„Агрокор“ ќе продолжи со работа по 15 јули, постигнат договор со две руски банки


Загреб, 19 април, 2018 - 11:29 (META) 

Претседателот на Хрватската стопанска комора, Лука Буриловиќ изјави денеска дека е постигната спогодба со две руските банки за концернот „Агрокор“, што ќе и овозможи на компанијата непречено да продолжи да работи од 15 јули оваа година.

Буриловиќ истакнал дека договорот ќе биде реализиран на 15 јули, бидејќи тогаш престанува да важи „лекс специјалис“ за „Агрокор“.

– Најважно е дека е постигнат договор и „Агрокор“ после 15 јули ќе продолжи непречено да работи – изјави Буриловиќ.

Според нацртот на договорот, „Спербанк“ и банката „ВТБ“ ќе бидат мнозински сопственици на концернот, бидејќи би имале помеѓу 30 и 46 отсто удел во сопствеништвото.

Акционерите на „Агрокор“ би имале од 23 до 25 отсто од компанијата, домашните банки околу 10 отсто, а добавувачите околу осум отсто.

Владата на Хрватска во „Агрокор“ кој имаше финансиски проблеми воведе принудна управа во април 2017 година. Тој концерн во регионот вработува околу 60.000 луѓе.


Владата го прошири опсегот на функционери што треба да кажат колку трошат


Скопје, 18 април, 2018 - 9:37 (META) 

Вчера Владата донела одлука најдоцна до 20 јуни годинава директорите и замениците на директорите на самостојните органи на државната управа, на органите во состав на министерствата и на инспекцискиот совет, на своите веб – страници да ги објават податоците за нивите службени трошоци за периодот од 01.12.2014 до 31.05.2015 година и за периодот од 01.12.2017 до 31.05.2018 година.

Истото им се укажува да го сторат и директорите и замениците на директорите на јавните претпријатија, правните лица со јавни овластувања и акционерски друштва во државна сопственост.

Со тоа се проширува досегашниот опсег на функционери и именувани раководни органи што треба да покажат отчетност пред јавноста.

„Обврската за објава на службените трошења, на долг рок ќе обезбеди ефикасност во работењето на институциите, како и зголемена одговорност на власта која работи транспарентно и отчетно без злоупотреба на државните ресурси“, соопшти Владата.

Истовремено, биле разгледани и усвоиени Правилници за мерките од Планот за економски пораст на Владата – столб 3. Правилниците се однесуваат на следните 4 мерки: Финансиска поддршка на мали и средни претпријатија со тенденција на брз пораст („Газели“), посебна финансиска поддршка за микро претпријатија, финансиска поддршка на микро, мали и средни претпријатија за подобрување на иновативноста, како и зафинансиска поддршка за стручно усовршување и пракса за нововработени млади лица.

Во исто време, Владата ќе формира работна група за следење на реализацијата на мерките од столб 3 од Планот за економски пораст.

На предлог на премиерот е прифатена иницијативата да се формира Национално координативно тело за изедначување на правата на лицата со попреченост , кое ќе функционира во рамките на Владата. Обврската за формирање ваков орган произлегува од Меѓународната Конвенција на ОН за заштита на правата на лицата со попреченост, која Република Македонија ја има ратификувано во 2011 година.


Заев: Граѓаните се најзаслужни за позитивната препорака од ЕК


Скопје, 17 април, 2018 - 17:25 (META) 

Граѓаните се најзаслужни за позитивната препорака од Европската Комисија, порача премиерот Зоран Заев на прес-конференција во Владата, откако беше објавена неусловената препорака за почеток на преговорите со Македонија што Европската Комисија (ЕК) ја упати до Европскиот Совет.

– Дел од успесите има и опозицијата зошто направивме заеднички компромиси. Владата е подготвена да прифати различни размислувања. Владата посветено ги сработи реформите. Одлуката да се стави крај на штетната политика, ја донесоа граѓаните. Власта ги послуша граѓаните, кои знаат што е важно за чекорењето на Македонија кон ЕУ. Ќе продолжиме со реформскиот пакет. Власта покажа дека е инклузивна и прифаќа различно мислење, а опозоцијата покажа дека е свесна за сопствената одговорност – порача премиерот на прес конференцијата, на која присуствуваа десетина министри од клучните ресори.

