!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Телеком Словенија се повлече од „ВИП“


Скопје, 10 ноември, 2017 - 19:35 (META) 

Телеком Словенија ја прифати понудата на Телеком Австрија и го отстапи својот удел во македонскиот телекомуникациски оператор „ВИП“ за сума од 120 милиони евра, објави словенечката берза.

Со купувањето на преостанатите 45 отсто од досега заедничката компанија „Оне.ВИП“, австрискиот телеком станува стопроцентен сопственик на операторот.

Компанијата беше формирана на 1 октомври 2015 година, кога беше напоменато дека останува можност Телеком Словенија да се повлече од заедничката зделка.

Доминантен сопственик на Телеком Австрија е Америка Мовил, компанија на Мексиканецот Карлос Слим, еден од најбогатите луѓе на светот.


„Оне-Вип“: Нема зголемување на цените на тарифите за мобилни разговори


Скопје, 10 јуни, 2016 - 18:18 (META) 

Со оглед на фактот што не ни е позната методологијата според која е пресметано наводното зголемување на цените, во овој момент можеме само најодговорно да изјавиме дека нема зголемување на малопродажните цени на тарифите во брендот „Вип“ – се вели во реакцијата на компанијата „Оне-Вип“ откако Агенцијата за електронски комуникации (АЕК) информираше дека просечната цена за една минута разговор на мобилен телефон е зголемена за повеќе од 15 проценти, а мобилниот интернет поскапува приближно за 20 отсто.

Како причина за ваквото поскапување од АЕК меѓудругото го наведуваат и спојувањето на „Оне“ и на „Вип“, кои по преземањето и на кабелскиот оепратор „Близу“ настапуваат како една компанија.

– Со комерцијалната интеграција на брендовите нема промени во договорите склучени досега. Корисничките договори остануваат целосно важечки со истите бенефиции, права и обврски се до нивната промена или раскинување од страна на самите корисници. Корисниците продолжуваат да ги користат услугите под истите услови под кои ги имаат склучено своите договори, со истите цени согласно избраниот тарифен модел – се вели во реакцијата на „Оне-Вип“.

Оттаму информираат дека „согласно преземените обврски на „Оне-Вип“, најдоцна до 30 јуни ќе започне со работа Лајка мобајл во улога на целосен мобилен виртуелен мрежен оператор.“


Катастарот воведе нова услуга со која се скратува времето за регистрација на имот


Скопје, 1 април, 2016 - 14:08 (META) 

Катастарот воведе нова услуга со која се скратува времето и постапката за пренесувањето на недвижност од едно на друго лице и регистрација на имот. Со сегашните измени постапката се извршува во три чекори за шест дена, за разлика од порано кога постапката се извршуваше во седум чекори и траеше 30 дена. Разликата во цената со постоечката постапка е од 3.000 до 6.000 денари.

Според директорот на Агенцијата за катастар на недвижности Славче Трпевски, со воведувањето на дополнителната ВИП постапка, на граѓаните им се овозможува да имаат избор на кој начин сакаат да ја регистрираат недвижноста.

– Со ова постапката за регистрација на имот завршува, а Катастарот по електронски пат целокупната документација ќе ја проследи до надлежната општина која ќе ја провери процената и ќе донесе даночно решение. Ваквата постапка се одвива во три чекори и ќе трае вкупно шест работни дена од започнувањето на процесот – изјави Трпевски.

 


Пазарниот удел на „Вип“ е 28,5 проценти, бројот на корисници намален на 624.000


Скопје, 20 октомври, 2015 - 12:34 (META) 

Како резултат на силната конкуренција во мобилниот сегмент и трендот на намалување на вкупната пенетрација на пазарот, бројот на мобилни корисници на „Вип“ се намали до 624.000 корисници, при што пазарниот удел на „Вип“ остана на ниво од 28,5 проценти. Со аквизицијата на „Близу“, сегментот Македонија брои околу 86.000 фиксни пристапни линии за првите девет месеци од 2015 година.

