Судењето за „Траекторија“ продолжува на 4 септември


Скопје, 12 јули, 2018 - 14:35 (META) 

Со преслушување на уште 20-тина „бомби“, приложени како доказ, денеска се одржа уште едно рочиште од случајот „Траекторија“, односно за изградбата на автопатите Кичево -Охрид и Миладиновци -Штип со кинески кредити, во кој обвинети се екс премиерот Никола Груевски, поранешниот вице премиер Владимир Пешевски, екс министерот Миле Јанакиески и поранешниот директор на ЈП за државни патишта Љупчо Георгиевски.

Следното рочиште ќе се одржи на 4 септември.

Досега се преслушани околу 300 разговори, а денеска се слушаа бомби од преговорите за апликацијата за кредит од Кина од период февруари 2013 година.

Во сите разговори се слуша гласот на поранешниот министер за транспoрт и врски Миле Јанакиески со соговорници, во кои се договара кои македонски компании да учествуваат во изградбата на патот.

– Ќе докажеме дека на 22.2.2013 година Пешевски и Јанакиески во нетранспарентна и неконкурентна постапка и за двете автопатски делници ја избрале понудата на „Синохидро“. Ќе докажеме дека обвинетите биле свесни дека немале законска основа да почнат преговори и покрај тоа што владите на Македонија и Кина потпишале и договор. За да се потпише таков меѓувладин договор, нужно било првин да биде донесен посебен закон. Сè дотогаш важи законот за јавни набавки – рече обвинителката Лиле Стефанова.


Претходната власт плаќала три пати поскапо за авионски карти, хотели и ресторани


Скопје, 22 март, 2018 - 11:40 (META) 

Алатката за отчетност за трошоците на носителите на јавните фунцкии, која владата ја промовираше вчера, покажува дека најголеми разлики во трошењето помеѓу сегашната и минатата власт има во авионските карти, хотелското сместување, но и кај трошењето во ресторани во странство.

За шестмесечен период, министерствата предводени од минатата власт за овие ставки потрошила двојно, а некаде и тројно повеќе народни пари за овие услуги.

Периодот кој што се анализира со оваа алатка е од 1 јуни до 1 декември 2014 година од владеењето на претходната власт и од 1 јуни до 1 декември 2017 година за време на владеењето на оваа власт, односно првите шест месеци од стапувањето на функции по прземање на власта.

Анализирањето на трошења по министерства, покажува дека министерството за финансии предводено од Зоран Ставрески потрошило 2.619.357 денари, а со Драган Тевдовски 583.170 денари.

Најголема разлика во трошењата има кај авионските карти, при што, Ставрески потрошил 947.579 денари, наспроти 144.514 денари потрошени од Тевдовски. Голема разлика има и кај хотелското сместување, 834.802 денари наспроти 206.283 денари. Евидентна е разликата и кај угостителски услуги во странство 345.243 денари, наспроти 32.748 денари.

MinFin

За угостителски услуги во земјата преку надворешни угостителски објекти, биле потрошени 171.469 наспроти 47.242 денари.

Разлики во трошењето има и во министерството за транспорт и врски, па така, кабинетот на Миле Јанакиески за авионски карти потрошил 615.774 денари, а за кабиентот на Горан Сугарески нема таков трошок.

За угостителски услуги во земјата, Јанакиески потрошил 286.661 денари наспроти 31.265 денари потрошени од Сугарески. Хотелското сместување во странство, Јанакиески го чинело 301.727 денари наспроти 16.700 денари потрошени од Сугарески.

Трошоците за мобилен телефон на кабиентот на Јанакиески се 419.132 денари, а на Сугарески 14.998 денари.

Кај Министерство за здравство, интересен е податокот што Никола Тодоров не потрошил ниту денар за авионски карти, но затоа за угостителски услуги во земјата преку надворешни угостителски објекти потрошил 816.607 денари, наспроти 276.982 денари, потрошени од Таравари.

MinODB

Министерството за одбрана за време на Зоран Јолевски потрошило 1.020.347 денари, а за време на Радмила Шекеринска 447.044 денари. Најголеми разлики во трошењето има кај авионските карти 636.533 денари за време на Јолевски, наспроти 225.872 денари за време на Шекеринска.

Речиси четири пати е поголема сумата потрошена на угостителски услуги преку мензи, ресорани и бифеа во рамките на институциите за време на Јолевски (800.277), наспроти 197.393 денари за време на Шеќеринска.


Груевски, Јанакиески и Пешевски се изјаснија за невини во случајот „Траекторија“


Скопје, 1 март, 2018 - 11:41 (META) 

Кривичниот суд го одби барањето на поранешниот премиер Никола Груевски „бомбите“ да не бидат докази во случајот со провизии од кинеските автопатишта со што започнаа воведните говори во случајот на СЈО „Траекторија“.

