, 2018 - 11:36 (META) 

Додека стојат багерите на Водно и траат преговорите со екологистите околу гасоводната траса, Градот веќе ги доби ветените 3 милиони евра за враќање на зеленилото на Водно, но и за најавените зелени коридори на Серава, Лепенец и Скопска Црна Гора од државата.Дали екологистите ја загубија битката за Водно?

Комплетно застанавте зад изградбата на трасата на гасоводот што води преку Водно.

– Бевме спротиставена страна во преговорите со Владата и со МЕР. Кога видовме дека измената на трасата е невозможна, поради финансиските и временските импликации врз гасификацијата во државата, го извадивме максималниот бенефит за граѓаните и за градот, ја намаливме и видоизменивме постојната траса и тогаш се уверив дека тоа е оптимумза да дадеме зелено светло и да преминеме, условно кажано, на другата страна.

Кога ќе продолжи изградбата?

-Сметав дека како градоначалник треба да ги прекинам градежните активности се додека не ги исцрпиме моментите и аргументите кои што ги имаат граѓанските активисти во однос на аргументите на државните институции и тоа е се уште активен процес. Од тој аспект не можам да кажам дали и кога ќе продолжат градежните активности.

Vodno gasovod zhiv shtit 25avg18 - Go sakam Vodno

Кој ќе гарантира дека на Водно ќе се реализираат ветувањата што се дадени за ревитализација, ширина на трасата, грижа за зеленилото…

– Градот Скопје ќе гарантира! Во повеќе наврати гиповикав и граѓанските активисти да бидат дел од процесот на подготовката на програмата за ревитализација. Веќе ги добивме средствата за изработка на програмата која ќе се направи секако по завршетокот на работите, кога ќе се видат оштетувањата. Град Скопје ќе биде активен надзор во рамките на надежностите, сега се чека издавање на градежни дозовли за делот каде трасата е изменета.Нема да прејудицирам, но, доколку конечно се одлучи таму да поминува трасата на гасоводот кон Тетово, Гостивар и Кичево, очекувам граѓанските здруженија да бидат активни во надзорот над изведувањето на работите.

Се пофаливте дека Вие на гасоводот преку Водно сте работеле уште од ноември, а не откако се појавија екологистите. Како тогаш бевте затечени од сликите на изгазени брези и борови што беа постирани на социјалните мрежи во март?

– За мене и за сите Скопјани Водно е секогаш сензитивна тема. Во ноември МЕР најави градежни активности на гасоводот преку Водно. Дотогашвоопшто немав информација дека таков проект, што може да биде потенцијален проблем, воопшто постои. Гасоводот преку Водно тогаш кога беше подготвуван од страна на претходната власт, подалеку од јавноста. Штом добивме информации дека во два наврата започнуваа градежни работи без дозвола, Град Скопјеги стопираше работите на гасоводот, реагиравме кога беше евидентно кршење на процедурата. Тогаш побарав преиспитување на трасата, а веднаш ги вклучив во целиот процес и граѓанскиотсектор… Зеленилото признавам дека се уништува, но 1.400метри кубни дрвна маса која што треба да се исече на Водно е дневна потрошувачка на дрва во Скопје, а реституцијата на зеленилото која ќе се случи по затрупувањето на цевките ќе го сведе на минимум оштетувањето.

Дали може да се случи повторно некои багери утре да „изненадат“ на Водно за да копаат за уште некој од проектите од времето на „Миле ми текна“?

Vodno

– Не, бидејќи во преговорите со Владата се изборивме за изработка на два законски текста – закон за Водно и закон за заштита на пределот Матка кои треба да дефинираат сериозни протоколи и стандарди за во иднина. Но, имајте на ум дека во многу високозаштитени природни зони во светот постојат инфраструктурни објекти. Низ Алпите има 237 километри гасовод.

Ајде, сега, признајте дека да не беше граѓанскиот еко-активизам, багерите на Рапид Билт одамна ќе си ја завршеа работата не водејќи сметка дека уништуваат макотрпно садена шума?

