Карневалот во Вевчани со маски за загадувањето и за трошоците на пратениците


Вевчани, 13 јануари, 2018 - 18:10 (META) 

Во Вевчани со карневалската поворка која тргна во 14 часот денеска почна традиционалниот карневал кој датира 1.400 години наназад. Одбележувањето ќе заврши утре со спалувањето на маските и честитки за Стара нова година.

Општествено политичките случувања кај нас и во светот и годинава беа инспирација за василичарите да имаат креативни и критички маски во дефилето. Колоритните маски продефилираа низ Горна и Долна маала, а покрај традиционалните Глупав Август, ѓаволите, музикантите, зетот и невестата, забележани беа „Скопје 2025“ за загаденоста во главниот град, но имаше и карневалска група што ги исмејуваше народните избраници и нивните паушали за патни трошоци, за двојазичноста, случувањата во Собранието, правата на ЛГБТ заедницата…

Вевчанскиот карневал привлече голем број туристи од земјава, но имаше посетители од Србија, Бугарија, Турција. Покрај бројните туристи кои допатуваа во Вевчани беа присутни политичари и дипломати од странските амбасади.

На свеченото прогласување на карневалот за беше и министерот за култура Роберт Алаѓозовски, кој рече дека е првпат на вевчанскиот карневал, и приватно и професионално.

– Вевчани и карневалот се носители на отпорот и на традицијата, на демократската борба и на критичноста, на слободоумноста и на креативноста. Тие резонираат и со новите владини политики. . Креативни се отворени и го шират принципот за кој се залагаме демократизација на културата и општеството, освојување на нови хоризонти на критичната култура – рече Алаѓозовски.


Вечерва е Стара нова година, во Вевчани почнува карневалот


Вевчани, 13 јануари, 2018 - 10:20 (META) 

Според Јулијанскиот календар, по кој се водат МПЦ-ОА, СПЦ и РПЦ, вечерва се дочекува Новата година, кај народот позната како Стара нова година. Првиот ден на новата година е познат како Василица, кога многумина празнуваат домашна слава, а оние кои го носат името на Свети Василиј го слават и својот именден. Некои семејства, слично како и за време на бадниковата вечера, кршат погача со паричка. Се верува дека на оној што ќе му падне, му претстои среќна и исполнета година.

По повод православната нова година и празникот Обрезание Господово и Свети Василиј Велики, утре во храмовите на Македонската православна црква ќе биде служена света Василиева литургија.

Преминот од старата во новата година според Јулијанскиот календар е и времето кога во Вевчани се одржува познатиот карневал, кој има традиција стара 14 векови. Карневалот почнува денеска во 13 часот, кога ќе се одржи дефилето на маските, а вечерва, Чалгија саунд систем, Џамбо Агушев оркестар и Блага Петреска ќе ги забавуваат василичарите и гостите на Вевчани.

Кулминацијата на настанот е утре сретсело со василичарско оро на околу илјада маски. Карневалот ќе заврши попладнето со традиционалното палење на маските.

 


Груевски: Мигранти ќе се сместуваат долж јужната граница и ќе чекаат државјанства


Струга, 28 септември, 2017 - 19:14 (META) 

Додека бевме на власт, од нас беше побарано да примиме 150.000 мигранти и да им дадеме државјанства. Ние не се согласивме на тоа, но некој друг се согласи и затоа ја направија Стратегијата за бегалци, изјави лидерот на ВМРО-ДПМНЕ, Никола Груевски на митингот во Вевчани.

Тој рече дека затоа во 20 општини граѓаните барале да се одржи референдум за мигрантите, а власта тоа го забранила.

– Владата со декрет го забрани референдумот зашто народот ќе ја кажеше вистината дека нивните општини немаат економска моќ и капацитет да вдомат 150.000 лица. По локалните избори се планира да се направат бегалски кампови долж јужната граница за да се сместат мигрантите додека не им се дадат државјанства – рече Груевски.

Тој додаде дека власта на секој можен начин оди против волјата на граѓаните, затоа што како што кажа, не е донесена од народот.

– Освен навреди и омаловажување, тие не нудат ништо или нудат нешто апстрактно. На пример, нудат живот како да сме сите мртви, нудат воздух како да го немаме итн. Не случајно, во овој период толку криминалци се пуштија од затвор. Опонентите се слаби и исплашени. Тие знаат дека по регуларен пат изборите ќе ги изгубат, па затоа се надеваат дека ќе победат со криминалци. Но, нема да дозволиме да ни ја украдат победата – додаде Груевски.

