!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

„Лавиринт“ нова книга од Ристо Лазаров


Скопје, 13 март, 2017 - 10:16 (META) 

Издателството „Везилка 2011“ ја објави новата, 32. поетска книга „Лавиринт“ од Ристо Лазаров. Како и последните десетина книги на овој автор, и оваа содржи 50 песни, седум циклуси со седум песни и една воведна песна.

Авторот на поговорот кон книгата, професорот Ферид Мухиќ, оваа книга ја нарекува поетска ревизија на архетипските митови. Класичните антички митови, оценува Мухиќ, од Тројанската војна и сите најважни херои и ликови што одиграле клучна улога во овој настан опеан од Хомер, преку Зевс и Хермес.

Инаку, „Лавиринт“ пред извесно време беше одбиена на конкурсот на Министерството за култура за финансирање на проекти од национален интерес за 2017 година.


Нова книга на Ана Чупеска за мултикултурната акомодација


Скопје, 20 февруари, 2017 - 9:56 (META) 

Едицијата „Патеки“ на издаваштвото „Везилка 2011“ се збогати со уште едно издание – од печат излезе дебитантската книга „Мултикултурна акомодација“ од д-р Ана Чупеска-Станишковска од Правниот факултет во Скопје.

Во фокусот на интересирањето на Чупеска-Станишковска, чиј влог во невладиниот активизам кај нас е респектибилен, се наоѓаат либерализмот и либералната демократија, столбовите и квазистолбовите на акомодирањето, при што се фрла поглед и врз перспективите на мултикултурната акодомодација, со посебна нагласка на Македонија.

Како одделен сегмент на оваа значајна книга е поместен заедничкиот оглед на проф. Љубомир Фрчкоски и на Ана Чупеска-Станишковска  за граѓанската непослушност. „Храброста и вербата се посебни карактеристики на граѓанската непослушност“, наведуваат Фрчкоски и Чупеска-Станишковска, поставувајќи повеќе актуелни прашања, почнувајќи од тоа што точно е најлегитимно да се направи, до тоа дали актот на граѓанската непослушност ќе го постигне саканиот ефект. Авторите ја нагласуваат неопходноста од верба, бидејќи постои недостиг, како што оценуваат тие, на мерливи знаења за правдата.


Промоција на романот „Рапави стихови“ од Милован Стефановски


Охрид, 15 ноември, 2016 - 9:30 (META) 

Романот „Рапави стихови“ од македонскиот писател и поет Милован Стефановски ќе биде промовиран денеска во кино „Култура“, во 12 часот. Најновото прозно дело на Стефаноски го објави „Везилка 2011“, во својата едиција „Проза“.

– Романот „Рапави стихови“ поставува едно суштествено прашање како да се преобрази куќата во дом, во топло семејно огниште. Кога животот се поминува во потрага по таков дом кој ќе биде огледало на архетипот на домот, природно е да се очекува да дојде до опсесивна обземеност од идејата за враќањето во првата куќа, природно е да дојде до фасцинација од идејата за првата куќа (не од самата куќа!) – пишува во  поговорот на романот Катица Ќулавкова.

На промоцијата, освен Ќулавкова, ќе говори и Ристо Лазаров. Извадоци од романот ќе интерпретира Олгица Марковска, додека музичката илустрација е на Ангел Витанов, на гитара.

 

 


Објавена книгата „Булгаков – писма до Сталин“ на Александар Новаковиќ


Скопје, 26 октомври, 2015 - 10:51 (META) 

Во издание на „Везилка 2011“, излезе од печат книгата „Булгаков – писма до Сталин“ од познатиот белградски новинар и писател Александар Новаковиќ.

Книгата го опфаќа вкупниот „московски дел“ од животот на големиот руски класик Михаил Булгаков. Во неа, авторот ја сместува книжевната, политичката и етичката полемика на Сталин и на Булгаков на сцената на вечниот судир на власта и на творецот, идеологијата и книжевноста, на „прозата“ и на „поезијата“, по кој нема победници и поразени, но останува утехата. Барем кога станува збор за уметникот и за уметноста.

Александар Новачиќ, меѓу другото, е автор и на биографските романи за Чехов и за Венедикт Јерофеев, исто така објавени на македонски јазик во издание на ,,Везилка 2011“.


„Покрај езерото“, нов роман на Благој Иванов


Скопје, 30 март, 2015 - 10:48 (META) 

Во издание на „Везилка 2011“, излезе од печат романот „Покрај езерото“, најново дело на истакнатиот македонски писател Благој Иванов. Станува збор за роман сиот нурнат во нашата стварност, во кој детално се скенирани сите бранувања во животот на главниот јунак, но и оние, со посилен налет – бранувања во општеството и во времето што го живееме. Всушност, станува збор за болно соочување со тревожноста на стварноста, во која се испревртени сите вредности, во која се растура, распаѓа животот.

„Покрај езерото“ на Благоја Иванов, како што забележува во поговорот Ристо Лазаров, ги допира сите прашања на нашата живејачка, ги открива најсуштествените пластови на една временска отсечка од речиси 70 години.

Почнува меко, речиси нежно, за да се распламти во сета жестина. Би се рекло: какво време – таков роман. Роман кој сите прашања, сосе мудрите песни на Конески, ги остава во туѓина. Роман кој нè предупредува дека смртта не била само точка, дека зад неа остануваат и големи прашалници. „Покрај езерото“ – тоа е романот што ѝ недостигаше на нашата литература, овде и денес. Роман со иднина.