– Јас двапати ги запрев багерите и јас сум им гарант на Скопјани дека самоволие на Водно нема да има! Она што како држава мораме да го научиме е да ги почитуваме процедурите правилата и стандардите.

Гасоводната траса преку Водно, како и Сончев град и патот до него не се наоѓаат во Просторниот план на РМ, кого го викаат „Устав за урбанизмот“ на една држава, а сепак ќе се гради …

– Ах, па топловодната мрежа во Скопје е дивоградба! Јас го отворив процесот на легализација на мрежата. Жртви сме на волунтаризам во секој сегмент на општеството па и овој. Не можам да сносам одговорност за она што го правеле или не го правеле луѓето што седеле на мое место или на местото на министер за транспорт, на животна средина или премиер. Трасите на гасоводот се затекната состојба, исто како и обврските кои Република Македонија ги превземала за таквата изведба на овие инфраструктурни проекти. Се обидуваме да го извадиме максимумот од невољата. Некогаш се чудам што работеле луѓето пред мене…

Како правник и како скопски градоначалник досега одмолчавте на дискусијата на тема – Водно има или нема заштитен статус, г. Макрадули тврди дека не е заштитено, екологистите цитираат закони кои велат дека е.

– Идејата за закон за Водно е моја, токму поради различните толкувања кои постојат за правниот статус на Водно, дали е или не е заштитено подрачје. И за да го дефинираме еднаш за секогаш не чекајќи дали и кога ќе се класификува, ревалоризира реков- Ајде да направиме закон! Тука ќе престанат сите шпекулации.

Има ли политичка воља да се донесе закон за Водно или бизнис-интересите ќе го заглават пред гласање во Парламентот?

– Апсолутно, да! Ова не го велам напамет. Кога тоа ќе ви каже нешто вакво потпретседател на Социјалдемократскиот сојуз, сметајте го тоа како став на партијата која е владеачка и на локално ниво во Скопје и на централно ниво.

foto brit emb foto uk gov Овој текст е подготвен во рамките на проектот „Поддршка на демократските вредности и промени во општеството преку новинарството“ финансистан од Владата на Обединетото Кралство, со поддршка на Британската амбасада во Скопје. Мислењата и ставовите наведени во оваа содржина не ги одразуваат секогаш мислењата и ставовите на Британската амбасада/Британската Влада.

 


„Го сакам Водно“ и власта не се договорија околу гасоводот


Скопје, 18 септември, 2018 - 17:22 (META) 

Претставниците на граѓанската иницијатива „Го сакам Водно и на власта – заменик-министерот за животна средина Јани Макрадули, градоначалникот на Скопје Петре Шилегов и директорот на МЕР, Бајрам Реџепи, не успеаја да најдат заеднички јазик околу спорната траса на гасоводната делница 5, Скопје-Тетово-Гостивар, преку Водно. Тие ги вкрстија аргументите на јавната дебата  на тема „Гасовод преку Водно“ што, поради симболика, се одржа денес во хотелот Средно Водно.

– Во овој момент не постои механизам кој може да ги отповика градежните дозволи дадени за проектот на гасоводната траса 5. Процесот е отиден предалеку за да го вратиме на почеток и да бараме траса која нема да оди преку Водно. Мораме да се носиме со фактите онакви какви што се – беше дециден скопскиот градоначалник Петре Шилегов, кој состојбата во која сега се наоѓа проблемот со гасоводот преку Водно го поистовети со поодмината бременост на жена во која абортирањето е опасно и за мајката и за детето.

Одговарајќи на обвинувањата на еко-активистите дека не држат оправдувањата дека не може да ја стопира изградбата на сегашната траса на гасоводот, Шилегов истакна дека сегашната владеачка гарнитура не ги носи своите одлуки според принципот „Миле ми текна“ туку дека, поради затекнатите состојби, морала на крајот да се определи да ја реализира оваа траса сосе делницата преку Водно, но дека сериозно е заангажирана да ги реализира еколошките подобрувања во градот како што се зелените коридори, зазеленувањето на булеварите, законското уредување на статусот на Водно и на Матка, а пред се завршувањето на секундарната гасификација на главниот град, за која најави дека работите, по повеќегодишната блокада, ќе стартуваат уште оваа есен.