Груевски кажа дека за овие четири месеци додека власта на секој чекор работела незаконски, се однесувала насилно и работела против волјата на народот, во ВМРО-ДПМНЕ работеле на зацврстување и реорганизација на партијата.


Големиот пожар над Вевчани e локализиран


Струга, 3 април, 2017 - 9:53 (META) 

Големиот пожар кој вчера напладне изби над Вевчани, на планината Јабланица е локализиран, пред сè, со масовното учество, организираноста и пожртвуваноста на самото население.

Огнената стихија беше токму над познатите Вевчанските извори, кои за оваа општина значат живот и тамошните жители повеќепати се бореле за нив.

Опожарени се околу 20 хектари борова и букова шума. Вевчанци се сомневаат дека некој намерно го подметнал пожарот и избегал.


Денеска на Вевчанскиот карневал, главната атракција – дефиле на маските


Вевчани, 13 јануари, 2017 - 9:58 (META) 

На Вевчанскиот карневал денеска главната атракција е дефилето на маските, или суратите, како што се нарекуваат на локалниот дијалект.

Од повеќе маала ќе тргнат поворките со повеќе од илјада василичари, кои ќе се спојат на плоштадот пред зградата на Општина Вевчани.

Никој однапред не открива со какви маски, односно пораки, ќе излезат вевчанци годинава. Тоа се смета за најстрога тајна во милениумската традиција, иако со сигурност се знае дека политиката, повторно, ќе биде во центарот на вниманието.

Во културниот дел, од 21 часот, ќе пеат Анета Наковска и вевчанецот Ефто Пупиновски, со чиј настап ќе биде пречекана Православна нова година.

Синоќа, во Вевчани настапија женскиот бенд од Нови Сад „Фрајле“, дуото „ДНК“ и групата „Нокаут“.

Вевчанскиот карневал завршува утре, со традиционалното палење на маските.


Денеска почнува „Вевчанскиот карневал“


Струга, 10 јануари, 2017 - 11:07 (META) 

Годинешниот „Вевчански карневал“ почнува денеска со културни настани предвидени за оваа манифестација.

Програмата денеска е во знакот на одбележувањето на верскиот празник Свети Василиј Велики, заштитник на вевчанските василичари и на Вевчани, додека формалниот почеток на карневалот е в четврток.

Денеска, со почеток во 17 часот, во Клубот на пензионери во Вевчани ќе се одржи трибина на тема „Перспективите на руралниот туризам во Република Македонија со осврт на општина Вевчани“. Утре ќе биде извршена промоција на романот „Пред шарени врати“ од Косте Шутиноски.

Изложбата на слики од академскиот сликар Ниче Василев ќе биде отворена на 12 јануари (четврток) во 12 часот, во Клубот на пензионери.

Забавниот дел ќе почне на 12 јануари во 21 часот, со настап на домашните групи „ДНК“ и „Нокаут“, а пред полноќ ќе се претстави групата „Фрајле“ од Србија.

На 13 јануари, во 21 часот, присутните ќе ги забавува фолк-пејачката Анета Наковска, додека православната Нова година ќе биде пречекана со настапот на вевчанецот Ефто Пупиноски.

Традиционалното дефиле на маските ќе се одржи на 13 јануари, по 14 часот.

Карневалот завршува на 14 јануари, со традиционалното палење на маските.


Го украле сефот од поштата во Вевчани и го оставиле на улица


Вевчани, 6 јануари, 2017 - 15:06 (META) 

Ноќта помеѓу 5 и 6 јануари се случил обид за кражба во локалната пошта во Вевчани.

Крадците ја скршиле решетката и ја обиле влезната врата, по што го одзеле сефот, во кој, неофицијално, имало околу 70.000 денари.

Инцидентот се случил околу 2 часот по полноќ, но, за среќа, крадците не успеале во намерата затоа што ги слушнал соседот, по што во паника го оставиле сефот на улица и избегале со возилото кое било паркирано во непосредна близина.

Полицијата направила увид и се прават напори да се откријат сторителите.