Во судницата покрај Груевски присутни се и поранешниот вицепремиер Владимир Пешевски, екс министерот за транспорт и врски Миле Јанакиески и поранешниот директор на Агенцијата за државни патишта, Љупчо Георгиевски.

-Го прочитав и разбрав обвинението, но не сфатив за што сум обвинет. Кривичното дело наведено во обвинението не сум го сторил – рече Груевски, по што и другите обвинети се изјаснија дека не се чувствуваат виновни.

Судот го оцени како неоснован предлогот на Груевски СМС пораките да бидат отфрлени како докази. Груевски обвини дека пред да му бидат дадени на СЈО, пораките биле во рацете на СДСМ, која, како што рече, е политичка партија која е негов силен противник.

На почетокот на рочиштето судијата Горан Бошевски ги праша обвинетите дали има промена на податоците. Јанакиески кажа дека во моментов е вработен како раководител во „Пелистерка“, Пешевски се води како невработен и прима апанажа, Георгиевски е невработен, а Груевски е пратеник во Собранието.

Обвинителката од СЈО, Лиле Стефановска, рече дека повод за постапката против обвинетите е содржината на аудио материјалите, од што произлегува дека биле повредени процесите за водење на јавни набавки при градење на автопатите. Од нив се гледа, рече Стефановска, дека Јанакиески и Пешевски требало да потпишат незаконски договор со кинеска компанија за градење на автопатите.

– Од содржината на материјалните докази, вештачењата, сведочењата на лица, ќе докажеме дека обвинетиот Груевски мотивиран од „пет на целото“, како што слушнавме во објавените снимки, ја искористил службената положба и влијаел врз Пешевски и Јанакиески да извршат избор на компанијата што ќе ги гради автопатите, но без тендерска постапка – рече Стефанова.

Четворицата се обвинети дека во втората половина на 2012 година и во текот на 2013 година презеле повеќе дејствија со кои во постапката за избор на компанија за изградба на автопатите Миладиновци – Штип и Кичево – Охрид ги искористиле и пречекориле своите овластувања, со што му нанеле штета на државниот буџет од најмалку 155 милиони евра.


Продолжува судењето на Груевски, Пешевски, Јанакиески и Георгиевски за „Траекторија“


Во скопскиот Кривичен суд (Основен суд Скопје 1) денеска треба да се одржи ново рочиште за случајот на СЈО „Траекторија“, во кој се обвинети поранешниот премиер Никола Груевски, поранешниот вицепремиер Владимир Пешевски, екс министерот за транспорт и врски Миле Јанакиески и поранешниот директор на Агенцијата за државни патишта, Љупчо Георгиевски.

Според обвинението на СЈО, тие во втората половина на 2012 година и во текот на 2013 година презеле повеќе дејствија со кои во постапката за избор на компанија за изградба на автопатите Миладиновци – Штип и Кичево – Охрид ги искористиле и пречекориле своите овластувања. Со тоа, му нанеле штета на државниот буџет од најмалку 155 милиони евра и за истиот износ на компанијата изведувач и овозможиле да се стекне со имотна корист.

На минатото рочиште што се одржа на 14 февруари, Груевски ги оспоруваше СМС-ите и побара да не формално решение од судот за одбивањето на барањето да не се користат 13 од вкупно 315 прислушувани разговори кои СЈО ги достави до судот како докази. Тој исто така ги ооспори вештачењата за предметот.


Судот ги одби барањата на адвокатите во „Траекторија“, тие поднесоа нови


Скопје, 14 февруари, 2018 - 11:40 (META) 

Денешното рочиште за случајот „Траекторија“ мина главно во знакот на предлозите на адвокатите на обвинетите, поранешниот премиер Никола Груевски, поранешниот вицепремиер Владимир Пешевски, екс министерот за транспорт и врски Миле Јанакиески и поранешниот директор на Агенцијата за државни патишта, Љупчо Георгиевски.

Пред почетокот на денешната главна расправа, судијата Горан Бошевски соопшти дека судот ги одбива како неосновани десетината предлози на адвокатите на одбраната. Тие на претходното рочиште дадоа приговори за водењето на записникот од главната расправа, побараа да се одбијат дел од вештачењата и околу користењето на бомбите во постапката.

Адвокатите реагираа и на тоа што не го добиле ЦД-то со записникот од претходното рочиште. Адвокатот Димитар Дангов побара поради тоа да се прекине денешното рочиште, бидејќи, како што рече, во спротивно на обвинетите им се оневозможува правото на квалитетна одбрана.

Инаку, одбраната утрово доставила и нови предлози до судот, од кои дел се однесуваат на користењето на смс-пораките во постапката.

– Смс-пораките не можат да бидат доказ и треба да се одбијат  – рече Дангов и повторно побара да добие записник од рочиштето на 31 јануари.