Ова го покажуваат финансиските резултати за третиот квартал на групацијата „Телеком Австрија“, како и за првите девет месеци од 2015 година, вклучувајќи ги и резултатите од работењето на сегментот Македонија.

Приходите во Македонија, вклучувајќи го и „Близу“, изнесувааат 50,5 милиони евра за девет месеци од 2015 година, што претставува пораст од 12,7 проценти во споредба од истиот период минатата година.

Во истиот период, заработката пред камати, даноци, амортизација и депрецијација (ЕБИТДА) забележува пораст од 25,4 проценти и достигна 11,6 милиони евра. Оперативните трошоци се зголемија за 11 проценти споредено со истиот период од минатата година и оперативната добивка забележа пад до 466.230 евра.

Резултатите од работењето на новиот ентитет „Оне-Вип“ ќе бидат внесени во извештаите на групацијата „Телеком Австрија“ во четвртиот квартал од 2015 година.


Се очекува „Оне-Вип“ да го раздвижи пазарот бидејќи има стагнација


Скопје, 2 октомври, 2015 - 15:11 (META) 

Со спојувањето на корисничките бази на двете компании, „Оне-Вип“ прерасна во еден од најголемите телекомуникациски оператори во Македонија, кој ќе опслужува 1,3 милиони корисници, со услуги во мобилната и во фиксната телефонија, интернет-комуникации и телевизијата.

Оваа компанија е со 53 проценти пазраен удел, по број на СИМ-картички. Но, сè уште во делот на приходите и на профитот каска зад „Македонски телеком“.

– Следува период на целосна интеграција што ќе генерира нов дополнителен квалитет за корисниците и понатамошен развој на пазарoт. Ќе настапиме со агресивни понуди од аспект на квалитет, функционалност и на цени – изјави извршниот директор на „Оне-Вип“, Никола Љушев.

До крајот на 2016 година, се очекува целосна интеграција на сите оперативни и технички системи. Дотогаш „Оне-Вип“ ќе продолжи да функционира преку две засебни постојани мрежи, системи за наплата, тарифни портфолија и продажни места на „Вип“ и на „Оне“.

Ова значи дека корисниците и понатаму ќе ги задржат своите постојани договори и ќе продолжат да ги добиваат услугите под истите услови, квалитет и цени како и досега.

„Оне-Вип“ќе ги задржи сите 900 вработени од двете досегашни компаниии, кои имаат стандардни договори за вработување. Промени има кај луѓето на менаџерските позиции, односно менаџерски договори, иако Љушев не даде коментар за бројот на менаџерите на кои не им е продолжен договорот.

Во следната година додека трае интеграцијата на техничко и на оперативно ниво, нема да има редуцирање на работните места. Понатамошните чекори во оваа насока ќе зависат од резултатите што компанијата ќе ги остварува.

– Ако работите не се одвиваат во посакуваниот правец, во тој случај ќе мора да има реорганизација. Во текот на интеграцијата, секој човек е добредојден. Со ширењето на бизнисот, ќе ги дополниме кадрите, што како индивудуални компании не сме имале можност да го направиме – објасни Љушев.

Според него, ова спојување ќе ја стимулира конкуренцијата, ќе се поттикне креативноста, ќе се дадат нови услуги и квалитет, бидејќи има стагнација во користењето на телекомуникациските услуги.


По спојувањето на „Оне“ и на „Вип“, корисниците ќе функционираат според старите договори


Скопје, 29 септември, 2015 - 14:44 (META) 

„Вип“ и „Оне“ ја затворија трансакцијата за спојување на двата правни ентитетa во една компанија „Оне-Вип ДОО Скопје“, кој сега е предмет на регистрација во Централниот регистер на РМ.