Заев рече дека  со иста посветеност се разговара со Грција за решавање на спорот со името и како што вели, да се затвори и ова прашање.


Шекеринска: Антидржавно е граѓанските организации да се сметаат за непријатели


Скопје, 16 април, 2018 - 14:00 (META) 

Вицепремиерката и министерка за одбрана, Радмила Шекеринска денеска во Владата одржа конститутивна седница на Советот за соработка и развој на граѓанскиот сектор, информираат од владината прес-служба.

Таа на присутните претставници на граѓанските организации им рекла дека членовите на владата овие средби ги гледаат како начин преку кој со соработка со граѓанскиот сектор може да се помогне во остварување на владините приоритети.

– Ве гледаме како сојузник во борбата против „заробената држава“ која што не се победува на избори, туку се победува преку многу, болни, тешки, понекогаш и долги реформи – рекла Шекеринска.

Според вицепремиерката, Советот не е само средство на граѓанските организации за постигнување на поголема гласност и влијание, туку и како начин до Владата да пристигнат повеќе информации и различни мислења за силен инклузивен дијалог.

– Како Влада, во изминатиот период обезбедивме и законски и процедурални услови за подолги дијалози по сите законски пакети и покажавме дека квалитетот ни е поважен од квантитетот- додала Шекеринска, подвлекувајќи дека Владата посебно инвестира во транспарентноста и инклузивноста.

Шекеринска истакнала дека актуелната Влада се заложува да се елиминира однесувањето во кое граѓанските организации се сметаат за непријател на државата, затоа што критикуваат некого од власта, нарекувајќи го тоа однесување како антидемократско, антиевропско и антидржавно.

Во Советот за соработка и развој на граѓанскиот сектор има 31 член, и во него учествуваат претставници на граѓанските здруженија и организации и претставници на ресорни министерства и секретаријати.

На денешната седница, освен членовите на Советот, биле присутни и претставници на Делегацијата на Европската Унија.

Во текот на дискусијата за предлог-деловникот за работа на Советот за соработка и развој на граѓанскиот сектор, присутните гласаа за формирање на работна група од четири члена, која до следната седница која е закажана за 9 мај, ќе ги усогласи и доработи одредбите на предложениот деловник.


Османи: Планот „3-6-9“ е 90 отсто реализиран, Иванов да го потпише Законот за јазици


Скопје, 13 април, 2018 - 12:37 (META) 

Реформскиот план „3-6-9“ на Владата е реализиран 90 отсто и со тоа успеавме да ја вратиме Македонија на вистинскиот, евроатланскиот пат, рече вицепремиерот задолжен за европски прашања, Бујар Османи.

Вицепремиерот рече дека ќе биле реализирани и 95 отсто од мерките, но некои од реформските закони, како законот за судови, за кои е потребно двотретинско мнозинство од пратениците во Собранието, не биле изгласани вчера поради барањето на опозицијата за дополнителни консултации.

– Меѓу другите мерки кои што не се реализирани се гласањето на законот за бесплатна правна помош кој е вратен во владата на доработка, носењето на етичкиот кодекс во Собранието, кој е во нацрт верзија но за него треба консензус од сите парламентарни политички партии кој очекуваме да биде постигнат во мај за време на средбите од процесот „Жан Моне“. Пред усвојување е и Стратегијата за соработка помеѓу владата и граѓанскиот сектор и законот за странци кој е во собраниска процедура – рече Османи и додаде дека со завршување на планот „3-6-9“ не завршуваат реформските процеси.

Тој потенцираше дека сите реформи биле донесени низ транспарентен и инклузивен процес и дека биле имплементирани забелешките и од граѓанскиот сектор и од опозицијата

– Пренесувам порака од Брисел дека Македонија успеа да реализира продуктивна реформска агенда и повторно е вратена патот кон ЕУ. Планот „3-6-9“ е успешно спроведен и на 17 април очекуваме да биде крунисан со позитивен извештај, најдобар за Македонија до сега и чиста безусловна препорака за почеток на преговори – вели Османи.