Адвокатот Дончо Наков рече дека ЦД-то од претходното рочиште на негово барање го добил утрово во 9.30 часот и немал време да го види.

– Во Законот за кривична постапка стои дека записникот со цд треба да биде даден веднаш или во рок од 24 часа. Без тоа не можам да дадам одбрана, ниту пак воведни зборови. Цд-то е законска обврска, а не помошно средство – рече Наков, побара прекин на постапката и да им биде дадено ЦД-то со записникот од претходното и од денешното рочиште.

Обвинителката на СЈО на тоа рече дека сите приговори на адвокатите се во насока на одложување на главната расправа, а не во насока на давање одбрана.

– Ако одбраната има нови предлози, мора да ги доставува навреме, а не пред почетокот на рочиштата. Од она што можев да го видам на кратко од денешните предлози на одбраната, станува збор за приговори кои се повторуваат и за кои судот досега се има произнесено – рече Стефанова.

Судијата Горан Бошевски даде пауза до 12 часот, за судот да одлучи за предлозите.


Груевски стаса на рочиштето за „Траекторија“ дури откако тоа се одложи


Скопје, 26 декември, 2017 - 10:18 (META) 

Откако судијата Горан Бошевски на самиот почеток го одложи за денеска закажаното рочиште за случајот „Траекторија“ а потоа замина и обвинетиот поранешен министер за транспорт и врски Миле Јанакиески, во Основен суд Скопје 1 со задоцнување стаса и поранешниот премиер Никола Груевски.

Судијата Бошевски даде два предлога за следното продолжение на судењето – 31 јануари и 14 февруари, но не образложи зошто го одложил денешното рочиште.

На адвокатите на обвинетите Груевски, Јанакиески и поранешниот вицепремиер за економска прашања Владимир Пешевски им рече дека Специјалното јавно обвинителство ги доставило преводите на македонски на дел од доказниот материјал и ги покани од утре да дојдат во судот и да ги земат.

Како што во неформален разговор кажаа адвокатите, причина за одлагање на денешното рочиште е и тоа што судијката Верка Петковска, која е дел од судечкиот совет за дел од овој предмет, со новиот распоред на претседателот на судот, Иван Џолев, е префрлена во друг оддел, односно не е повеќе во одделот за организран криминал.

Специјалните обвинителки Фатиме Фетаи и Лиле Стефановска немаа приговори за одложувањето на денешното рочиште.

Груевски, Јанакиески, Пешевски се обвинети за злоупотреба на службената положба за незаконско склучување договори за изградба на автопатите Кичево – Охрид и Миладиновци – Штип. Притоа, нанеле штета на буџетот на Република Македонија од најмалку 155 милиони евра, стои во обвинителниот акт од СЈО.


Јанакиески и Пешевски пристигнаа во суд, се чека Груевски


Скопје, 26 декември, 2017 - 9:57 (META) 

Во Основен суд Скопје 1 пред малку пристигнаа поранешните министер и вицепремиер Миле Јанакиески и Владимир Пешевски, а се чека и Никола Груевски, пред да почне судењето за случајот на Специјалното јавно обвинителство „Траекторија“, во кој се обвинети за злоупотреба на службената положба за незаконско склучување договори за изградба на автопатите Кичево – Охрид и Миладиновци – Штип. Притоа, нанеле штета на буџетот на Република Македонија од најмалку 155 милиони евра, стои во обвинителниот акт од СЈО.

Иако претходно најавено, во судот денеска најверојатно нема да има рочиште за предметот „Труст“ во кој првоосомничен е бизнисменот Сеад Кочан и уште две физички и три правни лица, меѓу кои и управителите на фирмите „Трансмет“, „Силекс“ и „Вато“ ДООЕЛ, за учество на тендер на електрани на Македонија. Според обвинението, осомничените со фалсификувани документи местеле тендери во ЕЛЕМ во вредност од 17 милиони евра.

Следното рочиште за „Труст“ најверојатно ќе се одржи на 18 јануари.


Судењето за „Траекторија“ одложено за 26 декември поради „Шамарите во Центар“


Скопје, 18 декември, 2017 - 11:30 (META) 

Судијата Горан Бошевски по кратка работа на денешното рочиште од судењето за случајот на СЈО, „Траекторија“, го прекина рочиштето откако беа слушнати барањата на одбраната на обвинетите. Следното рочиште ќе се одржи на 26 овој месец, а денешното беше прекинато бидејќи во судницата во 11.30 часот треба да продолжи судењето за случајот „Шамари во Општина Центар“.