Затворањето на трансакцијата се случува откако во јули оваа година, Комисијата за заштита на конкуренцијата на РМ го одобри спојувањето на двата телекомуникациски операторa.

Новоформираниот споен субјект „Оне-Вип“ официјално се очекува да биде регистриран на 1 октомври 2015 година. Од тој датум, новата компанија целосно ги презема сите права и обврски што произлегуваат од досегашното работење на „Вип“ и на „Оне“, вклучувајќи ги и договорите кои корисниците ги имаат, а кои продолжуваат да важат под истите услови под кои се склучени.

Ова значи дека корисниците и понатаму ќе добиваат најдобри услуги, со највисок квалитет и непроменети цени, во согласност со тарифниот модел што го имаат избрано.

Сè до целосната интеграција на сите технички системи, што се очекува да заврши до крајот на 2016 година, новата компанија „Оне-Вип“ ќе продолжи да ги обезбедува услугите за корисниците преку постојните мрежи, тарифни портфолија и продажни места на „Вип“ и на „Оне“.

Договорот за спојувањето на подружниците на „Телеком Австрија групацијата“ и „Телеком Словеније груп“ во Македонија беше објавен на 22 октомври 2014 година. Според тој договор, „Телеком Австрија групацијата“ поседува 55 проценти и ќе има целосна контрола врз новосоздадената компанија „Оне-Вип“, додека „Телеком Словеније груп“ поседува 45 проценти од сопственоста. Покрај тоа, договорот вклучува и опции за излез на „Телеком Словеније груп“ од заедничката компанија во рок од три години од завршувањето на спојувањето.


Групацијата „Телеком Австрија“ со пораст на приходите на македонскиот пазар


Виена, 17 јули, 2015 - 11:26 (META) 

Групацијата „Телеком Австрија“ ги објави финансиските резултати за првите шест месеци од 2015 година, вклучувајќи ги и резултатите од работењето на сегментот Македонија.

Како резултат на силната конкуренција во мобилниот сегмент и трендот на намалување на вкупната пенетрација на пазарот, бројот на мобилни корисници се намали до 608.000 корисници, при што пазарниот удел на „Вип“ остана на ниво од 28,4 проценти. Со аквизицијата на „Близу“, сегментот Македонија брои околу 87.000 фиксни пристапни линии за првите шест месеци од 2015 година.

Приходите во Македонија, вклучувајќи го и „Близу“, изнесуваа 32 милиони евра во првата половина од 2015 година, додека во истиот период заработката пред камати, даноци, амортизација и депрецијација (ЕБИТДА) достигна 7,2 милиони евра. Оперативните трошоци се зголемија за 14 проценти споредено со истиот период од минатата година.

Воедно, во јули 2015 година Комисијата за заштита на конкуренција на Македонија го одобри спојувањето на подружницата на групацијата „Телеком Австрија“, „Вип“, и на подружницата на „Телеком Словеније груп“, „Оне“. Согласноста е издадена врз основа на одредени обврски, меѓу другото и за обезбедување услуги на нови виртуелни мрежни оператори од новоформираниот субјект. Затворањето на трансакцијата се очекува во четвртиот квартал од 2015 година.


Спојувањето на „Вип“ и на „Оне“ ќе заврши до крајот на годината


Скопје, 9 јули, 2015 - 15:45 (META) 

Спојување на два мобилни оператори во земјава, „Вип“ и „Оне“, ќе заврши во последниот квартал од годината, пред сè, поради бројните бирократски процедури што му претстојат на процесот, информираше Никола Љушев, извршен директор на „Вип“.

Според Љушев, спојувањето ќе обезбеди поголем капацитет и иновативност на компанијата, односно зголемена конкурентност во однос на најголемиот играч на пазарот.

