!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Меркел: Нема да брзаме за да формираме влада


Берлин, 25 септември, 2017 - 9:34 (META) 

Демохристијанската партија на Ангела Меркел (ЦДУ) е победник на парламентарните избори во Германија, на кои, според прелиминарните резултати, освоила 33 проценти од гласовите.

Меркел изјави дека нема да брза да формира влада. За четврти пат да стане канцеларка, нејзе ѝ се потребни коалициски партнери помеѓу другите парламентарни партии за да обезбеди мнозинство во Бундестагот.

И покрај победата, демохристијаните забележаа послаб резултат од претходните избори, освојувајќи 8 проценти помалку гласови од 2013 година.

Втората по големина германска партија, социјалдемократите, поминаа уште полошто со освоени 20,5 проценти од гласовите, што е најлош резултат по Втората светска војна.

Одзивот на изборите изнесувал 75,6 проценти, што е поголем од 2013 година, кога изнесуваше 71,5 проценти.

На трето место по освоени гласови е Алтернативата за Германија (АФД) со 12,6 отсто од гласовите, така што првпат влегува во парламентот.

Во Бундестагот мандати обезбедија уште три  партии: Либерали (10,7 проценти), Зелени (8,9 проценти) и Левица СПД (9,2 проценти)


ЕВН од утре ќе ги усогласува броилата во домаќинствата за да се воведе евтина струја


Охрид, 24 септември, 2017 - 16:46 (META) 

ЕВН од утре ќе почне со усогласување на броилата, за домаќинствата од 1 октомври да добијат евтина струја. Претседателот на управниот одбор на ЕВН, Штефан Петер, информираше дека тоа ќе се прави постепено.

Усогласувањето на броилата ќе почне како резултат на одлуката на Владата, од 1 октомври да се воведе евтина струја од 14 до 16 часот.

За цената на електричната енергија, Петер рече дека за оваа година може да се очекува намалување.

– На долгорочен план, тоа зависи од глобаниот пазар на електрична енергија. Мора да се одлучува година по година – изјави денеска Петер, кој во Охрид учествува на конференција за енергетика.

Министерот за информатичко општество и администрација, Дамјан Манчевски, најави инвестирање во соларни паркови и субвенционирање на уреди за домаќинства.

– Македонија мора да го зголеми сопственото производство на електрична енергија и да го намали увозот, притоа водејќи сметка за зачувување на чистата животна средина преку поголема експлоатација на обновливи извори на енергија – изјави Манчевски.


ВМРО-ДПМНЕ: Кампањите имаа едукативна функција и донесоа видливи резултати


Скопје, 24 септември, 2017 - 16:13 (META) 

Сè е по закон и нема ништо незаконски, сите средства до последниот денар се распределени по прецизна методологија и доделени низ транспарентен процес, реагираат од ВМРО-ДПМНЕ на прес-конференцијата на портпаролот на Владата, Миле Бошњаковски, на која тој кажа дека кабинетот на поранешниот премиер, Никола Груевски, потрошил 38 милиони евра на рекламни кампањи и на пропаганда.

Од партијата велат дека владејачкиот СДСМ има „очигледна потребата за евтин сензационализам, страв од пораз и потреба за дефокусирање на јавноста“ во пресрет на локалните избори.

„Јавните кампањи на владата на ВМРО-ДПМНЕ имаа едукативна и информативна функција, а епилогот од кампањите беа видливи резултати, 100 нови странски инвестиции, подобрен имиџ на државата, дуплиран број на туристи, зголемен број на патници“, се вели во соопштението.


Гутереш охрабрува за надминување на спорните прашања


Њујорк, 22 септември, 2017 - 19:08 (META) 

„Македонија е еден од најпозитивните примери за меѓукултурен, меѓурелигиски и меѓуетнички соживот. Ја цениме улогата што ја има вашата држава во регионот како фактор што го помага разбирањето и дијалогот меѓу државите. Македонија има голема поддршка од Обединетите нации и таа ќе продолжи и во иднина“, порачал генералниот секретар на ОН, Антонио Гутереш на средбата со премиерот Зоран Заев во Њујорк.

Генералниот секретар на ОН, како што соопшти владината прес-служба, на средбата истакнал дека е важно Македонија да обезбеди развој и изразил „охрабрување за надминување на спорните прашања, во насока на обезбедување на стратешките евроатлантски цели на Македонија“.

