!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Закројувањето на лозјата ги доведе амбасадорите во „Стоби“ и во „Тиквеш“


Кавадарци, 14 февруари, 2017 - 16:16 (META) 

Стотици гости меѓу кои и холандскиот амбасадор Ваутер Пломп, италијанскиот амбасадор Карло Романо и унгарскиот амбасадор Виорел Станила присуствуваа на свечената прослава на празникот Св.Трифун во винарницата „Стоби“.

На денешниот настан гостин беше и претставникот од холандската компанија „Шермер“, која воедно е првата дистрибутерска фирма со која „Стоби“ има потпишано договор.

Закројување на лозјето според сите обичаи имаше и во винарската визба „Тиквеш“. На чинот на закројување освен членовите на управниот одбор, менаџментот и вработените на „Тиквеш“ присуствуваа претставници на дипломатскиот кор, на државните институции и на голем број партнери, соработници и пријатели на винарницата.

 


Македонски компании ќе се претстават на саем за храна во Москва


Скопје, 3 февруари, 2017 - 14:47 (META) 

Македонија со национален штанд ќе се претстави на најголемиот саем за стоки за широка потрошувачка во Руската Федерација и во Југоисточна Европа „Продекспо 2017“, што ќе се одржи од 6 до 10 февруари во Москва.

Настапот на македонските компании е во организација на Македонско-руската стопанска комора и со финансиска поддршка на Министерство за земјоделство, шумарство и водостопанство на Македонија.

На саемот ќе се претстават винарниците „Стоби“, „Далвина“, „Кралска винарија“, производителите на сирење и на кашкавал „Здравје“, „Осогово милк“, како и производителот на конзервиран зеленчук и овошје „Вори“.

Македонско-руската стопанска комора го организира и самостојниот настап на „Кадино индустри груп“, која првпат со сопствен штанд ќе ги престави своите мелнички производи и свежо замрзнати тестенини.

На „Продекспо 2017“ ќе се претстават повеќе од 2.000 компании од 57 земји од светот, со 27 национални штанда.


„Транспарентност Македонија“: Владата за чоколади и за пијалаци ќе потроши 24.390 евра


Скопје, 4 март, 2016 - 13:35 (META) 

Додека голем процент од граѓаните во земјата живеат во сиромаштија и не можат да ги задоволат ниту основните егзистенцијални потреби, Владата продолжува да се луксузира, се вели во февруарскиот билтен за состојбите со корупцијата на „Транспарентност Македонија“, а кој се однесува за делот на јавни набавки.

– Службата за општи и заеднички работи при Владата, за износ од 1.500.000 денари (24.390 евра), ќе набавува колонијални производи, кондиторски производи (чоколади), пиво, вино, жестоки пијалаци и ликери, а само за вино ќе потроши 563.918 денари (9.169 евра) и за ракија 73.610 денари (1.196 евра). Тендерот за овие набавки го доби Друштвото за трговија на големо и мало и услуги „Тинекс МТ“-ДООЕЛ. Истовремено, Министерството за економија само за  организација на регионална конференција за зимски туризам, ќе потроши 847.458 денари (13.779 евра), а тендерот го доби Друштвото за производи, трговија и услуги „Скрин принт ДОО експорт“ – се вели во извештајот на ТМ.


Искачување на Водно по повод Свети Трифун


Скопје, 14 февруари, 2016 - 10:14 (META) 

Здружението за спорт и рекреација „Прв до врв“ денеска по повод празникот на виното, Свети Трифун, организира групно планинарење и возење велосипеди до врвот на Водно.

Трката почна во девет часот утринава, пред основното училиште „Кочо Рацин“, а околу 11 часот на врвот на Водно е предвидено дружење и традиционално одбележување на празникот со македонско вино.

Настанот, кој е дел од серијата месечни настани во организација на „Прв до врв“, нема натпреварувачки карактер.


Денеска почнува „Вино-фест“


Скопје, 6 мај, 2015 - 16:01 (META) 

Од денеска почнува пролетениот „Вино-фест“, кој се одржува четврти пат кај „Веро-центар“ во Скопје.
Фестивалот ќе почне во 18 часот, а ќе трае сè до 1 часот по полноќ.

Денеска главни ѕвезди на програмата се „Хаундс“ и гостинот од Црна Гора – Бојан Маровиќ.

Фестивалот ќе трае до недела 10 мај.


Лозарите ќе бидат исплатени денеска


Кавадарци, 29 април, 2015 - 10:49 (META) 

Денеска истекува законски утврдениот рок за исплата на ланското грозје што винарската визба „Тиквеш“ го откупила од лозарите. Годинава, „Тиквеш“ планира да откупи поголемо количество грозје, односно 20 проценти повеќе од лани.

– Минатата година ја завршивме со 18 милиони килограми грозје, а за оваа плановите се откуп на 22 милиони килограми. Сè уште е рано да се оценува каква ќе биде бербата, но според состојбата на терен и редовните средби со кооперантите, почетоците се добри – изјави генералниот директор на „Тиквеш“, Игор Илиевски.

Од „Тиквеш“ најавија и нова инвестиција од 1,5 милион евра од ИПАРД-програмата за осовременување на процесот за производство на висококвалитетно вино. Во таа насока е и континуираното вложување во технологија и во луѓе за осовременување на производните капацитети и за продукција на висококвалитетни вина.