– Ќе се создаде оператор кој по бројот на корисници ќе стане подоминантен, порамноправен и поефективен, кој ќе нуди пакети и услуги со кои ќе му парира на „Македонски телеком“. Спојувањето ќе донесе поголема конкуренција, зголемување на асортиманот на услги, а размената на знаења меѓу двете компании ќе донесе иновативност во компанијата. Исто така, спојувањето ќе донесе финансиски помоќна компанија, која ќе генерира поголеми профити, а со тоа и повеќе ќе придонесува за буџетот на државата – истакна Љушев.

Тој додаде дека новиот оператор „Вип.Оне“, според договорот со Комисијата за заштита од конкуренција, презема обврска да овозможи влез на два нови виртуелни мобилни оператори, со кои овој момент веќе се водат разговори.

– Веќе стапивме во контакт со неколку виртуелни оператори и имаме и писма со намери и планираме да си ја исполниме оваа обврска – изјави Љушев.

Првиот човек на „Вип“ изјави дека спојувањето неминовно ќе доведе до намалување на одредени работни позиции каде има совпаѓања, без да прецизира за колку работни места станува збор. Од друга страна, тој најави дека ќе бидат потребни нови вработувања на одредени клучни позиции.

Новата компанија „Вип.Оне“ ќе функионира во рамките на кластерот Македонија-Хрватска, како што од неодамна функционира операторот „Вип“ во рамките на организациската шема што ја постави сопственикот на „Телеком-Австрија“.


Одобрено спојувањето на „Вип“ и на „Оне“


Скопје, 8 јули, 2015 - 15:25 (META) 

Комисијата за заштита на конкуренцијата денеска соопшти дека го одобрува спојувањето на телекомуникациските оператори „Вип“ и „Оне“.

Комисијата при оцена на предметната концентрација утврдила дека пријавената концентрација ќе доведе до нарушување на конкуренцијата на пазарот на обезбедување на мобилни телекомуникациски услуги.

– Имено, спојувањето на „Оне“ и на „Вип“, кои се втор и трет мобилен оператор, ќе доведе до значително нарушување на ефективната конкуренција и пазар на обезбедување на услуги на пренос на аудиовизуелни содржини до крајни корисници. Реализацијата на предметната концентрација ќе значи дека друштвата „Близу медиа енд броубенд ДООЕЛ“ – Скопје и „Диги“ ќе станат дел од иста групација – се вели во објаснувањето на Комисијата.


Се чека одлука за спојувањето на „Вип“ и на „Оне“


Скопје, 17 април, 2015 - 9:53 (META) 

За спојувањето на двата мобилни оператори „Вип“ и „Оне“ сè уште се чека одлука од Комисијата за заштита на конкуренцијата.

– Процесот за спојување од наша страна е завршен, се чека одлука на Комисијата. Не можеме да кажеме ништо, законскиот рок си тече – изјави маркетинг-директорот на „Оне“, Виктор Доневски.

На неодамнешна прес-конференција на операторот „Вип“, главниот извршен директор Никола Љушев изјави дека застој во спојувањето нема.

– Процесот е во втора фаза, која почна на почетокот од февруари годинава. Во согласност со законот, таа може да трае најмногу 90 дена, што значи некаде на средината од јуни очекуваме позитивен одговор од Комисијата – истакна Љушев.

Комисијата за заштита на конуренцијата (КЗК), до каде што и официјално е пристигнато барањето за спојување меѓу двата телекомуникациски оператори, објави дека мобилните опратори „Вип“ и „Оне“ ќе се спојат во новоосновано друштво со ограничена одговорност со назив „Друштвото за комуникациски услуги оне.ВИП ДОО Скопје“.

Групацијата „Телеком Австрија“ објави дека договори спојување на својата подружница „Вип оператор“ со компанијата „Оне“ (подружница на „Телеком Словеније“) во Република Македонија. „Телеком Австрија“ ќе поседува 55 отсто удел во компанијата и ќе има целосна контрола врз новосоздадениот ентитет, додека „Телеком Словеније“ ќе задржи 45 проценти.