Премиерот Заев на средбата нагласил дека Владата е силно посветена на потребните реформи за квалитетен живот на граѓаните и за отворање на перспективите на државата.

– Водиме инклузивни политики, ја градиме Македонија во едно општество за сите граѓани низ мултиетничка кохезија, развиваме добри односи со соседите, градиме пријателства на меѓународен план и се надеваме дека со тоа даваме позитивен пример за целиот регион. Договорот меѓу Република Македонија и Република Бугарија е доказ дека отворените прашања се надминуваат таму каде што постои политичка волја за тоа – рекол Заев, додавајќи дека интеграциите на Македонија во ЕУ и во НАТО се иднината на државата.

Заев истакнал дека Македонија ги поддржува активностите за реформа на Обединетите нации, што ги спроведува Гутереш, и го поканил генералниот секретар на ОН да го посети регионот и Македонија.


ОМД: Заев вети дека во 2019 година ќе има попис во Македонија


Вашингтон, 22 септември, 2017 - 11:11 (META) 

Премиерот Зоран Заев на средбата со Обединетата македонска дијаспора (ОМД) рекол дека во 2019 година ќе биде спроведен попис на населението во Македонија, тврди ОМД во соопштението за средбата што се одржа оваа недела во Њујорк, каде премиерот со владина делегација присуствува на 72. Генерално собрание на Обединетите нации.

На средбата претседателот на ОМД, Методија Колоски, стои во соопштението, побарал од Заев објаснување за Законот употреба на јазиците и го повторил ставот дека за ОМД е неприфатливо се што „задира во македонскиот устав, унитарноста, националните интереси, територијалниот интегритет на Република Македонија, како и можно креирање на бинационална држава наместо држава за македонците и сите малцинства со подеднакви права“

„(Коловски) доби објаснување од премиерот Заев дека овој предлог закон претставува само последниот легален дел од Законот за јазици донесен во 2008 и во 2011 година и не задира во Уставот на Република Македонија. Во тој контекст, Колоски го постави прашањето за попис на населението во Република Македонија, на што премиерот Заев даде ветување дека ќе биде спроведен во 2019 година“, стои во соопштението од ОМД.

На состанокот станало збор и за спорот за името со Грција. Членот на ОМД, Владимир Котевски потенцирал дека ОМД инсистира да се прекинат сите преговори за името, а го критикувал и договорот со Бугарија, истакнувајќи дека „било какви други договори не смеат да бидат на штета на интегритетот на државата и заштитата на правата на македонските малцинства во тие држави.

„Претседателот Колоски се надоврза со потенцирање на ставот на ОМД за НАТО и европската интеграција на Македонија, со посебен нагласок дека Владата на Република Македонија не треба да дозволи влезот во НАТО и во ЕУ да биде проследен со услов за промена на име“, стои во соопштението.

Претставниците на Обединетата македонска дијаспора се пожалиле за проблемите на македонската заедница во Њујорк и во Њу Џерси поради немањето на активен конзул, а искажале и незадоволство од одлуката на министерот за надворешни работи, Никола Димитров за повлекување на македонскиот генерален конзул Јовица Палашевски од Торонто.


Заев ќе се обрати пред Генералното собрание на ОН


Њујорк, 22 септември, 2017 - 10:21 (META) 

Премиерот Зоран Заев денеска ќе се обрати пред Генералното собрание на Обединетите нации во Њујорк и ќе се сретне со генералниот секретар на ОН, Антонио Гутереш, соопшти владината прес-служба.

На денешната агенда на македонскиот премиер е предвидена средба со вицепремиерот и министер за надворешни работи на Виетнам, Фан Бин Мин, како и кратка средба со премиерот на Непал, Шер Бахадур Деуба, на приемот по повод националниот ден на оваа земја.

Заев денеска ќе има и обраќање на конференцијата „Нов старт на Балканот“, во организација на УНДП.

Претседателот на македонската влада вчера имал средба со премиерот на Кралството Холандија, Марк Руте, кој дал поддршка на реформскиот процес што го почна Владата и ги поздравил чекорите што ги презема државата за градење на добрососедски односи и регионална соработка.

Руте истакнал дека Холандија останува силен поддржувач на Македонија во заложбите на нашата држава за постигнување на стратешките цели, членство во Европската Унија и во НАТО.