Во анализата на владата, како завршена мерка стои и усвојувањето на Законот за јазици иако тој не е ставен во функција поради таканареченото џебно вето на претседателот Ѓорге Иванов. Османи вели дека оваа мерка е обележана како исполнета затоа што ги поминала сите процедури и додаде дека овој закон ја искажува волјата на парламентарното мнозинство и на граѓаните. Тој го повика Иванов да го потпише законот и да биде кохезивен фактор во општеството.

– Иванов избира да остави празна книга за неговиот мандат, иако може да биде кохезивен фактор. Има уште неколку дена да го направи тоа. Ако не го направи, постојат други начини како законот да се стави во функција, но ќе почекаме да видиме што ќе одлучи Иванов – додаде Османи.


Со 62 гласа против, Собранието не изгласа недоверба на Владата


Скопје, 12 април, 2018 - 9:44 (META) 

По целодневната дебата исполнета со жестоки обвинувања на двете спротивставени страни, Собранието вчера не изгласа недоверба на Владата, на четвртото гласање од овој тип во самостојна Македонија.

Со 62 гласа „против“, 40 „за“ и Мерал Узеири Ферати од ДПА и Реџеп Мемеди од Беса кои беа воздржани, по десет часа расправа, на половина час пред истекот на рокот, пред полноќ, Владата ја доби довербата да продолжи со својот мандат.

Во долгата расправа пратениците од опозицијата обвинуваа за назадување во сите сфери, партиски диктат во државната управа, како и за криминал, додека нивните колеги од владејачката коалиција порачуваа дека резултатите на оваа Влада се одлични, со оглед на фактот дека владее 10 месеци, а морала да се справува со низа катастрофални штети што претходната власт ги нанела во многу сфери во државата.

Последен од пратениците говореше поранешниот премиер и поранешен претседател на ВМРО-ДПМНЕ, Никола Груевски, кој го обвини премиерот Зоран Заев дека е посветен исклучиво на прашањето за промена на името, дека се занимава со маргинални прашања, наместо со конкретни иницијативи и побара од него да се повлече од политиката „пред да направи поголема штета“.

Одговарајќи му, Заев, кој говореше последен на собраниската седница, ја повтори програмата на неговата Влада, го потенцираше катастрофалната состојба која ја затекнале во институциите кога ја превземале власта и му порача на својот опонент Груевски дека завршило неговото време.

– Никола Груевски, ти си минато, Македонија чекори напред, Македонија расчисти со тебе, ти си дел од темното минато. Затекнавме општа катастрофална состојба, ограбена држава. Наследивме тотален колапс, блокирани институции. Се соочуваме со коруптивни договори, кои не можат да бидат прекинати поради тоа што ќе нанесат штета врз буџетот. За да се создадат услови за темелна промена, неопходна е вклученост на сите политички фактори. Системот мора да се регенрира во самите институции. Без исклучок, чекориме кон тоа да ги оствариме стратешките интереси на граѓаните и државата, тоа е ЕУ и НАТО. Оваа можност беше прифатена од опозицијата -, истакна премиерот Заев во своето обраќање.

Барањето за гласање на доверба на Владата беше поднесено во неделата, со потписи на 41 пратеник од опозициската ВМРО-ДПМНЕ.


Според Рангелова министерката Царовска е најслабата алка во Владата


Скопје, 11 април, 2018 - 14:41 (META) 

По паузата од еден час, пратениците на СДСМ и ВМРО-ДПМНЕ продолжија со расправата по интерпелацијата поднесена од ВМРО-ДПМНЕ но и со меѓусебни расправања дали оваа владејачка коалиција добро ја води државата или не.

Пратеничката на ВМРО-ДПМНЕ, Даниела Рангелова, рече дека на оваа влада и на премиерот Зоран Заев треба да му се изгласа недоверба затоа што дозволил Мила Царовска да го води Министерството за труд и социјална политика.