– Да ја погледнеме пошироката слика – повика Бајрам Реџепи, директорот на државната компанија за гасификација, МЕР, кој ги повтори и претходно дадените аргументи дека евентуалната измена на трасата, во оваа фаза, со напуштање на веќе изградените објекти и со новото проектирање би значела конкретна загуба од 20 милиони евра од буџетот, но и дека и доколку гасоводот оди по друга траса, повторно би имало дури многу поголеми штети врз животната средина и сечење на многу повеќе шума.

– Тешко е да се биде еко-активист во еколошки девастирана држава каква што е Македонија – се пожали долгогодишниот еколошки активист Игор Смилев од „Го сакам Водно“. Тој посочува дека, поучен од сопственото дводецениско искуство во борбата против штетните еколошки проекти во земјава, ревитализацијата на веќе уништените подрачја, кои државата ги прави дури откако нивното уништување ќе достигне критично ниво, секогаш било премногу задоцнето, исклучително скапо и без никаков ефект.

Со тоа алудираше на ветувањата дадени од заменик-министерот за животна средина, Јани Макрадули, дека, паралелно со конечната законска заштита на Водно која тие ќе ја спровеле откако ќе биде завршена изградбата на гасоводот, ќе се случи обемен зафат за ревитализација на подрачјето опфатено со градењето на гасоводот и повеќекратен надомест на исечените дрва.

Еко-активистите потсетија и на недоследностите во постапките на власта околу гасоводната траса преку Водно, како што е сечењето на вегетацијата без дозвола, што де факто се случувало пред еколозите да ја предупредат јавноста што се случува на Водно и изразија отворено сомневање дека властите ќе покажеа макар и најмала грижа за Водно доколку тие не го кренаа својот глас во заштита.

Не беше разјаснета ниту дилемата дали е Водно сепак заштитено подрачје, како што тврдат тие или допрва треба да се заштитува, како што се изјаснија Макрадули и Шилегов. Директорот на МЕР, Реџепи самиот призна дека кај нив се уште постои дилема дали Водно навистина ужива некаков статус на заштита или не, но истакна дека тие уште од почеток имаат дозвола за сечење на вегетацијата за потребите на гасоводот, по утврдената траса, дека неа ја добиле од Македонски шуми и дека, поради ова, сечењето не се врши бесправно или со игнорирање на законските процедури.

„Го сакам Водно“ на крајот ги повикаа своите соговорници од власта да земат учество на јавна расправа која, овојпат, за разлика од досега, ќе ја организираат тие, под нивни услови.

foto brit emb foto uk gov Овој текст е подготвен во рамките  на проектот „Поддршка на демократските вредности и промени во општеството преку новинарството“ финансистан од Владата на Обединетото Кралство, со поддршка на Британската амбасада во Скопје. Мислењата и ставовите наведени во оваа содржина не ги одразуваат секогаш мислењата и ставовите на Британската амбасада/Британската Влада.


Реџепи: Северната траса на гасоводот би уништила многу повеќе зеленило


Скопје, 18 септември, 2018 - 8:03 (META) 

Македонски енергетски ресурси (МЕР) е државна компанија која стои зад изградбата на гасоводот од Скопје кон Тетово и Гостивар, што поминува преку заштитеното подрачје на парк-шумата Водно. Граѓанската иницијатива „Го сакам Водно“ го артикулираше граѓанското незадоволство од уште еден проект што ќе значи натамошна деградација на ионака сериозно уништеното зеленило и живиот свет на „белите дробови на Скопје“, а застанаа и пред багерите кои пред еден месец почнаа со копање за гасоводот на сртот на Водно. Власта реагираше со времено запирање на механизацијата и со преговори со екологистите, но не отстапува од проектот. За овие прашања, разговаравме со директорот на МЕР, Бајрам Реџепи.