Заев на средбата посочил дека очекува есенва да се тргне условеноста на препораката за членство на Македонија во ЕУ, а следен чекор да биде датум за почеток на преговори.


Сакаме паркови, а не згради, порачаа граѓаните на протестот за чист воздух


Скопје, 21 септември, 2017 - 20:37 (META) 

Со пароли и извици „Сакаме паркови, не згради“ и „Нема воздух, нема мир“, граѓаните на Скопје денеска го одржаа мировниот марш за чист воздух, организиран од Коалицијата О2 и Првата детската амбасада во светот „Меѓаши“, на кои им се придружија уште 18 невладини организации.

Протестот почна пред Владата и продолжи преку булеварите Илинден и 8 Септември каде граѓаните се приклучија здруженијата „Ние сме Карпош 4“ и „Заедно за заштита на зеленилото во Карпош“, кои претстираа против уништувањето на зелените површини во општината, на чие место треба да бидат изградени згради.

Активистите побараа од Владата да почне што побрзо да го решава проблемот со загадениот воздух и ги повторија барањата кои се веќе доставени до Министерството за животна средина.

– Ветувавте дека ќе направите промена. Ве охрабруваме да ја искористите шансата и да покажете сериозен пристап за решавање на проблемот со загадувањето. Заедно ќе ви стоиме на глава и ајде заеднички да го решиме проблемот – порача активистот Лазар Ѓуров.

Активистот Ѓоко Парго рече дека секоја вечер во Карпош мириса на хемикалии и на изгорена пластика.

– Воздухот смрди секоја вечер, мириса на профитот на некои луѓе – рече тој.

Ели Пешева од Коалицијата О2 рече дека овој период, пред локалните избори е исклучително важен, за идните градоначалници да го сфатат проблемот и заедно со централната власта да преземат итни мерки, бидејќи во сите поголеми градови – во Скопје, Тетово, Битола, Струга, Куманово, Кичево, Кавадарци граѓаните директно ги чувствуваат последниците од загадениот воздух.

Таа најави дека предлог-мерките ќе им бидат доставени на сите кандидати за градоначалници, од сите партии.


Анѓушев: Владата ќе направи се „Фени“ да продолжи да работи


Прилеп, 21 септември, 2017 - 17:29 (META) 

Владата ќе направи се што е во нејзина моќ за да се најде решение за финансиските проблеми на комбинатот „Фени“, за да може компанијата да продолжи со работа, изјави вицепремиерот за економски прашања, Кочо Анѓушев.

Тој, како невистинити ги отфрли тврдењата на опозициската ВМРО-ДПМНЕ дека „Фени“ е пред затворање порад негови бизнис-интереси.

– Вистината е дека „Фени“ има финансиски потешкотии. Комапнијата беше бликирана од „Силкроуд банка“ и од страна на другите банки, бидејќи не ги исполнувала своите финансиски обврски. Потоа следна блокада настана од добавувачот на руда од Албанија. Владата е посветена на изнаоѓањето решение, интензивно разговараме и со сопственичката структура и со менаџерскиот тим на „Фени“ да изнајдеме решение како овој проблем да биде решен. „Фени“ е голем индустриски капацитет. Вчера беше исплатена платата на работниците, сите работници одат на работа и никој нема да биде отпуштен. Фабриката не престана да работи, туку само го намали својот капацитет за ореден период – рече Анѓушев, кој денеска заедно со министерот за транспорт и врски, Горан Сугарески присуствуваше на свеченото отворање на фабриката „Инџекшн Молдинг Прилеп“ (ИМП), инвестиција на германски „Акомпласт“, во технолошко-индустриската развојна зона Прилеп.

Вицепремиерот истакна дека Владата може да помогне на краток рок, во рамките на своите капацитетит, но, долгорочно решение мора да понудат сопствениците и менаџерскиот тим на комбинатот.

– Ние посветено работиме и ќе најдеме решение како да му помогнеме на комбинатот да продолжи да работи, но, мораме да кажеме дека слободниот пазар, приватните субјекти и менаџментот и сопственичката структура на компанијата мора први да дадат решение бидејќи државата не може да се меша во сите операции на приватниот капитал. Државата може да помогне онаму каде што таа има моќ, а таа има моќ преку одредени мерки да помогне краткорочно, но за долгорочни решенија е потребно сопствениците и менаџерскиот тим да понудат решение – рече Анѓушев.