Денеска адвокатите на одбраната побараа да ги добијат 315-те снимки од прислушувани разговори и СМС-пораки што специјалната јавна обвинителка Лиле Стефанова ги достави како доказ. Најголем дел од нив досега не се објавени. Судијата Бошевски рече дека на следното рочиште ќе се изјасни околу барањата на адвокатите на обвинетите да ги слушаат снимките во судот, откако тој и петчлениот судски совет ќе го разгледаат барањето.

Во случајот „Траекторија“, за изградбата на автопатите Миладиновци – Штип и Кичево – Охрид, обвинети се поранешниот премиер и претседател на ВМРО-ДПМНЕ во заминување, Никола Груевски, и поранешниот министер за транспорт и врски, Миле Јанакиески, како и поранешниот вицепремиер Владимир Пешевски и поранешниот директор на Агенцијата за државни патишта, Љупчо Георгиевски. Груевски е обвинет за примање награда за противзаконито влијание, а другите тројца за злоупотреба на службената положба и овластувања.


Груевски и Јанакиески денеска на две судења


Скопје, 18 декември, 2017 - 9:49 (META) 

Поранешниот премиер и претседател на ВМРО-ДПМНЕ во заминување, Никола Груевски, и пораншниот министер за транспорт и врски, Миле Јанакиески, денеска поголем дел од денот ќе го поминат во Основен суд Скопје 1, поради неколку судења.

Во 9.45 часот почнува рочиштето за случајот на Специјалното јавно обвинителство (СЈО) наречен „Траекторија“, во кој освен двајцата обвинети се и поранешниот вицепремиер Владимир Пешевски и поранешниот директор на Агенцијата за државни патишта, Љупчо Георгиевски. Случајот е за договорите за новите автопати Миладиновци – Штип и Кичево – Охрид. Груевски е обвинет за примање награда за противзаконито влијание, а останатите тројца за злоупотреба на службената положба и овластувања.

Vladimir Peshevski Osnoven sud Skopje 1 sudenje Traektorija 18dek17 - Meta

По рочиштето за „Траекторија“, закажано е рочиште за случајот „Шамари“, а во  овој предмет Груевски и Јанакиески се прво и второобвинети, а со нив на обвинителна клупа е актуелната пратеничка и поранешна советничка во Општина Центар Даниела Рангелова.

Во првичното обвинение од СЈО беа опфатени вкупно 14 лица, по што Томислав Лазаревски и Јордан Ристевски, поранешни членови од ВМРО-ДПМНЕ во Советот на општина Центар, ја признаа вината и добија условни осуди од 6 месеци затвор.

На денешното рочиште треба повторно да сведочи екс градоначалникот на Центар, Андреј Жерновски, пред адвокатите на одбраната, откако на минатото рочиште сведочеше пред специјалните обвинители.


Одложено рочиштето за „Траекторија“ поради немање услови за снимање на судењето


Скопје, 6 декември, 2017 - 10:51 (META) 

Почетокот на судењето за случајот „Траекторија“ на СЈО, во кое обвинети се поранешниот премиер Никола Груевски, поранешните министри Владимир Пешевски, Миле Јанакиески и ексдиректорот на Агенцијата на државни патишта, Љупчо Георгиевски, се одложи на барање на одбраната бидејќи во судницата не беа обезбедени услови за тонско и за визуелно снимање на рочиштето.

Адвокатот Еленко Миланов во името на сите бранители побара од судот да ги почитува одредбите од ЗКП и да овозможи тонско и визуелно снимање на рочиштето за да можат, како што рече, сите учесници во постапката и институции да имаат увид во тоа што се случувало на рочиштата.

Судијата Горан Бошевски, кој го води предметот, се согласи и го одложи рочиштето за 18 декември, за кога, како што рече, ќе бидат обезбедени услови.

По завршувањето на рочиштето, Груевски изјави дека денеска бил повикан на суд за нешто што претходно го правела, а и сега го прави владата на СДСМ.

– Имено, владата на СДСМ, за изградбата на хидроцентралата Козјак направила договор во идентична постапка и на идентичен начин и ја исфинансирала изградбата, а сега кога СДСМ е повторно на власт е направен анекс на договорот кој е усвоен во Собранието и е преточен во закон – рече Груевски.

Прашан за договорот со кинеската компанија за изградбата на двата автопатишта, поранешниот премиер и актуелен лидер на ВМРО-ДПМНЕ рече дека сè било направено според закон, дека бил изгласан во Собранието и за него гласале пратениците на СДСМ, тогаш во опозиција.

Груевски се товари за примање награда за противзаконито влијание, а другите обвинети – за злоупотреба на службената положба и овластувања. Тие, поттикнати од Груевски, во периодот од октомври 2012 до октомври 2013 година, ги искористиле и ги пречекориле овластувањата во постапката за избор на компанија што ќе ги гради автопатските делници Миладиновци – Штип и Тетово – Охрид и на тој начин го оштетиле буџетот за 155.117.256 евра.