Кога ќе продолжите со градежните работи на гасоводната делница преку Водно? Што доколку има физичка блокада од еко-активистите?

– Според студијата за влијанието врз животната средина, сечењето на дрвата не е препорачливо да биде во период од 1 март до 1 октомври, и ние ги запазуваме сите тие мерки предвидени во таа студија. Што се однесува до физичките блокади, ние се обидуваме да ги убедиме активистите на сите состаноци и јавни дебати, што ќе значи за државата ако проектот престане да се реализира во оваа фаза и очекувам дека тоа ќе биде сфатено рационално.

Најавивте стеснување на трасата на 10 метри широчина. Како тоа ќе влијае на безбедноста на гасоводот, кога таа е стандардно е широка не помалку од 25 метри токму од безбедносни причини. Што во случај на пожар? Како ќе се интервенира на таков терен?

– Стеснувањето е само на работниот појас и нема да има никакво влијание за безбедноста на гасоводот. Пристап ќе има до целата траса и тоа е дефинирано по основен проект и со стандарди за градење на преносен систем на гас.

Му ги плативте веќе исечените дрва на град Скопје. Колку ве чинеа исечените дрва на Водно? Колку дрва ќе исече МЕР вкупно на трасата 5, ќе се надоместат ли и на кој начин?

– Досега на Водно немало сечење на дрва. Тоа ќе биде според препораките на студијата за влијанието врз животната средина. Ние на Водно ќе сечеме помалку од 2 хектари шума, или околу 1.400 метри кубни дрва. Тоа ќе биде надоместено неколкукратно со програмата за рекултивација која ќе го изготви Град Скопје во соработка со стручни лица. На пет метри од оската на гасоводот нема да може да се сади високостеблеста шума, но тоа не значи дека покрај оска нема да може да се садат нискостеблесни растенија  како што се шумски капини и друго шумско овошје, кои ќе може да ги користат планинарите што ќе ја користат таа патека за пешачење.

Зошто воопшто е избрана трасата на гасоводот да поминува преку Водно, кога најприродно, според географската поставеност, ќе беше таа да оди од Арачиново, кон Тетово покрај обиколницата, достапно, по рамно и со малку вегетација и градби? Знам дека одлуката е донесена пред вие да застанете на чело на МЕР, но би требало да сте информиран – дали е вистина дека одлуката паднала заради изградбата на Сончев град и планираната урбанизација на Водно?

– Нема такви индикации дека поради Сончев град била избрана трасата да оди низ Водно. А дали низ северната страна на Скопје би била подобра варијанта, тоа во оваа фаза на реализација на проектот е нерационално да се дискутира, заради причините што неколку пати ги повторуваме. Пред се, интервенциите врз зеленилото на таа траса би имале далеку поголемо влијание врз амбиенталниот воздух во Скопје. Исто така, досегашната инвестиција од околу 10 милиони евра ќе пропадне целосно и ќе има дополнителни трошоци од 10 милиони евра, и секако ќе треба проектот да се одложи во најдобар случај за пет години. Треба да земете предвид и дека во тој период ќе биде сечено такво количество на дрво за огрев или повеќе и тоа дневно, за потребите на домаќинствата во Скопје, Тетово и Гостивар.

Беше изнесен аргументот дека на тој потег гасоводната траса ќе се вкрстела со главниот довод на вода од Рашче за Скопје. Дали е вистина дека гасоводот сепак ќе го сече водоводот од Рашче со кракот кој ќе оди кон Косово?

– Тоа е целосна шпекулација. За интерконективниот вод за Косово не постои ниту физибилити студија, ни идеен проект, ниту е дефинирана траса кај треба даде помине.