Со 0,5 отсто од Буџетот МРТ ќе има значително помалку пари од порано


Скопје, 21 септември, 2017 - 13:44 (META) 

Со издвојување на 0,5 отсто од државниот буџет ,односно околу 885 милиони денари (14,4 милиони евра) за Македонската радиотелевизија (МРТ), националниот сервис ќе има помалку пари на располагање од буџетите во изнинатите неколку години, кои беа од 18 до 23 милиони евра.

Оваа сума, како што пишува „Вистиномер“, но, и како што предупредија Здружението на новинарите на Македонија (ЗНМ), Независниот синдикат на новинари и медиумски работници (ССНМ) и Советот за етика во медиумите (СЕММ), нема да гарантира незвисен, професионален и ефикасен национален сервис, што требаше да биде една од клучните реформи во медиумите.

Имено, според предложеното законско решение од Буџетот за радиодифузната дејност за 2018 година ќе бидат одвоени околу 14,4 милиони евра, од што на МРТ ќе и припаднат 10,7 милиони евра.

Според Законот средствата што се одвојуваат од буџетот за радиодифузијата се делат по принципот: МРТВ добива 74,5 отсто, Македонската радиодифузија 19,5 отсто, а остатокот од 6 отсто оди за Агенцијата за аудио и аудиовизулени мадиумски услуги (ААВМУ). Тоа значи дека МРТ ќе добие околу 10.7 милиони евра.

Само минатата година, која не се смета за најуспешна во буџетирањето на МРТВ, преку факторите РДТ, пари од Владата по разни основи и остварен приход од реклами, националниот сервис имал над 19 милиони евра за 2016 година.

Како што пишува „Вистиномер“, лани само од РДТ, јавниот сервис имал приход од околу 14 милиони евра. Со таа ставка буџетот на МРТВ, заедно и со другите приходи, во 2016 стигнал до над 19,3 милиони евра.

ЗНМ, ССНМ и СЕММ бараат од Владата сумата што ќе се одвојува за МРТВ да биде 1 отсто од државниот биџет или околу 25 до 30 милиони евра, годишно.

Од Министерството за информатичко општество и администрација во август годинава на финална расправа испратија предлог-законот за измена на Законот за аудио и аудиовизуелни медиумски услуги каде што процентот на буџетско финансирање за радиодифузијата беше 0,7 отсто. Но, наместо да се дискутира за таа верзија сега се појави предлог –закон во кој процентот за финансирање на радиодифузијата е 0,5 отсто.

Инаку, обезбедувањето на доволно средства за независно функционирање на МРТВ е и едно од клучните барања на Еврпската Унија и на европскиот експерт Рајнхард Прибе, во неговиот извештај од 2015 година и во најновниот од јули, оваа година.

„Мора итно да се обезбедат соодветни средства за да се засили нејзината независност и за да се овозможи ефикасно работење и управување“, стои во извештајот на Прибе


Владата предлага целосна и делумна амнестија, законот ќе се носи во редовна постапка


Скопје, 20 септември, 2017 - 19:52 (META) 

Oсудените лица на кои им е изречена казна затвор до шест месеци целосно ќе бидат ослободени од издржувањето на казната, а сите други осудени лица за кои се предлага амнестија се ослободуваат од издржување на 30 отсто од целокупната казна изречена со правосилна пресуда, предвидува нацртот на законот за амнестија што Владата го усвои на вчерашната седница.

Амнестијата, како што соопштија денеска од Владата, ќе ги опфати и осудените лица кои до денот на влегувањето во сила законот не почнале со издржување на затворската казна, а имаат конечна и правосилна пресуда. Од издржување на казната целосно ќе бидат ослободени лицата и осудени за дела кои на денот на влегувањето во сила на овој закон повеќе не претставуваат кривични дела.

Според предложениот текст, амнестија не е предвидена за осудените за убиство, за кривични дела против изборите и гласањето, за силување, педофилија, посредување во вршење проституција, потоа за кривични дела против државата, за злосторничко здружување, како и за кривичните дела против човечноста и меѓународното право.

Законот за амнестија, како што истакнал министерот за правда, Биљен Саљији, е израз на добра волја на државата кон одредена група на правосилно осудени лица, со цел за нивна ресоцијализација и за растоварување на затворите од прекумерниот број на лица кои издржуваат казна во нив.

Законот ќе се носи во редовна постапка, е времен и ќе се однесува на точно определени временски одредници.