!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

САД: Објавена снимка од убиството во Шарлот, протестите продолжуваат


Шарлот, 24 септември, 2016 - 12:39 (META) 

Во американскиот град Шарлот, во сојузната држава Северна Каролина, четврта ноќ по ред се одржаа протести, кои избија откако полицијата уби Афроамериканец.

Семејството на убиениот 43-годишен Кит Ламонт Скот утрината објави снимка од настаните што му претходеле на убиството. Стотина насобрани демонстранти бараа од полицијата да ги објави сите снимки од настанот.

Видеозаписот кој го објави телевизиската мрежа „Ен-би-си“, го снимила сопругата на убиениот, Раки Скот. Таа се приближила до местото на кое неколку полицајци во панцир држеле вперено оружје во нејзиниот сопруг, викајќи им да не пукаат затоа што не е вооружен.

Полицијата наведува дека на Скот повеќепати му било речено да го положи оружјето пред да биде убиен, но очевидци тврдат дека тој во раката држел книга.

Полицаецот што го уби Скот, исто така, е Афроамериканец.

Шарлот е еден градовите во САД во кои веќе две години се одржуваат протести поради полициските убиства на Афроамериканци.


Бијонсе триумфираше на „Ем-ти-ви видео-музички награди“


Њујорк, 29 август, 2016 - 15:46 (META) 

Поп-пејачката Бијонсе доби најголем број награди на годинешните „Ем-ти-ви видео-музички награди“, за кои церемонијата за доделување се одржаа вчеравечер во „Медисон сквер граден“ во Њујорк.

Од 11 номинации, Бијонсе си замина со осум награди, меѓу кои и тие за најдобар видеоспот на женски изведувач, кореографија, монтажа, како и главната награда за видеоспот на годината за песната „Formation“ од нејзиниот последен албум.

Таа имаше настап во кој изведе пет композиции од албумот „Lemonade“, а изведбата ја посвети на жртвите на поплавите во Луизијана.

Калвин Харис ги доби наградите за најдобар видеозапис на машки изведувач за „This Is What You Came For“, за кој соработуваше со Ријана, и за најдобар електронски видеоспот за „How Deep Is Your Love“.

Женската група „Фифт хармони“ победи во категоријата за најдобра соработка за „Work From Home“ со раперот Ту Дола Сајн.

Дрејк ѝ ја додели наградата за животно дело на Ријана, а тој доби награда за најдобар хип-хоп видеоспот за „Hotline Bling“.


Француски институт го објави конкурсот „Моето минивидео 2016“


Скопје, 11 април, 2016 - 14:36 (META) 

Францускиот институт во Скопје, во соработка со Фондацијата за интернет и општество „Метаморфозис“ и регионот Нормандија, го организира второто издание на конкурсот „Моето минивидео“.

Конкурсот е отворен за млади од 18 до 28 години, кои се интересираат за мултимедијалната сфера и потребно е да имаат паметен телефон со камера.

Кандидатите треба да имаат желба слободно да го изразат своето мислење на конкретна актуелна тема, а оваа година тема ќе биде слободата на изразување.

Најуспешните минивидеозаписи од три минути ќе бидат прикажани на новото издание на Фестивалот на француски филм, кој ќе се одржи од 15 до 18 јуни 2016 година.

Победникот на конкурсот ќе биде гостин на фестивалот „Оф корт“ (Off-Court) во Трувил, Нормандија, а воедно ќе добие и подготвителни часови по француски јазик од Францускиот институт во Скопје.

За слектираните 15 кандидати наменети ќе бидат две подготвителни работилници, кои ќе се одржат на 12 и на 13 мај 2016 година, за да им се дадат упатства за пишување сценарио, за технички совети и за практична реализација на видеозаписот.

Формуларот за учество на конкурсот и на подготвителните работилници треба да се испрати на culture@ifs.mk најдоцна до 6 мај 2016 година.


Полицијата објави видео-снимка од третиот напаѓач во Брисел


Брисел, 28 март, 2016 - 15:35 (META) 

Белгиската полиција објави снимка од безбедносните камери во обид да го идентификува третиот напаѓач на аеродромот во Брисел, чија бомба не експлодирала и кој побегна од местото на нападот.

Човекот, според снимката носел јакна со светла боја и шапка.

Во меѓувреме, белгискиот Кризен центра објави дека бројот на жртвите на напаѓачите на аеродромот и метро-станицата е зголемен на 35, откако четири лица им подлегнале на повредите во болница. Во бројката на жртвите не ги вклучува и тројцата напаѓачи.

Нападот го изврши џихадистичката организација Исламска држава.

Истражителите не сакале да ги коментираат извештаите на белгиските медиуми дека третиот напаѓач е Фајскал Чефоу, слободен новинар кој е уапсен минатиот четврток пред канцеларијата на обвинителството.

Во саботата човек под име Фајкал Ц. е обвинет за „учество во активности на терористичката група, за терористички убиства и обид за терористички убиства“, соопшти канцеларијата на федералното обвинителство.

Во меѓувреме, денеска обвинителството покрена обвиненија против тројца мажи за учество во терористичка група. Тројцата, кои се идентификуван на Јасин А., Мохамед Б. И Абоубакар О., уапсени во текот на рација на 13 адреса на недела. Четвртиот маж е пуштен на слобода и не е обвинет.


ИД ќе ги нападне Франција и Белата куќа


Багдад, 20 ноември, 2015 - 10:06 (META) 

Екстремистичката група Исламска држава објави нова видеопорака во која се заканува со нови напади во Франција, како и со напад на Белата куќа во Вашингтон.

Во шестминутната снимка, која ја објавија милитантите во Ирак, ИД се фали со неодамнешните напади во Париз во кои се убиени 129 лица и се заканува со напад на Белата куќа.