Постојано се тврди дека застојот поради протестите на екологистите ја одложува гасификацијата, но знаеме дека таа не зависи само од Водно. Кој ќе ја гради секундарната гасоводна мрежа, кој ќе стопанисува со неа? Ќе им соопштите ли на граѓаните колку ќе ги чини да се приклучат на гасоводната мрежа, со инсталирање на сите потребни апарати, бојлери, цевки и слично?

– А.Д. МЕР е оператор за пренос. Со новиот Закон за енергетика јасно се дефинирани дејностите. Но, Владата има формирано работна група, која интензивно работи на изнаоѓање модел за изградба на дистрибутивните мрежи низ градовите и со задоволство можам да ве информирам дека во скоро време ќе се обезбедат и средства и модел за изградба.


Kој му ја укинал заштитата на Водно ако било заштитено во 1976 и во 1991 година?


Скопје, 14 септември, 2018 - 9:35 (META) 

„Водно е заштитено подрачје и како такво треба да се третира од страна на државата“, категорични се екологистите.

Освен Законот за заштита на природата од 2004 година, во чијшто член 184 децидно стои: „Заштитените подрачја заштитени пред денот на влегување во сила на овој закон, како природни реткости, продолжуваат да ја уживаат заштитата на заштитени подрачја согласно со одредбите на овој закон“, од кој што еден примерок понудија да му го подарат на заменик министерот за животна средина, Јани Макрадули поради неговата изјава, дадена на јавната дебата за гасоводот преку Водно дека Водно за голема жал, не е заштитено, тие ги посочуваат и двата документа, од 1976 и 1991 година, на кои се однесува спомнатиот член, со кои планината Водно била прогласена за парк-шума и бил уреден начинот на нејзината заштита.

Во членот 1 од документот од 1976 година стои дека планината Водно се прогласува за градски парк-шума и се наведува во кои граници се заштитува: „Како градски парк-шума се става следново подрачје на планина Водно: од хидрицентралата Матка, по текот на реката Треска до устието во реката Вардар, јужната граница на град Скопје со населбите: Трнодол, Козле, Капиштец, Пржино и Кисела Вода по патот Сопиште-Пржино, потоа по кружниот пат кој ги поврзува населените места Св.Петка, Чифлик, Горно Соње, Долно Соње, Ракотинци и Сопиште“.

odluka

Во одлуката, пак од 1991 година на тогашното Собрание на Град Скопје, се попрецизно дадени границите на заштитеното подрачје парк-шума Водно, со детално наведените катастарски парцели каде таа граница се простира. И во двата документа се дадени главно истите забрани за постапување со Водно – се забранува сечење, кршење, откорнување, собирање и уништување на растителниот свет, потоа се забранува убивање, прогонување и вознемирување на животинските видови, како и подигање на објекти во границите на заштитеното подрачје, „освен јавни и општествени објекти кои нема да го нарушат интегритетот односно природниот изглед на планината“.

odluka 1

Според екологистите, со одлуката за изградба на гасоводот преку Водно и проектите кои беа почнати пред него, државните институции со години свесно ги игнорираат овие факти, а уништувањето на планината се толерира со образложение дека не е завршена ревалоризацијата на подрачјето на парк-шумата која треба да биде заштитено, што е обврска што произлегува од веќе спомнатиот Закон за заштита на природата.

„Се уште не сме добиле одговор од надлежните институции со кој акт, ако тој воопшто постои, е донесена одлука да престане заштитата на Водно“, вели Андреа Јанков од „Го сакам Водно“ и прашува: „Ако Водно е незаштитено, кој е за тоа виновен?“

Иако во повеќе наврати побаравме средба со заменик-министерот за животна средина, Јани Макрадули за да разговараме на темава, од неговиот кабинет се уште нема никаков одговор.

Откако беше најавено дека еко-активистите на „Го сакам Водно“ со жив ѕид ќе го бранат Водно од багерите кои ја градат гасоводната траса, Владата на својата седница од 22 август го задолжи Министерството за животна средина и просторно планирање да изготви предлог закон за заштита на Водно во рок од 30 дена.


