!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Путин доживеа неочекуван пораз во Москва


Москва, 13 септември, 2017 - 12:05 (META) 

Коалицијата на либералните опозициски партии оствари неочекуван триумф на локалните и на регионалните избори што во неделата се одржаа во Русија, победувајќи во повеќе изборни единици во Москва, вклучувајќи ја и онаа во која гласа претседателот Владимир Путин.

Партијата на Путин, Единствена Русија, која е на власт веќе 17 години, победи во повеќето места на изборите, но успехот на опозицијата во руската метропола не е за занемарување.

Обединетите демократи освоија 11 од 12 места во квартот Тврцкаја, кој се наоѓа во непосредна средина на Кремљ, како и 12 места во квартот Гагарински, каде гласал Путин.

Меѓу советниците на опозицијата е и Виталиј Шклијаров, 41-годишен политички консултант кој минатата година работеше на претседателската кампања на Берни Сандерс.

– Ова е нова ера во руската политика. Сите сме шокирани, симболично е што опозицијата го контролира квартот во кој гласаше Путин – рече Шклијаров.

Гласањето претставува редок триумф за руската либерална опозиција, на чии кандидати често не им е овозможено да влезат во власта.

Сепак, Кремљ овојпат одлучи да ги олесни изборните процедури во обид да одржи, како што рекоа претставниците во Москва, „најискрени избори досега“.


Путин го поддржуваат 84 отсто од Русите


Москва, 7 септември, 2017 - 16:40 (META) 

Рускиот центар за истражување на јавното мислење соопшти дека повеќе од 84 отсто од испитаните Руси ја поддржуваат работата на претседателот Владимир Путин, додека тие што се задоволни од премиерот Дмитриј Медведев се нешто повеќе од 53 отсто.

Рејтингот на Путин во август изнесуваше 83,5 отсто, а во периодот од 28 август до 3 септември – 84,4 отсто, соопшти еден од истражувачите.

Оценките за работата на премиерот варираат. Просечната бројка за август и за почетокот на септември за премиерот е 53,3 отсто, а за владата 57,4 отсто.

Со работата на долниот дом на Државната дума се задоволни 51 отсто од испитаниците, додека за горниот дом позитивно се изјасниле 57,7 отсто од учесниците на истражувањето.

Агенцијата ТАСС наведува дека 50,1 отсто од Русите го сметаат Путин за најкредибилен руски политичар, а веднаш зад него се Сергеј Шојгу со 16,7 отсто и премиерот Медведев со 15,5 отсто.


Путин ќе ги тужи САД


Москва, 5 септември, 2017 - 21:06 (META) 

Рускиот претседател, Владимир Путин, му наложил на Министерството за надворешни работи да ја тужи американската администрација поради запленувањето на имотот на руските дипломатски претставништва во САД, соопшти портпаролот на Кремљ, Дмитриј Песков.

Путин претходно најави дека ќе наложи преземање правни дејства поради кршењето на имотните права на Русија од Вашингтон.

– За почеток ќе дадам налог Министерството за надворешни работи да се обрати до судот, да видиме како функционира тој толку фален американски правосуден систем – изјави претходно Путин на прес-конференција во Сјамен.

Тој, исто така, рече дека Русија го задржува правото дополнително да го намали американскиот дипломатски персонал во Москва и дека земјата ќе протера уште 155 дипломати, но дека тоа нема да се случи во овој момент.


Путин предложи заедничка енергетска платформа на Самитот на БРИКС


Сијаме, 4 септември, 2017 - 11:19 (META) 

Рускиот претседател Владимир Путин им понуди на членките на БРИКС (организација во која членуваат Бразил, Русија, Индија, Кина и Јужноафриканска Република) заедничка платформа во областа на енергетските истражувања.

– Важно е да се зголеми дијалогот за енергетиката на овие пет земји – изјави Путин на самитот на БРИКС, кој почна денеска во Сијам.

Путин предложи да се основа заедничка енергетска платформа која би овозможила подобра размена на информации, аналитички и на научни податоци.

Тој потсети дека стратегијата на економско партнерство на БРИКС е основана на самитот во Русија во 2015 година.

– Сметаме дека треба да развиваме електронска трговија без пречки, да се поддржат малите и средни претпријатија и да има поголема ефикасност во партнерствата на државата и приватниот сектор – рече рускиот претседател.

Кинескиот претседател Кси Џинпинг ги повика земјите – членки на БРИКС да играат поголема улога во светот, да го отфрлат протекционизмот и да внесат нова енергија во решавањето на разликите помеѓу богатите и земјите во развој.


Путин нема да присуствува на заседавањето на Генералното собрание на ОН


Москва, 2 септември, 2017 - 12:19 (META) 

Рускиот претседател Владимир Путин не планира да учествува на годинешното заседавање на Генералното собрание на Обединетите нации, кое ќе се одржи на крајот на месецот.

– На претседателот тоа не му е во план – изјави портпаролот на Кремљ, Димитриј Песков.

Портпаролот на Кремљ не сакаше да ја коментира инцијативата на американскиот претседател, Доналд Трамп, пред почетокот на заседанието на Генералното собрание на ОН да одржи самит на светските лидери.