– Министерката Мила Царовска ја препознаваме по бројните скандали, со многу малку работа, многу одржани прес-конференции, малку проекти, празни ветување и немање грижа на совест. Прва причина поради која треба да си замине е поради ужасот кој што се случи во домот за штитеници „25 мај“. Владата треба да си оди затоа што не ја смени министерката Царовска затоа што три девојчиња беа силувани а министерката не презема одговорност. Немате умеење, немате желба за работа, имате само страст за власт. Оставка веднаш. Вие не сте способни ни во градинка да одите а камоли министерство за водите – рече Рангелова.

На ова реплицираше министерката Царовска која рече дека таа во МТСП наследила уништен систем од претходната влада и дека сите центри кои биле под надлежност на ВМРО-ДПМНЕ не само што биле уништени туку и покрадени.

Рангелова ја обвини Царовска дека лаже и дека не си ја врши својата работа затоа што на секој семафор има Ромчиња што просат и ја праша дали таа на работа патува со авион.

Расправата по интерпелацијата поднесена од ВМРО-ДПМНЕ ќе трае до полноќ, а пред гласањето, во 23.20 часот се очекува свое обраќање да има и премиерот Зоран Заев.


ВМРО-ДПМНЕ се врати во Собранието, порача дека оваа влада е најкриминалната досега


Скопје, 11 април, 2018 - 12:29 (META) 

Оваа влада е најнеспособната и најкриминалната вада во историјата на Македонија и треба да биде минато, рече Драган Данев координаторот на пратеничката група на ВМРО-ДПМНЕ во излагањето за интерпелацијата која опозициската партија ја поднесе за работењето на Владата.

-Заев е предводник на најнеработливата влада. Оваа влада покажа и докажа дека нема капацитет на водење на институции и наместо да се зафатите со решавање на реалните проблеми како што ветувавте, вие работите исклучиво за остварување на партиски и лични интереси и за одржување на климавата коалиција со ДУИ. Сериозно ги подривте и националните и државните интереси на Македонија. Во државата повеќе нема демократија, туку е држава во која претставниците на власта се и судии и обвинители и бизнисмени. Има нагло партизирање на сите институции. Има партизирано судство и луксузирање на владините претставници – рече Данев.

Во неговото излагање тој потенцираше дека има назадување во секое поле, дека политичкиот систем е деградиран, а дека кршењето на уставот е секојдневие. Според него животот дошол, но само за партиските функционери на СДСМ и ДУИ и за никој друг.

-Го скршивте Деловникот на Собранието, законите и Уставот со процедурата на носење на Законот за употреба на јазиците. Вакво неодговорно однесување мора и треба да биде санкционирано. Ги замолувам пратениците кои што се поддржувачи на оваа влада, кога ќе дојде времето за гласање пред сè да ги имаат интересите на граѓаните и да кажат „не“ на ваквото владеење, а не да ги води партискиот и личниот интерес– додаде Данев.

Координаторот на пратеничката група на владејачката СДСМ, Томислав Тунтев, како одговор на излагањето на Данев рече дека интерпелацијата е големо разочарување, затоа што преставува очаен обид да се најде оправдување ВМРО-ДПМНЕ да се вратат во Собранието.

-Беше очекувано да се вратат да разговараме за пакетот реформски закони затоа што за 10 дена од денеска очекуваме позитивен и безусловен извештај од Европската комисија безусловен. Овие пратеници што поднесоа интерпелација се истите кои што пред три години ги чуја бомбите и слушаа како криминално се владеело и кои сведочеа на извештајот на Прибе и договорот од Пржино – рече пратеникот од СДСМ.

Тунтев потенцираше дека во интерпелацијата не постои критика на министерствата на ДУИ, туку само за СДСМ, и дека тоа е очигледно обид за политичко додворување, иако ВМРО-ДПМНЕ имале шовинистички и националистички наратив.

-Наместо поделби и омраза, дајте да зборуваме за едно општество, дајте заедно да носиме закони кои ќе ги растеретат граѓаните, дајте економската пропаст да ја замениме со економски раст. Дајте заедно да обезбедиме повисоки плати. Не дека нема грешки, но дајте да ги исправаме заедно. Нема иднина во раздор, ширење на омраза и поделби – додаде Тунтев.