„Го сакам Водно“ до Шилегов: Навредите кон активистите, не се добра пи-ар стратегија


Скопје, 13 септември, 2018 - 10:25 (META) 

Еко-активистите кои се против изградбата на гасоводот на Водно, упатија отворено писмо до градоначалникот на Град Скопје, Петре Шилегов кој во една прилика, ги нарече дека се каприциозни.

„Во понеделникот пред медиумите зборувавте дека активистите против изградбата на гасовод низ Водно, ги игнорирале фактите и биле каприциозни. Во изминативе неколку месеци, на тема гасовод низ Водно, стотици аргументи и факти ви беа ставени на располагање, и вам и на претставниците на другите инволвирани институции. Измената на трасата во потег од 4,3 км се должи токму на тие факти презентирани од наша страна“, велат активистите во писмото до Шилегов.

Од таму додаваат дека „факт е дека до ден денешен не е презентирана компаративната анализа врз која се донела одлука трасата да помине низ Водно.“

„Факт е дека договорот за заемот од 90 милиони евра со „Дојче“ и „Ерсте банка“ за изградба и на овој гасовод не е даден на увид. Факт е дека има низа на нерегуларности во целата постапка, дел кои ги наведовме и доставивме и до вас и до надлежните инспекторати. Факт е дека вие во декември и март баравте преиспитување на трасата на гасоводот, изготвување на нова оцена на влијание врз животната средина, повторување на постапката за добивање на потребната документација за изградба на предметната делница на гасоводот, наведувате дека од 53 документи врз основа на кои е издадено одобрението за градење, нема документ со кој е одобрена градба во заштитено подрачје, потенцирате дека не било земено предвид дека трасата на гасоводот минува низ заштитениот локалитет парк-шума Водно. Интересно како тогаш парк-шумата Водно била заштитено подрачје, а сега не е. Или тогаш или сега не ја кажувате вистината“, дополнуваат активистите.

Тие додаваат дека Шилегов не излегол на терен за да ги согледа фактите и го повикаа Град Скопје да направи реална проценка на жителите на Скопје, кои се против изградбата на гасовод низ Водно.

„Градоначалниче Шилегов, навредите кон граѓанските активисти, никогаш не се добра стратегија за пи-ар. Во политички контекст многу брзо ќе сфатите дека претворајќи ги граѓаните кои волонтерски работат за општествен бенефит, при тоа во добар дел работејќи ја и вашата работа грижа за загадувањето, за животната средина, за чистотата, за животните во непријатели, најочигледно ќе се рефлектира врз вашиот углед. Притоа, ниту првата година од вашиот четиригодишен мандат не е измината. Што ве чека допрва ако сега сме каприциозни и малкумина?“, велат активистите.


Екологистите до Макрадули: Водно е заштитено, ќе ви подариме примерок од Законот


Скопје, 6 септември, 2018 - 15:21 (META) 

Не е точно дека Водно не е заштитено подрачје. Водно е заштитено со закон, категорични се екологистите кои застанаа во одбрана на планината, откако пролетва беше најавено започнување на изградбата на делницата 5 од гасоводот Скопје – Тетово – Гостивар.

Одговарајќи на изјавата од понеделникот на заменик-министерот за животна средина и просторно планирање Јани Макрадули, еколошките здруженија велат дека на Водно не можела туку-така да му исчезне заштитата која ја имало уште од неговото прогласување за парк-шума, само затоа што не е направен план за менаџирање со ова природно подрачје, во склад со Законот за заштита на природата од 2004 година.

На јавната дебата во понеделникот во салата на Советот на Град Скопје, во која учествуваа министерот за транспорт и врски Горан Сугарески, директорот на МЕР, Бајрам Реџепи и претставниците на еколошките здруженија кои се обединија во иницијативата „Го сакам Водно“, Макрадули и порача на јавноста дека Водно во моментов не е заштитено подрачје и допрва треба да се заштитува.