Посетата на Путин на Абхазија е непримерна, оценија САД


Вашингтон, 10 август, 2017 - 10:21 (META) 

Посетата на претседателот на Русија, Владимир Путин, на отцепениот грузиски регион Абхазија е непримерна, оцени американскиот Стејт департмент.

САД исто така ја повикаа Русија да ги повлече своите сили на позиции пред судирот и во согласност со мировниот договор од 2008 година.

Путин за време на посетата изјави дека Абхазија ќе добие воена поддршка од Москва, а западните влади го осудија руското поддржување на сепаратистите.

Путин за време на состанокот со абхазискиот претседател Раул Хаџимб рече дека Русија е решена цврсто да ја гарантира безбедноста и независноста на Абхазија и укажа на потребата за препознавање на оптималните начини за развој на економијата.


Путин побара 755 американски дипломати да ја напуштат Русија


Москва, 31 јули, 2017 - 11:26 (META) 

Рускиот претседател Владимир Путин синоќа во интервју за „Вести ТВ“ соопшти дека 755 американски дипломати мора да ја напуштат Русија и оти Москва би можела да разгледа и дополнителни мерки како одговор на најновите санкции на Вашингтон.

Путин рече дека САД имаат рок за намалување на дипломатскиот и на техничкиот персонал до 1 септември.

– Повеќе од 1.000 луѓе работеа и сè уште работат во американската амбасада и во конзулатите – рече Путин и додаде дека 755 американски дипломати мора да ја прекинат својата активност во Русија.

Москва во петокот им соопшти на САД да повлечат стотина дипломати и службеници и рече дека ќе заплени два дипломатски имоти на САД, откако Претставничкиот дом на САД и Сенатот ги одобрија новите санкции за Русија. Белата куќа во петокот соопшти дека американскиот претседател Доналд Трамп ќе го потпише пакетот санкции.

САД изразија жалење поради одлуката на Русија да го намали бројот на американски дипломати, наведувајќи дека сè уште не е донесена одлука за таа мерка, соопшти доцна синоќа Стејт департментот.

„Тоа е жална и неоправдана одлука. Го проценуваме влијанието на тоа ограничување и начинот на кој ќе одговориме на таа мерка“, стои во соопштението од американското Министерство за надворешни работи.


Путин: Одговорот на Русија на санкциите од САД ќе зависи од конечната верзија на законот


Москва, 27 јули, 2017 - 19:06 (META) 

Русија ќе протера 35 американски дипломати и максимално ќе го ограничи нивниот број доколку американскиот претседател Доналд Трамп го потпише законот кој се однесува на санкции против Русија, пишуваат руските медиуми, повикувајќи се на извори од руското министерство за надворешни работи.

Руското МНР ја разгледувало можноста и за непропорционален одговор, на тој начин што Москва може да ја одбие соработката со Вашингтон по важни прашања за САД, како што е зајакнување на притисокот врз Северна Кореја.

Конгресот на САД усвои закон за санкции кон Русија, Иран и Северна Кореја. Доколку Сенатот го усвои, а претседателот го потпише овој закон, новите санкции би можеле да бидат најголеми од 2014 година.

Рускиот претседател Владимир Путин денеска, исто така, изјави дека одговорот на Русија ќе зависи од конечната верзија на текстот на американскиот закон.


Путин, Порошенко, Макрон и Меркел телефонски разговарале за Украина


Киев, 24 јули, 2017 - 18:54 (META) 

Лидерите на Русија, Украина, Франција и на Германија разговарале телефонски околу решение за конфликтот на истокот на Украина.

Владимир Путин, Петро Порошенко, Емануел Макрон и германската канцеларка Ангела Меркел прво го слушнале извештајот на претставникот на набљудувачката мисија на Организацијата за европска безбедност и соработка во Украина за почитување на прекинот на оган.

„Лидерите потоа разменија идеи околу ситуацијата на југоистокот на Украина, земјаќи ги предивид сериозните препораки за примена на мировниот договор од Минск од февруари 2015 година“, се наведува во соопштението од Кремљ.

Ова е прв телефонски разговор во таканаречениот Нормандиски формат од почетокот на мандатот на францускиот претседател Емануел Макрон, кој на крајот на мај побара тој состанок да се одржи што побргу.

Лидерите се договориле да ги продолжат контактите, вклучувајќи ги и оние на највисоко ниво.

Во тригодишниот конфликт кој ја подели Украина, досега загинаа повеќе од 10.000 луѓе. Киев и Западот ја обвинуваат Русија дека финансиски и воено ги поддржува бунтовниците, што Москва го демантира.


Трамп и Путин имале уште еден досега необјавен разговор


Вашингтон, 19 јули, 2017 - 9:43 (META) 

Белата куќа соопшти дека претседателот на САД, Доналд Трамп, имал уште еден, претходно необјавен разговор со рускиот претседател Владимир Путин на самитот Г20 во Хамбург.

Портпаролот Шон Спајсер синоќа соопшти дека Трамп и Путин разговарале за време на заедничката вечера на лидерите од Г20.

Двајцата претседатели претходно, во текот на денот, имаа официјален состанок кој траеше повеќе од два часа.

Не е познато колку траел неформалниот разговор, ниту, пак, кои биле темите.