Во Собрание денеска ќе се гласа за интерпелација на владата


Скопје, 11 април, 2018 - 9:37 (META) 

За денеска во 11 часот Собранието е закажана седницата за интерпелација на Владата.
Опозициската ВМРО-ДПМНЕ во барањето за интерпелација наведува дека Владата предводена од СДСМ и ДУИ во изминатиот период покажала дека нема капацитет за водење на институциите кои се под извршната власт. Во документот во кој се потпишаа 41 пратеник, ВМРО-ДПМНЕ наведува дека единствени проекти коишто ги спровела владата се партизирање на институциите и нивно деградирање, заробено судство, како и луксузирање на владините функционери со парите на граѓаните и политички реваншизам.

„Оваа Влада наместо да се зафати со решавање на реалните проблеми и потреби на граѓаните на Република Македонија како што ветуваа во предизборието, тие работат исклучиво за остварување на партиските потреби и интереси“, се истакнува во барањето на ВМРО-ДПМНЕ за интерпелацијата.

Според Деловникот за работа на Собранието по поставеното прашање за доверба на Владата се води претрес. Право да го образложи прашањето за доверба на Владата има еден од пратениците кои го поставиле прашањето во траење од најмногу 30 минути. Редоследот на пратениците по пратенички групи и пратеници кои не се организирани во пратеничка група, а кои ќе учествуваат во претресот се определува во договор на претседателот на Собранието со координаторите на пратеничките групи пред почетокот на седницата.

Пратеникот во текот на претресот може да говори повеќе пати во траење од вкупно 15 минути, а координатор на пратеничка група вкупно 20 минути.
Претседателот на Владата и пред гласањето има право да му се обрати на Собранието.

За да биде изгласана недоверба на Владата потребно е мнозинство од вкупниот број пратеници , или најмалку 61 глас.


Владата бара комплетирање на документацијата за рудникот Иловица


Скопје, 11 април, 2018 - 9:33 (META) 

Владата на 63. седница ја разгледа и усвои информацијата во врска со потпишувањето на Меморандумот за разбирање меѓу Министерството за економија на Македонија и Министерството за енергетика на Бугарија во областа на енергетиката и го прифати усогласениот текст на овој меморандум.

„Една од целите на оваа иницијатива е нашата земја да се приклучи на внатрешниот пазар на електрична енергија во Југоисточна Европа, со цел на учесниците на пазарот да им се понудат нови деловни можности и прекугранична трговија за постигнување на ефикасност, конкурентни цени и повисоки стандарди за услуги. На седницата е констатирано дека овој меморандум, кој овозможува поволни околности, е резултат на либерализацијата што се обезбедува со новите законски решенија за енергетика, како и на поволната клима на пријателство и меѓусебна поддршка која произлегува од Договорот за пријателство и добрососедство помеѓу Македонија и Бугарија“,  се вели во соопштението на Владата.

Владата на оваа седница го задолжи Министерството за економија да ја продолжи постапката со која од концесионерот „Еуромакс“, за експлоатација на минерални суровини бакар и злато на локалитетот Иловица, се бара комплетирање на документацијата.

„За оваа своја иницијатива Владата се повикува на известувањето на Министерството за економија од 2016 година до „Еуромакс“ во кое се бара од концесионерот, до одреден период, да ја комплетира документацијата како обврска од договорот за концесија, и го информира дека, меѓу другото, не се доставени доказ за решени имотно-правни односи во делот на земјиштето на кое ќе се врши експлоатацијата, како и решението за одобрување на студијата за оцена на влијанието на животната средина, а направени се и други повреди на договорот. Согласно договорот за концесија, неподнесувањето на само овие два документа се доволни за да отпочне постапката за преиспитување на почитувањето на договорот, и затоа Владата на денешната седница го задолжи Министерството за економија во рок од 7 дена да достави информација дали во меѓувреме е комплетирана документацијата, по што ќе биде донесен соодветен заклучок“, се додава во соопштението.