Освен во регионот, „Тиквеш“ најмногу извезува во САД, Кина и во Велика Британија.


Форум за вински туризам и за вински патишта


Демир Капија, 25 април, 2015 - 10:37 (META) 

Министерството за економија и фондацијата „Тиквешки вински пат“ денеска во Демир Капија ќе одржат форум за вински туризам и за вински патишта.

Тема на форумот ќе бидат потребите од едукација во туризмот, со акцент на винскиот туризам во Македонија, кој почна да се развива од 2005 година.


Поддршка од 35 милиони денари за извоз на флаширано вино и земјоделски преработки


Скопје, 30 јануари, 2015 - 15:03 (META) 

Владата на Република Македонија ја усвои програмата за финансиска поддршка на маркетингот на земјоделски производи за 2015 година, истакна на денешната прес-конференција портпаролот на Владата на Република Македонија, Александар Ѓорѓиев.

Основна цел на оваа програма е финансиски да се поддржи пласманот на македонски квалитетни производи на надворешни пазари и тоа преку покривање на дел од трошоците за амбалажа на преработени земјоделски производи наменети за извоз. Со давањето поддршка за амбалажирање, се влијае на зголемување на квалитетот на земјоделските производи, и тоа преку зголемување на додадената вредност на производот и постигнување повисоки пазарни цени на странските пазари, што ќе обезбеди позитивни ефекти за приходот на компаниите, но и за девизниот прилив за земјата.

– За оваа намена се обезбедени и ќе бидат алоцирани 35 милиони денари, средства со кои ќе бидат поддржани поголем број мерки, од кои би сакале да ги акцентираме финансиската поддршка за покривање на дел од трошоците за амбалажата на флашираното вино за извоз и финансиската поддршка за покривање на дел од трошоците за амбалажата на преработените земјоделски производи наменети за извоз – рече Ѓорѓиев.

Помошта за трошоци за амбалажа на извезен преработен земјоделски производ се однесува на производи од конзервната индустрија кои се извезуваат во стаклена амбалажа. Помошта се исплаќа во висина до најмногу 4 денари за еден килограм извезен производ и е наменета да покрие дел од трошоците за стаклена амбалажа, капак, етикети и друго.

– Оваа програма се реализира веќе неколку години и, според информациите од компаниите, дава позитивни резултати и ефекти. Оваа и другите мерки што ги реализираме, како што се директните плаќања и редовните субвенции, кофинансирање на дел од трошоците за набавка на земјоделска опрема, имаат придонес во позитивниот тренд на континуиран пораст на извозот на виното и на земјоделските преработени производи – истакна Ѓорѓиев.

Во 2014 година, првпат по склучувањето на Спогодбата за стабилизација и асоцијација со Европската Унија, во целост е искористена безцаринска квота за извоз на вино во шишиња во земјите-членки на Европска Унија, заклучно со 8 декември 2014 година. Извозот на вино во 2014 година бележи сериозен пораст од 34 проценти во поглед на количеството и 48 проценти во поглед на остварена вредност на извозот. Досега само преку оваа мерка се исплатени 38,7 милиони денари за извоз на повеќе од 16 милиони шишиња вино, а помошта ја искористиле 25 регистрирани винарски визби. Како резултат, пак, на комбинација од мерки за маркетинг и за пласман, извозот на конзервиран зеленчук е во пораст од околу 10 проценти во 2014 во споредба со 2012 година.

 


Супер изум, чаши од кои никогаш не се истура виното


Мелбурн, 3 декември, 2014 - 21:05 (META) 

Ако некогаш сте се потуриле со црвено вино, сигурно знаете колку тешко се вади таа дамка и затоа ќе го цените изумов.

Дизајнерите Кристофер Јаман и Метју Џонсон од „Супердупер студио“ измислиле чаши за вино од кои не може да ви се истури пијалакот. Тие ја замениле традиционалната форма на чашите за вино со нешто малку поинакво, но доста функционално.

Овој изум се вика „сатурн-чаша“ и од неа не може да ви се истури виното.


Семинар за извоз на македонска храна и вино во Шведска


Скопје, 6 ноември, 2014 - 12:35 (META) 

Семинар на кој 24 македонски компании се запознаваат со можностите за извоз на свежа храна,овошје и на зеленчук на шведскиот пазар се одржуав денеска во Скопје, во организација на шведска владина агенција „Опен трејд гејт Свидн“.

Еден од најголемите снабдувачи со вино во Шведска, кој е одговорен за цела Скандинавија, е заинтересиран за македонските вина, особено за „вранец“.

Директорот на Агенцијата за странски инвестиции и промоција на извозот, Климент Шеќеровски, денеска изјави дека пред два дена македонските вина веќе влегле на листата на овој снабдувач.

– Веќе сме влезени на листата на продажба, посебно за виното „вранец“ и очекуваме нарачки што ќе бидат наменети не само за купувачите од Шведска, туку и од цела Скандинавија. Ова го сметаме за позитивен сигнал и веруваме дека и другите производители ќе го постигнат овој ефект – истакна Шеќеровски пред денешниот семинар, на кој ќе бидат презентирани регулативите за извоз кон Шведска и потребите на скандинавскиот пазар.