– Ќе ја кренеме во воздух, како што ги кренавме во воздух идолите во нашата земја – рече еден од маскираните милитанти на снимката.

Милитантите, исто така, се закануваат со нови напади на „француските споменици“.

Снимката е објавена еден ден откако ИД објави снимка со сцени од Њујорк, со кои сугерира дека ќе го нападнат овој американски град.

Во новата видеоснимка се наведува дека Белата куќа ќе биде мета на самоубиствени напади и на подментнати бомби, а се најавуваат и напади на Франција.


Боко харам објави видеоснимки од сурови казнувања


Абуџа, 3 ноември, 2015 - 13:28 (META) 

Екстремистичката организација Боко харам објави видеозапис на кој прикажува две отсечени десни раце на мажи, кои на тој начин се казнети поради крадење пари.

На видеоснимката објавена на социјалните мрежи се гледа како локалното население е насобрано околу вооружените борци, од кои еден објаснува дека тие се соочуваат со „пропишаната божја казна“.

Првата ампутација на раката не е прикажана на снимката.

Боко харам се обидува да наметне строг исламски закон во Нигерија, како и во делови од Чад, Нигер и од Камерун, каде припадниците на организацијата убија стотина лица.


Агрегатор на видеосодржини ќе им помага на наставниците и на учениците


Скопје, 10 октомври, 2015 - 13:57 (META) 

Министерството за образование и наука денеска го промовираше агрегаторот на видеосодржини www.eduvideos.mon.gov.mk, преку кој се презентираат наставни содржини.

На агрегаторот, како што истакна заменик-министерот за образование и наука, Спиро Ристовски, наставниците и учениците од основните и од средните училишта, како и родителите, ќе може да споделуваат едукативни видеосодржини поврзани со темите од наставните програми.

Закачените видеозаписи, пред да бидат одобрени за гледање, ќе бидат проверни од тим во Министерството, кој ќе ја прегледува содржината и во согласност со стандардите кои важат во образованието, ќе одлучува дали ќе биде објавена или не.

Интернет-страницата во моментот има 954 видеосодржини.


Исламска држава го нарече Ердоган предавник


Истанбул, 18 август, 2015 - 12:27 (META) 

Исламската држава го нарече турскиот претседател Реџеп Таип Ердоган предавник затоа што дозволил Американците да користат воздухопловни бази за напад против таа екстеремистичка организација.

Во видео порака објавена на „Твитер“, Исламската држава ги повика муслиманите во Турција да ја поддржат и да се борат против крстоносци, тирани и атеисти.

На снимката се гледаат борци на Исламската држава во друштво на уште двајца кои говорат на турски јазик и го обвинуваат Ердоган што дозволил САД да го бомбардира муслиманскиот народ.

Минатата недела во турската воздухопловна база донесени шест борбени авиони Ф-16 кои учестуваат на мисиите против ИД во Сирија.


Промоција на новиот воз во Кина: Македонија е земја благословена од сонцето


Џуџо, 8 јули, 2015 - 13:42 (META) 

„Македонија, земја благословена од сонцето. Од оваа земја Александар Македонски почна дотогаш невидена кампања. Изгради империја која се протегаше во Европа, Азија и во Африка. Сонцето на слободата секојдневно е сведок на промените во оваа земја“, објави порталот „Фокс“.

Вака почнува промотивниот видеозапис кој вчера беше промовиран заедно со електромоторна патничка гарнитура во фабриката на компанијата ЦРРЦ во градот Џуџо, пред македонска делегација предводена од министерот за транспорт и врски, Владо Мисајловски.

Договорот со Македонија е потпишан на 24 јуни 2014 година. Ваков тип на воз првпат ќе има во Европа, се вели во видеозаписот.

Во видеопромоцијата се вели дека безбедносните стандарди целосно се почитувани, а возот е просторен, има изолација на звуци и удобност за безбедно патување. Возот е еколошки и не загадува.

– За пазарот во Македонија развивме поинаква стратегија. Влеговме на пазарот и мислам дека ќе имаме и други можности за да учествуваме во напорите на земјата да го надгради железничкиот транспорт – вели Занг Минју, потпретседател на ЦРРЦ.

Возот е со три вагони со капацитет од 200 патници и можност за брзина до 160 километри на час. Новите патнички возови ќе имаат вкупен капацитет од 1.200 патници, што ќе покрива 60 проценти од линиите што ги одржува „МЖ – Транспорт“. Треба да бидат климатизирани, опремени со вакуумски тоалети, да ги задоволуваат најстрогите мерки за енергетска ефикасност, да ги исполнуваат безбедносните стандарди, како и условите за превоз на лица со ограничено движење.


„Јутјуб“ сега поддржува видеосодржини со 8к


Вашингтон, 10 јуни, 2015 - 15:30 (META) 

Видеостандардот 720 пиксели постепено се заменува со 1.080 пиксели, а новиот 4K (4.000 пиксели) станува сè пораспространет. Сепак, изгледа дека 8K е следниот чекор за „Јутјуб“. Компанијата официјално нема соопштено, но веќе почна да става видеосодржини со поддршка за 8K (8.000 пиксели).

Во моментов само неколку видеозаписи се достапни во резолуција 8K .

Проблемот, кога станува збор за видеосодржините со резолуција 8K, е во достапноста на монитори што ја поддржуваат. Постојат само телевизори со резолуција 8K, но тие тешко се наоѓаат и чинат премногу. Во секој случај, опцијата за прикажување 8K-видеосодржини на „Јутјуб“ е тука, а оние кои се во можност, можат и да пробаат.

Сепак, важно е да имате брза интернет-конекција.