Екологистите ги оспоруваат неговите тврдења, тврдејќи дека според еден член од законот, нема потреба од такви процедури.

– Парк-шума Водно е прогласена за заштитено подрачје согласно Законот за заштита на природните реткости од 1973 година. Што значи, продолжува да ја ужива заштитата на заштитено подрачје. Според тоа не стои воопшто аргументацијата на господинот Макрадули дека Водно не е заштитено – вели Андреа Јанков од „Го сакам Водно“.

На заменик-министерот Макрадули со речиси идентична порака му одговараат и од „Фронт 21/42“, велејќи дека се подготвени да му подарат примерок од тој закон.

– На господинот заменик-министер на првата наредна средба ќе му подариме примерок од Законот за заштита на природата, за да се увери и самиот дека според важечките закони на Република Македонија, Водно веќе ужива заштита!  Друга е работата што со години државата свесно толерира градење и уништување на Водно и на други заштитени подрачја со истиот изговор – дека не била завршена нивна ревалоризација и се се врти во истиот маѓепсан круг – вели Александра Бујароска од ова здружение.

Ана Чоловиќ – Лешоска од еколошкото здружение „Еко-свест“ порачува дека во моментот кога ќе се направи таква ревалоризација, ќе мора да престане секоја градежна активност од вакви размери и сите натамошни интервенции од кој било вид ќе мора да бидат во склад со законот за заштита на природата.

foto brit emb foto uk gov Овој текст е подготвен во рамките на проектот „Поддршка на демократските вредности и промени во општеството преку новинарството“ финансистан од Владата на Обединетото Кралство, со поддршка на Британската амбасада во Скопје. Мислењата и ставовите наведени во оваа содржина не ги одразуваат секогаш мислењата и ставовите на Британската амбасада/Британската Влада.

„Го сакам Водно“: Денешната дебата не е замена за јавно соочување на телевизија


Скопје, 3 септември, 2018 - 13:44 (META) 

Граѓанската иницијатива „Го сакам Водно“ смета дека дебатата што денеска се одржува во Град Скопје е далеку од она што тие го бараат – соочување на факти на неутрален терен, со непристрасен медијатор.

Од таму додаваат дека „доаѓање на терен на еден од учесниците во уништувањето на Водно и главните актери, ги става граѓаните бранители во инфериорна позиција.“

„Сепак ние како активисти, нема да одбиеме ниту една можност на граѓаните да им дадеме можност да ги слушнат сите аргументи против гасоводот низ Водно. Нашето присуство денеска на терен на градоначалникот, кој всушност ја има издадено дозволата за сеча низ Водно, не е никаква замена за уште едно соочување на национална телевизија, во нормално време кога граѓаните ќе можат да нè следат, и во која ќе учествуваат сите засегнати институции вклучително градоначалникот Шилегов, Јани Макрадули од Министерство за животна средина и просторно планирање кој се согласи за дебата, и ни е чудно што не е денеска овде“, велат активистите.

Од таму додаваат дека „овој проект кој е почнат во 2010 година, јасно е дека е на штета на природата, на штета на Водно и не е во најдобар интерес на граѓаните“.

„Вие самите, во неколку наврати, при некои од многуте средби што ги имавме изминативе четири месеци, кажавте дека сме 95 проценти во право, па затоа ни е чудно зошто не го прекинете? Зошто наместо во овој период да се посветите и времето да го потрошевте во барање на најдоброто решение и алтернативна траса, го посветивте во создавање непријатели од нас граѓаните? Ние немаме никаков интерес, освен најдоброто за нас како граѓани. Своето слободно време, свои лични материјални ресурси, ги посветуваме работејќи ја работата на државните институции, чија основна цел е да се грижат и да работат во најдобар интерес на нас граѓаните. Наспроти тоа, нè претворивте во условно „друга страна“. Ние не се откажуваме, но во моментов дали Македонија е на вистински пат кон ЕУ граѓанска држава зависи од вашите одлуки и вашиот пристап токму и по ова прашање“, се вели во соопштението.