„Фрајле“ и 1.500 василичари ќе ги забавуваат посетителите на Вевчанскиот карневал


Скопје, 4 јануари, 2017 - 14:40 (META) 

Околу 1.500 василичари ќе учествуваат на годинешниот Вевчански карневал, на кој главна атракција ќе биде женскиот бенд од Нови Сад „Фрајле“, соопшти денеска на прес-конференција во Скопје градоначалникот на Општина Вевчани, Цветомир Угриновски.

Според програмата на карневалот, од домашната сцена ќе настапат дуото „ДНК“ и групата „Нокаут“, додека од фолк-сцената, посетителите и туристите ќе ги забавуваат Анета Наковска и Ефто Пупиновски.

Градоначалникот Угриновски потсети дека документите сведочат дека карневалот е стар најмалку 1.460 години, но постојат археолошки наоди кои упатуваат на податоци дека карневалот постои барем 2.200 години.

– Денес карневалот е интересно и необично преплетување на пагански со христијански обичаи. Традиционално, учесниците се обидуваат да избегнат воведување на современи карневалски елементи, но, сепак, во последните години во организација на Општината и на Министерството за култура, се воведува ред во овој инаку хаотичен вонвременски настан – истакна Угриновски.

На презентацијата на програмата присуствуваше заменик-министерот за култура, Драган Недељковиќ.

Годинава, музичката и промоциска продукција „Пасворд“ е организатор на музичкиот и на забавниот дел на карневалот. Музичкиот дел почнува на 12 јануари, од 21 часот.

На 13 јануари во 13 часот е традиционалното дефиле на маските, кое ќе трае цело попладне, а потоа ќе следи вториот музички ден.

Вевчанскиот карневал завршува на 14 јануари со традиционалното палење на маските.


Охрид викендов полн со гости како среде туристичка сезона


Охрид, 26 јуни, 2016 - 10:06 (META) 

Со дневна температура од околу 30 Целзиусови степени и со температура на езерската вода од 22 степени, Охрид викендов пулсира како среде туристичка сезона. Убавото и топло време ги наполни плажите, а навечер полни се шеталиштата и летните бавчи во градот.

Центарот за јавно здравје информира дека температурата на водата во Охридското Езеро е натпросечна за овој период од годината.

Најголемиот број од гостите се од земјава, но на паркиралиштата можат да се забележат голем број возила и автобуси со регистерски таблички од земјите од соседството. Има и голем број гости од западноевропските земји.

Во Охрид почнаа и културните манифестации, што дополнително ги привлекуваат туристите. До 28 јуни се одржува меѓународниот фестивал „Словенечки денови во Охрид“ или „Словенија во Охрид“, на кој има околу 600 учесници од Словенија, претставници на аматериски културни друштва.

Во блиското Вевчани, отворена е 7. ликовна колонија „Вевчански видувања“, на која учествуваат 25 еминентни ликовни уметници од седум странски држави и од земјава.

Отворањето на колонијата беше посветено на големиот ликовен уметник, македонскиот академски сликар Григор Чемерски, кој почина неодамна.


Осудениот за двојното убиство во Вевчани сведочеше пред Врховниот суд


Скопје, 16 март, 2016 - 16:05 (META) 

Педесет и осумгодишниот Здравко Србаковски, осуден на доживотна казна затвор за двојното убиство во Вевчани, кое се случи кон средината на август 2014 година, денеска сведочеше пред Врховниот суд и побара намалување на казната.

Србаковски, вечерта на 13 август 2014 година, со пиштол ги застрела и ги уби 23-годишниот Мате Ѓурчески и 43-годишниот Владо Попески, сопственик на кафеаната „Пјаца“ во Вевечани, во која се случи убиството.

Тој денеска пред судот, како што пренесува „Телма“, не го негирал убиството. Тврдел дека немал намера да убие, а вечерта кога се случил инцидентот, бил испровоциран и навредуван.

Србаковски побарал од Врховниот суд наместо доживотна затворска казна, да добие 15 или 20 години затвор, со оглед на неговата возраст.

Денешното сослушување во Врховниот суд беше отворено за јавноста и беше дозволено целосно следење и снимање на седницата од новинарите, што не беше случај претходно.

Судењето го водеше претседателката на Врховниот суд, Лидија Неделкова, а во советот беа и нејзиниот претходник, Јово Вангеловски, и уште тројца судии. Седницата ја следеа и студенти од Правниот факултет.

Врховниот суд дополнително треба да донесе и да ја соопшти одлуката по жалбата на осуденикот.