Прекината изградбата на гасоводот на Водно, Шилегов повика на дебата в понеделник


Скопје, 31 август, 2018 - 13:42 (META) 

Градоначалникот на Скопје,Петре Шилегов, денеска информираше дека се прекинати сите градежни активности за изградба на гасоводот на Водно сè до завршување на процесот на дијалог и дебата. Тој ги повика претставниците на надлежните државни органи, како и претставниците на граѓанските здруженија на дебата в понеделник во 13 часот во просториите на Советот на Град Скопје.

– Изградбата на гасоводот на Водно предизвикува загриженост и реакции во јавноста. Сакам да потенцирам дека пред почетокот на градежните активности претходеа интензивни разговори со активистите и со загрижените граѓани и се бараа заеднички алтернативни компромисни решенија. Токму како резултат на овие разговори успеавме да се избориме за намалување на ширината на трасата на гасоводот од 25 на 10 метри и измени на трасата во еден дел од четири километри. Но, и покрај тоа, очигледно е дека во јавноста сè уште постои загриженост за ваквата траса и за изградбата на гасоводот. Јас како градоначалник не можам мирно и немо да го набљудувам овој процес – рече Шилегов.


Трет ден жив ѕид од еко-активисти пред механизацијата на Водно


Скопје, 31 август, 2018 - 11:46 (META) 

Трет ден по ред, под мотото „Не низ Водно“ активистите од екологистичката иницијатива „Го сакам Водно“ и денеска продолжува со одржување на живиот ѕид пред механизацијата на фирмите кои треба да го градат гасоводот на Водно.

Преку Фејсбук-страницата, активистки утринава објавија фотографии од кампот, повикувајќи ги граѓаните да им се придружат.

„Го сакам Водно“ вчера преку соопштение ги образложи причините зошто продолжува да се спротивставува на изградбата на гасоводот и побара мерки против работникот што во средата даде наредби багерите да ги прегазат активистите што протестираа.

 


„Го сакам Водно“ побара дисциплинска постапка против насилникот и јавна дебата


Скопје, 30 август, 2018 - 14:36 (META) 

Иницијативата „Го сакам Водно“ по вчерашниот инцидент на Водно, кога еден од луѓето што работеа на изградбата на гасоводот даде наредба на багерите да ги прегазат активистите, побара виновникот да биде отстранет и веднаш да се почне дисциплинска постапка против него. Истовремено, екологистите побараа дебата со директорот на МЕР, градоначалникот на Скопје и заменик министерот на Министерство за животна средина и просторно планирање (МЖСПП).

„Бараме ревизија на проектот, бараме постапување на институциите по доставените претставки, нивна меѓусебна соработка, а не изземање од надлежности и неделување,
бараме одговорноста за сите наведени пропусти и прекршени законски обврски, казнивост. Нулта толеранција за изигрување на законот и нерегуларно спроведување на целата постапка“ се вели во соопштението.

Екологистите обвинуваат дека на изградбата на гасоводот на Водно се работи речиси „на диво“.

„Се работи без почитување на цела листа на прописи, законски обврски – нема ознаки, нема обележан заштитен појас околу градежните работи, нема знак за предупредување дека работи тешка машинерија, нема документација на терен, работниците се без адекватна униформа и заштитна облека, нема мобилни тоалети, нема соодветен надзор, нема полнење бензин на строго определени места кои се водонепропусни, а се отстрануваат грмушки во период кога не смеат, пред 30 септември“, се вели во дописот од „Го сакам Водно“.

Активистите велат дека не се врши строго и прецизно набљудување од страна на МЖСПП.

„Сите неправилности кои ние ги предочивме, се игнорираат како да не постојат. Ниту еден
механизам кој институциите, државата, ги има на располагање,  не е покренат. Проектот наместо да претрпи сериозна ревизија, се тера на сила, на диво. Кога институциите остануваат глуви, што преостанува освен жив штит?“, велат активистите.